Samuelpa wañukusqanmanta
25
Samuel wañukuptinmi Israel runakuna llapallanku huñunakuspa waqarqaku paymanta.
Paypa cuerpontam pampaykurqaku Rama llaqtapi kaq wasinpi.
Hinaptinmi Davidqa pasakurqa Paran sutiyoq chunniqman.
Abigail sutiyoq warmipa ruegakusqanmanta
2 Maon sutiyoq sitiopim yacharqa huk llumpay apu runa.
Chay runapam kapurqa kimsa waranqa ovejankuna hinaspa waranqa cabrankuna.
Paymi costumbrenman hina ovejankunata rutuchkarqa Carmel llaqta lawpi.
3 Chay runapa sutinmi karqa Nabal.
Payqa karqa Calebpa mirayninmi.
Nabalqa karqa pasaypaq rumi sonqo mana allinlla kawsaq runam.
Warmin Abigailmi ichaqa karqa buenamoza hinaspapas yachaywan imapas allin rurakuq.
4 Davidmi chunniqpi kachkaspan uyarirurqa Nabalqa ovejankuna rutusqanta.
5 Chaymi chunka runankunata kacharqa kaynata nispa:
—Nabalpatayá riruychik Carmel llaqta lawman hinaspayá ñoqapa parteymanta saludaykuychik.
6 Paytam ninkichik:
“Wawqelláy,
chaskiykuyá kay rimariykamusqayta:
ñoqam qampaq munachkani allinlla tarikunaykita,
chayna allinllataqyá tarikuchun familiaykikunapas hinaspa wasikipi llapallan kaqkunapas.
7 Chayraqmi yacharuni ovejaykikuna rutusqaykita.
Arí,
qamqariki yachankim michiq runaykikunaqa ñoqaykuwan Carmel lawpi tarikusqankuta.
Ñoqaykuwan paykuna kaptinqa manam imanarqanikuchu nitaqmi Carmel lawpi kaptinkuqa imankupas chinkarqachu.
8 Kay nisqayqa cheqap kasqantam yachaykuwaq kikin sirvientekikunata tapuykuspa.
Chaynaqa ama hina kaspayá kachamusqay mozokunata allinta chaskiykapullaway.
Paykunaqa hamuchkanku mikuyllaykipas kasqan allin tiempopim.
Hinaptinqa paykunamanyá qoykapamullaway imallaykipas kapusuqnikita.
Arí,
ñoqaqariki qampaqqa kani churiki hinam” nispa.
9 Chaymi Davidpa runankuna pasaspanku chay encargota willarqaku Nabalman hinaspam upallaykuspa suyarqaku paypa rimarinanta.
10 Ichaqa Nabalmi kaynata nirqa:
—¿Pitaq chay Davidqa?
¿Pitaq chay Isaipa churinqa?
¡Kunan tiempokunaqa achkaq sirvientekunam patronninmanta lluptikuchkanku!
11 Mana reqsisqa yanqa purikuq runamanqa manam qoymanchu ima mikuyniytapas nitaq ima tomanaytapas nitaq ima aychatapas.
Kaykunataqa alistarqani ovejaykuna rutuqkunapaqmi —nispa.
12 Chaymi Davidpa runankuna kutispanku Davidman willarqaku Nabalpa tukuy chay rimasqankunata.
13 Chaymi David runankunata kamachirqa:
—¡Espadaykichikta llapallaykichik watakuychik!
—nispa.
Davidpa runankuna espadankuta weqawninman watakuptinmi Davidpas hina chaynallata rurarqa.
Davidwanmi pasarqa tawa pachak runakuna.
Iskay pachak runakunañataqmi qeparurqa imankutapas waqaychanankupaq.
14 Ichaqa Nabalpa huknin sirvientenmi pasarqa patronan Abigailman,
chayaruspanmi kaynata willarqa:
—Chunniqmantaraqmi David kachamusqa runankunata patronniy Nabalta saludaykunankupaq ichaqa paymi imaymanata insultarqa.
