1 ဇဝ် ယေဆူ ဝီ တဝ်း ဒီ ဂေ ဒီဘဲ အန်၊ “ဆေဆေ န့ ဒီ မိုဝ်း ဘဲန် မျုဝ် ဘဲန် မျုဝ်၊ အီ တဲး ဒူအီ ဘူင် နာ တူ မွှိုမ်။ န့ ယီ မုး ဒူအီ အီ ကာဆုး ဒူအီ ဘူင် နာ တူ မွှိုမ်၊ အန် ဒီ ဇမ် ဒုက် တာင်။ 2 ဆေ န့ မိုဝ်း ဒူအီ အူ ဝီ၊ ဘူင် တဲး ဂွန် ဒီတဲတ် အူ ဝီ ဘူင် နာ တူ မွှိုမ်၊ ဆေ အီ ဟဝ် ဒိုဝ်း မာဝ် ပီ ကြိတ် အီ ခါမုန် အူ ဘူင့်၊ ပက် ဟွယ် ဒီ မဲင် အန်၊ ဘျွာ အန် ခဲင် အိုမ် လိုက်၊ ဟဲ့ နပ်၊ န့ တူ မွှိုမ် ဒီ အန်။ ဆေ အီ ဘူင် ပါယ် တီ၊ န့ ယီ မွှိုမ် လွှိုမ် တဲး အန် ပွိုန် ဒီ ဒွါ ဒုက် ဒီ ဂွန် တွိုန်။ 3 ဘေ လုဝ် ဆာဒိက်။ ဆေ ဘီနွင် ဘေ ဘူင် မှာပ်၊ ဘေ လုဝ် မာနုဝ် အန်။ ဆေ အန် ကာပ့လု နဝ်း၊ ဘော ဘေ လုဝ် ဘ့လွာ့ ဝဲန် မှာပ် အန်။ 4 ဆေ အန် ယီ ဘူင် မှာပ် ဒီ မဲ အူ ဆီငဲ ဘူ ဇေန့်၊ ဆေ အန် ဘော တး ဇမ် ဒူင် ကွယ် မဲ ပေါ ဘူ ဇေန့် တဝ်း ဒီ မဲ၊ ‘အုဝ် ဟဲ့ ကာပ့လု နဝ်း၊’ တဲး မဲ ဘော ဘ့လွာ့ ဝဲန် မှာပ် အန်။”

5 ဂေ ဒီဘဲ ဇဝ် ယေဆူ တဝ်း ဒီ အန်၊ “ယေ မှာန့်၊ တဲး မဲ ဇဝ် စွယ် ယေ တဲး ယေ ညှိုမ် ဆီချာ လွှိုမ် ခါ အာတ့်။”

6 ဇဝ် ယေဆူ တဝ်း ဒီ ဂေ၊ “ဆေ နဝ်း ညှိုမ် ဘေ ဘော ဒါန် ကာအာင် ဒဝ် ဆျီမ် အူ ဂဝ်၊ ဘေ ဒီ ဘော ပွိုန် တဝ်း ဒီ ဟေ ကာပျြီး နီ၊ ‘တဲး မဲ လေး ခဲင် ကာဒါယ် တီ၊ ဝီ ဟာဝ် ကွယ် ခဲင် အိုမ် ဒိုင်၊’ ဆေ မဲ တဝ်း ပါယ် တီ၊ ဟေ တီ ဒီ ထူမ် ဒူပ် ပီ တဝ်း မဲ။

