ခါန် 21
လွင် ပီ လှူ ယာ ဆီပြး
1 ပန် တီ ဝါယ် ဟဲ့ ဟွတ့် မာနုဝ် ဇဝ် ယေဆူ ဒီ ဂေ၊ အန် မိူဝ် ယိုဝ် ဂေ ဒူအီ ခြမ် ဘ့လေး ရွိုန် ဂေ ခဲင် ဇီဒိူက် လှူ ဂေ ရွိုန် အီ ကွယ် ခဲင် ဟုဝ် ဇဝ်ဖြာ တွိုန်။ 2 အန် ဘော ယိုဝ် ယာ ဆီပြး အူ ဝီ။ ယာ ဆီပြး တီ ဟဲ့ ဂိန် ကာဆဝ်။ အန် ဘ့လေး မေတ် ဘွင့် အာ မေတ် ခဲင် ဇီဒိူက် တွိုန်။ 3 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ၊ ယာ ဆီပြး တီ ဟဲ့ ဂိန် ကာဆဝ်။ အန် ယဲ့ ဟဲ့ ဟပ် ရွိုန် ကိူန် လွှိုမ် ပီ ဟပ် အီ ဟဝ် ဒွန် အီ။ 4 ဂေ ဒူအီ ဟဝ် ဒွန် အီ ဟဲ့ လှူ ရွိုန် အီ ကာလွှိုမ် အန်။ အီဘိုန့် တီ၊ အန် ဟဲ့ ဂိန် ကာဆဝ်။ အန် ယီ ဟဲ့ လှူ တူတ့် ဒွန် မျုဝ် ခဲ့ ပီ မိုဝ်း အန်။”
လွင် ပန် ဒီ တူတ့် ဇာတ် နီ
5 ဒေါ အန် တီ ဂေ ဒူအီ မင် အီ လာယ် ကာလာင် လွင် ဟုဝ် ဇဝ်ဖြာ တွိုန် တဝ်း၊ မာဝ် ပီ တာ ဂေ ဂုဝ် ဟုဝ် တီ ဟဲ့ စှိတ် ကာဆဝ်။ ပီ လှူ ဒူအီ ဒွန် မျုဝ်၊ မိူဝ် ဟဲ့ ကိူန်။ 6 ပန် တီ ဇဝ် ယေဆူ ဝီ တဝ်း လွင် အန် တီ၊ “ဒွန် မျုဝ် ပီ ပွိုန် ယိုဝ် ဘေ ဒေါ တီ နီ၊ န့ ဒီ ဇမ် အူ ဆီငဲ၊ ဂေ ဒူအီ ဟဝ် ဒီ တး ပျာတ့် ဝဲန် တူတ့်။ မာဝ် ဂေ နီ၊ အီ ဟဝ် ဒီ ပျာတ့် ဝဲန် တူတ့်။ မာဝ် အူ ဘူင့် မိူဝ် တူ ဝီ ကွယ် ဒူင် ဘြိမ် အန်။”
7 ဟဲ့ ဟွတ့်၊ ဂေ ဒီဘဲ ဇဝ် ယေဆူ ဝီ ဒီမွှတ် လွင် အန် တီ တဝ်း၊ “အိုယ် မဲ ဒါ ဆာရာ၊ ဒေါ မှဝ် ဂေ ဒီ ဘူင် ပီ တဝ်း မဲ တီ။း မာဆေ န့ မုး လက်ဆာနာ အီ တဲး ယေ နပ်၊ အာခြာဝ် အန် တီ ဟဲ့ ကာတတ် ဒီ တး။း”
8 ဇဝ် ယေဆူ ဝီ တဝ်း ဒီ ဂေ၊ “ဘေ လုဝ် ဆာဒိက်၊ ကွဲ့ တဲး ဒူအီ ပွိုန် ဒီ ကာလုဝ် ဘေ။ န့ ဒီ မိုဝ်း ဘဲန် ဝီ ဘဲန် ဝီ၊ ဂေ ဒီ တး ဂါဝ် စိူဝ် အုဝ်။ ဂေ ဒီ ဘော တဝ်း၊ ‘န့ ဟဲ့ မုး အုဝ်၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။’ ဂေ ဒီ ဘော တဝ်း၊ ‘အာခြာဝ် တီ ဟဲ့ ကာတတ် ဒီ ဇမ်။’ ဆေ န့ မိုဝ်း ဒူအီ တဝ်း ပါယ် တီ၊ ကွဲ့ တဲး ဘေ ဒူပ် ဂေ ဒူအီ ဇိုဝ် တီ ဒေါ မှဝ်။ 9 ဆေ ဘေ ဘော ယိုဝ် ဆာဒါင် လွင် ဒူအီ လာယ် ကာဂုဝ်း ခဲင် မိူင် ဘဲန် မိူင်၊ ကွဲ့ တဲး ဘေ ယုဝ်။ န့ လုဝ် ဘဲန် ဒွန် မျုဝ် ဇိုဝ် တီ အာတ့် ဇမ် ဒုက် တာင်။ န့ ဒီ ဘော ဘဲန် ပါယ် တီ ဒွန် မျုဝ်၊ န့ ယီ ညှမ် ဟွတ့် တူတ့်။”
