3 Lota, wia Jesus bat dän Eeljboajch jekomen, un aus hee sikj doa haud dol jesat, dan kjeemen siene Jinja no am, aus doa sonst kjeene Menschen wieren, un eena von dee fruach am, un säd, "Saj ons wanea daut aula passieren woat, waut du ons von dän Tempel sätst. Wanea woat dee venicht woaren? Un waut es daut Tieekjen, waut daut aunwiesen woat, daut du trigjkomen woascht, un daut dise Tiet en dee wie nu läwen, to Enj komen woat?"

4 Un Jesus auntwuad siene Jinja, un säd, "Seet daut jie junt von kjeenem veleiden loten. 5 Wiel väle woaren oppkomen, un sajen, 'Ekj sie de Christus!', un see woaren väle veleiden. 6 Un jie woaren von Kjrich hieren, un woo met Kjrich woat jedreift woaren, oba enjst junt nich fa waut jie hieren. Wiel aul soont mott ieescht passieren, ea dise Tiet en dee wie nu läwen to Enj komen woat, un dan woa ekj trigjkomen. 7 Een Volkj woat jäajen een aundret kjampfen, un een Kjennich jäajen een aundren, un daut woat aulewäajen Hungaschnoot un Ieedbäben jäwen. 8 Oba met aul dit woat daut noch mau bloos soo sennen, aus wan ne Fru een Kjint to Welt brinjen deit. Wiel soo aus ne Fru äare Weedoag emma dolla toonämen, ea see een Kjint to Welt brinjt, soo motten dise Dinja emma dolla toonämen, ea dise Tiet en dee wie nu läwen to Enj komen woat.

9-10 "Menschen woaren junt veroden, un vefoljen, un ombrinjen, un aule Velkja oppe Ieed woaren junt haussen, wiel jie fa mie läwen un räden, un dan woaren väle vom Gloowen auffaulen, un sikj omzajcht veroden un haussen. 11 Un väle woaren oppkomen, un sajen see sent Profeeten, un met äare Läajes woaren see väle veleiden. 12 Un de Menschen äa beeset Läwen woat emma dolla toonämen, soo daut de mieeschte sikj omzajcht nich mea woaren leewen. 13 Oba wäa dit aula bat aum Enj too uthoolen woat, un mie woat tru bliewen, dän woat von daut komende Jerecht jerat woaren. 14 Un de goode Norecht, daut Gott aus Kjennich oppe Ieed rejieren woat, woat mank aule Velkja oppe Ieed jeprädicht woaren, un dan woat dise Tiet en dee wie nu läwen to Enj komen."

15-16 "Oba de Dach woat noch komen, wan jie daut oppscheiseljet Jestault em Tempel woaren seenen, wuavon de Profeet Daniel jeschräwen haud. (Wäa sikj dit noläst, saul sikj dit mau sea to Hoaten nämen!) Un jie woaren seenen woo daut Jestault en dän Tempel stonen woat, un woo dee dän Tempel entheiljen woat, un dan sellen deejanje, waut en de Jäajent von Judäa sent, seenen daut see wajch komen, un sikj manke Jebirj vestäakjen. Wiel dit es daut Tieekjen, daut de groote Triebsaulstiet aunfangen woat. 17-18 Un wäa dan toofalich woat buten sennen, saul nich noch schwind em Hus nen ranen sikj waut holen, ooda, wäa dan krakjt oppem Flekj wua es, saul nich noch schwind no Hus ranen sien Mauntel holen. Dee sellen bloos seenen daut see wajch komen. 19 De Frues waut dan woaren schwanga sennen, ooda dee kjliene Kjinja aune Broost foodren, woat daut to dise Tiet besondasch schwoa faulen. 20 Bät daut junt dit nich krakjt em Winta, ooda aum Sabat auntrafen woat, wiel dan woat junt daut besondasch schwoa faulen. 21 Wiel soone schrakjliche Tiet aus dit, haft daut noch niemols ea jejäft, un soone woat daut uk niemols wada jäwen. 22 Dise Tiet woat soo schrakjlich sennen, daut wan Gott dee nich vekjartren wudd, dan wudd kjeena dee äwaläwen. Oba om sien utjewäldet Volkj haulwen, woat hee dee vekjartren.

23 "Wan junt dan wäa sajen woat, 'Kjikjt emol, hia es de Christus!', ooda, 'Kjikjt emol, dort es hee!', dan jleeft dee daut nich. 24 Wiel Menschen woaren oppkomen, un see woaren junt väalieejen, un sajen see sent Profeeten, un daut see de Christus sent. Un see woaren groote Wundatieekjens doonen, wuamet see väle veleiden woaren, un wuamet see soogoa Gott sien utjewäldet Volkj veleiden wudden, wan daut mäajlich wia. 25 Nämt junt dit mau aula sea to Hoaten, wiel ekj saj junt dise Dinja em verut, soo daut jie dee erkjanen kjennen, wan dee passieren.

26 "Un wan Menschen junt woaren sajen, 'Kjikjt, de Christus es enne Wiltnis!', dan got nich no de Wiltnis no mie to sieekjen, ooda, wan see sajen, 'Kjikjt, dee helt sikj hia en een Hus opp!', dan jleeft dee daut nich. 27 Wiel krakjt soo kloa aus een Blitz dän gaunzen Himmel oppdacht, wan dee wua enschleit, soo woaren aule Menschen daut kloa weeten, wan ekj aus Gott sien Utjewälda, von mank Menschen, trigj jekomen sie. 28 Un krakjt soo secha aus de Oshakasch eenem emma wiesen wua daut Os es, soo woaren dise Tieekjens daut kloa moaken, daut dise Tiet en dee wie nu läwen, boolt to Enj komen woat."

