ဝါယ် အန် တီ ဂေ ဖိုင် ဒူအီ အီ ဆုင်ဖျာတ် ဒါရာ၊ ဂေ ဘောကာဂ့လျီတ် တိုယ် ဇဝ် ယေဆူ ဇမ် ဒူင် ကွယ် အာဖီလာတ်။ 2 ဂေ မိူဝ် ကာယွင့် ဇဝ် ယေဆူ တဝ်း၊ “ယေ ဟဲ့ ယိုဝ် ဒူအီ နီ မာနုဝ် တဲး မိူင် ယေ ကာပျာတ့် လိုဝ်။ အန် ဘော ခြဲ ဒူအီ ဒွါ ရွိုန် စိုင် ဒွန် မျုဝ် ဒီ ခုန်ဒီခမ် အာကဲဆာ။ အန် မိူဝ် ပီခိုက် အန် တဝ်း၊ အန် မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဘော တဝ်း၊ အန် မုး ခုန်ဒီခမ်။”

3 ဂေ ဟဲ့ ဟွတ့် ကာယွင့် အန် ပါယ် တီ၊ အာဖီလာတ် တွိုန် ဒီမွှတ် ဇဝ် ယေဆူ။ အန် တဝ်း၊ “ဟဲ့ မှာန် မုး မဲ ခုန်ဒီခမ် အီ အိုပ် ဂေ ဒူအီ အာယူဒါ။း”

ဇဝ် ယေဆူ ဝီ တဝ်း ဒီ အန်၊ “ဟဲ့ မှာန် ပီ တဝ်း မဲ။”

4 ပန် တီ အာဖီလာတ် ဝီ တဝ်း ဒီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဒီ ဂေ ဒူအီ ဟဝ် တွိုန်၊ “အုဝ် တူ ယိုဝ် နာ တူ မွှိုမ် ပဲ့ ဟဲ့ ဘူင် ဒူအီ နီ။”

5 ဂေ ဒူအီ တွိုန် ဝီ တဝ်း လွှိုမ် ခါ အာတ့် “ဒူအီ နီ ဘူင် တဲး န့ ဆီနန် ဆီနိူင် ခဲင် မိူင်။ အန် ဟဲ့ မာနုဝ် ဒူအီ ခဲင် အိူင် ဂါလီလေ ဘော ဝီ ဟာဝ် ဇမ် ဘော ခဲင် အိူင် ယူဒါ ဒွန် ပ့လုဝ့်။ ဒေါ တီ နီ၊ အန် ဟဲ့ တး ဘော ခဲင် မိူင် အေ နီ။”

6 အာဖီလာတ်၊ ဒေါ ထူမ် အန် ဂြုဝ်း တီ၊ အန် ဝီ ဒီမွှတ် တဝ်း၊ “ဒူအီ နီ တး အိူင် ဂါလီလေ။း” 7 အန် ကော နပ်၊ ဇဝ် ယေဆူ မုး ဒူအီ အီ ကွယ် ခဲင် မိူင် ဂါလီလေ အီ မုး မိူင် ပီ အိုပ် ခုန်ဒီခမ် အာဟေရူတ်၊ အန် ဘော တိုယ် ဂေ တဲး ဂေ ဟာဝ် ဒူင် ကွယ် အာဟေရူတ် တွိုန်။ ဒေါ အန် တီ အာဟေရူတ် ဟဲ့ တး ကွယ် ခဲင် မိူင် ယေရူဆာလဲမ်။