10 ပန် တီ ဇဝ် ယေဆူ ဘော တဝ်း၊ “ဒူအီ ခဲင် မိူင် အူ မိူင် ဒီ ကာဂုဝ်း ဒီ ဒူအီ ခဲင် မိူင် ပေါ အူ မိူင်။ ဒူအီ အူ မျုဝ် ဒီ ဘော ကာဂုဝ်း ဒီ ဒူအီ ပေါ အူ မျုဝ်။ 11 မာအိမ် ဒီယေန့် ကာဆဝ်။ န့ ဒီ ဘော ဇမ် အာခြာဝ် တူ မိုဝ်း ပီ ဒီ ဟူမ် ဘဲန် ပ့လုဝ့် ဘဲန် ပ့လုဝ့်။ န့ ဒီ ဘော မိုဝ်း ဆဝ် ဘဲန် မျုဝ် ဘဲန် မျုဝ်၊ ဒိုက် ဒီ ဒူအီ ကိူန်။ ခဲင် ဂါင်ဟြာဝ် ဂေ ဒီ ပွိုန် ယိုဝ် နာ မွှိုမ် ယုဝ် ကာဆဝ်၊ ဘော ဂေ ဒူအီ ဒီ ဝီ ယုဝ် ကာဆဝ် ဘဲန် မျုဝ် ဘဲန် မျုဝ်။
12 အာတ့် ဒီ ဘဲန် ဒွန် မျုဝ် ဇိုဝ် တီ၊ ဂေ ဒူအီ ဒီ မှေတ့် ဘေ။ ဂေ ဒီ ဘော ဘူင် နာ စီစိဝ် ဒီ ဘေ။ ဂေ ဒီ ကာယွင့် ဘေ ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ ဂေ ဒီ ဘော အာပ် ဘေ ဒီ ဒါ ကာညာ၊ ခြွင့် ဘေ ခဲင် ကာပိုမ်။ ဂေ ဒီ ဘော ကာယွင့် ဘေ၊ တိုယ် ဘေ ဇမ် ဒီ အာတ့် ခုန်ဒီခမ် ဘော ဒါ ကာညာ အီ အိုပ် မိူင်။ ဂေ ဒီ ဘူင် တူတ့် ဇိုဝ် တီ၊ ကူပ် ညှိုမ် ကြိုပ် ဘေ ဒီ အုဝ်။ 13 ဒေါ အန် တီ ဘေ ဒီ ပွိုန် ဒီ ကာလာင် လွင် အုဝ် ဒီ ဂေ။ 14 အာတ့် ဘူင် ဂေ ဒူအီ ပါယ် တီ ဒီ ဘေ၊ ဘေ တူ လုဝ် ဇေန့်ဇာ မာဆေ ပီ ဒီ လုဝ် ကာလာင် ဘေ ဒီ အာတ့် ဒါ တာင် ဂေ တီ။ 15 အုဝ် ဒီ တဲး အာငျာန် ဒီ ဘေ၊ တဲး ဘေ နပ် ဒီ ကာလာင်၊ ကွဲ့ တဲး ရန်ဆူ ဘေ ပွိုန် ဒီ ကာလာင် နာ တူ မွှိုမ် လွင် ဂြုဝ်း ဘေ။ 16 ဒေါ အန် တီ ဂေ ဂုန့် မာ ဘေ၊ ဂေ အူကတ် အူဝါ ဘေ၊ ဂေ ဝေါဝဲ ဘော ဂေ ဂိုက် ဘေ၊ ဂေ ဒီ ကာယွင့် ဘေ ဒီ အာတ့် ဒူအီ ဟဝ်။ ဂေ ဒီ ဘော ငဝ်း ယမ် ဘေ မင် အီ။ 17 ကူပ် ညှိုမ် ဘေ ဒီ အုဝ်၊ ဂေ ဒူအီ ဒွန် မျုဝ် ဒီ ဘော ဇွင့် ဘေ။ 18 ဘေ ယီ တူ လုဝ် ယုဝ် မာဆေ။ ဟိုက် ဂိန့် အီ ကွယ် ဒဲင် ဂိန့် ဘေ၊ အူ ညွင့် မိူဝ် တူ ဟြာယ်၊ တူ ဘျုဝ်း။ 19 ဆေ ဘေ မိုဝ်း နဝ်း မန် ဘော နဝ်း အီ နပ် ဒီ ခမ် တူတ့်၊ ဘေ ဒီ ဘော လွတ် ယမ်၊ ဘေ ဒီ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။
