2 Un fuaz aus Jesus von daut Boot utjestäajen wia, dan wia doa een Maun von mank de Jräwa no am jekomen, dee von een onreinen Jeist besäten wia.

3 De Maun haud doa en de Gadara Jäajent mank de Jräwa jewont, un de Menschen hauden am foaken vesocht faust to binjen, un kjeena haud daut jeschauft, nich mol wan see hauden Kjäden jebrukt. 4 Wiel see hauden am aul foaken met Kjäden un iesane Spaunsels faustjebungen, un hee haud dee oba emma aula entwei jebroaken, un kjeena haud am mak moaken kunt. 5 Un hee haud sikj Dach un Nacht emma, mank de Boaj, un en de Jräwa oppjehoolen, waut en de Heelen wieren, un hee haud emma lud jeschräajen, un haud sikj met Steena jeschnäden. 6 Oba aus hee Jesus von wiet auf jeseenen haud, dan wia hee no am jerant, un dan haud hee sikj ver am han jekjneet. 7-8 De Maun wia nämlich von een onreina Jeist besäten, un Jesus haud dän onreinen Jeist befolen, un säd,"Komm von disen Maun rut."

Un de onreina Jeist haud derch dän Maun jerät, un de Maun haud lud jeschräajen, un säd, "Ekj weet wäa du best, du best Jesus, de aulahechsta Gott sien Sän. Waut west du von mie? Ekj pracha die, daut du mie daut met een Eid ver Gott vespräakjen wurscht, daut du mie noch nich kjwälen wurscht."

9 Un Jesus fruach dän onreinen Jeist, "Woo heetst du?"

Un de onreina Jeist auntwuad Jesus, un säd, "Mien Nomen es Legion, wiel wie sent äare väle." 10 Un de onreine Jeista prachaden Jesus sea, daut hee äant nich von de Jäajent wajch schekjen sull.

11-12 Un doa wia dichtbie enne Boaj, ne groote Häad Schwien, un aul de Diewels prachaden Jesus, un säden, "Schekj ons no de Schwien, soo daut wie en dee nen trakjen kjennen." 13 Un Jesus haud äant daut uk fuaz toojeloten, un soo veleeten see dän Maun, un fuaren en de Schwien nen. Un doa wieren bie twee dusent Schwien jewast, un aus de onreine Jeista en de Schwien nen jetrocken wieren, dan wieren de Schwien dän steilen Eewa rauf jemoaracht, em Mäa nen, wua see dan vesopen wieren.

14 Un de Hoad waut doa no de Schwien hauden oppjepaust wieren utjekleift, un see hauden daut en de Staut, un en de gaunze Omjäajent bekaunt jemoakt, waut met dän

besätnen Maun passieet wia. 15 Un de Menschen wieren no Jesus jegonen, wiel see nämlich selfst seenen wullen, waut doa passieet wia. Un aus see no Jesus jekomen wieren, dan haud de Maun, doa bie Jesus jesäten, un hee haud Kjleeda aun jehaut, un hee haud uk kloa denkjen kunt. Un aus de Menschen daut jeseenen hauden, dan hauden see sikj jefercht.

16 Un de Hoad, dee daut nämlich selfst jeseenen hauden, aus Jesus de onreine Jeista von dän Maun rutjedräwen haud, vetalden de Menschen woo daut passieet wia, un waut dan met de Schwien jeworden wia. 17 Un de Menschen hauden Jesus jeprachat, daut hee äare Jäajent veloten sull.

18 Un aus Jesus en daut Boot enjestäajen wia, dan wull de Maun, dee nämlich verhäa besäten wia, Jesus sien Nofolja sennen. Un soo haud hee Jesus jeprachat, auf hee met am met gonen durf. 19 Oba Jesus haud am daut oba veboden, un säd,"Go no Hus, no diene Menschen, un vetal äant von aul de groote Dinja, waut de Har fa die jedonen haft, un woo leeftolich hee die es jewast." 20 Un soo wia de Maun loos jegonen, no de Omjäajent von de Städa von Dekapolis, un haud de Menschen von de groote Dinja vetalt, waut Jesus fa am jedonen haud. Un de Menschen hauden aula sea jestaunt.

21 Un aus Jesus wada met een Boot, äwarem Mäa no de aundre Kaunt jefoaren wia, dan haud sikj doa ne groote Häad Menschen vesaumelt, aus hee doa aune Kaunt Mäa wia jewast.

