Davidta Jonatan yanapasqanmanta
20
Davidmi lluptikurqa Rama llaqtapa hichpan Naiot lawmanta chaymi Jonatanpa kasqanman chayaruspa payta nirqa:
—¿Imatataq ñoqaqa ruraruni?
¿Mayqantaq mana allin rurasqayqa?
¿Mayqantaq taytaykipa contranpi ñoqapa huchay chaynapi wañuchiyta munawaspa maskawananpaqqa?
—nispa.
2 Chaymi Jonatanñataq nirqa:
—¡Amayá chaytaqa Diospas munachunchu!
¡Manapunim wañunkichu!
Taytayqa manam imatapas ruranmanchu mana willawaspanqa.
¿Imanasqataq taytayqa kay asuntotaqa pakawanman?
¡Manam chaynaqa kanmanchu!
—nispa.
3 Davidmi Jonatanman willaspan nirqa:
—Taytayki Saulqa alli-allintam yachan ñoqanchikqa llumpay amigo kasqanchikta.
Chaynaqa manam willasunkimanchu chaynapi ama llakikunaykipaq.
Ichaqa Tayta Diosrayku hinaspa vidaykiraykum jurani ¡ñoqaqa wañuy patanpiñam tarikuchkani!
—nispa.
4 Hinaptinmi Jonatanñataq nirqa:
—Ñoqaqa imam munasqaykitam rurasaq —nispa.
5 Chaymi Davidñataq nirqa:
—Paqarinmi kanqa llullu killa fiesta.
Chaypim tiyanayman hina reywan tiyanay yachakun mikunapaq.
Amayá harkawaychu,
mincha tardenkamayá purunpi pakakaramusaq.
6 Sichum ñoqamanta taytayki tapusuptikiqa kaynatam ninki:
“Davidqa permisota mañakuykuwaspam kallpaylla pasan Belen llaqtanta.
Chaypis watan-watan rurasqankuman hina familiankunawan animalkunata Diosman ofrecenqaku” nispa.
7 Sichum taytayki “allinmi” niptinqa hawkam kasaq.
Ichaqa chay niykusqaykiwan piñakuruptinqa ñam yachankiña contraypi mana allin piensasqanta.
8 Chayna kaptinqa,
Jonatan,
ama hina kaspam kay favorta ruraykuwanki.
Qanwanqariki amigo kananchikpaqmi jurarqanchik Tayta Diospa ñawpaqninpi.
Chaynaqa ñoqapa culpay kaptinqa qampuniyá wañurachiway.
Amayá taytaykipa ñawpaqninmanraqchu pusawayqa —nispa.
9 Chaymi Jonatanñataq nirqa:
—¡Amayá chaynataqa piensaychu David!
Sichum yacharusaq contraykipi taytaypa mana allin ruray piensasqanta hinaspaqa willaykusqaykipunim —nispa.
10 Hinaptinmi David nirqa:
—¿Pitaq willamuwanqa piñakuspa taytayki nisuptikiqa?
—nispa.
11 Chaymi Jonatan nirqa:
—Hakuchik campota —nispa.
—Israelpa yupaychasqan Tayta Diosraykum niki,
paqarin-mincham kunan hina horatapuni taytayta tapurusaq chaynapi paypa imam ruray munasqanta yachanaypaq.
Allinlla qampaq kaptinqa willachimusqaykim.
13 Ichaqa taytay mana allin rurayta munasuptikiqa Tayta Diosyá llumpayta castigawachun mana willaykamuptiyqa hinaspa hawkalla ayqekunaykipaq mana yanapaptiyqa.
¡Tayta Diosyá yanapasunki imaynam taytaytapas yanapasqanman hina!
14 Chaynaqa David,
sichum chay punchawkuna kawsasaqraq hinaptinqa llakipayariwankimá imaynam Tayta Diospas qamta llakipayasusqaykiman hina.
Sichum wañukusaq hinaptinqa
15-16 amamá qonqarunkichu familiaykunata llakipayariykuspa imallapipas yanapaykuyta,
chaynataqa ruranki enemigoykikunata kay pachamanta Tayta Dios chinkarachiptinmi.
¡Paypuniyá juzgachun enemigoykikunata!
—nispa.
Chaynatamá Jonatanqa huk contratota rurarqa Davidwan.
17 Kuyasqanraykum Davidman huktawan Jonatan jurarqa,
kuyarqaqa kikinpa vidanta hinam.
18 Paymi nirqa:
—Paqarinmi mosoq killa fiesta,
chaynaqa qampa tiyanayki vacio kaptinchá watukusunki.
19 Kimsa punchawninmanqa tiyanayki aswanraq vaciorayaptinchá watupayakusunki.
Chaynaqa mejoryá pasakuy qayninpa pakakusqayki sitioman hinaspayá tiyakamuy Egel sutiyoq rumipa kasqanpi.
20 Chay lawmanmi ñoqa kimsakama flechamusaq chay sitiota hapichiq sumllalla.
21 Sirvienteytam kachasaq:
“Flechakunata maskamuy” nispa.
Sirvienteytam nisaqtaq:
“Flechakunaqa kachkan qampa kaylawnikipim.
Hamuspa hoqariy” nispa.
Chaynata niptiyqa ama imatapas manchakuspam lloqsikamunki,
manam imapas pasasunkichu.
