1 ဝါယ် အန် တီ ဟဲ့ ဇမ် ဘ့လွယ် ဟူမ် ဒူအီ ခါမုန် အီ တူ ဟပ် ဆီနမ် ဘြး။ ဂေ ဒူအီ ဘော တဝ်း၊ န့ မုး ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ 2 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ လာယ် ဆင်ချာင် မှဝ် ဂေ ဒီ ပါယ် ဒီ တဲး ဂေ ပွိုန် ဒီ ငဝ်း ယမ် ဇဝ် ယေဆူ။ ဂေ ယီ ယုဝ် ဒူအီ ကိူန်။ 3 ဒေါ အန် တီ ဘုဝ် ကာနမ် အီ စိူဝ် ဆာတာန်၊ အန် ဘော လိုပ် ခဲင် ဒုဝ် ဘူင့် အာယူဒတ်၊ အီ စိူဝ် ဘော အာဆာခါရီအူတ်၊ အီ မုး ဒူအီ အူ ဝီ ကာတဲ ဒီဘဲ ဇဝ် ယေဆူ ဂိုဝ် ဒီ အာ ဝီ။ 4 အာယူဒတ် ဘော ဟာဝ် ဇမ် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ ဘ်ု ဟုဝ် ဇဝ်ဖြာ။ အန် မိူဝ် လာယ် ကာမွုန် ဒီ ဂေ လွင် မှဝ် အန် ဒီ ပါယ် ဒီ အာပ် ဇဝ် ယေဆူ ဒီ ဂေ။ 5 ဂေ ဒါ တာင် တွိုန် ဘော ခူယ် ကာဆဝ် လွင် အန် တီ။ ဂေ မိူဝ် လာယ် ဖြူမ် ဒီ ဒွါ ရွိုန် ဒီ အာယူဒတ်။ 6 အာယူဒတ် ဘော ဝီ ဟြေတ့် ပီ ဒီ ပါယ် တဲး အန် ပွိုန် ဒီ အာပ် ဇဝ် ယေဆူ ဒီ ဂေ ဒါ တာင် တွိုန် ဒေါ တူ မိုဝ်း ဒူအီ ဟဝ် ကွယ် ရိုမ် ဒူပ် အန် ဇဝ်။

7 ဝါယ် အန် တီ ဟဲ့ ဇမ် ဆီငဲ ဟူမ် ဂေ ဒူအီ ခါမုန် အီ တူ မိုဝ်း ဆီနမ် ဘြး။ န့ မုး ဆီငဲ လုဝ် လှူ ဂေ ဂွန် မာဘူ၊ တဲး ဂေ ဟူမ် ရိုမ်။ 8 ဆီငဲ အန် တီ၊ ဇဝ် ယေဆူ စ်ု အာပေတာရူ ဂါယ် အာယောဟာန် တဝ်း၊ “တဲး ဘာယ် ဟာဝ် ရဲန် မာဘူ အာဒါ အေ၊ တဲး အေ ပွိုန် ဒီ ဟူမ် ရိုမ်။”

9 ဂါယ် ဝီ ဒီမွှတ် အန်၊ “မဲ ဒီ တဲး ယာယ် ဟာဝ် ရဲန် ဘ့လွယ် တီ နာ မှဝ်။း”