7-10 ဆေ ဒဲစေန့် ဘူင် ဂါန် ပီ စ်ု ဒါ ကာညာ အန် ဘူင်၊ ဘေ ထာင် ဒါ ကာညာ အန် ဒီ ဝီ တဝ်း ‘ဂုင် တာင်’ ဒီ ဒဲစေန့် အန်။း အာဝ် မုး ပါယ် တီ။ န့ မုး ဂါန် ပီ လုဝ် ဘူင် အန်။ ဆေ ဘေ ဟဲ့ ဟာဝ် ထဲ နာ ဘော ဟာဝ် ဘ်ု မာဘူ ဘေ၊ ဆေ ဘေ ဟဲ့ ဝေန့် ဇမ် ခဲင် ကာင်၊ အာဝ် မိုဝ်း အာဆေ ကာတဲ ဘေ အီ ဒီ တဝ်း ဒီ ဒဲစေန့် အန်၊ ‘တဲး မဲ တး အူ ဇေန့်၊ တး တုတ့် ဒီ နီ၊ ဟူမ် ဘူမ် မဲ။’ ဘေ ယီ နပ် ဒီ တဝ်း ဒီ ဒဲစေန့် ဘေ၊ ‘တဲး မဲ စွိုမ် ဘူမ်၊ ဒင် ဟာပ် အာဒါ အုဝ်။ ဟဲ့ ဟွတ့်၊ တဲး မဲ ဝီ ကာပ့လု ခြိုင် မဲ၊ အဝ်း ဘူမ် ဂေ ဟာပ်၊ ဒွါ ဒီ အုဝ် ဒီ အာတ့်။ ဆေ မဲ ဟဲ့ ဟွတ့် ဘူင် တူတ့် ဒွန် မျုဝ်၊ ဘော မဲ ဟဲ့ ပွိုန် ဒီ ဟူမ် ဘူမ် မဲ။’ ပါယ် တီ ဒွန် အီ နပ် ဒီ ဘူင်။ ဘော ဘေ လုဝ် ဘ့လေး နဝ်း ဘေ ပါယ် တီ။ ဘေ ဟီ ဟွတ့် ဘူင် ဒွန် မျုဝ် ပီ စ်ု ဇဝ်ဖြာ ဘေ ဘူင်၊ ဘေ လုဝ် တဝ်း၊ ‘အုဝ် မုး ဒဲစေန့် အာဝ် အး။ အုဝ် ဟဲ့ ဘူင် ဂါန် ခဲ့ ပီ လုဝ် အုဝ် ဘူင်။’”

11 အူ ဆီငဲ၊ ဒေါ ဟာဝ် ဇဝ် ယေဆူ ဒူပ် န့တေန့် ဟုဝ့် မိူင် ယေရူဆာလဲမ်၊ အန် ဘော ပွုန် ဟာဝ် ကာတဲ အိူင် ဆာမာရီ ဂါယ် အိူင် ဂါလီလေ။ 12 ဝါယ် ဟဲ့ လိုပ် အန် ခဲင် မိူင် အူ မိူင်၊ အန် ကာတုန့် ဒူအီ အီ မိုဝ်း ဆဝ် ဒု^a ဂိုဝ် ဝီ။ ဂေ ဒူအီ တွိုန်၊ ဒေါ ဆီ ကွယ် ကာတူင့် ဂေ ဒီ အန်၊ ဂေ ဟဲ့ ယိုဝ် အန်။ 13 ဂေ ဘော ဒတ် တာင် တဝ်း၊ “အိုယ် ဇဝ် ယေဆူ၊ အိုယ် မဲ ဇဝ်၊ ယေ မှာန့်၊ တဲး မဲ ကာဝေ ယေ။”

14 ဇဝ် ယေဆူ ဟဲ့ ယိုဝ် ဂြုဝ်း ဂေ၊ အန် တဝ်း ဒီ ဂေ၊ “ဘေ လုဝ် ဟာဝ် ဇမ် ဒူင် ကွယ် ဒူအီ အီ လှူ ဒီ ဇဝ်ဖြာ၊ တဲး အန် ယွတ် ဘေ၊” အန် ဟဲ့ ဟွတ့် တဝ်း ပါယ် တီ၊ ဂေ ဟာဝ် အူ ဇေန့်။ ဒေါ ဟာဝ် ဂေ ဒူပ် န့တေန့်၊ ဆဝ် ဒု ဂေ ဘော ဟြာယ် အူ ဇေန့်။

15 န့ ယီ မိုဝ်း ဒူအီ အူ ဝီ၊ ဒေါ ယိုဝ် အန်၊ ဆဝ် အန် ဟဲ့ ဟြာယ်၊ အန် ဘော ဝီ ဝေန့်၊ ဘော အိူပ် ဇဝ်ဖြာ ကာလာင် ဂြုဝ်း တာင်။ 16 အန် ဘော ခြိုပ်ခြဝ် ဒီ အာတ့် ဇဝ် ယေဆူ၊ ကာလာင် ဂုင် ဒါင် ဒီ အန်။ ဒူအီ တွိုန် ယီ မုး ဒူအီ အာမျုဝ် ဆာမာရီ။

17 ဇဝ် ယေဆူ တဝ်း၊ “ခါ အာတ့် အုဝ် ထာင် ဟဲ့ မိုဝ်း ဂိုဝ် ဝီ ပီ ပီဟြာယ် အုဝ် ဆဝ် ဂေ။ ဒူအီ ဒိမ် ဝီ တွိုန်၊ ဂေ ကွယ် နာ မှဝ်။း