20 ဆေ ဘေ ယီ ယိုဝ် ဒါ ဆိုက် ကွယ် ရူပ် မိူင် ယေရူဆာလဲမ်၊ ဘေ ဒီ ဘော နပ်၊ အာဝ် လှေန့်၊ ဂေ ဒီ ဘူင် တဲး ဘေ ကော စှိုမ် တူတ့်။ 21 ဒေါ အန် တီ ဂေ ဒူအီ အီ ကွယ် ခဲင် အိူင် ယူဒါ၊ ဂေ လုဝ် တဝ် ဟာဝ် ဒဲင် နွန်။ ဂေ ဒူအီ အီ ကွယ် ခဲင် မိူင်၊ တဲး ဂေ လေး ဟာဝ် ပေါ အူ ပ့လုဝ့်။ ဂေ ဒူအီ အီ ကွယ် နာ ရေတ့် မိူင်၊ ကွဲ့ တဲး ဂေ ဝီ လိုပ် ခဲင် မိူင်။ 22-23 ဒေါ အန် တီ ဆေ န့ မိုဝ်း အီဘိုန့် အီ တူ အး ဘော အီဘိုန့် အီ မိုဝ်း ဂွန် အာင အီ ဆီ ပူ၊ ဂေ ဒီ ဇမ် ဒုက် တာင်။ ဂေ ဒူအီ ခဲင် မိူင်၊ ဂေ ဒီ မိုဝ်း ဆဝ် ကိူန်။ ဇဝ်ဖြာ ဒီ ဘော ဘျ ခဲ့ ဟဲ့ ရူ ကာဆဝ် အန် ဒီ ဂေ ဒူအီ တွိုန်။ ဒေါ အန် တီ န့ မုး အာခြာဝ် ဝီ ပွိုန် ဇဝ်ဖြာ ဘူင် နာ တူ မွှိုမ် ဒီ ဒူအီ ခဲ့ ဟဲ့ ဘူင် ဂေ ဒီ အန်။ အန် ဇဝ် လုဝ် ဘူင် ပါယ် တီ၊ တဲး န့ ဘဲန် တူတ့် ပီ ဒွိုမ် တဝ်း အန် ခဲင် ဘပ် ဇဝ်ဖြာ။ 24 ဂေ ဒူအီ ကိူန် ဒီ ယမ် ဒီ မာ ပွါ့ လာင်။ အီ ဟဝ် ဒီ မှေတ့် ဂေ၊ ဆုတ့် ဂေ လေး ခဲင် မိူင် ဂေ၊ တိုယ် ဂေ ဟာဝ် ဇမ် မိူင် ဒွန် မိူင်။ ဂေ ဒူအီ အာမျုဝ် ဟဝ်၊ ဂေ ဒီ ညဲတ့် ကာပျာတ့် မိူင် ယေရူဆာလဲမ် ဘော အိုပ် ခဲင် မိူင် တီ၊ တဲး န့ ကော ဇမ် ပန် ဒီ တူတ့် အာခြာဝ် ဒီ အိုပ် ဂေ မိူင် ဘေ။
25 န့ ဒီ ဘော လိုဝ်း အီ မွှိုမ် ယုဝ် ကာဆဝ် ဒီ ဆီငဲ ဘော ဒီ မာဂျီန် ဂေ ဆီမန့်။ ဒဲင် ကာဒါယ် နီ၊ ဂေ ဒူအီ ဒွန် မျုဝ်၊ ဂေ တူ နပ် ဒီ ဘူင် မာဆေ။ ဂေ ဒီ ယွတ် အိုမ် နမ်မုက်ဆာရာ အီ မွှိုမ် ယုဝ်။ ဂေ ဘော ယွတ် မာ အိုမ် အီ ဒီယုး တာင်။ 26 ဒူအီ ဒီ ဘဲန် ပိဝ် ဒုဝ် ကူပ် ယုဝ် ဂေ ဒုက် အီ ဒီ တး ဒဲင် ကာဒါယ်။ န့ ဒီ ဘော မိုဝ်း