10 ဇဝ် ယေဆူ ဝီ တဝ်း ဒီ ဂါယ်၊ “ဆေ ဘာယ် လိုပ် ခဲင် မိူင်၊ ဘာယ် ဒီ ယိုဝ် အီမာယ် အူ ဝီ၊ အန် ဒီ ဂွတ် ကာပဝ် အိုမ်။ ဘာယ် လုဝ် ဒူပ် ဒူအီ တီ၊ ဘော လိုပ် ခဲင် ကာင် ဒူင် လိုပ် အန်။ 11 ဟဲ့ ဟွတ့် ဘာယ် လုဝ် ကာလာင် ဒီ ဒါ ကာညာ ကာင် တဝ်း၊ ‘အိုယ် ဒါ၊ ဒါ ဆာရာ ယာယ် တဲး ယာယ် မှာန့်၊ တဲး မဲ ဒွါ ဟူင် ဒီ ဟူမ် ဘ့လွယ် လှုဝ်း အေ ဇဝ်ဖြာ ဒေါ ကာလုဝ်း အန် ကာင် အီ။ ဘော အန် ဘော ဒီဘဲ အန် လုဝ် ဟူမ် ရိုမ်။’ ဘာယ် ဟီ ဟွတ့် တဝ်း ပါယ် တီ၊ 12 ဒါ ကာညာ ကာင် တွိုန်၊ အန် ဒီ တဲး ဘာယ် လိုပ် ခဲင် ဟူင် တာင် အီ ကွယ် ခြွင့် ဒဲင်။ ဟဲ့ ဟွတ့်၊ ဘာယ် လုဝ် ရဲန် ပီ ဒီ ဟူမ် အေ ခဲင် ဟူင် တီ။”

13 ဟဲ့ ဟွတ့် ကာလာင်၊ ဂါယ် အာ ဝီ ဘော ဟာဝ် ဘော ယိုဝ် တူတ့် ဒွန် မျုဝ် ပီ ကာလာင် ဇဝ် ယေဆူ ဒီ ဂါယ်။ ဝါယ် အန် တီ ဂါယ် ဝီ ရဲန် ဘ့လွယ် တွိုန် ဒီ တီ။

14 ဒေါ ဟဲ့ ဇမ် အာခြာဝ် ဒီ လုဝ် ဟူမ်၊ ဇဝ် ယေဆူ ဘော တး တုတ့် ဒီ မာတိန့်။ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ ကွယ် ရိုမ် ဒူပ် အန်။ 15 အန် ဝီ တဝ်း ဒီ ဂေ၊ “အုဝ် ဟဲ့ ဆီ ကွယ် ကာဆဝ် ရိုမ် ဒူပ် ဘေ၊ ဟူမ် ဘ့လွယ် တီ အာတ့် လုဝ် ခမ် အုဝ် ဒုက်။ 16 အုဝ် တဝ်း ဒီ ဘေ၊ အုဝ် တူ ဝီ ဟူမ် ဘ့လွယ် တီ အာတ့် ဒီ ဘူင် ဟွတ့် အုဝ် ဒွန် မျုဝ် ပီ ဒီ လုဝ် ဘူင် အုဝ်၊ အာတ့် ကွယ် အုဝ် ခဲင် မိူင် ပီ အိုပ် ဇဝ်ဖြာ။”

17 ဝါယ် အန် တီ အန် ဘော ဒိုဝ်း ဆီလယ့်၊ ဘော ကာလာင် ဂုင် ဂေဇူ ဒီ ဇဝ်ဖြာ။ အန် တဝ်း၊ “တဲး ဘေ ဒိုဝ်း ဆီလယ့် နီ။ တဲး ဘေ ဒွန် အီ ဒျီင်။ 18 အုဝ် တဝ်း ဒီ ဘေ၊ အူ ဆိန့် ဒေါ တီ နီ၊ ကော ဇမ် အာခြာဝ် ဒီ အိုပ် ဇဝ်ဖြာ ကာဒါယ်၊ အုဝ် အာဝ် ဟူ ဒျီင် အိုမ် မာငုန်။”

19 ပန် တီ အန် ဘော ဒိုဝ်း ခါမုန်၊ ကာလာင် ဂုင် ဂေဇူ ဒီ ဇဝ်ဖြာ။ အန် ဘော ကာဘက် ခါမုန်၊ ဒွါ ဒီ ဂေ။ အန် ဘော တဝ်း ဒီ ဂေ၊ “နီ၊ န့ မုး ဒုဝ် ဘူင့် အုဝ်။ အုဝ် ဒီ အာပ် ဒုဝ် ဘူင့် အုဝ် ဒါင် ဘေ။ ဘေ လုဝ် ဟူမ် ခါမုန် နီ၊ တဲး ဘေ လှုဝ်း ပဲ့ ဟဲ့ ဘူင် အုဝ် ဒါင် ဘေ။”