18 ဒဲင် ဒူအီ အူ ဝီ နီ၊ အီ မုး အာမျုဝ် ဟဝ် အာဝ် မိုဝ်း ပေါ အူ ဝီ အီ ဆီ အိူပ် ဇဝ်ဖြာ။း” ဟဲ့ ဟွတ့်၊ အန် တဝ်း ဒီ ဒူအီ တီ၊ 19 “တဲး မဲ ယိတ့်၊ တဲး မဲ ဝေန့် ကာင် မဲ။ ကူပ် ဟဲ့ ညှိုမ် မဲ၊ မဲ ဟဲ့ ကဲန်။”

20 ဂေ ဒါ ဆာရာ ခဲင် ဖိုင် ဖာရီဆဲ၊ ဂေ ယီ ဒီမွှတ် ဇဝ် ယေဆူ လွင် အာခြာဝ် ဒီ တး အိုပ် ဇဝ်ဖြာ ဒူအီ ဒဲင် ကာဒါယ်။ ဇဝ် ယေဆူ တဝ်း ဒီ ဂေ၊ “ဆေ ဇဝ်ဖြာ တး အိုပ် ဒူအီ ဒဲင် ကာဒါယ်၊ န့ တူ မိုဝ်း မာဆေ ပီ ပွိုန် ယိုဝ် ဒူအီ ဒီ ငါယ် ဂေ။ 21 အာဝ် မိုဝ်း အာဆေ အီ ပွိုန် တဝ်း၊ ‘နီ၊ မိူင် ဇဝ်ဖြာ ကွယ် ဒီ နီ။’ န့ မိူဝ် တူ မိုဝ်း အာဆေ အီ တဝ်း ‘ယွတ် ဒီ နူ၊ မိူင် ဇဝ်ဖြာ ကွယ် ဒီ နူ။’ အုဝ် ယီ တဲး ဘေ နပ်၊ အာခြာဝ် ဒီ အိုပ် ဇဝ်ဖြာ ဒူအီ ဒဲင် ကာဒါယ်၊ အန် ဟဲ့ တး ဇမ်၊ ကွယ် ဒီ ကာတဲ ဘေ။”

22 ဟဲ့ ဟွတ့် ပန် တီ အန် ဝီ တဝ်း ဒီ ဂေ ဒီဘဲ အန်၊ “န့ ဒီ ဘော ဇမ် အာခြာဝ် အန်၊ ဘေ ဒီ ဘော ကာပြာ ကာဆဝ် ဒီ ယိုဝ် အုဝ် အီ ဟဲ့ ဘဲန် ဂွန် ဒူအီ ခေါ အူ ဆီငဲ။ ဘေ ယီ တူ ပွိုန် ယိုဝ်။ 23 န့ ဒီ ဘော မိုဝ်း ဒူအီ ဒီ တဝ်း ဒီ ဘေ၊ ‘ယွတ် နာ နီ၊ အန် ကွယ် ဒီ နီ။ ယွတ် နာ နူ၊ အန် ကွယ် ဒီ နူ။’ ကွဲ့ တဲး ဘေ လေး ဟာဝ် ဒူပ် ပီ ကာလာင် ဂေ။ 24 န့ ပီ ပ့လ မ့ပ့လေတ့်။ ဘ့လာင် အန် လေး အူ ဘ့လာက် ခဲင် ဘ့လေန့် ဟာဝ် ဇမ် ပေါ ဘ့လာက်။ ဆီငဲ ပန် ဒီ ဝီ တး လူင် အုဝ် ဒဲင် ကာဒါယ်၊ န့ ဒီ ဘော ဘဲန် ပါယ် တီ။ 25 ခါ အာတ့် ဒူအီ အီ ဟဲ့ ဘဲန် ဒူအီ ယီ လုဝ် ခမ် ဒုက် ဘဲန် မျုဝ် ဘဲန် မျုဝ်။ ဒူအီ ဇာတ် နီ တူ ရွုး အန်၊ ဂေ ဒီ ဝဲန် အန်။

26 ဒေါ ဇမ် အာခြာဝ် ပန် ဝီ တး အုဝ် အီ ဟဲ့ ဘဲန် ဂွန် ဒူအီ လူင် ဒဲင် ကာဒါယ် နီ၊ န့ ပီ ဒေါ မုး ဇာတ် ဒါ အာနုဝ် ဒေါ မွိုန်။ 27 ဒေါ မုး ဇာတ် အာနုဝ် တွိုန်၊ ဂေ ဒူအီ ဟူမ် ဒါခိုယ်။ ဂေ ဘော လာယ် လာယ်၊ လာယ် ခတ်၊ ကော ဇမ် ဆီငဲ ဒေါ လိုပ် အာနုဝ် ခဲင် ရိုဝ် ဆင်ဖုဝ် တာင် တွိုန်။ ဟဲ့ ဟွတ့် အိုမ် တာင် ဟဲ့ တး ဒေါ တူ နမ်လှုဝ်း ဂေ၊ မ့ပုန် ဒွန် အီ၊ တဲး ဂေ ယမ် ဘောကာဂ့လျီတ်။

