2 Un aus de Sabat jekomen wia, dan wia Jesus no de Judenschool jegonen, un haud de Menschen daut Wuat Gottes utjelajcht. Un väle dee am jehieet hauden, staunden äwa waut hee äant jelieet haud, un see fruagen sikj omzajcht, "Von wua haft dis Mensch daut aula häa? Von wua kjricht hee soone Weisheit un Krauft häa, daut hee soone Wundatieekjens doonen kaun? 3 Dit es doch bloos de Descha, un hee es doch bloos Maria äa Sän, un siene Breeda sent doch bloos Jakobus, Joses, Judas, un Simon, un siene Sestren wonen doch uk bloos hia bie ons." Un wiel see sikj daut hauden baudren loten, daut Jesus bloos aus een eefacha Mensch mank äant oppjewossen wia, dan hauden see siene Lieren nich aunjenomen.

4 Un Jesus oba säd, to äant,"Een Profeet woat aulawäajen je-ieet, aus bloos nich en daut Darp, wua hee mank sien Frintschoft un siene Famielje, oppjewossen wia." 5 Un Jesus haud en Nazaret kjeene Wundatieekjens doonen kunt. Hee haud doa bloos atelje Kranken de Henj oppjelajcht, un haud äant jesunt jemoakt. 6 Un Jesus haud jestaunt, äwa woo ongloowsch de Menschen doa wieren jewast.

Un von doa wia Jesus wieda jegonen, un wia von een Darp no daut aundre jegonen, un haud de Menschen daut Wuat Gottes utjelajcht.

7 Een Dach haud Jesus siene twalw Jinja no sikj jeroopt, un haud äant poawies rut jeschekjt daut Gottes Wuat to vebreeden, un hee haud äant de Krauft jejäft, soo daut see de onreine Jeista von de besätne Menschen utdriewen kunnen. 8 Un hee haud äant befolen daut see sikj fa de Reis nuscht metnämen sullen, aus bloos een Gonstock. See durwen sikj kjeen Broot, ooda ekjstra Kjleeda metnämen, un uk kjeen Jelt fa äare Jelttauschen. 9 Jo, un see sullen sikj oba Sandalen aune Feet auntrakjen, oba see sullen sikj nich een tweedet Äwarock met nämen. 10 Un Jesus säd to äant,"Wan jie rut gonen, un jie komen no eene Städ wua jie de Menschen, daut Wuat Gottes lieren wellen, dan sieekjt junt doa wäm dee junt oppnämen woat. Un dan blieft doa soo lang bie dee enne Kost, aus jie miene Bootschoft en de Jäajent prädjen woaren. 11 Un wua junt kjeena oppnemt, ooda wua kjeena miene Bootschoft hieren well, doa sell jie de Menschen woarnen ea jie wieda reisen. Jie sellen junt de Feet nämlich aus een Tieekjen ver äant aufsteewen, wiel doamet woarn jie äant, daut Gott äant fa äa Ongloowen strofen woat. Ekj saj junt de Woarheit, de Menschen waut miene Bootschoft nich jleewen woaren, dee kaun eena met daut Volkj von de Jäajent von Sodom un Gomorra vejlikjen, wiel Gott woat dee aum Jerechtsdach nochmol secha strofen, un nich bloos daut, hee woat dee soogoa noch dolla strofen, aus hee daut Volkj von Sodom un Gomorra strofen woat." 12 Un de Jinja wieren rut jegonen, un hauden to de Menschen jeprädicht, daut see sikj äare beese Denkjens Oat endren sullen, un daut see de Woarheit jleewen sullen. 13 Un see hauden väle Diewels von de besätne Menschen utjedräwen, un see schmäaden väle Kranken met Eelj en, un muaken dee jesunt.

14 Un de Kjennich Herodes haud von aul dise groote Dinja jehieet, waut Jesus jedonen haud, wiel doawäajen wia sien Nomen aul aulewäajen bekaunt jeworden. Atelje hauden jesajcht, "Daut mott Johanes de Deepa sennen, dee dise Dinja jedonen haft. Hee es vom Doot oppjestonen, un doawäajen haft hee soone groote Krauft, daut hee soone Wundatieekjens doonen kaun." 15 Un aundre säden, "Daut mott de Profeet Elia sennen, dee dise Dinja jedonen haft.", un noch aundre säden, "Daut es eena von de Profeeten, dee lang trigj jeläft haud." 16 Oba aus de Kjennich Herodes von Jesus siene Wundatieekjens jehieet haud, dan säd hee, "Daut es Johanes de Deepa, dän ekj haud loten dän Kopp aufhaken, dee dise Wundatieekjen jedonen haft. Un hee es nämlich vom Doot oppjestonen."