20 ဂေ ဟဲ့ ဟွတ့် ဟူမ်၊ အန် ဘော ဒိုဝ်း ဆီလယ့် ပါယ် တီ။ အန် တဝ်း၊ “ဆီလယ့် နီ၊ န့ မုး နှာမ် အုဝ် အီ လေး တူတ့် ခဲင် ဒုဝ် ဘူင့် အုဝ် ဒါင် ဘေ။ န့ ဘျ ကာဒိက် ဆတ်ဇာ ကာမာယ် ပီ ဒွါ ဇဝ်ဖြာ ဒီ ဘေ။ 21 တဲး ဘေ ယီ ယွတ်၊ ဒူအီ ဒီ အာပ် အုဝ် ဒီ ရန်ဆူ အုဝ်၊ အန် ဟဲ့ ကွယ် ဟူမ် ရိုမ် ဒူပ် အုဝ်။ ဘော အန် ဟဲ့ ဘ့လေး ဒဲ အန် ဒဲင် မာတိန့် နီ။ 22 ဟဲ့ မှာန်၊ ခဲ့ ခ့ဝါင် ဇဝ်ဖြာ ဂေ ဘူင်၊ ဂေ ဒီ ဘူင် ဒွန် မျုဝ် ဒီ အုဝ် အီ ဟဲ့ ဘဲန် ဂွန် ဒူအီ။ န့ ယီ မုး ဒူအီ အီ ဒီ အာပ် အုဝ် တီ၊ အန် ဒီ ဇမ် ဒုက် တာင် အာခါခ်ု။” 23 ဂေ ဒီဘဲ အန် လာယ် ကာမွုန် ကာတဲ ဂေ၊ ဒူအီ ဒီ ယ ဘူင် ပီ ကာလာင် ဇဝ် ယေဆူ တီ၊ အန် မုး အာဆေ။

24 ပန် တီ ဂေ ဒီဘဲ အန် ဝီ လာယ် ကာလာင် နာ ကာတဲ ဂေ၊ အာဆေ ဟဲ့ တာင် လွှိုမ် အီ ဟဝ်။ 25 ဇဝ် ယေဆူ တဝ်း ဒီ ဂေ၊ “ခုန်ဒီခမ် အီ အိုပ် ဒူအီ အာမျုဝ် ဟဝ်၊ ဂေ တာ ပွုန် ဂေ တဲး ဂေ အိုပ် ဒူအီ ဘော ဘူင် တဲး န့ ဒုက် ဒီ အီ။ ဂေ ဒူအီ အီ အိုပ် အီ ဟဝ်၊ ဂေ ဆီ တဲး အီ ဟဝ် ဒဲ့ ဂေ တဝ်း ‘ဒါ အီ မိုဝ်း နဝ်း ဒီဟာင်၊ နပ် ဒီ စွယ် ဒူအီ။’ 26 န့ ယီ မုး ဘေ၊ ဘေ တူ လုဝ် ဘူင် ပါယ် တီ။ အာဆေ ဆီ ဘဲန် ဒါ တာင် အီ အိုပ် ဒူအီ ဟဝ်၊ တဲး အန် ဘဲန် ပီ ဝါ ဒွန် အီ။ အာဆေ ဟဲ့ ဘဲန် ဒါ ကာညာ အီ အိုပ် ဒူအီ၊ တဲး အန် ဘဲန် ပီ ဒဲစေန့် အီ၊ တဲး အန် စွယ် ဒွန် အီ။ 27 ဆေ န့ မုး ဒူအီ အီ တုတ့် ဟူမ်၊ အန် တာင် လွှိုမ် ဒူအီ အီ အဝ်း ဘူမ် ဘော လိုမ်လာ ဒူအီ အီ ကွယ် ဟူမ်။ န့ ယီ မုး ဘေ၊ ဘေ လုဝ် ဒူပ် အုဝ်။ ဒေါ ကွယ် ရိုမ် အုဝ် ဒူပ် ဘေ၊ အုဝ် ဟဲ့ ဘဲန် ဒဲစေန့် ဘေ။ 28 ဒေါ ဇမ် အုဝ် ဒုက် ဒွန် မျုဝ် ဘေ ဟဲ့ ကွယ် ရိုမ် ဒူပ် အုဝ် ဆေဆေ။ 29 ဂုန့် အုဝ် ဟဲ့ တဲး အုဝ် အိုပ် မိူင် ပီ အိုပ် အန်။ ပါယ် တီ၊ အုဝ် ဒီ ဘော တဲး ဘေ ဘဲန် ဒါ တာင် ခဲင် မိူင် ပီ အိုပ် အုဝ်။ 30 ဘေ ဒီ ပွိုန် ကွယ် ဟူမ် ရိုမ် ဒူပ် အုဝ် ခဲင် မိူင် ပီ အိုပ် အုဝ်။ ဘေ ဒီ ဘော ကွယ် နာ ဒဲင် မာလာင်၊ ဆုင်ဖျာတ် ဒါရာ ဒီ ဂေ ဂိုဝ် ဒီ အာ ခြိုဝ် ခဲင် ဒူအီ အာမျုဝ် အီဆာရေလ။”