28 န့ ဘော ပီ ဒေါ မွိုန်၊ ဒေါ မုး ဇာတ် အာလူတ် တွိုန်။ ဂေ ဒူအီ ဘော ဟူမ် ဘော ဒျီင်၊ ဂေ မိူဝ် ကာစိုဝ်း ကာယွင့်၊ ဘော ဆမ် ငှုဝ်၊ ဆမ် ကာင်။ 29 ယီ ဇမ် ဆီငဲ လေး အာလူတ် ခဲင် မိူင် ဆုဝ်ဒူမ် တွိုန်၊ န့ ဘော မိုဝ်း ဂ့လာယ် ငဝ် ဘော ဂန်ဒိူက်၊ လေး ခဲင် ဂါင်ဟြာဝ်၊ တဲး ဂေ ဒွန် အီ ယမ် ဒေါ တူ နမ်လှုဝ်း ဂေ။

30 ဆီငဲ ဒီ ဘျ ဇဝ်ဖြာ ဒူအီ အီ ဟဲ့ ဘဲန် ဂွန် ဒူအီ၊ တဲး အန် ဝီ တး လူင် ဒဲင် ကာဒါယ် နီ၊ န့ ဒီ ပါယ် တီ။ 31 ဆီငဲ အန် တီ၊ ဆေ ဒူအီ အူ ဝီ ကွယ် နာ ဒဲင် ကာင် အန်၊ ဆေ အန် ဝီ လူင်၊ ကွဲ့ တဲး အန် ဝီ လိုပ် ဒိုဝ်း ကြုဝ်ကြာမ် အန် ခဲင် ကာင်။ တဲး အန် ဟာဝ် တဝ် အူ ဇေန့်။ န့ ဘော ပါယ် တီ။ ဆေ ဒူအီ အူ ဝီ ကွယ် ခဲင် မာန်၊ ကွဲ့ တဲး အန် ဝေန့် ကာင် အန်။ တဲး အန် ယီ ဟာဝ် တဝ် အူ ဇေန့်။ 32 တဲး ဘေ ယီ လှုဝ်း အီဘိုန့် အာလူတ် တွိုန်။ 33 အာဆေ ဆီ ချွတ် အာဆာက် အန်၊ အန် ဒီ စှိုမ် အာဆာက် အန်။ အာဆေ ယီ တူ ယုဝ် ဒီ ယမ်၊ အန် တူ စှိုမ် အာဆာက် အန်။ 34 အုဝ် တဝ်း ဒီ ဘေ၊ ခဲင် မှိုဝ် တီ၊ န့ ဒီ မိုဝ်း ဒူအီ အာ ဝီ၊ ဂေ ဒီ အိတ် ဒဲင် ကာစှူင့် အူ ဘူင့်။ ဇဝ်ဖြာ ဒီ တဲး အူ ဝီ ဟုဝ့် ဂါင်ဟြာဝ်။ ပေါ အူ ဝီ ယီ ကွယ် နာ ပန်။ 35 န့ ဒီ ဘော မိုဝ်း အီဘိုန့် အာ ဝီ အီ ကြိတ် ခါမုန် အူ ပ့လုဝ့်။ ဇဝ်ဖြာ ဒီ ဒိုဝ်း အူ ဝီ၊ ဝီ အုန် ပေါ အူ ဝီ။

36 န့ ဒီ ဘော မိုဝ်း အီမာယ် အာ ဝီ ကွယ် ခဲင် ဒူင် နာ။ ဇဝ်ဖြာ ဒီ ဘော ဒိုဝ်း အူ ဝီ၊ ဝီ အုန် ပေါ အူ ဝီ။^b”

37 ဂေ ဒူအီ အီ ထူမ် ဂြုဝ်း ဇဝ် ယေဆူ တီ ဘော ဂေ ဒီဘဲ အန် ဝီ ဒီမွှတ် အန် တဝ်း၊ “မဲ ဇဝ်၊ ပန် မှဝ် န့ ဒီ ဘော ဘဲန် ပါယ် တီ ဒွန် မျုဝ်။း” အန် ဝီ တဝ်း ဒီ ဂေ။ “ဆေ န့ မိုဝ်း ဒုဝ် အီ ယမ်၊ ဂေ မာလင်ဒါ ဘော ကွယ် ကာဇု ဒူင် တီ ဟူမ်။” ဇဝ် ယေဆူ တဝ်း ပါယ် တီ ဒီ ဂေ။