—Taytay Saulmi wañurachiyta munasuchkanki,

chaynaqa paqarin madrugawyá cuidakuy,

pakakusqayki sitiollapim kanki.

3 Ñoqam hamusaq taytaywan qampa kasqayki sitioman,

chaypim ladonpi sayaykuspa parlapayasaq qanmanta,

chayñam willamusqayki imam niwasqanta —nispa.

4 Chaynapimá Jonatanqa Davidpa favorninpi taytanwan rimaspan nirqa:

—Reynilláy,

amayá ruraychu ima mana allintapas sirvienteki Davidpa contranpiqa.

Payqa manam ima mana allintapas rurasurqankichu aswanqa allinllatam.

5 Payqa vidantapas peligroman churaykuspam chay Filistea runatapas wañurachirqa.

Chaynapim Tayta Dios libraykurqa llapallan Israel runakunata.

Qampas chaytaqa qawaspam kusikurqanki.

Chaynaqa ¿imanasqamá inocente runataqa wañuchiypi riwaq?

Amayá munaychu yanqamanta David wañuchiytaqa —nispa.

6 Chaymi Saulqa churin Jonatanpa rimapayasqanta uyariykuspan nirqa:

—¡Tayta Diosraykum jurani,

Davidqa manam wañuchisqachu kanqa!

—nispa.

7 Davidta Jonatan qayaykuspanmi tukuy chay rimasqankuta willaykurqa.

Kikin Jonatantaqmi Davidtaqa pusaykurqa Saulpa kasqanman chaymi Davidqa ñawpaqta hina Saulta yanaparqa.

8 Yapatawanmi guerra qallaykurqa chaymi David guerraman pasaspan Filistea runakunata venceramurqa.

Filistea runakunam pasaypaqtaña vencerachikuspanku lluptikurqaku Davidpa ñawpaqninmanta.

9 Saulmanñataqmi huktawan yaykururqa Tayta Diospa kachamusqan mana allin espiritu.

Saulqa palacionpim tiyachkarqa lanzanta hapirayastin.

Davidñataqmi arpanta tocachkarqa.

10 Chaymi Saulqa lanzawan David clavaruyta munarqa perqaman ichaqa David surtiruptinmi Saulpa choqasqan lanzaqa clavakururqa perqallaman.

Chay tutapunim David lluptikuruspan ayqekurqa.

11 Saulmá chaypunilla runankunata kacharqa Davidpa wasinman chaynapi payta wateqamuspanku paqarinnintinñataq wañurachinankupaq.

Ichaqa Davidpa warmin Micalmi payman willaykurqa:

—Kunan tuta mana lluptikuptikiqa paqarinmi wañurachisunki —nispa.

12 Davidtam ayqekunanpaq warmin Mical warkururqa ventananta chaymi payqa lluptikuspan ayqekurqa.

13 Chaymantam Micalqa Davidpa camanman siriykachirqa runaman rikchakuqta,

uman lawman cabrapa pelonta churaykuspanmi hawanmanñataq qataykurqa.

14 David hapimunankupaq Saulpa kachasqan runakunatam Mical nirqa:

—Payqa onqochkanmi —nispa.

15 Davidta huktawan maskamunankupaqmi runankunata Saul nirqa:

—¡Camantintapas apamuwaychik wañuchinaypaq!

—nispa.

16 Chaymi Saulpa runankuna Davidpa wasinman yaykuruspanku camapiqa tarirurqaku runaman rikchakuqllata,

uman lawpiñataqmi tarirurqaku cabrapa pelollanta.

17 Chaymi Micalta Saul nirqa:

—¿Imanasqataq engañawaspayki enemigoyta lluptirachirqanki?

—nispa.

Hinaptinmi Micalñataq nirqa:

—“Kachaykuway lluptikunaypaq,

mana chayqa wañurachisqaykim” nispa niwaptinmi kachaykurqani —nispa.

18 Chaynatamá Davidqa lluptikurqa hinaspam Samuelwan tupananpaq rirqa Rama llaqtata.

Chaypim Samuelman willaykurqa Saulqa payta tukuy mana allin rurasqanta.

Chaymantam Davidqa Samuelwanña ripukurqa Naiot sutiyoq lawpi yachanankupaq.

19 Ichaqa Saulmanmi willarqaku:

—Davidqa Rama llaqtapa hichpan Naiot lawpim kachkan —nispa.

20 Chaymi Saulqa runankunata kacharqa Davidta hapimunankupaq.

Chay runakuna chayaruspankum tarirurqaku Diosmanta willakuq achka runakunata.

Paykunam Diosmanta rimachkasqaku.

Paykunatam dirigichkasqa kikin Samuel.

Hinaptinmi qonqaymanta Diospa Espiritun chay Saulpa kachasqan runakunatapas hapirurqa chaymi paykunapas Diosmanta rimaytaña qallaykurqaku.

21 Chayta Saulman willaykuptinkum huk runakunataña kacharqa ichaqa paykunapas Diosmanta rimaytañam qallaykurqaku.

Chaymi Saulqa kimsa kaq kutipiña huktawan runakunata kacharqa ichaqa paykunatapas hina kaqllam pasarurqa.

22 Chaymi kikin Saulña pasarqa Rama llaqtaman hinaspam Secu sutiyoq lawpi pozoman chayaruspan tapukurqa:

—¿Maypitaq kachkan Samuelwan Davidqa?

—nispa.

Hinaptinmi huk kaqnin nirqa:

—Rama llaqtapa hichpan Naiot lawpim —nispa.

23 Chaylawman Saul pasaptinmi paytapas Diospa Espiritun hapirurqa hinaptinmi paypas Diosmanta willakuqkuna hinaña rimarqa.

Hina chayna rimastinmá rirqa Rama llaqtapa hichpan Naiot lawman chayanankama.

24 Chaymantam Saulqa pachantapas chustukuruspan qalallaña Samuelpa ñawpaqninpi Diosmanta rimarqa,

wichiykuspanmi tukuy punchaw pampapi qalalla karqa.

Chayraykum runakuna rimakuqku:

—¿Saulpas kasqa Diosmanta willakuqñachus?

—nispa.