31 ဝါယ် အန် တီ အန် ဝီ တဝ်း၊ “အိုယ် အာဆီမူန်၊ တဲး မဲ ထူမ် ဂြုဝ်း အုဝ်။ ဘုဝ် ကာနမ် အီ စိူဝ် ဆာတာန်၊ အန် ဟဲ့ မှာန့်၊ တဲး ဇဝ်ဖြာ ခ့ဝါင် အန် ထေဝ် နဝ်း မဲ၊ တဲး န့ ပီ ဂေ ဒူအီ ယွိုမ် ငှုဝ်။ 32 အုဝ် ယီ ဟဲ့ ဆာခိုဝ် ဒါင် မဲ၊ ကွဲ့ တဲး မဲ ဝဲန် နဝ်း ညှိုမ် မဲ၊ ကွဲ့ တဲး မဲ စှိုမ်။ ဆေ မဲ ဟဲ့ ဝီ ဘျွင် နဝ်း၊ တဲး မဲ စွယ် ဂေ ဘီနွင် မဲ၊ တဲး ဘော ဂေ မိုဝ်း နဝ်း ရိတ် နဝ်း မန်။”

33 အာပေတာရူ ဝီ တဝ်း၊ “အိုယ် မဲ ဇဝ်၊ အုဝ် ဟဲ့ ဘ့လေး နဝ်း အုဝ်၊ ဆေ ဒူအီ ဒီ ခြွင့် မဲ ခဲင် ကာပိုမ်၊ ဆေ ဂေ ဒီ ဘော ငဝ်း ယမ် မဲ၊ အုဝ် ယီ ဒီ ဒူပ် မဲ ဆေဆေ။” 34 အန် ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ အန်၊ “အာပေတာရူ၊ အုဝ် တဝ်း ဒီ မဲ၊ အာတိုဝ်၊ အာတ့် ကာတွုန် အျီန်၊ မဲ ဒီ ဘော ကာလာင် အူယ် ဇေန့်၊ မဲ တူ နပ် အုဝ်။”

35 ဝါယ် အန် တီ ဇဝ် ယေဆူ ဝီ တဝ်း ဒီ ဂေ ဒီဘဲ အန်၊ “ခါ အာတ့် အုဝ် ဟဲ့ တိုယ် ဘေ ဟာဝ် ဒွန် ပ့လုဝ့်၊ အုဝ် တူ တဲး ဘေ ဂူင့် ဟူ ဘော ရွိုန်။ အုဝ် တိုယ် ဘေ ဟာဝ် ဒူပ် န့တေန့်၊ တူ တဲး ဘေ မိုဝ်း ဒီ ဂူင့် ခူဒိန့် ကာလွှိုမ်။ ဒေါ ဟာဝ် ဘေ ပါယ် တီ၊ ဘေ မိုဝ်း ပီ ဇုတ် လုတ် မာဆေ။း” ဂေ ဝီ တဝ်း ဒီ အန်၊ “အာဝ် မိုဝ်း။”

