Davidpa lluptikusqanmanta
21
Davidmi pasarqa Nob sutiyoq llaqtapi Ahimelec sutiyoq sacerdotepa kasqanman.
Chaymi Ahimelecqa mancharisqallaña lloqsimuspan Davidta tapurqa:
—¿Imanasqataq sapallaykiqa hamuchkanki?
—nispa.
2 Chaymi Davidñataq nirqa:
—Reymi huk asuntota kunamuwarqa,
kamachimuwarqam hamusqaymantaqa ama pipas yachananpaq chaynataq reypa kamachikuynintaqa ama pimanpas willakunaypaq.
Kamachisqay runakunataqa saqeramuni huklaw sitiopi tupanaykupaqmi.
3 ¿Kachkanchu imallaykipas mikuykunaypaq?
Qoykuwayá chay pichqantin tantata otaq imapas kaqta —nispa.
4 Hinaptinmi chay sacerdote nirqa:
—Manam kapuwanchu comun tantaqa,
kaspaqa-kachkan Diospaq sapaqchasqa tantallam.
Sichu runaykikuna mana puñurqachu warmikunawan hinaptinqa qoykusqaykim —nispa.
5 Hinaptinmi David nirqa:
—Runaykunawan kayna lloqsispaqa warmikunawanqa manañam puñunikuchu.
Arí,
kunan kutipiqa qonqaytam pasamurqaniku ichaqa runaykunaqa manam puñurqachu warmikunawanqa.
Paykunaqa Diosman asuykunankupaq hinam kachkanku —nispa.
6 Sacerdotem Diospaq sapaqchasqa tantata Davidman qoykurqa.
Arí,
chaypiqa manamá karqachu comun tantaqa,
kaspaqa-karqa Diospaq sapaqchasqa tantallam.
Hina chay punchawllapim chay tantakunata suchurachirqaku Tayta Diospa mesanmanta hinaspam chay mesapa hawanpiqa churaykurqaku qonichkaq tantataña.
7 Chay punchawmi Saulpa huk serviqnin kachkarqa Tayta Diosta adorananpaq suyaspa,
payqa karqa Edompa castan Doeg sutiyoq runam.
Payqa karqa Saulpa michiqninkunapa kamachiqninmi.
8 Davidmi sacerdote Ahimelecta nirqa:
—¿Yaqachum kapusunkiman ima armallapas?
Manam imananchu lanza kaspa otaq espada kaspapas.
Qonqayta rey kamaykachiwaptinmi mana apamurqanichu espadayta nitaq huk armaykunatapas —nispa.
9 Hinaptinmi chay sacerdote nirqa:
—Arí,
kaypim kachkan chay Goliat sutiyoq Filistea runapa espadan,
chay runataqariki qanmi vencerurqanki Ela Qechwapi.
Chay espadaqa kachkan huk capawan wankuykusqam chay efodpa qepanpi.
Munaspaykiqa apakuyá,
manam huk armaqa kaypiqa kanchu —nispa.
Chaymi David nirqa:
—¡Chay espada hinaqa manam huk armaqa kanchu!
¡Chaynaqa qoykuwayá!
—nispa.
10 Hina chay punchawllam David pasakurqa Saulmanta ayqekuspa hinaspam chayarurqa Aquis sutiyoq reyman.
Payqa karqa Gat llaqtapi reymi.
11 Rey Aquispa serviqninkunam payta nirqaku:
—¡Kay runaqariki kay allpapi munaychakuq Rey Davidmi!
Paymantam tususpa takirqaku:
Saulmi wañurachimun waranqa soldadokunata.
Davidñataqmi wañurachimun chunka waranqata.
12 Davidñataqmi chay rimasqankuwan cuentata qokuruspan Gat llaqtapa reynin Aquista anchallataña manchakururqa.
13 Chaymi paykunapa qayllanpiqa loco hinaña rimakurqa hinaspam loco tukuruspan zaguan punkukunapi qellqayta qallaykurqa,
toqaynintapas barban uraytam suturichirqa.
14 Hinaptinmi chay Rey Aquisqa serviqninkunata nirqa: