2 Chay llumchuynin Moab casta Rutmi Noemiyta nirqa:

—Ama hina kaspayá dejaykuway chakrata rirunaypaq chaynapi chaskiwaqniypapi cebadata pallapakamunaypaq —nispa.

Chaymi Noemiyñataq nirqa:

—Riruyá,

mamáy —nispan.

3 Chaynapim Rutqa chayaruspan rutuqkunapa qepanta rirqa pallapakustin.

Mana yachastinmi chayarurqa suegron Elimelecpa ayllun Boozpa chakranman.

4 Rut pallapakuchkaptinmi Belen llaqtamanta hamuspan Booz sutiyoq runa chayaramurqa hinaspam rutuqkunata rimaykurqa:

—Tayta Diosyá qamkunawan kachun —nispa.

Chaymi rutuqkunapas nirqaku:

—Qamtapas Tayta Diosyá bendecisunki —nispa.

5 Chaymantañataqmi rutuqkunapa capataznin sirviententa Booz tapurqa:

—¿Pitaq wak sipasqa?

—nispa.

6 Hinaptinmi chay capataz nirqa:

—Payqa Noemiywan hamuq Moab nacionniyoq sipasmi.

7 Paymi ruegakuwarqa rutuqkunapa qepanta rispa gamillakunapa chawpinpi pallapakunanpaq.

Chaynapimá tutapaymanta kunankama pallapakuchkan,

huk ratochallam kay wasipiqa samariykurqapas —nispa.

8 Hinaptinmi chay Rut sutiyoq sipasta Booz nirqa:

—Uyariy mamáy,

amam kaymantaqa huklaw chakramanqa pasakunkichu,

hinallapiyá sirvientaykunawan kuska pallapakuy,

9 paykunawan kuskayá qatiy rutuqkunapa maymanpas risqanta,

sirvienteykunataqa kamachiniñam mana pipas imanasunaykipaq.

Yakunayasuptikipas puyñukunapa kasqanman rispayá sirvienteykunapa yaku horqomusqanta tomakuy —nispa.

10 Chaymi Rutqa qonqoranpa pampaman kumuykuspan Boozta nirqa:

—¿Imaynanpitaq qamqa forastera kachkaptiypas qawariykuwaspa favoreceykuwanki —nispa.

11 Chaymi Boozñataq nirqa:

—Arí,

ñoqaqa yachaniñam qosayki wañukuptin imaynam suegraykiwan vida pasasqaykita,

yachanitaqmi tayta-mamaykitapas hinaspa nacekusqayki llaqtaykitapas saqemuspa mana reqsisqayki llaqtaman hamusqaykita.

12 Tukuy chay rurasqaykimantayá Tayta Dios kutichipusunki,

Israelpa yupaychasqan Tayta Diosyá qanman llumpayta pagapusunki.

Hamurqankiqa paypa waqaychasqan kanaykipaqmi —nispa.

13 Chaymi Rutñataq nirqa:

—Taytáy,

mana huknin sirvientayki hina kachkaptiypas favoreceykuwaspam consuelaykuwanki,

kuyakuywan rimapayaykuwaspaykim kallpanchaykuwanki —nispa.

14 Mikuy hora chayaramuptinmi Booz nirqa:

—Yaw sipas,

kayman asuykamuspayá mikuykuy,

tantaykitapas nuyuykachiyá vinagrepi —nispa.

Chaymi rutuqkunawan kuska tiyaykuptin Booz haywaykurqa kikinpa trigo hamkanta chaymi Rut saksanankama mikuruptinpas puchururqaraq.

15 Huktawan Rut pallapakuq pasaptinmi sirvientenkunata Booz kamachirqa:

—Pallapakuchunyá gamilla huñusqaykichikpipas,

amam penqayman churankichikchu,

16 gamillamantapas mana musyayllatam wichichinkichik pallapakunanpaq,

chaynaqa amamá michakunkichikchu —nispa.

17 Chaynapim Rutqa tardeykuqkama chakrapi pallapakurqa,

chay pallapakusqanta qaqoruptinmi lloqsirurqa iskay chunka kilo masnin cebada.

18 Pallapakusqanta apaspam kutirqa wasinman hinaptinmi suegran qawarqa pallapakamusqanta,

alzakamusqantapas qepinmanta horqoykuspam suegranman qoykurqa.

19 Hinaptinmi suegran nirqa:

—¿Maypitaq pallapakamurqanki?

¿Maypitaq llamkapakamurqanki?

Diosyá bendecichun chay yanapaykamusuqnikita —nispa.

Chaymi suegranman willarqa pipapim llamkamusqanta,

suegranman willaspam kaynata nirqa:

—Kunan punchaw llamkamusqay chakrayoqpa sutinqa Boozmi —nispa.

20 Chaymi Noemiyñataq llumchuyninta nirqa:

—Tayta Diosyá bendecichun payta.

¡Diosqariki bendeciykuwanchikmi ñoqanchiktapas hinaspa wañuqkunatapas.

Ayllunchikmi chay runaqa,

paypaqa deberninmi reclamawananchik —nispa.

21 Hinaptinmi Rutñataq nirqa:

—Chay runam niwarqa:

“Sirvientaykunawan kuskayá pallapakuy rutuchisqay tukunankama” nispa.

22 Chaymi Noemiyñataq llumchuyninta nirqa:

—Wawalláy,

allinpunim sirvientankunawan lloqsiynikiqa.

Amayá huklaw chakramanqa lloqsiychu —nispa.

23 Chaynatamá Rut rurarqa.

Boozpa sirvientankunawan kuskam pallapakurqa cebada rutuy hinaspa trigo rutuy tukunankama.

Paymá yacharqa hina suegran Noemiywan.