36 ပန် တီ ဇဝ် ယေဆူ ဝီ တဝ်း၊ “ဒေါ တီ နီ၊ ဒူအီ အီ မိုဝ်း ဟူ ဘော ရွိုန်၊ တဲး အန် ဒိုဝ်း ဟာဝ်။ ဒူအီ အီ တူ မိုဝ်း မာ ပွါ့ လာင်၊ တဲး အန် ယွင့် ဆီတုဝ် အန်၊ စိုဝ်း မာ ပွါ့ လာင်။ 37 အုဝ် ယီ တဝ်း ဒီ ဘေ၊ ပီ ဒဲမ် အုန် ခဲင် ဘပ် ဇဝ်ဖြာ လွင် အုဝ်၊ န့ လုဝ် ဘဲန် တူတ့် ပါယ် တီ။ ခဲင် ဘပ် ဇဝ်ဖြာ န့ တဝ်း၊ ‘ဂေ ဒူအီ ဟဲ့ တဝ်း လွင် အန်၊ အန် ကွယ် ခဲင် ဖိုင် ဂေ ဒူအီ အီ ဘူင် မှာပ် ဆေဆေ။’ ဇဝ်ဖြာ မိူဝ် ဟဲ့ တဲး န့ ဘဲန် ပါယ် တီ ဒေါ တီ နီ။”

38 ဂေ ဒီဘဲ အန် ဝီ တဝ်း ဒီ အန်၊ “မဲ ဇဝ်၊ နီ၊ ဟဲ့ မိုဝ်း မာပွါ့ လာင် အာ ဘ့လ။” အန် ဝီ တဝ်း၊ “စူ ခဲ့ တီ။”

39 ဝါယ် အန် တီ ဇဝ် ယေဆူ လေး ခဲင် မိူင်၊ ဟာဝ် ဒီ နွန် ဟေ နာမန်၊ ဒူင် ဟာဝ် အန် ဆေဆေ။ ဂေ ဒီဘဲ အန် ဘော ဟာဝ် ရိုမ် ဒူပ် အန်။ 40 ဒေါ ဟဲ့ တး ဇမ် အန် ဒူင် တွိုန်၊ ဇဝ် ယေဆူ တဝ်း ဒီ ဒီဘဲ အန်၊ “ဘေ လုဝ် ဆာခိုဝ်၊ ကွဲ့ တဲး ဘေ ဒူပ် ဘုဝ် ကာနမ် အီ ကာဆုး ဘေ ဘူင် မှာပ်။” 41 ဝါယ် အန် တီ အန် လေး ဟာဝ် ဒူင် ကွယ် ဂေ၊ ဟာဝ် ကာတူင့် ခဲ့ ပွိုန် ဝိုန့် မာဝ်၊ ခြိုပ်ခြဝ် ဘော ဆာခိုဝ်။ 42 အန် တဝ်း၊ “အိုယ် ဂုန့် အုဝ်၊ ဆေ မဲ ဘော ပွိုန် ဘူင်၊ တဲး မဲ ဒိုဝ်း ဝဲန် ဒုက် နီ။ န့ ပီ ဆီလယ့် အီ မိုဝ်း ဂူင်။ ကွဲ့ တဲး အုဝ် လုဝ် ဒျီင်။ မဲ ယီ ကွဲ့ ဘူင် ပီ အိုင် အုဝ်၊ တဲး မဲ ဘူင် ပီ အိုင် မဲ။” 43 န့ ယီ မိုဝ်း အာမူ အာမာတ် ဇဝ်ဖြာ လူင် ခဲင် မိူင် ဂါင်ဟြာဝ် တး ဇမ် ဒူင် ကွယ် အန်၊ စွယ် အန်၊ တဲး အန် ဝီ မိုဝ်း ပ့လူမ်။ 44 ဒေါ အန် တီ ဇဝ် ယေဆူ ဝီ ကာဒုး ဒုက် တာင် ခဲင် နဝ်း အန်။ အန် ဘော ဆာခိုဝ် ကာဆဝ် လွှိုမ် ခါ အာတ့်။ အိုမ် ဒီမှုး အီ လှဲ ဒီ ဒုဝ် ဘူင့် အန်၊ န့ ကော ဘဲန် နှာမ်၊ စုဝ်း ဒဲင် ကာဒါယ်။^a

