2-3 Un aus de Sonn, sea tiedich Sindach zemorjes oppjekomen wia, dan wieren de Frues no daut Grauf jegonen, un see fruagen sikj omzajcht, "Wäa woat ons dän Steen von ver daut Grauf wajch rollen?" 4 Un aus see hauden oppjekjikjt, dan hauden see jeseenen daut de Steen aul wajch jerolt wia. See hauden daut nämlich aul von wiet auf fauststalen kunt, daut daut Grauf op wia, wiel de Steen wia sea groot jewast.

5 Un aus de Frues en daut Grauf nen jegonen wieren, dan hauden see doa een jungen Maun jeseenen, dee aun äare rajchte Sied jesäten haud, un dee haud een langet wittet Mauntel aun jehaut. Un de Frues hauden sikj sea je-enjst. 6 Oba de Enjel säd to äant, "Enjst junt nich! Ekj weet daut jie no Jesus von Nazaret sieekjen, dän see jekjriezicht hauden. Hee es nich hia, wiel hee es vom Doot oppjestonen. Kjikjt emol, dit es wua see sien Kjarpa han jelajcht hauden. 7 Un wiel jie am hia nich finjen kjennen, dan got doch leewa no siene Jinja, un sajcht to de Jinja, un to Petrus uk, daut Jesus junt no de Galiläa Jäajent veropp jegonen es, un daut wan jie bat doa komen woaren, daut hee sikj dan krakjt soo von junt woat seenen loten, aus hee junt daut aul em verut jesajcht haud."

8 Un de Frues wieren von daut Grauf rut jegonen, un wieren doavon jerant, un see hauden jeflautat, un wieren sea ve-enjst. Un see hauden kjeenem jesajcht, waut see em Grauf jeseenen un jehieet hauden, wiel see sikj soo sea je-enjst hauden.^a

9 Aus Jesus tiedich Sindach zemorjes vom Doot oppjestonen wia, dan haud hee sikj ieescht aun Maria von Magdala openboat, von dee hee nämlich säwen beese Jeista utjedräwen haud. 10 Un Maria wia no Jesus siene Aunhenja jekomen, aus see äwa am jetruat un jeroat hauden, un Maria haud äant daut vetalt, waut see biem Grauf jeseenen haud. 11 Un aus see jehieet hauden, daut Jesus jeläft haud, un daut Maria am jeseenen haud, dan hauden see äa daut nich jejleeft.

12 Nohäa haud Jesus sikj von twee von siene Aunhenja seenen jeloten, aus see von Jerusalem rut jegonen wieren, äwarem Launt. Un Jesus haud sikj aus ne aundre Persoon vestalt, soo daut see am nich hauden kjanen kunt. 13 Un aus see dan no Jesus siene aundre Aunhenja jegonen wieren, dan hauden see äant daut uk nich jejleeft, daut Jesus wada jeläft haud.^b

14 Un lota haud Jesus sikj aun siene alw Jinja openboat, aus see jejäten hauden, un hee haud äant utjeschullen, wiel see soo ieejenkoppich un ongloowsch wieren. Wiel aus see jehieet hauden, woo atelje am jeseenen hauden, aus hee vom Doot oppjestonen wia, dan hauden see äant daut nich jejleeft.

15 Un Jesus säd to siene Jinja, "Got en de gaunze Welt, un prädicht de goode Norecht to aule Menschen, dee nämlich aula to Gott siene Erschaufunk jehieren. 16 Un wäa sikj opp de goode Norecht veloten woat, waut jie wieda prädjen, un sikj doaropp deepen lat, dee woat jerat woaren, un wäa oba nich jleewen woat, woat vedaumt woaren. 17-18 Un derch miene Krauft woaren de Gleubje Wundatieekjens schaufen. Atelje woaren beese Jeista von Menschen utdriewen, un aundre woaren en framde Sproaken räden, un wan see Schlangen opphäwen sullen, un dee äant bieten sullen, ooda wan see waut jeftjet drinkjen sullen, dan woat äant daut nuscht schoden. Un noch aundre woaren äare Henj opp de Kranken nopp lajen, un dee woaren bäta woaren."

19 Un aus de Har Jesus met siene Jinja jerät haud, dan haud Gott am enne Hecht nom Himmel jenomen, wua hee sikj aus Harscha, aun de rajchte Sied, von Gott sien Troon, dol jesat haud. 20 Un de Jinja wieren jegonen, un hauden de goode Norecht, aulewäajen wieda jeprädicht. Un de Har haud met äant met jeschauft, un haud äant de Krauft jejäft, wuamet see Wundatieekjens jeschauft hauden. Un soo haud Jesus de Menschen bewäsen, daut waut de Jinja jeprädicht hauden de Woarheit wia.