2 Un Pilatus haud Jesus auf jefroacht, un säd, "Meenst du werkjlich de Juden äa Kjennich to sennen?"

Un Jesus auntwuad am, un säd, "Jo, du hast daut selfst jesajcht."

3 Un de väastonende Priestasch hauden Jesus met aulahaunt beschulcht. 4 Un soo haud Pilatus am wada auf jefroacht, un säd, "Sajchst du nuscht to aules waut see von die sajen? Kjikj doch emol, fa waut see die aules beschuljen." 5 Oba Jesus wia bloos stell jewast, soo daut Pilatus sikj sea äwa am jestaunt haud.

6 De Harscha Pilatus haud daut emma fa Mood jehaut, daut wan de Juden aule Joa daut Passafast fieeden, daut see sikj een Jefangnen wälen kunnen, dän hee äant dan emma friejeloten haud. 7 Un aus Jesus ver Pilatus jekomen wia, dan wia doa krakjt een Vebräakja em Jefenkjnis jewast, dee Barabbas jeheeten haud. De Soldoten hauden am met atelje Vebräakja toop em Jefenkjnis enjestoppt, dee nämlich een Opprua jäajen de Rejierunk aunjestalt hauden, un dee doabie een Mensch doot jemoakt hauden. 8 Un daut Volkj wia no Pilatus jekomen, un see wullen han daut hee äant een Jefangnen frieloten sull, soo aus hee daut aule Joa emma jedonen haud.

9 Un soo fruach Pilatus daut Volkj, un säd, "Well jie, daut ekj junt dän Juden Kjennich frieloten saul?" 10 Pilatus wull Jesus nämlich frieloten, wiel hee haud daut goot jewist, daut de väastonende Priestasch Jesus bloos aufjenstich wieren, un daut see am doawäajen, aun am äwajäft hauden. 11 Oba de väastonende Priestasch hauden daut Volkj soo aunjespornt, daut see daut von Pilatus velangen sullen, daut hee äant Barabbas leewa frieloten sull, aus Jesus.

12 Oba Pilatus haud daut Volkj wada aunjerät, un hee fruach äant, un säd, "Jie wellen daut ekj Barabbas en Jesus siene Städ frieloten saul, oba waut saul ekj met dis Jesus doonen, dän jie dän Juden Kjennich nanen?" 13 Un daut Volkj haud Pilatus bloos wada aun jeschräajen, un see säden, "Kjriezij am!"

14 "Oba wuarom?", fruach Pilatus, "Met waut haft hee sikj veschulcht?"

Un daut Volkj schrieech bloos noch dolla, "Kjriezij am!"

15 Un wiel Pilatus met daut Volkj Fräd moaken wull, dan haud hee äant Barabbas friejeloten. Un Jesus haud hee vepitschen loten, un dan haud hee am aun de Soldoten äwajäft, dee am kjriezjen sullen.

16 De Soldoten hauden Jesus no Pilatus sien Rejierungs Hus jenomen, waut see nämlich^a 'daut Prätorium' jenant hauden, un aus see Jesus oppem Hoff nopp jenomen hauden, dan hauden see aul de aundre Soldoten toop jeroopt, waut doa bie daut Rejierungs Hus jedeent hauden. 17 Un de Soldoten hauden Jesus een rootbleiwet Mauntel äwalajcht, soo aus waut een Kjennich sikj emma äwatrakjen wudd, un see hauden sikj ne Kroon von spekjaje Asta jeflochten, un hauden Jesus dee oppem Kopp nopp jesat. 18 Un dan hauden see Jesus soo bejreest, aus wan eena een Kjennich bejreesen wudd, un see säden, "Wie bejreesen die, O Juden Kjennich!" 19 Un de Soldoten hauden Jesus met ne stiewe Wipp^b äwarem Kopp jeschloagen, un see hauden am bespäajen, un hauden sikj soo ver am han jekjneet, aus wan see am aus een Kjennich je-ieet hauden. 20 Un aus see am jenuach bespatat hauden, dan hauden see am daut rootbleiwet Mauntel aufjenomen, un dan hauden see am siene ieejne Kjleeda wada aunjetrocken, un dan hauden see am wajch jenomen, om am to kjriezjen.

21 Un aus de Soldoten Jesus von Jerusalem rut jebrocht hauden, dan wia doa krakjt een Maun von buta de Staut jekomen, dee en Jerusalem nen gonen wull. Un de Soldoten hauden am bedwungen, daut hee Jesus sien Kjriez droagen sull. De Maun sien Nomen wia Simon, un hee kjeem von de Staut von Kyrene, un hee wia de Voda von Alexander un Rufus.

22 Un de Soldoten hauden Jesus no ne Städ jebrocht, dee Golgatha heet, waut nämlich 'Schädelstäd'^c äwasat woat. 23 Un see hauden Jesus betren Wien^d aunjeboden, waut am beteiben sull, wan see am aum Kjriez naun noagelden. Oba Jesus haud dän Wien nich aunjenomen.

24 Un aus de Soldoten Jesus jekjriezicht hauden, dan hauden see oppe Wad jespält, om to seenen woo see sikj Jesus siene Kjleeda toodeelen sullen. 25-26 Un daut wia Klock 9 zemorjes jewast, aus see Jesus jekjriezicht hauden, un bowa Jesus sien Kopp, hauden de Soldoten een Schilt aum Kjriez aunjeschloagen, wuaropp jeschräwen stunt, wuarom see am jekjriezicht hauden. Un opp daut Schilt stunt jeschräwen, 'DIT ES DE JUDEN ÄA KJENNICH'.