ပွုန် အီ တဲး ဂါင်ဟြာဝ် ကွယ် ဒါခိုယ်၊ ဂေ ဘော ယုဝ် ပွုန် တီ အာဝ် ဟူ ပီ ဘြိမ်၊ ယုဝ် န့ ဒီယုး၊ ကွဲ့ ဟူ တဲး န့ မိုဝ်း မာဆေ အီ ကွယ် ဒူင် ဘြိမ် အန်။ 27 ဒေါ အန် တီ ဂေ ဒီ ယိုဝ် ဒူအီ အီ ဟဲ့ ဘဲန် ဂွန် ဒူအီ တး လူင် ဒဲင် ကာဒါယ်၊ ကွယ် ခဲင် န့အု။ ဘော ပွုန် ဘော အာဖုင် ဒင်ခုဝ် အန် ဒီ တာင် ကာဆဝ်။ 28 ဒေါ ဇမ် အာခြာဝ် ဒီ ကာစုး ဒီ ဘဲန် တူတ့် ဒွန် မျုဝ် ပါယ် တီ၊ ဘေ လုဝ် ဘဲန် နဝ်း ဒါခိုယ်။ ခုဝ်၊ ဇဝ်ဖြာ ဟဲ့ ကာတတ် ဒီ တး ချွတ် ဘေ။”
29 ဒေါ အန် တီ ဇဝ် ယေဆူ ကာလာင် အူဖာမာ ဒီ ဂေ။ အန် တဝ်း၊ “ဘေ လုဝ် ယွတ် ဟေ ဒီပူ ဂေ ဟေ ဒွန် မျုဝ်။ 30 ဒေါ ယိုဝ် ဘေ ရာ အန် ဟဲ့ န့လုဝ်း၊ ဘေ နပ်၊ ဂ့လာယ် ဟဲ့ ကာတတ် ဒီ တး။ 31 ပါယ် တီ၊ ဆေ ဘေ ယိုဝ်၊ ဒုက် ပီ တဝ်း အုဝ် ဒွန် မျုဝ် န့ ဟဲ့ ဘဲန်၊ ဘေ ဘော နပ်၊ အာဝ် လှေန့် ဇဝ်ဖြာ ဒီ အိုပ် ဒူအီ ဒဲင် ကာဒါယ်။
32 အုဝ် ယီ တဝ်း အာခ်ု ဒီ ဘေ၊ ဇာတ် နီ တူ တူတ့် အာတ့် ဒီ ဘဲန် တူတ့် ဒွန် မျုဝ် ပီ တဝ်း အုဝ် ဒီ ဘေ ဒေါ တီ နီ။ 33 ဘော ကာဒါယ် ဘော ဂါင်ဟြာဝ် ဂေ ဒီ ဟြာယ်။ ဂြုဝ်း အီ လေး ခဲင် မူတ့် အုဝ် ယီ တူ ဟြာယ် ဒေါ မှဝ်။ န့ ဒီ ကွယ် ဆေဆေ။
34 ဘေ ယီ လုဝ် ဆာဒိက် ဆီချာ၊ ကွဲ့ တဲး ဘေ မိုဝ်း နဝ်း မှဲ ကူပ် အိုင် ဘေ ဒီ ဟူမ် ကိူန်၊ ဟူမ် ကာလွှိုမ်၊ ဘော ကူပ် ယိုတ့် ဘေ ပဝ်း၊ ကူပ် ဒီ စှိုမ် ဘေ ကြုဝ်ကြာမ် ဘဲန် မျုဝ် ဘဲန် မျုဝ် အီ ကွယ် ဒဲင် ကာဒါယ် နီ။ ဆေ ဘေ ယီ ယုဝ် ပါယ် တီ၊ ဆီငဲ ဒီ တး ဒုက် တာင် တီ ဒီ တး ဇမ် ဒီ ဘေ အူ ဇေန့်၊ ဒေါ တူ ထာင် တူ နမ်လှုဝ်း ဘေ။ 35 ဒုက် တာင် တွိုန် ဒီ တး ဒီ ဂေ ဒူအီ ဘောကာဂ့လျီတ် ဒဲင် ကာဒါယ်။ 36 ခုဝ် အန် တီ ဘေ လုဝ် ဆာဒိက် ဘ်ု ဆေဆေ။ ဘေ လုဝ် ဆာခိုဝ် ဆေဆေ၊ တဲး ဘေ မိုဝ်း ဟဲန့် ဒီ ခမ် ဒုက် ဒွန် မျုဝ် ပီ ဒီ ဘူင် ဒူအီ ဒီ ဘေ၊ တဲး ဘေ ဘော ပွိုန် ဒီ ကွယ် ဒီ အာတ့် ဒူအီ အီ ဟဲ့ ဘဲန် ဂွန် ဒူအီ။” ဇဝ် ယေဆူ မာနုဝ် ပါယ် တီ။