1 ဇဝ် ယေဆူ ဝီ တဝ်း ဒီ ဒီဘဲ အန်၊ “န့ ဟဲ့ ဒွိုမ် မိုဝ်း ဒူအီ ခြမ် အူ ဝီ။ အန် မိုဝ်း ဒဲစေန့် အူ ဝီ၊ အီ အိုပ် တူတ့် ကြုဝ်ကြာမ် အန်။ ဒူအီ ခြမ် တွိုန် ဘော ယိုဝ် အီ ဟဝ် ကာလာင် လွင် ဒဲစေန့် အန် တီ။ ဂေ တဝ်း၊ အန် တူ ဘ်ု ဆီချာ ရွိုန် ဒါ ကာညာ အန်။ 2 ဒါ ကာညာ ဘော ဒဲ့ ဒဲစေန့် အန်၊ ဒီမွှတ် အန် တဝ်း၊ ‘အုဝ် ယိုဝ် အီ တူ မွှိုမ် ဘဲန် မျုဝ် ဘဲန် မျုဝ် လွင် ပီ ဘူင် မဲ။ မဲ အာဝ် ဟူ ပွိုန် ဘူင် ဂါန် အုဝ်။ တဲး မဲ ဘျ ဘပ် ဇာရာင် ပီ ဒဲမ် အုန် မဲ ဒွန် မျုဝ်၊ တဲး အုဝ် နပ်။’

3 အန် ဟဲ့ ဟွတ့် တဝ်း ပါယ် တီ၊ ဒဲစေန့် တွိုန် တဝ်း ခဲင် နဝ်း အန်၊ ‘ဒါ ကာညာ အုဝ် ဟဲ့ တဝ်း ဒီ ဝဲန် အုဝ်၊ ကွဲ့ ဟူ တဲး အုဝ် ဘူင် ဂါန် အန်။ မာဆေ ပီ ဒီ ဘူင် အုဝ်။း လုဝ့် မာန်၊ အုဝ် တူ ခမ် ဒီ ဘူင်။ အုဝ် တူ မိုဝ်း ပ့လူမ်။ မှာန့် ဒီ ဟူမ် ဒီ အီ ဟဝ်၊ အုဝ် ဆာယ် အီ။ အာဝ် ကာအာပ် အုဝ် ဘူင်။ 4 အိုဝ်၊ အုဝ် ဟဲ့ နပ် ပီ ဒီ ဘူင် အုဝ်။ အုဝ် ဒီ ဘူင် ပါယ် နီ။ ဆေ အုဝ် အာဝ် ဟူ ပွိုန် ဘူင် ဂါန် အုဝ် နီ၊ န့ ဒီ မိုဝ်း ဒူအီ ဒီ ဘာင် အုဝ် တဲး အုဝ် ကွယ် ခဲင် ကာင် ဂေ။’

5 ဟဲ့ ဟွတ့် ပန် တီ ဒူအီ တွိုန် ဘာင် ဂေ ဒူအီ ဒွန် ဝီ အီ ကာရဝ်း ဒီ ဒါ ကာညာ အန်။ အန် တဝ်း ဒီ အူ ဝီ၊ ‘ခဲ့ မှဝ် မဲ မိုဝ်း ဒီ ကာရဝ်း။း ခဲ့ မှဝ် မဲ ဒီ လုဝ် ဝီ ဒွါ ဒီ ဒါ ကာညာ အုဝ်။း’ အန် ဟဲ့ ဟွတ့် တဝ်း ပါယ် တီ၊ 6 ဒူအီ တွိုန် ဝီ တဝ်း ဒီ အန်၊ ‘အုဝ် ကာရဝ်း နာမန် အူ မာယဝ်း ပုင်။’ ဒဲစေန့် တွိုန် ဝီ တဝ်း၊ ‘နီ၊ ဒိုဝ်း ဘပ် ပီ ဒဲမ် အုန် ခဲ့ ပီ ကာရဝ်း မဲ။ တဲး မဲ တုတ့် ဒီ နီ၊ တဲး မဲ ဝီ ဒဲမ် ဟဲ ဟဲ၊ ဘျွင် တဲး န့ ဘဲန် ဖန် ဂိုဝ် ပုင်။’

7 ဟဲ့ ဟွတ့်၊ အန် ဝီ တဝ်း ဒီ ဒူအီ ပေါ အူ ဝီ၊ ‘မဲ လဲ့။း ခဲ့ မှဝ် မဲ ဟဲ့ ကာရဝ်း ဒီ ဒါ ကာညာ အုဝ်။း’

ဒူအီ တွိုန် ဝီ တဝ်း ဒီ အန်၊ ‘အုဝ် ကာရဝ်း ဒီဂါဝ် အူ မာယဝ်း ဘ့လဲ။’

ဒဲစေန့် တွိုန် ဝီ တဝ်း၊ ‘နီ၊ ဘပ် ပီ ဒဲမ် အုန် ပီ ကာရဝ်း မဲ။ တဲး မဲ ဘျွင် ဘဲန် ဒါ ဂိုဝ် ဘ့လဲ။’

8 ပန် တီ ဒါ ကာညာ အန် ဝီ အိူပ် ဒဲစေန့် အန် တွိုန်။ ခုဝ်၊ အန် ပီ ဆ ဘူင် နာ မှာန်၊ အန် ယီ ဟဲ့ လွှက့် ကာဆဝ်။ ဂေ ဒူအီ အီ တူ ဒူပ် ဇဝ်ဖြာ၊ ဒေါ ