Jesus vetald siene Jinja een Jlikjnis von tieen Junkfrues, dee dän Briegaum bejleiten sullen wan hee kjeema, un hee lieed äant daut Gott sien Volkj soo fa am reed sennen sull, aus de Junkfrues fa dän Briegaum sullen reed sennen
25
Un Jesus lieed wieda, un vetald siene Jinja een Jlikjnis, un säd, "Wan Gott em Himmel, äwa sien Volkj oppe Ieed rejieet, dan kaun eena sien Volkj met tieen Junkfrues vejlikjen, dee äare Freundin, äaren Briegaum bejleiten sullen. Un aus de Briegaum boolt komen sull, dan neemen see äare Laumpen, un jinjen dän Briegaum entjäajen.2-4 "Fief von dee Junkfrues wieren Noaren, un hauden sikj bloos äare Laumpen jenomen, oba dee aundre fief wieren weis, wiel see hauden sikj fa äare Laumpen, uk noch jieda ne Kruck Eelj met jenomen.b 5 Un aus daut aul lot jeworden wia, un de Briegaum noch emma nich jekomen wia, dan worden de Junkfrues schleeprich, un soo wieren see uk aula enjeschlopen.
6 "Oba bie Meddanacht rom, dan schrieech doa met eemol wäa, un säd, 'Kjikjt emol, de Briegaum kjemt! Got am schwind entjäajen!'
7 "Un aus de Junkfrues daut hieeden, dan stunden see aula schwind opp, un see stalden sikj äare Laumpen aula en. 8 Oba de Noaren prachaden sikj waut Eelj von de weise, un säden, 'Jäft ons von jun Eelj, wiel onse Laumpen woaren boolt utgonen.'
9 "Oba de weise Junkfrues auntwuaden äant, un säden, 'Nä, wiel wan wie junt von ons Eelj waut jäwen, dan rieekjt daut fa ons nich too. Got un kjeept junt leewa von de Eeljhendla waut Eelj.'
10 "Un aus de Noaren wieren Eelj kjeepen jegonen, dan wia de Briegaum uk aul jekomen, un de weise Junkfrues jinjen met am toop no siene Brut, un von doa jinjen see aula toop no de Haul, wua see de Kjast fieren wullen. Un aus see wieren en de Haul nen jegonen, wua see daut Kjast fieren wullen, dan wort de Däa hinja äant toojemoakt, soo daut kjeena nen komen kunn. 11 Un aus de Noaren schlieslich bat de Haul jekomen wieren, dan stunden see bute vere Däa, un roopten, 'Har! Har! Moak de Däa doch uk noch fa ons op!'
12 "Oba de Briegaum säd bloos, 'Ekj saj junt de Woarheit, ekj weet nich wäa jie sent!'"
13 Dan räd Jesus wieda met siene Jinja, un säd,"Wan ekj nochmol aus Kjennich trigjkomen woa, dan paust opp daut junt daut nich soo gonen woat, aus dise Noaren daut jinkj, wiel jie weeten nich wanea ekj trigjkomen woa."
Jesus vetald siene Jinja een Jlikjnis, un lieed äant daut een trua Deena woat met jratre Veauntwuatungen beloont woaren
14-15 Un Jesus räd wieda, un säd,"Un ekj vetal junt noch een Jlikjnis. Wan Gott em Himmel äwa sien Volkj oppe Ieed rejieet, dan kaun eena am met een Wieet vejlikjen, dee vereisen wull. Un aus de Wieet sikj fa siene Reis reed muak, dan roopt hee siene Deena toop, un doano aus see begoft wieren, trud hee äant sien Vemieejen aun. Dän ieeschten Deena äwajeef hee $5,000.00, un dän tweeden $2,000.00, un dän dredden $1,000.00. Un doamet sullen de Deena fa dän Wieet schaufen, un am mea Jelt vedeenen. Un aus de Wieet daut Jelt haud utjedeelt, dan vereisd hee.
16 "Un de Deena, waut dee $5,000.00 jekjräajen haud, jinkj fuaz un schachad met sien Wieet sien Jelt, un hee vedeend doamet nochmol soo väl Jelt, aus sien Wieet am haud aunvetrut. 17 Un krakjt soo haud de tweeda Deena daut jedonen. Dee jinkj uk fuaz un schachad met sien Wieet sien Jelt, un hee vedeend doamet nochmol $2000.00. 18 Oba de dredda Deena, waut dee $1,000.00 jekjräajen haud, dee jinkj bloos un groof sikj een Loch, un vestuak sien Wieet sien Jelt enne Ieed.
19 "Aus de Wieet no ne lange Tiet trigj jekomen wia, dan jinkj hee met siene Deena veräakjnen. 20 Un aus de ieeschta Deena nom Wieet kjeem, dan läd hee am $10,000.00 väa, un säd, 'Har, du jeefst mie $5,000.00, un kjikj, hia ha ekj die nochmol soo väl vedeent.'
21 "Un de Wieet auntwuad sien Deena, un säd, 'Du best een trua Deena, un du hast goot jedonen. Du best met weinich tru jewast, un soo woa ekj die äwa väl aunstalen. Komm! Well wie ons freien, fa waut du vedeent hast!'
22 "Un aus de tweeda Deena nom Wieet jekomen wia, dan läd hee am $4,000.00 väa, un säd, 'Har, du jeefst mie $2,000.00, un kjikj, hia ha ekj die nochmol soo väl vedeent.'