8 အာဟေရူတ် တွိုန်၊ ဒေါ ယိုဝ် အန် ဇဝ် ယေဆူ၊ နဝ်း အန် ဒါခိုယ် ကာဆဝ်။ ဟဲ့ လှေန့်၊ အန် ဟဲ့ ဆီ ယိုဝ် ဇဝ် ယေဆူ။ အန် ဟဲ့ ယိုဝ် ဂြုဝ်း ပီ ကာလာင် အီ ဟဝ် လွင် အန်။ အန် ဘော ဆီ ယိုဝ် ဇဝ် ယေဆူ ဘူင် နာ မွှိုမ် အာမ် ကာဆဝ်။ 9 အာဟေရူတ် ဒီမွှတ် ဒွန် မျုဝ် ဒီ ဇဝ် ယေဆူ။ အန် ယီ တူ ဝီ ဝျီ့ မာဆေ ဒီ အာဟေရူတ်။ 10 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ တး ဇမ် ဒီ အာတ့် အန်၊ ကာလာင် နာ တူ မွှိုမ် ဒွန် မျုဝ် လွင် ဇဝ် ယေဆူ။ ဂေ တဝ်း၊ မှာပ် အန် ဟဲ့ တာင် ကာဆဝ်။ 11 ပန် တီ ခုန်ဒီခမ် အာဟေရူတ် ဘော ဂေ ဒါ ဆိုက် အန် ကာညး ဇဝ် ယေဆူ၊ ဘူင် နာ တူ မွှိုမ် ဒီ အန်။ ဂေ မိူဝ် ကာညး အန်၊ တဲး အန် စှိုပ် ဆီတုဝ် စှိတ် ပီ ခုန်ဒီခမ်။ ဟဲ့ ဟွတ့်၊ ဂေ ဝီ တိုယ် အန် ဝေန့် ဒူင် ကွယ် အာဖီလာတ် တွိုန်။ 12 ခါ အာတ့် အာဟေရူတ် ဂါယ် အာဖီလာတ် တူ လာယ် ကာလဝ့်။ ဆီငဲ အန် တီ၊ ဂါယ် ယီ ဘဲန် အူ ဂိုက်။

13 အာဖီလာတ် ဘာင် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် ဒူအီ ဘော ဂေ ဒူအီ ကိူန်၊ တဲး ဂေ ဟာဝ် ဇမ် ဒူင် ကွယ် အန်။ 14 အန် တဝ်း ဒီ ဂေ၊ “ဘေ ဟဲ့ တိုယ် ဒူအီ နီ ဇမ် ဒီ အာတ့် အုဝ်။ ဘေ မိူဝ် တဝ်း အန် မုး ဒူအီ မာနုဝ် အီ ဟဝ် ကွဲ့ ဟူ တဲး ဂေ ဒူပ် ယေ။ ဒေါ တီ နီ အုဝ် ဟဲ့ ဒီမွှတ် ဆီချာ ပဲ့ ဟဲ့ ဘူင် အန် ဒီ အာတ့် ဘေ။ အုဝ် ယီ တူ ယိုဝ် နာ တူ မွှိုမ် မာဆေ ပဲ့ ဟဲ့ ကာယွင့် ဘေ လွင် အန်။ 15 ဘော ခုန်ဒီခမ် အာဟေရူတ် တူ ယိုဝ် နာ တူ မွှိုမ် မာဆေ။ ခုဝ်၊ အာဟေရူတ် ဟဲ့ တိုယ် အန် ဝီ တး ဇမ် ဒူင် ကွယ် အုဝ်။ ဒူအီ နီ အာဝ် မိုဝ်း ဒီ ဘူင် နာ တူ မွှိုမ် မာဆေ၊ အီ တဲး အုဝ် ပွိုန် ဒီ ငဝ်း ယမ် အန်။ 16 ကူပ် န့ ပါယ် တီ၊ အုဝ် ဒီ တဲး ဂေ မး အန်၊ ဟဲ့ ဟွတ့်၊ အုဝ် ဒီ ဝီ တဲး အန် လွတ်။”

17 န့ ဘော မုး ဟိတ် ဂေ၊ တဲး အာဖီလာတ် ဘ့လေး ဒူအီ အီ ကွယ် ခဲင် ကာပိုမ် အူ ဝီ ဒေါ ဘူင် ဂေ ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။^a

18 ဂေ ဒူအီ ကိူန် တွိုန် ဘော ဒတ် တာင် တဝ်း၊ “တဲး မဲ ငဝ်း ယမ် ဒူအီ နီ။ တဲး မဲ ဒွါ အာဘာရာဘ လေး ခဲင် ကာပိုမ်။” 19 အာဘာရာဘ တွိုန် မုး ဒူအီ ပီ ပက် ဂေ၊ ခြွင့် ခဲင် ကာပိုမ် ကူပ် ဟဲ့ ဘူင် အန် တဲး ဒူအီ ဆီနန် ဆီနိူင် ခဲင် မိူင် ယေရူဆာလဲမ်။ အန် မိူဝ် ဟဲ့ ငဝ်း ယမ် ဘော ဒူအီ။

