2-3 Un Jesus roopt een Kjint, un hee stald daut ver siene Jinja han, un säd,"Ekj saj junt de Woarheit, wan jie june Enstalunk nich endren, un jie deemootjen junt nich soo aus kjliene Kjinja, dan woat Gott em Himmel niemols äwa junt rejieren. 4 Wäa sikj dan oba soo deemooticht aus dit Kjint, dee es de jratsta von de Menschen äwa dee Gott nochmol rejieren woat. 5 Un wäa soon Kjint aus dit dan soo oppnemt, aus wan see mie oppnämen wudden, dee nemt mie dan uk opp. 6 Oba wäa eene von miene jerinjste Jinja toom sindjen veleit, fa däm wia daut bäta wan am een Molsteen rom dän Hauls jehongen wort, un daut am dan en de deepste Städ em Mäa nen jeschmäten wort, soo daut dee doa secha vesupen must."

7 Jesus räd wieda, un säd,"Un fa de Weltmenschen woat daut oba nochmol schrakjlich sennen, wiel daut es ommäajlich daut see de Vesieekjungen ut däm Stich komen kjennen. Oba fa dee waut aundre toom sindjen veleiden, woat daut nochmol besondasch schrakjlich sennen!

8 "Doarom paust fa de Vesieekjungen opp! Wan du met diene Henj ooda Feet waut deist, waut die toom sindjen veleiden well, dan hia doch bloos fuaz opp. Sie met diene Henj un Feet krakjt soo strenj, aus wan eena sikj dee wudd aufhaken loten, soo daut eena dan nich sindjen kunn. Daut es bäta du best kjräplich un lom, un du hast daut eewje Läwen, aus daut dien gaunza Kjarpa en daut eewje Fia jestroft wort. 9 Un wan du waut sitst waut die toom sindjen veleiden well, dan kjikj doch bloos fuaz wajch. Sie met diene Uagen krakjt soo strenj, aus wan eena sikj een Uag utplekjen wudd, soo daut eena dan nich sindjen kunn. Daut es bäta wan du opp een Uag blint best, un du hast daut eewje Läwen, aus daut dien gaunza Kjarpa, en daut halen Fia jestroft wort.

10 "Seet dan daut jie kjeene von dise kjliene Kjinja veachten, wiel mien himlischa Voda räakjent dee soo väl, daut hee äant haft Schutzenjel jejäft, dee to aulen Tiet ver mien Voda em Himmel komen." ^†

12 Un Jesus lieed wieda, un säd,"Waut meen jie? Wan een Mensch hundat Schop enne Jebirj wua heeden deit, un am vebiestat eene von dee, dan velat hee de näajen-un-näajentich, un dan jeit hee, un sieekjt no daut eene waut sikj vebiestat haud. 13 Un ekj saj junt de Woarheit, wan hee daut eene vebiestade Schop jefungen haft, dan freit hee sikj dolla to daut eene, aus to dee näajen-un-näajentich waut nich vebiestat wieren. 14 Un krakjt soo aus een Hoad nich mol een Schop velieren well, soo well jun himlischa Voda uk nich, daut eene von dise kjliene Kjinja veloaren gonen."

15 "Wan dien Brooda em Harn sikj aun die vesindicht, dan go du auleen no am, onen daut irjentwäa doavon weet, un wies am woo hee sikj vesindicht haft. Wan hee daut ensitt, waut du am sajchst, dan hast du dien Brooda trigj jewonnen. 16 Oba wan hee sien Fäla nich toostonen well, dan go wada no dien Brooda, un nemm die twee ooda dree Zeijen met, dee daut aula bestädjen kjennen, wan du dien Brooda wada wäajen sienen Fäla aunrätst.^† 17 Un wan hee sienen Fäla dan noch emma nich toostonen well, dan saust du de gaunze Vesaumlunk de Sach väastalen. Un wan dien Brooda sienen Fäla dan noch emma nich toosteit, dan sell jie am von june Vesaumlunk rut steeten, un am fa een gottloosa Mensch talen, ooda fa een faulscha Takskollakjta, dee sikj nich met junt vesaumlen doaf. 18 Un ekj saj junt de Woarheit," säd Jesus,"waut jie hia oppe Ieed vebeeden woaren, daut woat em Himmel aul veboden sennen, un waut jie hia oppe Ieed erlauben woaren, daut woat em Himmel aul erlaubt sennen.