23 "Un de Wieet auntwuad sien Deena, un säd, 'Du best een trua Deena, un du hast goot jedonen. Du best met weinich tru jewast, un soo woa ekj die äwa väl aunstalen. Komm! Well wie ons freien, fa waut du vedeent hast!'
24 "Un aus dee dredda Deena schlieslich uk noch nom Wieet jekomen wia, dan säd hee to sien Wieet, 'Har, ekj wist daut du een strenja Mensch best. Wiel du best soo aus eena dee arnten deit, wua hee nich jeseit haft, ooda, soo aus eena dee Jeträajd en nemt, wua hee nich jedrascht haft. 25 Un doawäajen enjst ekj mie fa die, un ekj jinkj un vestuak diene $1,000.00 enne Ieed, un kjikj, hia hast du diene $1,000.00 trigj.'
26-27 "Oba de Wieet auntwuad dän Deena, un säd, 'Du best doch uk bloos een beesa fula Deena! Wan du daut aul goot jewist hautst, daut ekj soo strenj sie, dan hautst du dee $1000.00, doch no ne Bank nämen sult, un dan haud mie daut Jelt doa dan weenstens noch waut Zinsen vedeent.'
28 "Dan deend de Wieet siene aundre Deena aun, un säd, 'Nämt dis fulen Deena dee $1,000.00 wajch, un jäft dän ieeschten Deena dee, waut dee $10,000.00 haft. 29 Wiel dee waut tru sent, woat mea aunvetrut woaren, un see woaren emma mea aus jenuach han. Oba dee waut nich tru sent, woat daut bätje dan noch wajchjenomen, waut see hant. 30 Un soo schmiet disen Daugeniks rut, em diestren nen, wua de Menschen hielen, un ut Weedoag met de Tänen kjnirschen.'"
Jesus vetald siene Jinja daut wan hee nochmol aus Kjennich trigj no de Ieed komen woat, dan woat hee de Jerajchte un de Onjerajchte rechten
31 Jesus räd wieda, un säd,"Wan ekj aus Gott sien Utjewälda von mank Menschen, en miene Harlichkjeit trigj no de Ieed komen woa, dan woaren mie aul Gott siene Enjel bejleiten, un ekj woa dan aus Kjennich, opp mien harlichen Troon dol saten, un rejieren. 32 Un aule Velkja oppe Ieed woaren ver mie vesaumlt woaren, un ekj woa dee soo uteneen deelen, aus wan een Hoad siene Schop von siene Kosen deelt. 33 De jerajchte Menschen woaren soo aus Schop, no miene rajchte Sied gonen, un de Onjerajchte woaren soo aus Kosen, no miene linkje Sied gonen.
34 "Dan woa ekj to de Jerajchte sajen, 'Mien Voda haft junt jesäajent. Komt no mie, un nämt junt jun Poat von miene Rejierunk, waut Gott fa junt aul von dan haft reed jemoakt, aus hee de Welt erschaufen haud. 35-36 Wiel aus ekj hungrich un darschtich wia, dan jeew jie mie to äten un drinkjen, un aus ekj aus een Framda no junt kjeem, dan neem jie mie opp. Un aus ekj kjeene Kjleeda haud, dan jeew jie mie Kjleeda, un aus ekj krank wia, dan fläajd jie mie, un aus ekj em Jefänkjnis wia, dan kjeem jie mie besieekjen.'
37 "Dan woaren see mie froagen, 'Har, wanea wieescht du hungrich, ooda darschtich, daut wie die to äten, ooda drinkjen jeewen? 38 Un wanea wieescht du bie ons een Framda, ooda onen Kjleeda, daut wie die hant oppjenomen, un Kjleeda jejäft? 39 Un wanea wieescht du krank, ooda em Jefänkjnis, daut wie die besochten?'
40 "Un dan woa ekj äant aus Kjennich auntwuaden, un sajen, 'Ekj saj junt de Woarheit, doano aus jie eene von dise jerinjste von miene Breeda bedeent hant, soo ha jie mie uk bedeent.'
41 "Dan woa ekj uk to de Onjerajchte sajen, 'Fuat met junt, jie vedaumde Menschen, un got en daut eewje Fia nen, waut Gott fa dän Diewel, un fa siene Enjel haft reed jemoakt! 42 Wiel aus ekj hungrich un darschtich wia, dan jeew jie mie nuscht too äten, ooda drinkjen. 43 Un aus ekj aus een Framda no junt kjeem, dan neem jie mie nich opp, un aus ekj kjeene Kjleeda haud, dan jeew jie mie kjeene Kjleeda. Un aus ekj krank wia, un em Jefänkjnis ensetten must, dan kjeem jie mie uk nich besieekjen.'
44 "Dan woaren see mie froagen, 'Har, wanea wieescht du hungrich ooda darschtich, ooda wanea wieescht du bie ons een Framda? Ooda, wanea wieescht du onen Kjleeda, ooda krank, ooda em Jefänkjnis, daut wie die nich bedeenden?'
45 "Un dan woa ekj äant auntwuaden, un sajen, 'Ekj saj junt de Woarheit, doano aus jie eene von dise jerinjste von miene Breeda, nich bedeent hant, soo ha jie mie uk nich bedeent.'"
46 Un Jesus räd wieda, un säd,"Dan woaren de Onjerajchte no de Städ gonen, wua äant woat eewich bestroft woaren, un de Jerajchte oba, no de Städ wua see eewich läwen woaren."