17 De Kjennich Herodes haud aun Johanes jedocht, wiel hee haud am faustnämen loten, un haud am om Herodias äa haulwe enstoppen loten. Herodias wia nämlich dän Kjennich sien Brooda Philippus siene Fru, un de Kjennich haud äa aus siene Fru, fa sikj jenomen. 18 Un Herodias haud Johanes nämlich nich lieden kunt. Wiel Johanes haud met dän Kjennich jerät, un hee säd, "Daut es jäajen daut Jesaz, daut du dien Brooda, siene Fru fa die jenomen hast." 19-20 Un daut es wuarom Herodias sikj dan aun Johanes haud rajchnen wult, un wuarom see am dan haud wult ombrinjen loten. Oba de Kjennich haud sikj fa Johanes jefercht, un haud am beschizt, wiel hee haud jewist, daut Johanes een jerajchta Mensch wia, dee Gott sien oppoat jesada Deena wia. Un wan hee sikj Johanes aun jehorcht haud, dan wia hee orruich jeworden, un doch haud hee sikj Johanes emma jieren aun jehorcht.

21 Oba een Dach haud Herodias ne goode Jeläajenheit jefungen, soo daut see sikj aun Johanes rajchnen kunn. De Kjennich haud sikj nämlich een grootet Fast utreeden loten, om sien Jeburtsdach to fieren, un hee haud siene huach Beaumte, un siene huage Militäa Fierasch, un de väaschte Aunjestalde von de Jäajent von Galiläa, fa daut Fast enjelot. 22 Un aus Herodias äare Dochta ver dän Kjennich un siene Jast jekomen wia, dan haud see fa äant jedaunzt, un daut haud dän Kjennich, un siene Jast sea jefollen.

Un de Kjennich räd met de Mejal, un säd, "Froag mie no waut emma die jankat, un daut woa ekj die jäwen." 23 Un hee vespruak äa daut met een Eid, un säd, "Ekj woa die jäwen waut du west, un wan de halft von mien Kjennichsrikj."

24 Un de Mejal wia no äare Mutta jegonen, un haud äa jefroacht, "No waut saul ekj froagen?"

Un äare Mutta auntwuad äa, un säd, "Froag am no Johanes dän Deepa sien Kopp."

25 Un de Mejal wia fuaz jegonen, un see haud sikj jespoot, un wia nom Kjennich jekomen, un see säd, "Ekj well han daut du mie nu fuaz dän Kopp, von Johanes dän Deepa opp ne groote Schiew brinjen latst."

26 Un dän Kjennich haud daut sea leet jedonen, daut de Mejal soont von am jefroacht haud, oba wiel hee äa daut met een Eid, ver aul siene Jast vesproaken haud, kunn hee äa daut nich aufsajen. 27-28 Un soo haud de Kjennich een von siene Wajchta fuaz aunjestalt, daut hee Johanes dän Kopp aufhaken sull, un daut hee dän dan trigj no am brinjen sull. Un soo wia de Wajchta dan uk jegonen, un haud Johanes em Jefenkjnis dän Kopp aufjehakt, un dan haud hee de Mejal dän opp ne groote Schiew jebrocht, un see haud äare Mutta dän jebrocht. 29 Un aus Johanes siene Jinja doavon hauden to hieren jekjräajen, dan wieren see jekomen, un hauden Johanes sien Kjarpa jeholt, un hauden dän en een Grauf nen jelajcht.

30 De Apostel^a hauden Jesus siene Bootschoft en aul de Städen vebreet, wua Jesus äant haud han jeschekjt, un soo wieren see trigj no Jesus jekomen, un dan hauden see am von aules vetalt, waut see oppe Reis jedonen hauden, un waut see de Menschen jelieet hauden.

31 Un dan säd Jesus to siene Jinja,"Komt met mie toop oppoat, no eene Städ wua wie kjennen auleen sennen, soo daut jie junt vepusten kjennen.", wiel doa wieren eegol soo väl Menschen jewast, dee eegol han un häa jekomen wieren, daut see nich mol hauden äten kunt. 32 Un soo wieren see auleen opp een Boot, no eene eensome Städ jefoaren.

33 Un de Menschen hauden jeseenen woo Jesus un siene Jinja opp een Boot wajchjefoaren wieren, un väle von de Menschen hauden Jesus jekjant. Un soo wieren see tofoot, met väle von de Menschen von de Städa toop veropp jerant, no de Städ wua Jesus un siene Jinja aunkomen sullen, un doa hauden see sikj vesaumelt. 34 Un Jesus wia met siene Jinja toop bat Launt jekomen, un aus hee de groote Häad Menschen jeseenen haud, dan haud am daut Leet jedonen om äant, wiel see wieren soo aus vebiestade Schop jewast, dee kjeen Hoad hauden. Un soo haud hee aunjefongen, äant aulahaunt von daut Wuat Gottes uttolajen.

35 Un aus daut aul meist Owent wia jewast, dan wieren de Jinja no Jesus jekomen, un see säden to am, "Wie sent hia wiet von irjent een Darp, en eene eensome Städ, un daut es aul lot. 36 Schekj de Menschen doch wajch, soo daut see sikj en de aunligjende Darpa kjennen Broot kjeepen, wiel hia hant see nuscht toom äten."

