—Taytáy,

hamuspayá kaypi tiyaykuy —nispa.

Chaymi pay hamuspan tiyaykurqa.

2 Chaymi llaqtapi chunka ancianokunata Booz qayaykuspan nirqa:

—Taytakuna,

kaypiyá tiyaykuychik —nispa.

Chaymi arreglo ruraqkunapa tiyananpi tiyaykurqaku.

3 Hinaptinmi Rut reclamaq deberniyoq runata Booz nirqa:

—Moab nacionmanta kutimuq Noemiymi ayllunchik Elemelecpa chakranta rantikuchkan.

4 Ñoqam munarqani qanman willaykuyta chaynapi rantiyta munaspaqa kay tiyaqkunapa hinaspa ancianokunapa qayllanpi aylluykipaqña reclamaspa rantinaykipaq.

Qanmiriki kanki Elemelecpa hichpa ayllunqa,

chaynaqa qampam derechoyki ayllunchikpaqña reclamanayki.

Mana munaspaykiqa willaykuwayá ñoqaña rantirunaypaq,

ñoqamriki qampa qepaykiman derechoyoq runaqa kani reclamanaypaq —nispa.

Hinaptinmi reclamananpaq derechoyoq runa nirqa:

—Reclamasaqmi —nispa.

5 Chaymi Boozñataq nirqa:

—Noemiymanta chakranta rantispaykiqa wañukuqpa viudan Moab nacionniyoq Rutwanpas casarakunkim chaynapi wañukuqpa viudanmanta naceq churikipas chay chakrata dueñochakunanpaq —nispa.

6 Chaykunata uyariykuspanmi chay ayllunqa nirqa:

—Manam ñoqaqa reclamaymanchu,

manam munanichu herenciayqa hukpaq kananta,

reclamayta munaspaykiqa qamñayá rantiruy.

Ñoqam derechoyta qoyki —nispa.

7 Chay tiempokunapim Israel nacionpi karqa kay costumbre:

pipas reclamaptinqa otaq contratota ruraptinqa huk kaqninmi usutanta lluchuykuspa qoykuq contrato ruraqmasinman.

Chaynataqa ruraqku contrato firmasqa hina kananpaqmi.

8 Chay costumbreman hinamá chay Boozpa ayllunqa usutanta lluchukuykuspan nirqa:

—Qamyá rantiruy —nispa.

9 Chaymi Boozñataq chaypi kaq ancianokunatawan chaypi kaq runakunata nirqa:

—Kunan punchawmi qamkuna llapallaykichik testigo kankichik Elemelecpa tukuy kapuqninkuna rantisqaymanta,

Noemiymantam rantini Quelionpa hinaspa Mahalonpa kaqninkunata.

10 Casarakusaqtaqmi Mahalonpa viudan Moab nacionniyoq Rutwanpas.

Chaynata ruraptiymi wañukuq Mahalonpa chakrankunapas hina sutillanpi kanqa.

Chayraykum paypa ayllunmanta hinaspa llaqtamasinkunamanta sutinpas mana chinkanqachu.

Chaynaqa kunanmá qamkuna testigo kankichik —nispa.

11 Hinaptinmi llaqtapa zaguan punkunpi kaqkuna llapallan runakunapiwan nirqaku:

—Arí,

testigom kaniku.

Wasikiman yaykumuq warmitaqa Tayta Diosyá Raqueltawan Leata hina rurachun,

chay iskaynin warmikunamantam ñoqanchik Israel castakuna mirarqanchik.

Qamtapas Dios yanapasuptikiyá munaychakuy kay Efrata llaqtapi,

allin reqsisqataqyá kawsakuy kay Belen llaqtapipas.

12 Kay warmiwan casarakuptikiyá Tayta Dios qosunki achkallaña wawakunata imaynam Faresmanpas qosqanman hina.

Farespa mamanmi karqa Tamar,

taytanñataqmi karqa Juda —nispa.

13 Chaynapimá Boozqa casarakurqa Rutwan,

kuskanchakusqanmantam Tayta Diospa munasqanman hina Rut wiksayakuspan wachakurqa qari wawata.

14 Chaymi warmikuna nirqaku Noemiyta:

—Tayta Diosyá alabasqa kachun,

paymi qoykusunki reclamaqniki willkata.

Chay willkaykiyá kachun Israel nacionninchikpi allin reqsisqa runa.

15 Willkaykiyá kachun consuelaqniki hinaspa payayaynikipipas mantienesuqniki,

payqariki llumpay kuyasuqniki llumchuynikipa wawanmi,

qampaqa Rutqa valen qanchis qari wawamantapas mastaraqmi —nispa.

16 Hinaptinmi wawata hoqariykuspan Noemiy marqakuykurqa,

chay punchawmantam karqa chay wawapa uywaqnin.

17 Chayta qawaspankum vecinankuna nirqaku:

—Noemiypaqmi nacerapun qari wawa —nispa.

Chay wawatam suticharqaku Obedwan.

Paymi hatunyaspan karqa Isaipa taytan hinaspa rey Davidpa abuelon.

18 Kaykunam Farespa mirayninkuna karqa:

Farespa churinmi karqa Hezron,

19 Hezronpa churinñataqmi karqa Ram,

Rampa churinñataqmi Aminadab

20 Aminadabpa churinñataqmi karqa Naason,

Naasonpa churinñataqmi karqa Salmon,

21 Salmonpa churinñataqmi karqa Booz,

Boozpa churinñataqmi karqa Obed,

22 Obedpa churinñataqmi karqa Isai,

Isaipa churinñataqmi karqa David.