15 Arí,
chay runakunaqa ñoqaykuwanqa allinllam karqaku,
manam imanawaqkupaschu.
Paykunawan tukuy tiempo purunkunapi puriptiykupas manam imanawarqakuchu hinaspapas manataqmi imallaykupas chinkarqachu.
16 Ovejaykuta michiptiykupas aswanraqmi paykunaqa huk muralla hina tuta-punchaw imamantapas harkawaqku.
17 Ichaqa qosaykimá rumi sonqo kasqanrayku mana pipapas rimapayaykunan.
Chaynaqa mamáy,
qamyá tantearispa imallatapas ruray,
mana chayqa seguropunim familiantinman patronniymanqa ima mana allinpas chayaramunqa —nispa.
18 Chaymi Abigail alistarqa apurawllataña iskay pachak tantata,
iskay odre vinota,
pichqa oveja nakasqata,
yaqa tawa chunka kilo trigo hamkata,
uvas pasasmanta llapisqa pachak tortillakunata,
alistarqataqmi higosmanta iskay pachak tortillakunatapas.
Chaykunata asnonkunapi cargakuykuspanmi
19 sirvientenkunata nirqa:
—Ñawpachkaychikyá qamkuna,
ñoqaqa pasamusaqñam —nispa.
Chay imam rurasqantaqa manam willarqachu qosan Nabalmanqa.
20 Abigailmi asnopi sillakuykuspan pakan-pakanlla orqomanta uraykurqa.
Hinaptinmi Davidqa runankunapiwan paylawman hamuchkasqa chaymi Abigailqa payman taripaykurqa.
21 Davidmi hamuchkasqa kaynata piensastin:
—Yanqapaqmi ñoqaqa chunniqpi nanachikurqani chay runapa tukuy imanta.
Manam paypaqa imallanpas chinkarqachu ichaqa favorninpi rurachkaptiypas payqa mana allinwanmi kutirachiwan —nispa.
22 Davidmi kaynata jurarqa:
—¡Kunanmanta paqarinkamam Nabalpa llapachallan qari kaq ayllunkunata wañurachisaq!
¡Mana chayna kaptinqa Diosyá llumpaysuta castigawachun!
—nispa.
23 Abigailmi Davidta rikuruspan asnonmanta apurawman uraykurqa hinaspam Davidpa ñawpaqninpi qonqoranpa pampaman kumuykurqa.
24 Chaymantam Davidpa chakinman wischukuykuspan nirqa:
—Taytáy ¡kay culpaqa kachun ñoqapa hawaypiyá!
¡Ama hina kaspaykiyá uyariykullaway kay rimarisqayta!
25 ¡Amayá kasuychu taytáy,
chay torpe runa aNabalpa rimasqantaqa!
Arí,
paytaqa sutinpas trazanpas reqsinmi.
Payqa mana umayoq upa runam.
Kay sirvientaykiqa manam rikuykamurqanichu kachasqayki runaykikunataqa.
26 Tayta Diosrayku hinaspa vidaykurayku juraspam nini:
Tayta Diospunich mana munarqachu yawar chaqchuq hamunaykita hinaspa kikikipuni mana vengakunaykita.
¡Tayta Diosyá Nabalta hina castigachun llapallan enemigoykikunatapas chaynataq llapallan mana allin ruray munasuqnikikunatapas!
27 Chaynaqa taytáy,
ama hina kaspayá kay regalokuna apamusqayta rakiykariy qanwan puriq runaykikunaman.
28 Ruegakuykitaqmi kay sirvientaykipa faltankunata pampachaykuwanaykipaqpas.
Cheqaptapunim Tayta Diosqa reypaq churasuspayki allinta takyachisunki,
chaynatachá ruranqa llapallan familiaykikunatapas.
Qamqariki peleachkanki Tayta Diosraykum,
kawsanaykikamaqa amayá qampaqa ima mana allinpas kachunchu.
