Jesus neem Petrus, Jakobus un Johanes, opp een huagen Boajch nopp, un doa wort am ver äant vewaundelt
17
1-2 Sas Doag lota haud Jesus sikj Petrus, Jakobus, un Jakobus sien Brooda Johanes oppoat jenomen, un haud äant opp een huagen Boajch nopp jenomen. Un aus see doa wieren auleen jewast, dan wort Jesus ver siene Jinja ve-endat, un sien Jesecht dacht soo kloa aus de Sonn, un siene Kjleeda worden soo kloa aus een wittet Licht. 3 Un seet junt, met eemol wieren Moses un de Profeet Elia, doa uk oppem Boajch ver de Jinja, un see vetalden doa met Jesus.4 Dan vemuld Petrus sikj, un säd, "Har, daut es fa ons goot, daut wie hia sent! Wan du west, dan stal ekj hia fa junt dree Koten opp, eene fa die, eene fa Moses, un eene fa dän Profeet Elia."
5 Oba aus Petrus doa noch met Jesus jerät haud, dan kjeem äant eene dache Wolkj äwa, un seet junt, dan hieeden see ne Stemm von en de Wolkj, un dee Stemm säd, "Dit es mien leewa Sän met dän ekj gaunz tofräd sie, horcht waut hee junt sajcht!" 6 Aus de Jinja de Stemm hieeden, dan follen see lank oppem Jesecht han, un see enjsten sikj ferchtalich.
7 Un Jesus kjeem no siene Jinja, un hee schieed äant aun, un säd,"Stot opp, un enjst junt nich!" 8 Un aus de Jinja oppkjikjten, dan sagen see doa sonst kjeenem, aus bloos Jesus.
9 Aus Jesus un siene Jinja vom Boajch wieren rauf jekomen, dan befool Jesus äant, un säd,"Waut jie oppem Boajch jeseenen hant, sell jie noanich wieda vetalen, bat Gott mie aus sien Utjewälda von mank Menschen, vom Doot haft oppjewoakt."
10 Un de Jinja fruagen Jesus, "Stemt daut wan de Schreftjelieede sajen, daut de Profeet Elia ver dän Christus komen saul?"
11 Un Jesus auntwuad äant, un säd,"Daut stemt aul daut Elia toieescht komen woat, un daut hee daut Volkj fa mie reed moaken woat. 12 Oba ekj saj junt, Elia wia aul jekomen, oba de Menschen hauden am nich erkjant, un see deeden met am bloos soo aus see wullen. Ekj sie Gott sien Utjewälda von mank Menschen, un soo aus see daut dan met Johanes jedonen hauden, soo woaren see daut uk noch met mie doonen." 13 Dan vestunden de Jinja daut Jesus haud Johanes de Deepa jemeent, aus hee to äant von dän Profeet Elia räd.
Jesus juach een Beese Jeist, von een Jung rut
14-15 Un aus Jesus un siene Jinja vom Boajch wieren rauf jekomen, dan kjeemen see bat ne Häad Menschen, un doa wia een Maun dee no Jesus kjeem, dee sikj ver am han kjneed, un säd, "Har, erboarm die äwa mien Sän, wiel hee es ersennich, un hee kjricht soone Aunfaulen, daut hee foaken em Fia ooda em Wota nen felt. 16 Ekj ha am aul no diene Jinja jebrocht, oba see kunnen am nich bäta moaken."
17 Un Jesus säd,"Ach, jie Menschen von vondoag sent een ongleubjet un vedreidet Volkj! Ekj sie doch aul soo lang met junt toop jewast, un jie jleewen noch emma nich. Woo lang woa ekj jun Ongloowen noch vedroagen motten? Brinjt mie dän Jung mol häa!" 18 Dan vemond Jesus dän beesen Jeist, waut en dän Jung wia, un doamet veleet dee dän Jung, un de Jung wort fuaz jesunt.
19 Nohäa wieren de Jinja auleen met Jesus toop, un see fruagen am, "Wuarom kunn wie dän beesen Jeist nich utdriewen?"
20 Un Jesus auntwuad äant, un säd,"Daut es wiel jie nich jenuach Gloowen hant. Wiel ekj saj junt de Woarheit, wan jun Gloowen aul mau soo groot wia aus een Sampkuarn, dan wudd jie too dän Boajch sajen, daut dee sikj von eene Städ no ne aundre vesaten sull, un dan wudd dee sikj vesaten. Wan jie soon Gloowen hauden, dan wia junt nuscht ommäajlich." †
Wada vetald Jesus siene Jinja, daut hee boolt wudd stoawen motten
22-23 Aus Jesus siene Jinja aula en de Galiläa Jäajent toop jekomen wieren, dan säd Jesus to äant,"Ekj sie dee dän Gott sikj von mank Menschen utjewält haft, un mie woat aun Menschen verot woaren, dee mie ombrinjen woaren, oba benna dree Doag woat Gott mie vom Doot oppwakjen." Un de Jinja wieren sea truarich aus see daut hieeden.
Jesus told dän Tempel Taks uk wan am daut nich troff
24 Aus Jesus un siene Jinja no Kapernaum jekomen wieren, dan kjeemen dee Mana waut dän Tempel Taks oppnämen no Petrus, un see fruagen am, "Tolt jun Liera nich dän Tempel Taks?"
25 Un Petrus säd bloos fuaz, "Jo, hee tolt dän." Dan kjeem Petrus en daut Hus nen, wua Jesus wia, un ea hee Jesus waut sajen kunn, dan fruach Jesus am,"Simon Petrus, waut denkjst du? Von wäm nämen de irdische Kjennichs dän Zoll, un de Opploag? Nämen see daut von äare ieejne Säns, ooda von äare Birja?"
26 Un Petrus auntwuad am, un säd, "Von äare Birja."
Un Jesus auntwuad Petrus, un säd,"Dan sent de Kjennichs äare Säns vom Zoll tolen veschoont, un soo es daut dan uk fa mie, wiel ekj Gott sien Sän sie. 27 Oba go doawäajen nom Mäa, un schmiet die doa ne Angel em Wota nen, un moak dän ieeschten Fesch dän du die jripst daut Mul op. Un doa em Mul vom Fesch woascht du een Jeltstekj finjen, waut krakjt too rieekjen woat, daut du fa ons beid dän Tempel Taks betolen kaust. Nemm daut Jeltstekj, un go un tol fa ons dän Tempel Taks, wiel wie wellen de Mana, dee dän Taks ennämen, nich een Aunstoos sennen."