Keila llaqtayoqkunata David librasqanmanta
23
Huk punchawmi salteanankupaq Filistea runakuna yaykururqaku Keila llaqtaman hinaspam suwakurqaku chayraq trillasqa erapi trigokunata.
Chaytam Davidman willaykurqaku.
2 Hinaptinmi David Tayta Diosta tapurqa kaynata:
—Taytáy ¿risaqchu icha manachu chay Filistea runakunawan peleaq?
—nispa.
Hinaptinmi Tayta Dios nirqa:
—Arí,
rispaykiyá peleamuy hinaspa libramuy chay Keila llaqtata —nispa.
3 Chaymi Davidpa runankuna nirqaku:
—Kay Juda lawpi kachkaspanchikpas manchakuywanmi kachkanchik.
Astawanchá manchakusun Keila llaqtata Filistea tropakunawan peleaq rispaqa —nispa.
4 Tayta Diosta huktawan David tapuptinmi payñataq nirqa:
—Riypuni Keila llaqtaman.
Filistea runakunataqa ñoqam makikiman churasaq —nispa.
5 Chaymi runankunawan David pasarqa Keila llaqtaman,
chaypim Filistea runakunawan peleaspa pasaypaqta vencerurqaku,
qatikurqakutaqmi llapallan ganadonkutapas.
Chaynatamá David librarurqa Keila llaqtapi yachaqkunata.
6 Ahimelecpa churin Abiatarmi Saulmanta lluptispan Davidwan Keila llaqtapi tuparqa,
chayman rispanqa aparqam Diosninku tapuna efodtapas.
7 Saulmanmi willaykurqaku Davidqa Keila llaqtapiña tarikusqanta chaymi Saulqa piensarqa:
—Kunanqa Diosmi makiymanña churaykun,
chay llaqtaman yaykuruspaqa wichqasqaña hinaspa cerrojosqañam rikurirun —nispa.
8 Chaymi Saulqa chaypunilla qayachirqa llapallan tropankunata chaynapi Keila llaqtaman pasaspanku Davidtawan runankunata chawpicharunankupaq.
9 Ichaqa Saulpa mana allin piensasqanta David yacharuspanmi sacerdote Abiatarta kamachirqa:
—Israelpa yupaychasqan Tayta Dios kay serviqnikim yacharuni Saulqa kay Keila llaqtaman hamuy piensasqanta.
Ñoqaraykum kay llaqta puchukachiyta piensachkan.
11 Taytáy ¿cheqaptachum hamunqa maskawananpaq?
¿Qoykuwanqakuchum kay Keila llaqtayoqkunaqa?
Israelpa yupaychasqan Tayta Dios,
kay sirvientekim ruegakullayki willaykuwanaykipaq —nispa.
Hinaptinmi Tayta Dios nirqa:
—Arí,
Saulqa hamunqam —nispa.
12 Hinaptinmi David huktawan tapurqa:
—Taytáy,
¿Saulmanqa qoykuwanqakuchum kay Keila llaqtayoq runakunaqa?
—nispa.
Chaymi Tayta Diosñataq nirqa:
—Arí,
qamkunataqa qoykusunkichikmi —nispa.
13 Hinaptinmi David lloqsirqa Keila llaqtamanta,
paywantaqmi lloqsirqa yaqa soqta pachak soldadonkunapas.
Paykunam purirqaku kayman-wakman mana maymanpas riyta yachastin.
Saulmanmi willaykurqaku Davidqa Keila llaqtamanta lluptirusqanta chaymi Saulqa manaña rirqachu.
Chunniqkunapi David pakakusqanmanta
14 Zif law chunniqpa orqonkunapim karqa mana yaykuy atina sitiokuna.
Chay sitiokunapim David yacharqa.
Sapa punchawña Saul maskaptinpas Diosqa manam qoykurqachu.
15 Saulmi lloqsirqa David wañurachiyta tanteaykuspan,
chayta David yacharuspanmi Hores sutiyoq sitiollapi karqa,
chay sitioqa tarikun Zif sutiyoq chunniqpim.
16 Huk punchawmi Saulpa churin Jonatan pasarqa Hores sutiyoq sitioman,
chaypim Davidta Jonatan kallpancharqa Diosman hapipakunanpaq.
17 Jonatanmá kaynata nirqa:
—Ama manchakuychu.
Taytay Saulqa manam tarisunkichu.
Qanmi huk punchaw kanki Israel runakunapa reynin,
ñoqañataqmi kasaq qampa qepaykiman qatiqllaña.
Arí,
kaytaqa taytay Saulpas ñam yachanña —nispa.
18 Tayta Diospa qayllanpi juramentota ruraruptinkum Jonatan kutikurqa wasinman,
Davidñataqmi qeparurqa hina Hores sutiyoq sitiollapi.
19 Ichaqa Zif lawpi yachaqkunam pasarqaku Saulpa yachasqan Gabaa llaqtaman hinaspam willamurqaku kaynata:
—Davidqa pakarayachkan yachanayku lawpi kaq mana yaykuy atina qaqakunapim.
Pakarayachkanqariki Hores law Haquila sutiyoq orqokunapim.
Chayqa kachkan chunniqkunapa surlawninpiñam.
20 Chaynaqa reyllayku,
haykapipas llaqtaykuman riptikiqa ñoqaykum qomusqaykiku —nispa.
21 Chaymi Saulñataq nirqa:
—¡Tayta Diosyá bendecisunkichik llakipayariwasqaykichikmanta!
22 Chaynaqa kutispayá yachaykamuychik sumaqta maypim kasqantapas.
Yachamuychiktaqyá chaypiqa pikunam rikusqantapas.
Willawarqakum payqa llumpay sacre runa kasqanta.
23 Sumaqtayá qawaykamuychik maykunapim pakakusqantapas hinaspayá willaykamuwaychikpuni.
Cheqaptapuni chay lawpi kaptinqa qamkunawanmi pasasaq,
kuchun-kuchun maskamuspam Judapa castan runakuna ukupi tariramusaq —nispa.
24 Hinaptinmi chay runakunaqa Saulpa ñawpaqninmanta Zif llaqtaman kutikurqaku.
Davidqa runankunapiwanmi kachkarqa Maon sutiyoq chunniqpi.
Chayqa kachkan Araba sutiyoq chunniqpa surlawninpim.
25 Saulmá runankunapiwan pasarqa David maskaq.
Ichaqa Davidman willaykuptinkum uraykaramurqa qaqapa kasqanman hinaspam karqa Maon sutiyoq chunniqpi.
Chayta Saul yacharuspanmi Davidta hapimunanpaq kachakuykurqa Maon sutiyoq chunniqman.
26 Saulmi rirqa runankunapiwan orqopa waklawnin waqtanta.
Paykunam apurawman rirqaku Saulmanta karunchakunankupaq.
Saulqa runankunapiwanmi chawpicharurqakuña Davidtawan runankunata hapirunankupaq.
27 Ichaqa Saulman huk willakuq chayaramuspanmi nirqa:
—¡Utqayman kutiriy reynilláy!
¡Filistea runakunam nacionninchikta saqueachkanku!
—nispa.
28 Chaymi Saulqa David qatikachasqanmanta kutirirqa Filistea runakunawan peleaqña.
Chayraykum chay sitiotaqa suticharqaku “Rakinaq Qaqa” nispanku.
29 Davidmi chay lugarmanta pasakurqa En-gadi sutiyoq sitioman.
Chaypim yacharqa mana yaykuy atina sitiokunapi.