45 အန် ဟဲ့ ဟွတ့် ဆာခိုဝ် ပါယ် တီ၊ အန် ဝီ ယိတ့် ဟာဝ် ဒူင် ကွယ် ဒီဘဲ အန်။ အန် ဘော ယိုဝ် ဂေ ဟဲ့ အိတ်။ ခုဝ်၊ ဘော ဂေ ဟဲ့ မိုဝ်း ဒုက် ခဲင် နဝ်း။ 46 ပန် တီ အန် ဝီ တဝ်း ဒီ ဂေ၊ “မှဝ် န့ ပါယ် ပီ အိတ် ဘေ။း တဲး ဘေ ယိတ့်၊ ဆာခိုဝ်၊ ကွဲ့ တဲး ဘေ ဒူပ် ဘုဝ် ကာနမ် အီ ကာဆုး ဘေ ဘူင် မှာပ်။”

47 ဇဝ် ယေဆူ ညှမ် ဒန် ဟွတ့် ကာလာင် ဂြုဝ်း တီ၊ န့ မိုဝ်း ဒူအီ ကိူန် တး ဒူင် တဝ်း အန် ဒီ ဟာဝ်။ အာယူဒတ် အီ မုး အူ ဝီ ခဲင် ဒီဘဲ ဇဝ် ယေဆူ ဂိုဝ် ဒီ အာ ဝီ တွိုန်၊ အန် ဘော ယဲတ့် ဒီ အာတ့် ဂေ ဒူအီ ကိူန်။ အာယူဒတ် ဟဲ့ ဇမ် ဒူင် ကွယ် ဇဝ် ယေဆူ၊ အန် ဘော အုး ဇဝ် ယေဆူ။ 48 ဇဝ် ယေဆူ တဝ်း၊ “အိုယ် အာယူဒတ်၊ မဲ ဟဲ့ အုး ဟဲ့ အာပ် ဒူအီ အီ ဟဲ့ ဘဲန် ဂွန် ဒူအီ ဒီ အီ ဟဝ်။း”

49 ဂေ ဒူအီ အီ ကွယ် ရိုမ် ဒူပ် ဇဝ် ယေဆူ၊ ဒေါ ယိုဝ် ဂေ ပီ ဒီ ဘူင် ဒူအီ ဟဝ် ဒီ အန်၊ ဂေ တဝ်း၊ “မဲ ဇဝ်၊ မဲ ဆီ တဲး ယေ ဒိုဝ်း မာပွါ့ လာင်၊ ကာဂုဝ်း ဒီ ဒူအီ ဂေ တီ။း” 50 ဒီဘဲ အန် အူ ဝီ မိူဝ် ဒဲပ် ဟျုဝ့် ဘ့လာက် အာအး ဒါ အူ ဝီ အီ မုး ဒဲစေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။

51 ဇဝ် ယေဆူ ယီ တဝ်း ဒီ အန်၊ “စူ ခဲ့ တီ။” ဝါယ် အန် တီ အန် ဒိုဝ်း ဟျုဝ့် ဒူအီ တွိုန် ဝီ ပိ တဲး န့ ကဲန်။