20 အာဖီလာတ် မိုဝ်း နဝ်း ဆီ ဘ့လေး ဇဝ် ယေဆူ။ အန် ဘော ဝီ တဝ်း ဒွန် မျုဝ် ဒီ ဒူအီ ကိူန် တွိုန်။ 21 ဂေ ဒူအီ ကိူန် ယီ ဒတ် တာင် တဝ်း၊ “တဲး မဲ တဲး အန် ယမ် ဒဲင် ရွင့် ကာဝဲ့။” ဂေ ဒတ် တာင် ပါယ် တီ ဘဲန် ဇေန့် ဘဲန် ဇေန့်။

22 အာဖီလာတ် ဝီ တဝ်း ဒီ ဂေ အူယ် ဇေန့်။ “မှဝ် န့ ပါယ် ပီ ဆီ တဲး ဘေ အန် ယမ်။း ဒူအီ တီ ဟဲ့ ဘူင် နာ တူ မွှိုမ် မျုဝ် မှဝ်။း အုဝ် တူ ယိုဝ် နာ တူ မွှိုမ် ပီ ကာအာပ် အန် ယမ်။ အုဝ် ဒီ တဲး ဂေ မး အန်၊ ဟဲ့ ဟွတ့်၊ အုဝ် ဒီ ဘ့လေး အန်။”

23 ဂေ ဒူအီ ကိူန် ယီ တူ ထူမ်၊ နပ် ဒတ် တာင်။ ဂေ ဝီ ကာဖြူမ် ဒီ ဒတ် တာင်၊ မှာန့် ဒီ အာဖီလာတ် တဲး အန် ငဝ်း ယမ် ဇဝ် ယေဆူ ဒဲင် ရွင့် ကာဝဲ့။ ပီ ကာလာင် ဂေ၊ န့ ယီ တာင် လွှိုမ် ပီ တဝ်း အာဖီလာတ် ဒီ ဂေ။ ဂေ ဟဲ့ ဝဲန် ဂြုဝ်း အန်။ 24 ပန် တီ အာဖီလာတ် ဆုင်ဖျာတ်၊ တဲး ဂေ ဒူအီ ဘူင် ဒီ ဇဝ် ယေဆူ ပီ မှာန့် ဂေ ဒီ အန်။ 25 အန် မိူဝ် ဘ့လေး ဒူအီ ပီ ပက် ခြွင့် ဂေ ခဲင် ကာပိုမ် ကူပ် ဘူင် အန် ဆီနန် ဆီနိူင် ခဲင် မိူင် ဘော ငဝ်း ယမ် ဒူအီ။ အန် ဘော အာပ် ဇဝ် ယေဆူ ဒီ ဂေ ဒါ ဆိုက်၊ တဲး ဂေ ဘူင် ပီ အိုင် ဂေ။

26 ဝါယ် အန် တီ ဂေ တိုယ် ဇဝ် ယေဆူ လေး ဒူင် တွိုန်။ ဒေါ ဟာဝ် ဂေ ဒူပ် န့တေန့်၊ ဂေ ဘော ကာတုန့် ဒူအီ အူ ဝီ အီ တး ခဲင် မိူင် ကူရေန့်။ အန် စိူဝ် အာဆီမူန်။ အန် ဟဲ့ တး ဒီ မာန် အန်၊ ဒူပ် န့တေန့် ဟာဝ် ဂေ။ ဂေ ကာစွှာ့ အန်၊ တဲး အန် ဂွတ် ရွင့် ကာဝဲ့ ဒူပ် ဒီ ပန် ဇဝ် ယေဆူ။ 27 ဂေ ဒူအီ ကိူန် ဘော ဒူပ် ဒီ ပန် အန်။ ကာတဲ ဂေ ကိူန် ဘော မိုဝ်း အီဘိုန့် မင် အီ။ ဂေ ယာမ် ဘော မိုဝ်း နဝ်း က့လိုဝ် လွင် ဇဝ် ယေဆူ။ 28 ဇဝ် ယေဆူ ယီ ယိုဝ် ဂေ၊ အန် ဘော တဝ်း ဒီ ဂေ၊ “အိုယ် ဘေ အီဘိုန့် ခဲင် မိူင် ယေရူဆာလဲမ်၊ ကွဲ့ ယာမ် ကူပ် ကာဝေ ဘေ ဒီ အုဝ်။ တဲး ဘေ ယာမ် ကူပ် ကာဝေ ဘေ ဒုဝ် ဘေ ဘော ဂွန် ဘေ။ 29 န့ ဒီ ဇမ် အူ ဆီငဲ၊ ဂေ ဒူအီ ဒီ တဝ်း၊ ‘ဂေ အီဘိုန့် အီ တူ မိုဝ်း ဂွန် ဘော အီ တူ မိုဝ်း ဒီ ရတ့် ဂွန် အာင၊ ဂေ ဟဲ့ ဒါခိုယ် လွှိုမ် အီ ဟဝ်။’ 30 ဒေါ အန် တီ ဂေ ဒူအီ ဒီ တဝ်း ဒီ နွန်၊ ‘တဲး ဘေ ကေး ထိပ် ယေ။’