29 Un Jesus räd wieda, un säd,"Un fuaz no dise schwoare Triebsaulstiet, woat Gott dän Himmel gaunz veschedren. De Sonn un de Mon woaren dan nich mea schienen, un de Stierns woaren dan vom Himmel rauf faulen, un soo woaren de himlische Machten vescheddat woaren. 30 Un dan woat daut Tieekjen aum Himmel vedäl komen, waut aule Velkja oppe Ieed daut kloa aunwiesen woat, daut ekj Gott sien Utjewälda, von mank Menschen sie, un dan woaren see sea truaren. Un dan woaren see seenen, woo ekj oppe Wolkjen, vom Himmel rauf komen woa, un dan woaren see miene Krauft, un miene groote Harlichkjeit seenen. 31 Un dan woaren see hieren, woo ne Trompeet lud schaulen woat, un doamet woa ekj miene Enjel, äwa de gaunze Welt rut schekjen, om aul dee toop to saumlen, dee dan woaren wirdich sennen, to Gott sien erwäldet Volkj to jehieren."

32 Un Jesus lieed wieda, un vetald siene Jinja een Jlikjnis, un säd, "Wan ekj aus Gott sien Utjewälda, von mank Menschen, trigjkomen woa, dan woat daut soo sennen aus met een Fieejenboom, dee em Farjoa jreene Bläda kjricht, wiel dan weet jie daut Somma boolt doa es. 33 Un krakjt soo woat daut sennen, wan jie aul dise schrakjliche Dinja seenen. Wiel dan woat daut soo sennen, aus wan ekj ver ne Däa stonen wudd, un aul mau bloos em Hus nen gonen brukt, wiel dan woa ekj fuaz doa sennen. 34 Ekj saj junt de Woarheit, daut de Menschen von dise Tiet, en dee wie nu läwen, woaren nich aufstoawen ea aul dit passieren woat. 35 Horcht no waut ekj junt saj, wiel wan de Himmel un Ieed uk vegonen sullen, doawäajen woaren dise Dinja waut ekj junt jesajcht ha secha passieren.

37 "Wan daut bat doa es, daut ekj aus Gott sien Utjewälda, von mank Menschen, trigj no de Ieed komen woa, dan woaren de Menschen krakjt soon gottlooset Läwen fieren, aus de Menschen von Noah siene Tiet. 38 Wiel to Noah siene Tiet hauden de Menschen emma Fasten jefieet, un see frieden un befrieden sikj, soo aus see daut emma jedonen hauden. Un soo läwden see dan onen Sorjen, bat aun dän Dach daut Noah em Schepp nen jinkj. 39 Un kjeena kjemmad sikj om waut äant passieren wudd, bat äant de Äwaschwamunk äwakjeem, un äant aula wajch schlapt. Un soo woat daut nochmol sennen, wan ekj aus Gott sien Utjewälda, von mank Menschen, trigj no de Ieed komen woa.

40 "Un wan twee Mana dan toofalich oppem Flekj wua woaren schaufen, dan woat eena von dee beid met jenomen woaren, un dän aundren woat hinjaloten woaren. 41 Ooda, wan twee Frues toofalich wua woaren Weit molen, dan woat eene von dee beid met jenomen woaren, un dee aundre woat hinjaloten woaren.

42 "Doarom paust mau sea opp, un siet waka," säd Jesus, "wiel jie weeten nich wanea jun Harn trigjkomen woat. 43 Un nämt to Hoaten waut ekj junt nu sajen woa. Wan een Wieet daut wist, daut een Deef de Nacht en sien Hus enbräakjen wull, dan wudd hee sikj doch nich hanlajen un schlopen. Dan wudd hee sikj dän Deef doch aufluaren, soo daut hee daut väabieejen kunn, daut dee am bestälen wudd. 44 Doarom sell jie dan uk emma reed sennen, wiel jie woaren doa nich met räakjnen, wan ekj aus Gott sien Utjewälda, von mank Menschen, trigj no de Ieed komen woa."

45 Un Jesus vetald siene Jinja noch een Jlikjnis, un säd, "Mol sajen een Wieet wull vereisen, un hee stald sien Deena äwa sien gaunzet Hushault aun. Woo wudd een trua un kluaka Deena sikj vehoolen? 46 Een trua Deena wudd siene Oabeit emma tru verechten, un hee wudd seenen daut siene Metdeena auledach emma to äten hauden. Un wan sien Wieet trigjkomen wudd, dan wudd sien Deena sikj doch sea freien kjennen, daut hee sien Wieet tru jedeent haud. 47 Ekj saj junt de Woarheit, soon Deena wudd de Wieet dan äwa aules aunstalen waut hee haud.

48-49 "Oba waut wudd sennen, wan de Deena een beesa Mensch wia, dee to sikj selfst säd, 'Mein Wieet woat noch lang nich trigjkomen, un soo kaun ekj doonen waut ekj well.', un dee fangt aun mank siene Metdeena rom to schlonen, un hee frat un sipt bloos, met aundre Supasch toop? 50-51 Dan wudd sien Wieet met eemol trigjkomen, wan de Deena doa nich met räakjnen wudd, un dan wudd dee am schentlich vepitschen, un am sien Poat met de Heichla toop jäwen, en dee Städ wua de Menschen hielen, un ut Weedoag met de Tänen kjnirschen."