52 ပန် တီ ဇဝ် ယေဆူ ကာလာင် ဒီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဒါ ကာညာ အီ ဘူင် ဂါန် ဒီ ဟုဝ် ဇဝ်ဖြာ၊ ဘော ဂေ ဒါ တာင် အီ ဟဲ့ တး မှေတ့် အန် တွိုန်။ အန် တဝ်း၊ “ဘေ ဂူင့် မာ ပွါ့ လာင် ဘော န့ကြွုန်၊ တး ဇမ် ဒီ နီ။ န့ နှဲန် အုဝ် ဟဲ့ မုး ဒူအီ ယဲတ့် ဒါ ဇူန်။ 53 အုဝ် ယီ ဟဲ့ ကွယ် ရိုမ် ဒူပ် ဘေ ခဲင် ဟုဝ် ဇဝ်ဖြာ ဒွန် ဆီငဲ ဒွန် ဆီငဲ။ မှဝ် န့ ပါယ် ဘေ ပီ တူ မှေတ့် အုဝ် ဒေါ အန် တီ။း ဒေါ တီ နီ၊ ဟဲ့ မုး အာခြာဝ် ဒီ ပွိုန် ဘေ ဘူင် ပီ ဆီ ဘူင် ဘေ။ န့ မုး အာခြာဝ် နာ တူ မွှိုမ်၊ အာခြာဝ် ဒီ မိုဝ်း အပ် ဝွင့် ပွုန် တာင်။”

54 ပန် တီ ဒူအီ ဂေ တွိုန် ဘော မှေတ့် ဇဝ် ယေဆူ။ ဂေ တိုယ် အန် ဇမ် ခဲင် ကာင် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ အာပေတာရူ ယီ ဟာဝ် ဒူပ် နာ ပန် ယီ ရာမ် ကာတူင့်။ 55 ဒေါ အန် တီ ဒူအီ ဘုတ် ငဝ် နာ ကာတဲ ဂ့လင် နာ ရေတ့် ကာင် ဒါ အီ တွိုန်။ အာပေတာရူ ဟာဝ် တုတ့် ရိုမ် ဒူပ် ဂေ ဒူအီ တွိုန်၊ တုတ့် ဝါတ် ငဝ်။ 56 န့ ယီ မိုဝ်း အီဘိုန့် အူ ဝီ အီ မုး ဒဲစေန့် အီ။ အန် ဘော ယိုဝ် အာပေတာရူ ကွယ် ဝါတ် ငဝ်၊ အန် ယွတ် ဆီချာ အာပေတာရူ ဘော တဝ်း ဒီ အီ ဟဝ်၊ “ဒူအီ ဝီ နီ၊ ဘော အန် ကွယ် ခဲင် ဖိုင် အာယေဆူ တွိုန်။”

57 အန် ဟဲ့ ဟွတ့် ကာလာင်၊ အာပေတာရူ ဝီ တဝ်း၊ “အာဝ် မုး၊ အုဝ် တူ ဒွိုမ် ယိုဝ် ဒူအီ တီ ဒေါ မှဝ်။”

58 ဝါယ် အန် တီ အာဝ် လှေန့်၊ ပေါ အူ ဝီ တဝ်း၊ “ဘော မဲ မုး ဒူအီ အီ ကွယ် ခဲင် ဖိုင် ဂေ တွိုန်။” အာပေတာရူ ယီ တဝ်း၊ “အိုယ် အီကတ်၊ အာဝ် မုး၊ အာဝ် မှာန်။”

59 ဝါယ် အန် တီ ကော နုဝ့် အူ နာရီ၊ ဘော အီမာယ် ပေါ အူ ဝီ စုး ဒီ ကာလာင် ဆီချာ ဒီ ဒူအီ ဟဝ် တဝ်း၊ “ဒူအီ နီ၊ အုဝ် ဟဲ့ နပ် ဆီချာ၊ ဘော အန် ဟဲ့ ဒူပ် ဒူအီ တီ။ ဘော အန် ဟဲ့ မုး ဒူအီ အာမျုဝ် ဂါလီလေ။”