ဘေ ဒီ ဘော တဝ်း ဒီ ဒါအာင် မာဝ်၊ ‘တဲး ဘေ ဆီဘ့လိုက် ဝဲန် ယေ ဒီ နီ၊ ကွဲ့ တဲး ယေ လုဝ် ခမ် ဒုက် တာင် အီ ဒီ တး။’

31 ဆေ ဒူအီ ဘူင် ဇိုဝ် တီ ဒီ အုဝ်၊ အီ တူ မိုဝ်း မှာပ်၊ အီ ပီ ဟေ အိမ်၊ အာဝ် ဟူ နပ် ဒီ ကာလာင် ပီ ဒီ ဘူင် ဂေ ဒီ ဒူအီ အီ ပီ ဟေ ကာဟဝ်း။”

32 ဒေါ အန် တီ ဂေ ဒူအီ အီ တိုယ် ဇဝ် ယေဆူ နာ ရေတ့် မိူင်၊ ဂေ ဘော တိုယ် ဘော ဒူအီ အာ ဝီ၊ အီ ဟဲ့ ဘူင် မှာပ်၊ ငဝ်း ဒီရိုမ် ဘော ဂါယ် ဒူပ် ဇဝ် ယေဆူ။ 33 ဂေ ဟဲ့ တး ဇမ် ဒူင် စိူဝ် ဒူင် ကွယ် ကာအာင် ဂိန့်၊ ဂေ ဘော ဒိုက် ဇဝ် ယေဆူ ဒီ ရွင့် ကာဝဲ့။ ဟဲ့ ဟွတ့်၊ ဂေ ဘော ဆမ် ရွင့်။ န့ ဘော မိုဝ်း ဒူအီ မိုဝ်း မှာပ် အာ ဝီ ဒိုက် ဒီ ရွင့် ကာဝဲ့ ခူပ် ဇဝ် ယေဆူ။ ဂေ တဲး အူ ဝီ ကွယ် ဘ့လာက် အာအး ပေါ အူ ဝီ ကွယ် ဘ့လာက် အာဂ အန်။ 34 ဇဝ် ယေဆူ ယီ တဝ်း၊ “အိုယ် ဂုန့် အုဝ်၊ အုဝ် မှာန့်၊ တဲး မဲ ဂဝ်း ဝဲန် မှာပ် ဂေ။ ဂေ တူ နပ် မာဆေ ပီ ဘူင် ဂေ ဒီ အုဝ်။” ဂေ ဒါ ဆိုက် ယီ ကာဆာင် ခြိုင် ပီ တာ အန်၊ လာယ် ကာဒုဝ်၊ အာဆေ ဒီ ပွိုန်။

35 ဒူအီ ကိူန် ဘော ယွတ် ဇဝ် ယေဆူ။ ဂေ ဒါ ကာညာ အိုပ် မိူင် ကာညး အန်။ ဂေ တဝ်း၊ “ဒူအီ နီ ဟဲ့ ဒွိုမ် စွယ် ဒူအီ ဟဝ်။ ဆေ အန် မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ တဲး အန် ဝီ စွယ် ဒုဝ် ဘြိမ် အန်၊ ချွတ် အာဆာက် အန်။”

36 ဂေ ဒါ ဆိုက် ဘော ကာညး အန်။ ဂေ တး ဒီ အာတ့် အန်၊ ဒွါ အန် ဒျီင် အိုမ် မာငုန် အီ ပြာင်။ 37 ဂေ ဘော တဝ်း၊ “ဆေ ဟဲ့ မှာန်၊ မုး မဲ ခုန်ဒီခမ် ဒူအီ အာယူဒါ၊ တဲး မဲ ချွတ် ဒုဝ် မဲ၊ တဲး မဲ လေး လူင် ဒဲင် ရွင့် ကာဝဲ့ တီ။”

