Saulta David mana wañuchiy munasqanmanta
24
Filistea runakunata qatirusqanmanta Saul kutiramuptinmi willarqaku:
—Davidqa En-gadi Chunniqpim kachkan —nispanku.
2 Chaymi Saulqa Israel llapallan runakunamanta akllaykurqa kimsa waranqa soldadokunata hinaspam pasarqaku Purun Cabrakunapa Purinan Qaqa sutiyoq sitiokunapi Davidtawan runankunata maskamunankupaq.
3 Richkaspankum chayarurqaku ovejakunapa kanchanman.
Chaypa hichpanpim kachkarqa huk machay,
chay machay ukupim pakarayachkarqa Davidwan runankuna.
Chay machaymanmi ispakunanpaq Saul yaykururqa.
4 Chaymi Davidta runankuna nirqa:
—Kunanmi cumplikurun “Enemigoykitam qosqayki” nispa Tayta Diospa prometesusqayki.
Chaynaqa Saulwanyá imam munasqaykita ruray —nispa.
Davidmi upallalla asuykuspan Saulpa capanpa puntanta kuchururqa.
5 Ichaqa chay rurasqanmanta conciencian acusaptinmi David pesakurqa.
6 Chaymi runankunata nirqa:
—Amayá chaynataqa Tayta Diospas munachunchu.
Payqariki rey kaspaqa kachkan kikin Tayta Dios reypaq nombrasqanraykum —nispa.
7 Chaynata nispam soldadonkunata David harkarurqa Saulman ama pawaykunankupaq.
Chaymi Saulqa machaymanta lloqsiruspan pasakurqa.
8 Ichaqa paypa qepallanta machaymanta David lloqsiramuspanmi qayarqa:
—¡Señorlláy,
reynilláy!
—nispa.
—Reynilláy,
amayá qamqa kasuychu:
“Davidqa contraykipim kachkan” nispa yanqa rimaqkunataqa.
10 Reynilláy,
qawasqaykiman hinam wak machaypi kunan punchaw Tayta Dios qamta makiyman churaykamurqa chaymi “Wañurachiy” nispa niwaptinkupas qamtaqa kuyapayaspay mana wañurachirqaykichu.
Arí,
ñoqam piensarqani:
“Reyniytaqa manam wañuchiymanchu,
payqariki Tayta Diospa nombrasqan reymi” nispa.
11 —Chaynaqa reynilláy,
qawaykuyá imam kay makiypi kasqanta.
Kayqariki capaykipa puntanmi.
Arí,
makiypiña kachkaptikipas manamá wañurachirqaykichu.
Chaynaqa reynilláy,
cuentatayá qokuyña ñoqaqa mana contraykipi kasqayta.
Ñoqallayqa manam hoqarikurqanichu hinaspapas manataqmi huchallikurqanichu qampa contraykipiqa.
Chaywanpas reynilláy,
qanmi maskawachkanki wañurachiwanaykipaq.
12 ¡Tayta Diosyá iskayninchikta juzgawasunchik!
¡Paypuniyá castigawachun qanmanta vengakuwaspan!
Ñoqallayqa manam makiytaqa hoqarisaqchu qampa contraykipiqa.
13 Runakunapa ñawpaq rimakuyninmi kaynata nin:
“Mana allin ruraykunaqa lloqsimun mana allin runakunamantam” nispa.
Chaymi ñoqallayqa makiytaqa mana haykapipas hoqarisaqchu qampa contraykipiqa.
14 Chaynaqa reynilláy ¿pipa qepantamá qamqa richkanki?
¿Pitamá qamqa qatichkanki?
Qampa ñawpaqnikipiqa kani mana valeq wañusqa allqo hinallam otaq mana valeq piki hinallam.
15 Chaynaqa reynilláy,
Tayta Diosyá tanteasqanman hina qamtawan ñoqata juzgawasunchik.
¡Tayta Diosyá kay asuntoyta qawaykuspan qanmanta defiendewachun!
—nispa.
16 David rimayta tukuruptinmi Saul nirqa:
—¡Kay rimapayawaqniyqariki kachkasqanki churillay Davidmi!
—nispa.
—Qamqa allin ruraqmi kanki ñoqamantaqa.
Qampaq mana allinta munachkaptiymi kutirachiwanki allinwan.
18 Kunanmi qawaykachiwanki qamqa imapas allinnillay maskasqaykita.
Arí,
Tayta Diospuni makikiman churawachkaptinmi mana wañurachiwarqankichu.
19 Cheqaptaqariki manam pipas kanchu enemigonta tarichkaspan mana imanaqqa.
Chaynaqa David ¡Tayta Diosyá imapas allinwan pagasunki kunan kutipi imam ñoqapaq ruraykusqaykimanta!
20 Kunanmi sumaqta cuentata qokuruni Israel runakunapa reynin kanaykita.
Cuentataqmi qokuruni qam rey kaptikiqa Israel nacionpa gobiernon allin takyananta.
21 Chaynaqa David ¡kunanyá Tayta Diosrayku juraykuway!
Amamá puchukarachinkichu mirayniykunatawan familiaykunataqa,
amataqmá sutiytapas chinkarachinkichu —nispa.
22 David juraykuptinmi Saul kutikurqa palacionman,
Davidñataqmi runankunawan pasakurqa mana yaykuy atina sitiokunaman.