19 "Un ekj saj junt wada, wan doa bie junt twee Breeda em Harn sent, dee sikj hia oppe Ieed äwa irjentwaut eenjen, dan brucken see mien himlischa Voda bloos froagen, un hee woat daut fa äant doonen. 20 Wiel wua twee ooda dree vone miene Jinja, sikj en mien Nomen vesaumlen, doa sie ekj mank äant."

21 Dan kjeem Petrus no Jesus, un fruach, "Har, woo lang saul ekj mien Brooda vezeien, wan hee sikj aun mie vesindjen deit? Rieekjt daut too wan ekj am fa säwen Fäla vezeij?"

22 "Nä", säd Jesus,"Ekj saj, du saust am nich bloos säwenmol vezeien, du saust am zäwentich mol säwen mol vezeien, ooda aundasch jesajcht, du saust am jiedats mol vezeien, wan hee sikj aun die vesindicht."

23 Un Jesus räd wieda, un säd,"Ekj woa junt mol erkjläaren wuarom eena sienen Brooda soo aus dit vezeien saul, wiel wan eena sikj von Gott em Himmel rejieren lat, dan haundelt hee met eenem, een bät soo aus jan irdischa Kjennich, aus hee met siene Deena veräakjend. 24 Un dän Kjennich wort een Deena väajebrocht, dee am miere Millionen Dolla schuldich wia. 25 Un wiel de Deena siene Schult nich betolen kunn, dan befool sien Wieet, daut siene aundre Deena dän Schildna, un siene Fru, un Kjinja aus Sklowen vekjeepen sullen, un daut see aul sien Hab un Goot uk vekjeepen sullen, soo daut de Wieet dan weens noch waut jäajen de Schult trigj kjriejen kunn.

26 "Oba de Deena schmeet sikj lank ver sien Wieet han, un hee prachad am, un säd, 'Sie doch jeduldich met mie, wiel ekj woa die de Schult noch aula auftolen.' 27 Un dän Wieet jaumad daut äwa sien Deena, un soo vejeef hee am aules waut hee am schuldich wia, un dan leet hee am gonen.

29 "Dan schmeet sien Metdeena sikj ver am han, un hee prachad am, un säd, 'Sie doch jeduldich met mie, wiel ekj woa die de Schult noch auftolen.' 30 Oba de Deena leet sikj nuscht beräden, un hee jinkj un leet sien Metdeena enstoppen. Un sien Metdeena must doa dan soo lang em Jefenkjnis ensetten, bat hee siene Schult gaunz aufjetolt haud.

31 "Aus de Wieet siene aundre Deena, dit aula hauden too jeseenen, dan stieed äant daut sea. Un see jinjen un vetalden dän Wieet, waut de beesa Deena jedonen haud. 32-33 Un de Wieet leet sien Deena, wada no am komen, un hee säd, 'Du best werkjlich een beesa Deena! Wiel ekj vejeef die aules waut du mie schuldich wieescht, wiel du mie soo aufprachazhd, un soo hautst du die dan doch uk äwa dien Metdeena erboarmen sult.' 34 Un de Wieet oajad sikj soo sea äwa sien Deena, daut hee am aun de Stautsdeena äwajeef, soo daut see dän dan soo lang kjwälen sullen, bat hee siene Schult gaunz aufjetolt haud."

35 Un Jesus räd wieda, un säd,"Un krakjt soo woat mien himlischa Voda een jiedra von junt bestrofen, wan jie aul june Breeda nich von Hoaten vezeien."