38 ဂေ ယီ ဟဲ့ ဒဲမ် အုန် နာ ဒဲင် ဂိန့် အန်၊ “ဒူအီ နီ မုး ခုန်ဒီခမ် အီ အိုပ် ဒူအီ အာယူဒါ။”

39 ဒူအီ ဘူင် မှာပ် အူ ဝီ၊ အီ ဟဲ့ ဒိုက် ဒီ ရွင့် အီ ကွယ် ခူပ် ဇဝ် ယေဆူ၊ အန် ဘော ကာလာင် ဂြုဝ်း တူ မွှိုမ် ဒီ အန်။ အန် တဝ်း၊ “ဆေ မဲ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ တဲး မဲ ချွတ် ဒုဝ် မဲ၊ ချွတ် ဘော ယာယ်။”

40 ဒူအီ အီ ဒိုက် ဒီ ရွင့် ပေါ အူ ဘ့လာက် တူ တဲး အန် ကာလာင် ပါယ် တီ။ အန် တဝ်း၊ “မဲ တူ နပ် ဒီ ယုဝ် ဇဝ်ဖြာ ဒေါ မှဝ်။း မဲ ယိုဝ်၊ မဲ လုဝ် ခမ် ဒီ ရိုမ် မှာပ် အူ မျုဝ် ဒူပ် အန်။ 41 အာယ် အာ ဝီ နီ ယီ ဟဲ့ ကာအာပ် ယမ် ပါယ် တီ။ အာယ် ဟဲ့ ဘူင် နာ တူ မွှိုမ်။ ဒူအီ နီ ယီ တူ ဘူင် နာ တူ မွှိုမ် မာဆေ။”

42 အန် ဟဲ့ ဟွတ့် ကာလာင် ပါယ် တီ၊ အန် ဝီ တဝ်း ဒီ ဇဝ် ယေဆူ၊ “တဲး မဲ နမ်လှုဝ်း အုဝ်။ ဆေ မဲ ဇမ် ခဲင် မိူင် ပီ အိုပ် မဲ၊ ကွဲ့ တဲး မဲ ပိဝ် အုဝ်။”

43 ဇဝ် ယေဆူ ဝီ တဝ်း ဒီ အန်၊ “အုဝ် တဝ်း အာခ်ု ဒီ မဲ၊ အာတိုဝ် နီ မဲ ဒီ ပွိုန် ကွယ် ဒါခိုယ်၊ ကွယ် ရိုမ် ဒူပ် အုဝ် ခဲင် မိူင် ဒါခိုယ်၊ မိူင် ဂျာမ်ဆာ။”

44 ပန် တီ ဟဲ့ ဇမ် ကာတဲ ဆီငဲ။ ဒေါ အန် တီ ခဲင် မိူင် ဘော မိူင် ဘော အပ် ဝွင့် အာဒါ အူယ် နာရီ။ 45 ခဲင် ဟုဝ် ဇဝ်ဖြာ န့ ယီ မိုဝ်း ဘိက် ဂွင့် အီ ဘဲန် ရဲင် အီ စန် ကာဆဝ်။ န့ ဘော ကာယာတ့် ရာင် အန်၊ ဘဲန် အာ ဘ့လာက်။ 46 ဇဝ် ယေဆူ ဘော ဒတ် တာင် တဝ်း၊ “အိုယ် ဂုန့်၊ အုဝ် အာပ် နဝ်း ဖွိုမ် အုဝ် ဒီ မဲ၊” အန် ဟဲ့ ဟွတ့် တဝ်း ပါယ် တီ၊ ဖွိုမ် အန် ဘော တူတ့်။

47 န့ ယီ မိုဝ်း ဒူအီ အီ အိုပ် ဒါ ဆိုက် အူ မာယဝ်း ဝီ၊ ဒေါ ယိုဝ် အန် ဒွန် မျုဝ် ပါယ် တီ၊ အန် စုး ဒီ အိူပ် ဇဝ်ဖြာ။ အန် တဝ်း၊ “ဟဲ့ မုး၊ ဟဲ့ မှာန်၊ ဒူအီ တီ ဟဲ့ မုး ဒူအီ ဆိူဝ်၊ ဒူအီ တူ ဘူင် မှာပ်။” 48 ဂေ ဒူအီ ကိူန်၊ အီ ဟဲ့ တး ယွတ် ပီ ဘူင် ဂေ၊ ဒေါ ယိုဝ် ဂေ ဒွန် မျုဝ် ပီ ဘူင် ဂေ ဒီ ဇဝ် ယေဆူ၊ ဂေ ဘော ပါ ဘာင်နဝ်း ဂေ၊ ဘော စုး ဒီ ဝီ လေး ဝေန့် ဒူင် ကွယ် ဂေ။ 49 ဂေ ဒူအီ အီ နပ် ဇဝ် ယေဆူ ဘော ဂေ အီဘိုန့် အီ ဟဲ့ ဒူပ် အန် တး အိူင် ဂါလီလေ၊ ဂေ ဘော ကွယ် နာ ကာတူင့် ယွတ် တူတ့် ဒွန် မျုဝ်။