22 Un eena von de Harschasch von de Judenschool wia doa no Jesus jekomen, un sien Nomen wia Jairus, un aus hee Jesus jeseenen haud, dan haud hee sikj plaut ver am hanjelajcht.^a 23 Un hee haud Jesus sea jeprachat, un säd, "Miene kjliene Dochta licht krank em Bad, un see es meist bat däm stoawen. Ekj pracha die, komm un laj äa diene Haunt opp, soo daut see wudd kjennen jesunt woaren, soo daut see läwen wudd." 24 Un soo wia Jesus met am metjegonen.

Un doa wia ne groote Häad Menschen, dee met Jesus met jegonen wia, un dee hauden am von aule Sieden sea bedrenjt. 25-26 Un doa wia ne Fru, dee fa twalw Joa emma haud Moonatsfluss^b jehaut, dee väl jeläden haud, un dee aul no väle Doktasch no Rot jegonen wia. Un see haud aul äa Jelt vedoktat, un enne Städ daut see wia bäta jeworden, wia see bloos noch kranka jeworden. 27 Un aus see von Jesus jehieet haud, dan haud see sikj mank aul de Menschen mank jedrenjt, un dan haud see Jesus sien Äwarock von hinja Kaunt aunjeschieet. 28 Wiel see haud fa sikj opp stelles jedocht, "Wan ekj uk aul mau bloos wudd siene Kjleeda aunschieren kjennen, dan wudd ekj jesunt woaren." 29 Un fuaz aus see Jesus sien Äwarock aunjeschieet haud, dan haud see met däm bleeden oppjehieet. Un dan haud see daut en äa Kjarpa jespäat, woo äa von de Krankheit jeheelt wort.

30 Un Jesus wia daut uk fuaz enjeworden, daut Krauft von am rut jegonen wia. Un soo dreid hee sikj em Medden von aul de Menschen om, un fruach, "Wäa schieed miene Kjleeda aun?"

31 Un eena von siene Jinja haud am jeauntwuat, un säd, "Du sitst doch woo aule dise Menschen, die von aule Sieden bedrenjen, un dan frajchst du noch, "Wäa schieed mie aun?"

32 Un Jesus haud sikj mau wieda rom jekjikjt, no wäa am aunjeschieet haud. 33 Un de Fru haud jewist daut see wia jesunt jeworden, un aus see no Jesus jekomen wia, dan haud see ut angst jeflautat, un see haud sikj ver am han jelajcht, un haud am de Woarheit jesajcht, äwa aules waut doa passieet wia. 34 Un Jesus räd äa aun, un säd,"Dochta, daut es wiel du jejleeft hast, daut du best jesunt jeworden. Go en Fräd, un sie von diene Krankheit jeheelt!"

35 Un aus Jesus noch emma met de Fru jerät haud, dan wieren doa atelje Menschen, von Jairus sien Hus jekomen, dee nämlich de Harscha von de Judenschool wia. Un see säden to Jairus, "Diene Dochta es doot. Du brukst dän Liera nich wieda baudren."

36 Oba aus Jesus daut jehieet haud, dan säd hee to dän Harscha von de Judenschool,"Fercht die nich, jleew bloos!"

37 Un aus Jesus no dän Harscha sien Hus loos jegonen wia, dan haud hee sonst kjeene von siene Jinja loten met am met komen, aus bloos Petrus, Jakobus, un Johanes, dee nämlich dän Jakobus sien Brooda wia.

38 Un aus Jesus no dän Harscha von de Judenschool sien Hus jekomen wia, dan haud hee jeseenen, woo orruich de Menschen wieren jewast, un woo see jeroat un jehielt hauden. 39 Un aus Jesus em Hus nen jegonen wia, dan säd hee to de Menschen,"Daut es doch nich needich daut jie junt soo oppräajen, un daut jie soo roaren, wiel de Mejal es nich doot, see schlapt bloos." 40 Un de Menschen lachten Jesus bloos ut.

Oba aus Jesus de Menschen aula von daut Hus rut jeschekjt haud, dan neem hee de Mejal äa Voda un Mutta, un siene Jinja, dee am bejleit hauden, un dan wieren see en de Stow nen jegonen, wua de Mejal jeläajen haud. 41 Un Jesus haud de Mejal bie de Haunt jenomen, un säd,"Talita kum!", un daut meent, "Kjliene Mejal, ekj saj die, sto opp!" 42 Un de Mejal wia fuaz oppjestonen, un see haud uk fuaz aunjefongen rom to gonen, wiel see wia aul twalw Joa oolt jewast, un soo wia see oolt jenuach daut see gonen kunn. Un de Voda un Mutta, un de Jinja hauden aula sea jestaunt. 43 Un Jesus haud äant gaunz strenj befolen, daut see kjeenem vetalen sullen, waut hee jedonen haud, un dan haud hee äant befolen, daut see de Mejal sullen Äten jäwen.