—Wawalláy,

maskapusqaykiyá qosaykipaq huk kaqninta chaynapi kusisqa kawsakunaykipaq.

2 Kachkanmiki ayllunchik Booz.

Paypa sirvientankunawanmi kuska llamkamurqanki,

kunan tutam payqa cebadata wayrachinqa.

3 Chaynaqa bañakuspayá perfumewanpas hinakuytaq hinaspayá mosoq pachaykikunawan pachakuspa pasay eraman.

Amaraqmi paywanqa reqsichikunkichu mikuyta,

tomayta tukunankama.

4 Qawankim maypim pay puñusqanta hinaspam haytananta kichaykuspa chaypi puñunki,

paymi nisunki imam ruranaykita —nispa.

5 Chaymi Rutñataq nirqa:

—Rurasaqmi tukuy kamachiwasqaykita —nispa.

6 Rutmá eraman rispan suegranpa tukuy kamachisqanta rurarqa.

7 Boozmi mikuruspa hinaspa tomaruspa kusisqallaña pasaspan huk monton cebadapa waqtanpi puñuykurqa.

Chaymi Rut rispan upallalla Boozpa haytananpi puñuykurqa.

8 Chawpi tutatam Booz qonqayta rikcharirurqa hinaspam tikraparikuspan musyarurqa haytananpi huk warmi puñusqanta.

9 Chaymi Booz tapurqa:

—¿Pim kanki?

—nispa.

Chaymi Rutñataq nirqa:

—Ñoqaqa kani sirvientayki Rutmi,

qamqa kanki wañukuq qosaypa ayllunmi,

chaynaqa debernikim reclamawaspa casarawanayki —nispa.

10 Chaymi Booz nirqa:

—Tayta Diosyá bendecisunki mamáy,

kunanmi qawaykuni wañukuchkaptinpas qosaykipaq allinnintaraq maskasqaykita.

Munaspaykiqa aputapas wakchatapas ñoqamanta mozotaraqmi maskakuruwaq karqa ichaqa manamá chaytachu rurarqanki.

11 Kunanqa amayá manchakuychu,

ñoqam qanwan rurasaq imam mañakuwasqaykiman hina.

Llaqtaypi kaqkunaqa yachankum allin sonqoyoq warmi kasqaykita.

12 Cheqaptapuni reclamaq aylluyki kachkaptiypas kachkanraqmi ñoqamanta aswan hichpa reclamaq aylluyki.

13 Kaypiyá samakuy kunan tutaqa.

Paqarin madrugaw pay reclamasuptikiqa allinmi,

ichaqa pay mana reclamasuptikiqa ñoqam reclamasqayki.

Kaytaqa jurani kawsaq Diosraykum,

chaynaqa waqtapakuyñayá tutamantakama —nispa.

14 Chaymi tutamantakama Boozpa haytananpi Rut puñurqa hinaspam hatarirqa manaraq achikyachkaptin.

Boozmi payta nirqaña:

—Eraman warmipa hamusqantaqa amayá pipas yachachunchu —nispa.

15 Boozqa nirqataqmi:

—Hawaykipi rebozaykita pampaman mastariykuspa sumaqta hapiykuy —nispa.

Rebozanta Rut mastariykuptinmi Booz talliykurqa yaqa tawa chunka kilo cebadata chaymi churkuykuptin wasinman ripukurqa.

16 Suegranpa kasqanman Rut chayaruptinmi Noemiy nirqa:

¿Allinchu karamunki wawalláy?

—nispan.

Chaymi Rut willarqa paypaq tukuy ima Booz ruramusqanmanta.

17 Rutmi nirqa:

—Kay yaqa tawa chunka kilo cebadatam qoykamuwan:

“Suegraykimanqa amayá hinallaqa riychu” nispa.

18 Chaymi Noemiyñataq nirqa:

—Wawalláy,

qawasunchikyá imaynam kananmanta,

kunanqa chay runaqa manam dejanqachu kay asuntotaqa ruray tukunankama —nispa.