50 န့ ယီ မိုဝ်း အီမာယ် အူ ဝီ၊ အန် မုး ဒူအီ မွှိုမ်။ အန် စိူဝ် အာယုဝ်ဆဲပ်။ အန် တး ခဲင် မိူင် အေရီမာထီ အီ ကွယ် ခဲင် အိူင် ယူဒါ။ 51 အန် ဟဲ့ နှဝ့် န့ဒဝ့် ပန် ဒီ တး အိုပ် ဇဝ်ဖြာ ကာဒါယ်။ အန် ဘော မုး ဒူအီ အီ ကွယ် ခဲင် ဖိုင် ဒါ တာင် အီ ဆုင်ဖျာတ် ဒါရာ။ အန် ယီ တူ ဆီဖဝ် ပီ ဆုင်ဖျာတ် ဂေ ဒီ ဇဝ် ယေဆူ။ အန် မိူဝ် တူ အိုင် ပီ ဘူင် ဂေ။ 52 အာယုဝ်ဆဲပ် ဘော ဟာဝ် ဇမ် ဒူင် ကွယ် အာဖီလာတ်။ အန် မှာန့်၊ တဲး အာဖီလာတ် ဒွါ ဒုဝ် ဘူင့် ဇဝ် ယေဆူ ဒီ အန်။ 53 အန် ဒိုဝ်း လူင် ဒုဝ် ဘူင့် ဇဝ် ယေဆူ ဒဲင် ရွင့် ကာဝဲ့၊ ဒိုဝ်း ဘိက် ကာတမ် လုယ် အူ ဖိူန်၊ ကာဘန် ဘိက် တီ ဒီ ဒုဝ် ဘူင့် ဇဝ် ယေဆူ။ ဟဲ့ ဟွတ့်၊ ဂေ ဘ့လေး အန် ခဲင် ကာဒဝ် ဘာရေဝ် ကာမာယ် ပဲ့ ဟဲ့ ဟွတ့် ဂိုဝ်း ဂေ ခဲင် ဒါအာင် မာဝ်၊ အီ တူ ဒွိုမ် မိုဝ်း ဒီ ဘ့လေး ဒူအီ ယမ်။ 54 ဆီငဲ အန် တီ မုး ဆီငဲ ရဲန် အုန် ဂေ ဒူအီ ဒွန် မျုဝ် အာတ့် ဆီငဲ ဒီလှဝ်။ ဒေါ အန် တီ ဆီငဲ ဒီလှဝ် ဟဲ့ ငှာ ဒီ ဇမ်။

55 ဂေ အီဘိုန့် အီ ဟဲ့ ဒူပ် ဇဝ် ယေဆူ ဆိန့် ဒေါ တး အန် ခဲင် အိူင် ဂါလီလေ၊ ဂေ ဘော ဟာဝ် ဒူပ် အာယုဝ်ဆဲပ် ခဲင် ကာဒဝ် ဘာရေဝ်၊ ယွတ် ဒူင် ဘ့လေး ဂေ ဒုဝ် ဘူင့် အန်။ 56 ဝါယ် အန် တီ ဂေ ဘော ဝေန့် ကာင် ဂေ၊ မ့ပြာယ် အုန် န့ကြိုဝ်း ဆီနမ် ပြဲ ဘော နာမန် အုး ငှုန် ပီ တာ ဂေ ဖဝ်း ဒီ ဒုဝ် ဘူင့် ဒူအီ ယမ်။ ဆီငဲ ဒီလှဝ် ဂေ ယီ ကွယ် ဒီလှဝ်၊ ဒူပ် ပီ ဒမ် ဒါရာ ဂေ ဘူင်။