Jesus lieed daut eena nich de Aunerkjanunk von Menschen sieekjen saul
6
Jesus lieed wieda, un säd,"Paust sea opp daut jie june goode Woakjen nich soo ver Menschen doonen, daut see junt doafäa aunerkjanen sellen. Wiel wan jie june goode Woakjen bloos ver Menschen doonen, dan woat jun himlischa Voda junt nich beloonen doafäa."Jesus lieed äwa woo eena de Oame uthalpen saul
2 "Wan du de Oame waut jefst, dan moak daut nich aulewäajen bekaunt, un stal die dan uk nich oppfaulent han. Sie nich soo aus de Heichla wan see de Oame waut jäwen, wiel see moaken daut enne Judenschoolen un oppe Hauptgaussen aulewäajen bekaunt; un see loten sikj uk Menschen veropp gonen, dee fa äant met Trompeeten spälen motten, soo daut aulemaun äant lowen saul. Ekj saj junt de Woarheit, wan de Menschen äant lowen, dan es daut aules, waut see fa een Loon kjriejen woaren; un Gott woat äant dan nochmol nich beloonen doafäa. 3-4 Oba wan du de Oame waut jefst," säd Jesus,"dan hool de Sach bloos fa die, un lot kjeenem weeten waut du jedonen hast. Un dien himlischa Voda dee em Jeheemen aules sitt, woat die dan frie ver aulem beloonen."
Jesus lieed äwa woo eena to Gott bäden saul
5 "Wan jie too Gott bäden, dan siet nich soo aus de Heichla wan see sikj oppfaulent hanstalen, wiel see bäden emma jieren enne Judenschoolen un oppe Hauptgaussen, soo daut aulemaun äant seenen saul. Ekj saj junt de Woarheit, wan de Menschen äant bäden seenen, dan es daut aules waut see fa een Loon kjriejen woaren; un Gott woat äant nochmol nich beloonen doafäa. 6 Oba wan du bäden deist, dan go fa die auleen en eene Stow nen, un moak de Däa hinja die too, un dan bäd doa too dien himlischa Voda em Jeheemen. Un dien himlischa Voda, dee em Jeheemen aules sitt, woat die dan frie ver aulem beloonen.
7 "Wan jie too Gott bäden,", säd Jesus,"dan sell jie uk nich soon Jeplaupa wadaholen, soo aus de gottloose Menschen daut emma doonen, wan see äare Aufjetta aunbäden. Wiel see meenen äant woat bäta jehieet woaren, wan see väl sajen. 8 Jie sellen nich aulahaunt onneedjet wadaholen, wiel jun himlischa Voda weet waut junt aules fält, ea jie am doano froagen. 9 Wan jie bäden, dan bät soo aus dit,
'Gott em Himmel, du best ons Voda.
Ekj bäd daut aulemaun daut erkjanen mucht, daut dien Nomen heilich es, wiel du heilich best,
un daut eena dien Nomen dan uk doano ieren sull.
10 Ekj bäd daut du boolt aus Kjennich oppe Ieed rejieren wurscht,
un daut dien Wellen soo oppe Ieed mucht jedonen woaren,
aus daut em Himmel jedonen woat.
11 Jeff ons vondoag daut Äten waut ons auledach fält,
12 un vezei ons doano aus wie dee vezeien, dee sikj aun ons veschuljen.
13 Leid ons nich enne Vesieekjunk nen,
un moak ons vom Beesen frie.'"
14 Un Jesus säd,"Wan jie de Menschen vezeien dee sikj aun junt veschulcht hant, dan woat jun himlischa Voda junt uk vezeien. 15 Oba wan jie dee nich vezeien, dan woat jun himlischa Voda junt uk nich vezeien, un dan woat hee june Jebäda uk nich erhieren."
Jesus lieed daut eena bloos ver Gott fausten saul
16 Un Jesus lieed wieda, un säd,"Wan jie fausten, dan vetrakjt junt nich de Jesechta, soo aus de Heichla emma doonen, wiel see loten sikj toch soo daut aulemaun daut seenen kaun daut see fausten. Ekj saj junt de Woarheit, wan de Menschen äant soo aus daut seenen, dan es daut aules waut see fa een Loon kjriejen woaren, un Gott woat äant dan nochmol nich beloonen doafäa. 17 Oba wan du fausten deist, dan besorj die diene Hoa, un wausch die dien Jesecht, soo aus du daut jeweenlich emma deist. 18 Kjeena saul daut moakjen, wan du fausten deist, wiel bloos dien Voda em Himmel saul daut weeten. Un dien himlischa Voda, dee em Jeheemen aules sitt, woat die dan frie ver aulem beloonen."