¡Kaytaqa cheqaptapunim nichkayki Tayta Diosrayku juraspay!
22 Ichaqa:
“Flechakunaqa waklawneqpim kachkan” nispa mozota niptiyqa pasakunkim.
Chayna kaptinqa Tayta Diosmi munachkan pasakunaykita.
23 Juramentowan contrato rurasqanchikmantaqa Tayta Diosmi testigo kanqa wiña-wiñaypaq —nispa.
24 Chaynapimá Davidqa campopi pakakururqa.
Llullu killa fiesta chayaramuptinmi reyqa mesaman tiyaykurqa mikunanpaq.
25 Reyqa tiyaykurqa perqapa ladonpim costumbrenman hina.
Jonatanñataqmi tiyaykurqa paypa chimpanpi,
Abnerpas tiyaykurqam Saulpa waqtanpi hinaptinmi Davidpa tiyananñataq quedarurqa vaciolla.
26 Chay punchawpiqa Saulqa manam imatapas nirqachu Davidmantaqa.
Paymi piensarqa:
—Imapas pasaruptinchá mana chuyanchakusqanrayku kay Diospa fiestanpiqa mana mikunanpaq hinachu kachkan —nispa.
27 Ichaqa chay paqarinnintin fiesta punchawpipas Davidpa tiyanan hina vaciolla kaptinmi churin Jonatanta Saul tapurqa:
—¿Imanasqataq Isaipa churinqa mana hamurqachu mikuq qayna punchaw nitaq kunan punchawpas?
—nispa.
28 Chaymi Jonatanñataq nirqa:
—Davidqa Belen llaqtanman rinanpaqmi ruegakuspa permisota mañakuwarqa.
29 Ruegakuwarqamá permiso qoykunaypaq.
Paypa familiansi animalkunata wañuchispa Tayta Diosman ofrecenqaku llaqtankupi.
Chaysi Davidta wawqen kamachisqa rinanpaq.
Niwarqataqmi,
chay permisota qoykuptiyqa familiankunatapas pasada watukaykamunanpaq.
Chayraykum mana hamurqachu qanwan mikuq —nispa.
30 Chaymi Saulqa Jonatanpa contranpi piñakuruspan qaqcharqa:
—¡Mana allin warmipa wawan maqta!
¿Manachu ñoqaqa yacharqani chay Isaipa churinwanqa llumpay amigollaña kasqaykita?
¡Chaynamá kanki penqaynikipaq chaynataq mamaykipa penqayninpaq!
31 Chay Isaipa churin kawsaptinraqqa manam segurochu vidayki manataqmi segurochu rey kanaykipas.
¡Chaynaqa wañunanpaqyá maskachimuspa pusamuway!
—nispa.
32 Hinaptinmi taytanta Jonatan nirqa:
—¿Imanasqataq wañuchisqaqa kanqa?
¿Imatataq payqa rurarurqa?
—nispa.
33 Chaymi Saulqa lanzanta hoqarirqa Jonatanta chamqarunanpaq.
Chayraqmi Jonatanqa sumaqta yachaykurqa taytanqa cheqaptapuni David wañurachiy munasqanta.
34 Jonatanmi hatarirurqa mesamanta llumpay piñasqa,
chayraykum mana mikurqachu chay llullu killa fiestapa iskay kaq punchawninpiqa.
Jonatanpa sonqonmi nanarirqa taytan mana allinkunata Davidmanta rimasqanrayku.
35 Paqarinnintinmi Jonatanqa lloqsirqa campoman imaynam Davidwan rimanakusqanku horata.
Jonatantam compañarqa warmallaraq sirvienten.
36 Chay sirviententam Jonatan nirqa:
—Kallpaspayki maskamuy flechasqay flechakunata —nispa.
Chay sirvienten kallpaptinmi Jonatanñataq flecharqa chay sirvientepa waklawninmanraq chayananpaq.
37 Hinaptinmi chay flechapa wichiykusqanman chay sirviente chayaruptinñataq Jonatan qayarqa:
—¡Flechaqa kachkan qanmanta waklawpiraqmi!
—nispa.
38 Huktawanmi Jonatan qayarqa:
—¡Apurawllamanña kallpay ama sayaykuspa!
—nispa.
Chaymantam sirvientenqa kutimurqa Jonatanman flechankunata apamuspa.
39 Ichaqa chay sirvienteqa manam imatapas entienderqachu,
Jonatanwan Davidllam chaytaqa entienderqaku.
40 Jonatanmi chay sirvientenman qoykurqa armankunata hinaspam nirqa:
—Aparuy llaqtaman —nispa.
41 Chay sirviente pasaruptinñam David lloqsimurqa rumipa surlawninmanta hinaspam Jonatanpa ñawpaqninpi qonqoranpa kimsakama pampaman kumuykurqa.
Chaymantam muchaykanakuspanku iskayniku waqarqaku,
Davidmi waqarqa aminankama.
42 Jonatanmi Davidta nirqa:
—Pasakuy hawkalla.
Ñoqanchikqariki iskayninchikmi jurarqanchik Tayta Diospa sutinpi.
Paytataqmi mañakurqanchik siempre yanapanakunanchikpaqpas chaynataq ayllunchikkuna yanapanakunankupaqpas —nispa.
David pasakuptinmi Jonatanpas kutikurqa llaqtaman.