37 Un Jesus auntwuad äant, un säd,"Jäft jie äant to äten!" Un eena von de Jinja auntwuad Jesus, un säd, "Eena wudd doch äwa een haulwet Joa schaufen motten, un dan wudd eena noch emma nich jenuach Äten kjeepen kjennen, om aul dise Menschen jenuach Äten to jäwen."

38 Un Jesus auntwuad de Jinja, un säd,"Wooväl Broot ha jie?" Un aus see utjefungen hauden, wooväl Äten see hauden, dan säd eena von de Jinja to Jesus, "Wie hant fief Broot, un twee Fesch."

39 Un Jesus haud de Menschen befolen, daut see sikj aula Grupp wies, oppem Graus dol saten sullen. 40 Un de Menschen hauden sikj en Gruppen von hundat, un von feftich dol jesat. 41 Un dan haud Jesus sikj de fief Broot un de twee Fesch jenomen, un dan haud hee enne Hecht nom Himmel jekjikjt, un dan säd hee Gott dank fa daut Äten, un dan haud hee de Broot en Bieta jebroaken. Un dan haud hee siene Jinja de Bieta Broot jejäft, un see hauden dee dan manke Menschen vedeelt. Un Jesus haud de twee Fesch uk en Bieta jebroaken, un dan haud hee dee aun siene Jinja wieda jejäft, un see hauden dee manke Menschen vedeelt. 42 Un de Menschen hauden aula jejäten, un wieren aula saut jeworden. 43 Un nohäa wieren de Jinja jegonen, un hauden aul daut Äten toop jesaumelt, waut doa wia äwajebläwen, un doa wieren twalw Kjarw voll jewast. 44 Un doa wieren em gaunzen, von onjefäa 5000 Mana jewast, dee doa jejäten hauden, un doatoo hauden äare Frues un Kjinja, sikj uk noch aula saut jejäten.

45 Un fuaz aus de Jinja daut äwajebläwne Äten hauden toopjesaumelt, dan haud Jesus siene Jinja befolen, daut see en daut Boot enstieen sullen, un daut see no de aundre Kaunt Mäa foaren sullen, no daut Darp von Betsaida opptoo. Un dan wia Jesus jegonen, un haud von aul de Menschen aufscheet jenomen. 46 Un aus Jesus de Menschen no Hus jeschekjt haud, dan wia hee opp een Boajch nopp jegonen, wiel hee bäden wull. 47-48 Un daut Boot wia zeowes, met Jinja toop em Medden vom Mäa jewast. Un Jesus wia auleen oppem Launt jewast, aus hee jeseenen haud, woo de Jinja sikj sea aunjestrenjt hauden, jäajen dän Wint väarwajch to komen. Un aus daut zemorjes meist haud aunjefongen to doagen, dan wia Jesus äwarem Mäa jegonen, un hee wudd siene Jinja vebie jegonen sennen. 49-50 Oba aus de Jinja am hauden jeseenen oppem Mäa gonen, dan hauden see sikj sea jefercht, wiel see hauden jedocht, daut hee wia een Jespanst. Un soo hauden see ut Angst jeschräajen, wiel see hauden nämlich aula jeseenen, woo doa wäa oppem Wota jegonen wia. Un fuaz haud Jesus siene Jinja aunjerät, un hee säd,"Siet jetreest, daut sie ekj! Fercht junt nich!"

51-52 Un dan wia Jesus bat daut Boot jegonen, un wia bie de Jinja enjestäajen, un doamet haud de Wint dan uk aul oppjehieet. Un de Jinja hauden Utnom sea jestaunt un jewundat, wiel see hauden daut noch emma nich venomen, woo stoakj Jesus siene Krauft wia, aus hee aul de Menschen met daut bätje Broot, haud to äten jejäft, wiel de Jinja wieren nämlich sea hoatlierich jewast.

53 Un aus see dan aula toop no de aundre Kaunt Mäa jefoaren wieren, dan wieren see bat daut Darp von Genezareth jekomen, wua see daut Boot, dan hauden oppem Eewa nopp jeschlapt. 54 Un aus see von daut Boot utjestäajen wieren, dan hauden de Menschen, Jesus uk fuaz jekjant. 55 Un dan wieren see de gaunze Omjäajent runt jerant, un hauden aul äare Kranke opp Madrauzen no de Städ jebrocht, wua see jehieet hauden, daut Jesus sennen sull. 56 Un wuaemma Jesus jegonen wia, auf derch de Darpa, ooda de Städa, ooda oppem Launt, doa hauden de Menschen, äare Kranke, aum Wajch hanjelajcht, fa am. Un de Kranke hauden Jesus jeprachat, auf see am aunschieren durwen, un wan uk aul mau bloos dän Soom von sien Äwarock. Un aul dee waut am aunjeschieet hauden, wieren jesunt jeworden.