Jesus lieed äwa waut daut woare Rikjdom es
19 "Hia oppe Ieed sell jie nich bloos fa daut Rikjdom schaufen, un junt een grootet Rikjdom toop saumlen, waut doch bloos aula vekomen woat. Wiel hia verostren eenem siene Sachen, ooda de Motten vefräten dee, un hia sent uk väle Deew waut eenem met Jewault bestälen wellen. 20 Schauft leewa doano han, daut jie Gott toom Jefaulen läwen, un daut jie sien Wellen doonen, wiel soo saumel jie dan em Himmel daut woare Rikjdom toop. Daut woare Rikjdom woat junt em Himmel nich verostren, un daut woat doa uk nich von Motten vefräten woaren, un em Himmel sent doa uk kjeene Deew waut junt bestälen kjennen. 21 Doarom paus opp," säd Jesus,"daut die dien Rikjdom nich too väl Wieet es. Wiel wan die dien Rikjdom väl wieet es, dan woaren diene Jedanken emma aun daut sennen, oba wan die daut himlische Rikjdom väl wieet es, dan woaren diene Jedanken emma aun daut sennen.
22 "Diene Uagen sent fa die een bät soo aus ne Laump, waut en eene diestre Stow dacht. Wan diene Uagen jesunt sent, dan kaust du aules kloa seenen. 23 Oba wan diene Uagen schlemm sent, dan es daut soo aus wan de Laump ut es, un soo aus wan du em Diestren best. Soo es daut dan met een bejieeja Mensch, wiel een bejieeja Mensch kaun nich seenen waut werkjlich wieetvoll es, un dee es dan werkjlich gaunz em Diestren!
24 "Krakjt soo aus eena nich fa twee Wieets schaufen kaun, soo kaun eena bloos fa Gott, ooda fa daut irdische Rikjdom schaufen. Wiel entwäda eena kaun een Wieet nich lieden, un eena räakjent dän aundren väl, ooda eena es een Wieet tru, un eena veacht dän aundren.
25 "Un soo saj ekj junt dan, schauft fa Gott, un moakt junt nich Sorjen auf jie waut to äten un drinkjen woaren han, ooda met waut jie junt auntrakjen woaren, wiel daut Läwen besteit doch von väl mea, aus bloos von Äten un Kjleeda. 26 Kjikjt junt mol de Väajel aun. Dee seien un arnten nich, un dee spikjren sikj uk nich Jeträajd opp, un doch paust jun himlischa Voda fa äant opp, un jeft äant aules waut äant fält. Wan Gott soo fa de Väajel opp paust, dan woat hee doch väl dolla fa junt oppaussen. 27 Jleew jie daut wan jie junt Sorjen moaken, daut junt daut werkjlich waut halpt? Wan jie junt Sorjen moaken, dan woa jie doch nich eene Stund lenja läwen kjennen. Doarom moakt junt dan kjeene Sorjen.
28 "Wuarom moak jie junt daut wäajen Kjleeda schwoa? Kjikjt doch emol woo de Lelje wilt oppem Flekj waussen, wiel dee kjennen nich schaufen, un dee kjennen sikj uk nich Kjleeda moaken. 29 Un doch saj ekj junt, daut nich mol de harlicha Kjennich Salomo siene Kjleeda soo straum wieren, aus de Lelje waut wilt oppem Flekj waussen. 30 Oba wan Gott een Flekj soo met Bloomen straum moakt, dee mau een Dach fein blieejen, un dee dän näakjsten Dach bloos vebrent woaren, dan woat Gott junt doch aul secha met Kjleeda vesorjen. Jie sent oba noch mau sea kjliengloowsch!
31-32 "Doarom moakt junt nich Sorjen," säd Jesus,"un froacht junt nich, 'Waut woa ekj äten ooda drinkjen?', ooda, 'Met waut woa ekj mie auntrakjen?', wiel äwa aul soont moaken de gottloose Menschen sikj daut emma schwoa. Jun himlischa Voda weet daut doch goot daut junt soont aules fält. 33 Tracht leewa ieescht doano, daut jie junt von Gott rejieren loten, un daut jie rajcht läwen, un soo woat hee junt aules tookomen loten waut junt fält. 34 Doarom moakt junt nich Sorjen äwa de Trubbels von Morjen, wiel dee kjennen bat Morjen wachten. Auledach haft eena jenuach Trubbels fa dän Dach."