—Davidqa pakakuchkan chunniqpa chimpan Haquila sutiyoq orqokunapim —nispa.

2 Hinaptinmi Saulqa kimsa waranqa soldadokunawan rirqa Zif llaqta law chunniqman.

Chay riqmasin soldadokunaqa karqa Israel runakunamanta allinnin akllasqa qarikunam.

Paykunawanmá pasarqa chay lawpi Davidta maskamunanpaq.

3 Saulqa campamentontam sayachirqa Haquila orqokuna lawpi.

Chayqa kachkan ñanpa hichpallanpim hinaspa chunniqpa chimpallanpim.

Ichaqa Davidmi chay chunniqpi kachkaspan musyakururqa Saulqa chaykama qatisqanta.

4 Chaymi Davidqa kacharqa wateqaqkunata chaynapi cheqaptapuni Saulpa chayaramusqanta yachananpaq.

5 Saulpa campamento sayachisqanman David chayaruspanmi qawarqa Saulpa maypim puñusqanta.

Qawarqataqmi maypim Abner puñusqantapas,

Abnerqa karqa Nerpa churinmi hinaspapas payqa karqa Saulpa llapallan tropankunapa kamachiqninmi.

Davidmi yacharurqa Saulqa campamento ukupi puñusqanta.

Chaypi puñuptinmi runankunañataq muyuriqninpi samarqaku.

6 Davidmi rimapayarqa Hetpa castan Ahimelec sutiyoq runata.

Rimapayarqataqmi Abisai sutiyoq runatapas.

Abisaiqa karqa Sarvia sutiyoq warmipa wawanmi hinaspa Joab sutiyoq runapa wawqenmi.

Chay iskaynin runakunatamá David tapurqa:

—¿Pitaq riraysiwanman Saulpa campamentonkama?

—nispa.

Hinaptinmi Abisai sutiyoq runa nirqa:

—¡Haku ñoqawanyá!

—nispa.

7 Chaynapim Davidqa Abisaipiwan campamentoman pasarqaku chay tutapuni.

Saulmi puñuchkasqa campamento ukupi.

Sawnanpa waqtanpiñataqmi paypa lanzan pampapi clavarayachkasqa.

Saulpa muyuriqninpiñataqmi puñuchkasqa Abnerwan llapa tropakuna.

8 Chaymi Davidta Abisai nirqa:

—Kunanmi enemigoykita Dios makikiman churaykun.

Kunanyá kikinpa lanzallanwan wañurachisaq.

Payqariki wañurunqa huk tuksiyllawanmi —nispa.

9 Chaymi Davidñataq nirqa:

—¡Ama wañuchiychu!

Diospa nombrasqan rey wañuchiq runaqa manam kanmanchu mana castigasqaqa.

10 Ñoqaqa juranim Tayta Diosrayku,

paychá wañuchispaqa wañuchinqa Saulpa wañunan punchaw chayaramuptin otaqchá wañunqaqa peleachkaspa.

11 Tayta Diosyá harkawachun kikinpa nombrasqan reytaqa ama wañurachinaypaq.

Chaynaqa hakuchikyá sawnan lawpi kaq lanzatawan yakuyoq aysakullata aparikuspa —nispa.

12 Chaynapimá Davidqa Saulpa sawnanmanta aparikurqa huk lanzatawan yakuyoq aysakullata hinaspam pasakurqaku.

Manam pipas rikurqachu nitaqmi pipas musyarqachu,

manataqmi pipas rikcharirqachu.

Llapallankum puñukururqaku paykunamanqa sinchi puñuyta Tayta Dios qoykusqanrayku.

13 Chaymantam Davidqa pasakurqa waklaw moqopa chimpanman hinaspam karuneqpi sayaykurqa huk moqopa puntanpi.

14 Chay sitiomantam tropakunatawan Nerpa churin Abnerta David qayarqa:

—Abner ¡contestamuway!

—nispa.

Chaymi Abnerñataq nirqa:

—¿Pitaq qamqa kanki reyta qayaykachamunaykipaq?

—nispa.

15 Chaymi David nirqa:

—¿Manachum qamqa kanki Israel runakuna ukupi mana pipapas igualay atinan?

¿Imanasqamá manaqa allintachu waqaycharqanki servisqayki reytaqa?

¡Huk runam yaykuramurqa rey wañurachiyta munaspan!

16 ¡Chayqa manam allinpunichu!

Ñoqaqa Tayta Diosraykum jurani ¡qamkunaqa wañuytam debenkichik!

Qamkunaqa manam waqaycharqankichikchu Tayta Diospa nombrasqan reynikichikta.

Kunanyá ¡maskay!

¿Maypitaq kachkan reypa lanzanpiwan sawnan lawpi kaq yakuyoq aysaku?

—nispa.

17 Chaymi Davidpa vozninta Saul reqsiruspan nirqa:

—¡Qamqariki kachkasqanki masay Davidmi!

—nispa.

Hinaptinmi Davidñataq nirqa:

—Arí,

reynilláy.

Ñoqaqa kani Davidmi.

18 Ichaqa reynilláy ¿imanasqamá kay serviqnikitaqa qatikachawanki?

¿Ima mana allintamá ñoqaqa rurarurqani?

19 Reynilláy,

ama hina kaspayá kay serviqnikita uyariykullaway.

Sichum Tayta Diospuni ñoqapa contraypi qamta hatarirachisuptikiqa chaskiykuwachunyá huk ofrendata.

Ichaqa chay contraypi hatarisqayki runallamanta kaptinqa Tayta Diosyá ñakachun.

Ñoqatam qarqowarqaku Tayta Diospa kay allpanmanta.

Chaynata ruraspam tanqaypaq-tanqawachkanku taytacha-mamachakunata servinaypaqña.

20 Tayta Dios wañunayta manaraq munaptinqa amayá wañusaqchu.

Ichaqa reynilláy,

qanmá lloqsimurqanki piki hinalla kachkaptiypas maskawanaykipaq.

Montekunapim yututa hina maskawanki —nispa.

21 Hinaptinmi Saul nirqa:

—¡Kuyasqay David,

ñoqaqa reqsikunim huchallikurusqayta!

¡Loco hina kaykunata ruraspaymi huk pantayman wichiykuni!

Kunan punchawmi makikipiña kachkaptiypas mana wañurachiwarqankichu.

Chaynaqa kutikamuyá,

manañam wañuynikitaqa maskasaqñachu —nispa.

22 Chaymi David nirqa:

—¡Reynilláy,

kayqayá lanzaykiqa kaypi kachkan!

Huk kaqnin sirvientekitayá kachamuy kay lanza hoqarinanpaq.

23 Tayta Diosyá sapakamaman pagapuchun allin rurasqanman hina hinaspa allin confianza kasqanman hina.

Tayta Diospuni kunan punchaw qamta makiyman churamuchkaptinmi mana wañurachirqaykichu qamqa paypa nombrasqan rey kasqaykirayku.

24 Kunan punchawmi qampa vidaykita qawarqani llumpay valorniyoqpaq chayna valorniyoqpaqyá Tayta Diospas qawachun ñoqapa vidayta hinaspayá Librawachun tukuy llakiymantapas.

25 Hinaptinmi Saul nirqa:

—Diosyá bendecisunki kuyasqay David.

Qamqa hamuq punchawkunapim imapas hatun kaqkunata ruranki.

Qamqa vencenkitaqmi tukuy imapipas —nispa.

David pasakuptinmi Saulñataq wasinman kutikurqa.