22
Davidmi chaymanta pasakuspan ayqekurqa Adulam sutiyoq machayman chaymi wawqenkunapiwan llapallan ayllunkuna chayta yacharuspanku pasarqaku paywan huñunakunankupaq.
2 Chaypitaqmi Davidman taqrukuykurqaku sasachakuypi kaq llapallan runakunapas,
debekuq llapa runakunapas chaynataq llakipa qatisqan runakunapas.
Davidmá paykunapa capitanninña rikurirurqa.
Chaynapim Davidwan puriq runakunaqa karqa yaqa tawa pachak qarikuna.
3 Moab nacionpi kaq Mizpa sutiyoq llaqtaman David pasakuspanmi chay nacionpa reyninta nirqa:
—Ama hina kaspayá kay ruegakusqayta arí niykullaway:
mama-taytay ripukamuspanyá qanwan kachun imam Diospa munasqanta yachanaykama —nispa.
4 Chaynapimá Davidqa pusamurqa mama-taytanta Moab nacion reypa ñawpaqninman hinaptinmi chaypi yacharqaku David tukuy tiempo mana yaykuy atina lugarpi pakarayanankama.
5 Ichaqa Diosmanta willakuq Gad sutiyoq runam Davidta consejarqa:
—Ama kaychu chay mana yaykuy atina lugarpiqa,
qamqa pasakuy Juda lawmanyá —nispa.
David pasakuspanmi Haret sutiyoq monteman chayarqa.
Nob llaqtayoq sacerdotekunata Saul wañuchisqanmanta
6 Saulmi yacharurqa Davidqa runankunapiwan maypim tarikusqanta.
Chay ratom Saulqa tiyachkarqa Gabaa llaqta law tamarisco sachapa llantusqan moqopi.
Lanzanta hapiykuspan tiyaptinmi llapallan yanapaqninkunañataq paypa muyuriqninpi sayachkarqaku.
7 Paykunatam Saul nirqa:
—Benjaminpa castankuna,
uyariwaychik.
¿Creenkichikchum chay Isaipa churinqa llapallaykichikman chakrakuna qosunaykichikta otaq uvas chakrakuna qosunaykichikta?
Qamkunaqa ¿creenkichikchum waranqa tropa kamachiqpaq akllaykusunaykichikta?
8 Llapallaykichikmi contraypi hoqarikurunkichik chayraykum mayqannikichikpas mana willaykuwarqankichikchu churiy Jonatan chay Isaipa churinwan contratota ruraruptinpas.
Manam imapas qokusunkichikchu ñoqamantaqa.
Manam mayqannikichikpas willaykuwarqankichikchu chay serviqniy Davidta churiy Jonatan contraypi hatarirachiptinpas.
Chay serviqniymi pakan-pakanlla wateqawachkan imaynam kunan rurasqanman hina —nispa.
9 Hinaptinmi Saulpa serviqninkunawan chaypi tarikuq Edom casta Doeg sutiyoq runa nirqa:
—Rikumurqanim chay Isaipa churinqa Nob llaqtaman rispan sacerdote Ahimelecwan kaqta,
chay sacerdoteqa Ahitobpa churinmi.
10 Chay sacerdote Ahimelecmi Tayta Diosta tapurqa Davidpaq hinaspam qoykurqa mikuyta,
qoykurqataqmi Filistea runa Goliatpa espadantapas —nispa.
11 Rey Saulmi qayachimurqa Ahitobpa churin sacerdote Ahimelectawan Nob llaqtapi yachaq llapallan ayllun sacerdotekunata.
Reyman llapallanku hamuruptinmi
12 Ahimelecta Saul nirqa:
—Kayta uyariway,
Ahitobpa churin Ahimelec —nispa.
Chaymi sacerdote Ahimelecñataq nirqa:
—Uyarisqaykim,
reylláy —nispa.
13 Chaymi Saulñataq nirqa:
¿Imanasqataq qamqa chay Isaipa churinwanqa ñoqapa contraypi hatarirqanki?
Qanmi qoykurqanki tantata chaynataq huk espadatapas hinaspam Diostapas tapurqankiraq chay Davidpaq.
Chaykunata ruraspam yanaparqanki chaynapi contraypi hatarispan kunan hina pakan-pakan wateqawananpaq —nispa.
14 Chaymi reyta Ahimelec nirqa:
—Llapallan serviqnikikunamantapas huk runaqa manam kanchu David hina confianqa qariqa.
Chaywanpas payqariki qampa masaykim hinaspapas waqaychasuqniki soldadokunapa kamachiqninmi.
Wasikipiqa manam pipas kanchu pay hina allin respetasqa runaqa.
15 Manataqmi chay kutillapichu Diostaqa tapurqani Davidpaqqa.
¡Manam chaynachu!
Chaynaqa reylláy,
amayá kay serviqnikitaqa yanqakunamantaqa tumpawaychu,
amataqyá tumpaychu aylluykunatapas.
Ñoqallayqa manam imaniraqtapas yachanichu kay asuntomantaqa —nispa.
16 Chaymi Rey Saul nirqa:
—¡Wañunkipunim Ahimelec!
¡Wañunqataqmi llapallan aylluykikunapas!
—nispa.
17 Chaymantam rey Saulqa muyuriqninpi waqaychaqnin guardiakunata kamachirqa:
—¡Wañuchiychik Tayta Diospa sacerdotenkunata!
Paykunapas Davidmanmi sayapakurunku.
Paykunaqa chay runa ayqekusqanta yachachkaspankum mana willaykamuwarqakuchu —nispa.
Ichaqa reypa serviqninkunam mana munarqakuchu Tayta Diospa sacerdotenkuna wañuchiyta.
18 Hinaptinmi Rey Saulqa kamachirqa Doeg sutiyoq Edom casta runataña:
—¡Qamñayá wañurachiy!
—nispa.
Hinaptinmi chay runa pawaykurqa sacerdotekunata wañuchinanpaq.
Chay punchawmi wañurachirqa pusaq chunka pichqayoq linomanta rurasqa efodwan pachasqa sacerdotekunata.
19 Wañuchirqataqmi sacerdotekunapa yachanan Nob llaqtapi qarikunatapas,
warmikunatapas,
warmakunatapas hinaspa ñuñuq wawakunatapas.
Wañurachirqataqmi bueyeskunatapas,
asnokunatapas hinaspa ovejakunatapas.
20 Ichaqa Ahimelecpa huknin churinmi lluptirurqa,
Ahimelecqa karqa Ahitobpa churinmi,
chay lluptiruqpa sutinmi karqa Abiatar.
Paymi chay wañuymanta ayqekuspan chayarurqa Davidpa kasqankama.
21 Chaypim Davidman willaykurqa Tayta Diospa sacerdotenkunataqa Saul wañurachisqanmanta.
22 Hinaptinmi Davidñataq nirqa:
—Ñam yacharqaniña chay punchawpi tarikuq Edom casta Doeg sutiyoq runaqa Saulman willaykunanta.
Ñoqam huchayoq kani llapallan aylluykikunata wañurachisqanmantaqa.
23 Ichaqa ama manchakuspayá ñoqawan kaypi yachakuy.
Wañuchiwaqniy munaqmi qam wañuchiytapas munachkan.
Ñoqawan kaptikiqa manam pipas imanasunkichu —nispa.