60 အာပေတာရူ ယီ ဝီ တဝ်း ဒီ အန်၊ “အိုယ် အီကတ်၊ အုဝ် တူ နပ် မာဆေ ပီ ကာလာင် မဲ တီ။” အာပေတာရူ ညှမ် ဒန် ဟွတ့် ကာလာင် ဂြုဝ်း တီ၊ န့ ဘော မိုဝ်း အျီန် ကာတွုန် အူ ဇေန့်။ 61 ဇဝ် ယေဆူ ဘော မာငး ယွတ် အာပေတာရူ။ အာပေတာရူ ဝီ လှုဝ်း အူ ဇေန့် ဂြုဝ်း ပီ ဒွိုမ် ကာလာင် ဇဝ် ယေဆူ ဒီ အန်၊ ဒေါ တဝ်း အန်၊ “အာတိုဝ်၊ အာတ့် ကာတွုန် အျီန်၊ မဲ ဒီ ဘော ကာလာင် အူယ် ဇေန့်၊ မဲ တူ နပ် အုဝ်။” 62 ဝါယ် အန် တီ အန် လေး ဟာဝ် ဒူင် ကွယ် ဂေ တွိုန် ဘော ယာမ် တာင်။

63 ဂေ ဒဲစေန့် အီ ဘ်ု ဇဝ် ယေဆူ၊ ဂေ ဘော ကာညး အန်၊ ဘော မး အန်။ 64 ဂေ မိူဝ် ကာဘိတ် ငါယ် အန်၊ ကွဲ့ တဲး အန် ယိုဝ်။ ဂေ တဝ်း ဒီ အန်၊ “ဆေ န့ မှာန် နပ် မဲ ဒွန် မျုဝ်၊ ကာလာင် ဒီ ယေ၊ အာဆေ ဟဲ့ မး မဲ။” 65 ဒဲင် တီ၊ ဂေ ဘော တဝ်း ဘဲန် မျုဝ် ဘဲန် မျုဝ်၊ ကာလာင် နာ စီစိဝ် ဒီ အန်။

66 ပါ ခဲညှာ ဆိန့်ဝး၊ ဂေ ဒါ တာင် ခဲင် အိူင် ယူဒါ ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ ဒူအီ အီ ဆုင်ဖျာတ် အာမူ တီ၊ ဂေ ဘော တး ကာဇု။ ဂေ တိုယ် ဇဝ် ယေဆူ တး ဇမ် ခဲင် ဟူင် လာယ် ဆင်ချာင် ဂေ။ ဂေ ဘော တဝ်း၊ 67 “ဆေ မဲ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ တဲး မဲ ကာလာင် ဒီ ယေ။”

ဇဝ် ယေဆူ ဝီ တဝ်း ဒီ ဂေ၊ “ဆေ အုဝ် ဒီ ကာလာင် ဒီ ဘေ၊ အုဝ် ဟဲ့ နပ်၊ ဘေ တူ ညှိုမ် အုဝ်။ 68 ဆေ အုဝ် ယီ ဒီမွှတ် ဘေ၊ အုဝ် ဟဲ့ နပ်၊ ဘေ တူ ဝီ ဝျီ့ ဂြုဝ်း အုဝ်။ 69 အူ ဆိန့် ဒေါ တီ နီ၊ ဒူအီ အီ ဟဲ့ ဘဲန် ဂွန် ဒူအီ၊ အန် ဒီ ပွိုန် ဒီ ကွယ် ဘ့လာက် အာအး ဇဝ်ဖြာ၊ အီ မိုဝ်း ပွုန် တာင်။”

70 ဂေ ဖိုင် ဒူအီ အီ ဆုင်ဖျာတ် ဒါရာ ဝီ တဝ်း ဒီ ဇဝ် ယေဆူ၊ “ဆေ န့ ပါယ် တီ၊ မဲ မုး ဂွန် ဇဝ်ဖြာ။း” “ဟဲ့ မှာန် ပီ တဝ်း ဘေ၊” အန် ဝီ တဝ်း ဒီ ဂေ။

71 ပန် တီ ဂေ ဝီ လာယ် ကာမွုန်၊ ဝီ တဝ်း၊ “ဘေ ယိုဝ်၊ အေ ဟဲ့ ဟွတ့် ထူမ် ဂြုဝ်း အီ လေး ခဲင် မူတ့် အန်။ အန် ဟဲ့ ဟွတ့် ခဲန့် ဇဝ်ဖြာ။ အေ အာဝ် ဟူ လုဝ် ဒူအီ ဟဝ် ဝီ ကာလာင် ဒီ အေ လွင် ပဲ့ ဟဲ့ ဘူင် အန်။”