29 Pipas qatikachasuspayki wañurachiyta munasuptikiqa qampa vidaykiqa kanqa yupaychasqayki Tayta Diospa waqaychasqanmi.
Enemigoykikunataqa Tayta Diosmi wikaparunqa imaynam rumita warakachkaq hina.
30 Qampaq tukuy allinkuna qanmanta rimasqanta Tayta Dios cumpliptinmi hinaspa Israel runakunata kamachinaykipaq churasuptikim
31 mana imamanta pesakunaykipas kanqachu,
manataqmi sonqoykipas hukmanrayanqachu.
¡Allinpunim yanqamanta mana wañuchiynikiqa!
¡Allinpunitaqmi kikillayki mana vengakuynikipas!
Chaynaqa Tayta Diospuni tukuy imapi bendecisuptikimá ama qonqarullawankichu kay sirvientaykita —nispa.
32 Chaymi Davidñataq nirqa:
—¡Israelpa yupaychasqan Tayta Diosyá alabasqa kachun!
Paymi kachamusurqanki ñoqawan kunan tupaykunanchikpaq.
33 Qamtapas paytaqyá bendecisunki allin piensaq kasqaykimanta.
Kunanmi harkaykuwanki runakunapa yawarninta ama chaqchurunaypaq chaynataq kikiypuni ama vengakurunaypaq.
34 Ichaqa Israelpa yupaychasqan Tayta Diosraykum jurani.
Paymi kunan harkaruwan qamtaqa ama imananaypaq.
Sichum ñoqawan tupanaykipaq mana apuramuwaqchu karqa hinaptinqa paqarinqa Nabalpa llapallan runankunam manaña chullapas kawsanmanchu karqa —nispa.
35 Davidmi Abigailpa apamusqankunata chaskiykuspan nirqa:
—Kunanqa hawkallañayá kutikuy wasikiman,
qawasqaykiman hinam kunanqa uyariykuykiña chaynataqmi “arí” niykuykitaq imam mañakuwasqaykitapas —nispa.
36 Hinaptinmi Abigailqa kutikurqa qosan Nabalpa kasqanman.
Chaymi payqa rey hinaraq wasinpi convidota rurakuchkasqa,
Nabalqa llumpayta sinkaruspam llumpay kusisqallaña kachkasqa.
Chayraykum warmin Abigailqa mana imatapas nirqachu paqarinnintinkama.
37 Paqarinnintin punchawman Nabal mallaqyaruptinñam warmin Abigail willarqa chaykunata.
Chaymi Nabalqa hukmanyaruspan kaskitarurqa.
38 Chunka punchawmanta huktawan Tayta Dios castigaruptinmi Nabalqa chay punchaw wañukurqa.
39 Nabal wañurusqanta David yacharuspanmi nirqa:
—¡Yupaychaykim Tayta Dios!
¡Nabal insultawasqanmantam qamña ñoqapaq vengakurunki!
¡Libraykuwankim imapas mana allin ruranaymanta!
Nabalpa mana allin rurayninkunatam kikillanman kutirachinki —nispa.
Chaymantam Davidqa Abigailta rimapayamunankupaq kacharqa chaynapi paywan casarakunanpaq.
40 Davidpa serviqninkunam rirqaku Carmel lawpi yachaq Abigailman hinaspam paywan rimarqaku kaynata:
—Davidmi kachamuwarqaku qanwan casarakunanpaq —nispa.
41 Chaymi Abigailqa qonqoranpa pampaman kumuykuspan nirqa:
—Chaynata kamachiwaptinqa kayqayá kaypi kachkani sirvientenkunapa chakinta mayllanallaypaqpas.
Ñoqaqariki kani Davidpa sirvientallanmi —nispa.
42 Chaynata rimarispam Abigailqa apurawllamanña alistakurqa,
pichqa sirvientankunawanmi compañaykachikuspa asnopi sillada pasarqa.
Paymá chay runakunata qatispan Davidwan casarakurqa.