27 Un aus de Soldoten Jesus jekjriezicht hauden, dan hauden see opp de selwje Jeläajenheit uk noch twee Reiba jekjriezicht. Dän eenen hauden see aun Jesus siene rajchte Sied jekjriezicht, un dän aundren aun siene linkje. 28 Un doamet wia erfelt, waut en de Schreften^e lang em verut jeschräwen wia, nämlich, "Am hauden see aus eena von de Vebräakja jetalt."^f

29 Un de Menschen waut doa wieren vebie jegonen, hauden Jesus bespatat, un see dreikopten, un säden, "Ach, du best doch bloos dee, waut jesajcht haud, daut du Gott sien Tempel venichten kust, un daut du dän en dree Doag wada oppbuen kust. 30 Wan du soo stoakj best, dan rad die doch selfst, un stieej vom Kjriez rauf."

31 Un krakjt soo hauden de väastonende Priestasch un de Schreftjelieede Jesus bespatat, un see säden eena to dän aundren, "Hee haft aundre jerat, oba selfst kaun hee sikj nich raden. 32 Wan hee werkjlich Gott sien Enjesäajenda Kjennich^g von Israel es, dan lot am doch nu krakjt vom Kjriez rauf stieejen, soo daut wie daut wudden seenen, un jleewen kjennen. Un de Reiba dee met Jesus toop jekjriezicht wieren, hauden am uk bespatat.

33 Un opp Meddach wia daut äwa daut gaunze Launt diesta jeworden, un soo wia daut bat Klock 3 no Meddach jewast. 34 Un Klock 3 haud Jesus gaunz lud oppjeschräajen, un säd, "Eli, Eli, lama sabachthani?" Äwasat meent daut, "Mien Gott, mien Gott, wuarom hast du mie veloten?"

35 Un atelje von de Menschen, waut sikj doa hauden rom jestonen, hauden jehieet waut Jesus jesajcht haud, un eena von dee säd, "Kjikj emol, hee roopt dän Profeet Elia."^h See hauden nämlich jedocht, daut Jesus dän Elia jeroopt haud, soo daut hee am sull raden komen. 36 Un eena wia jerant, un haud sikj schwind een Schwomⁱ met suara Wien jefelt, un haud daut aun een langen Stock aunjemoakt, un haud Jesus daut toom drinkjen aunjeboden. Oba eena säd to am, "Wacht emol, well wie seenen auf Elia am vom Kjriez rauf nämen woat."

37 Oba Jesus haud bloos eemol lud jeschräajen, un dan haud hee sien Jeist oppjejäft, un soo wia hee doot jewast. 38 Un krakjt dan haud Gott de Gardien em Tempel, von bowen bat unjen entwei jeräten.

39 Un de Hauptmaun^j haud ver Jesus jestonen, aus hee aum Kjriez jehongen haud, un aus de Hauptmaun jeseenen haud, woo Jesus jestorwen wia, dan säd hee, "Dit es werkjlich Gott sien Sän jewast!"

40 Un doa wieren uk väle Frues jewast, dee dit aula von een Enj auf beoobacht hauden. Un doarunja wieren de Maria von Magdala, un Maria de Mutta von dän kjlienen Jakobus, un von sien Brooda Joses, un de Salome. 41 Dise Frues wieren Jesus aul en de Jäajent von Galiläa hinajraun jegonen, om am met daut auldäachlichet to bedeenen. Un met dise Frues wieren doa uk noch väle aundre Frues, dee met Jesus toop no Jerusalem jekomen wieren.

42-43 Un aus daut meist Owent jeworden wia, wan de Juden sikj emma fa dän Sabat reed jemoakt hauden, un wiel see aum Sabat nich oabeiden durwen, dan wia doa een rikja Maun von daut Darp von Arimathäa no Pilatus jekomen. Sien Nomen wia Josef, un am wort aus een aunstendja Metjliet von daut judische Huage Rot aunerkjant, un hee haud emma no dän Dach jeluat, wan Gott aus Kjennich oppe Ieed rejieren wudd. Un wan Josef sikj uk fa de Judenfierasch jefercht^k haud, doawäajen haud hee sikj daut jewoacht ver Pilatus to komen, om am to froagen, auf hee Jesus sien Kjarpa vom Kjriez nämen durf, soo daut hee daut noch ver dän Sabat, em Grauf nenn lajen kunn. 44 Un Pilatus haud jestaunt, daut Jesus aul doot wia, un soo haud hee sien Hauptmaun jeroopt, un haud am jefroacht auf Jesus aul doot wia. 45 Un aus hee daut utjefungen haud, daut Jesus aul doot wia, dan haud hee Josef de Frieheit jejäft, Jesus sien Kjarpa vom Kjriez to nämen. 46 Un Josef haud sikj een Loaken von reina Kartunzeich^l jekoft, un aus hee un atelje aundre, Jesus sien Kjarpa vom Kjriez jenomen hauden, dan hauden see daut en daut Loaken enjewekjelt, un dan hauden see daut en een Grauf nen jelajcht, waut nämlich von een grooten Steen utjehakt wia, un dan hauden see een grooten Steen, ver dän Engank väa jerolt. 47 Un Maria von Magdala, un Maria de Mutta von Joses, hauden jeseenen, wua see Jesus sien Kjarpa hanjelajcht hauden.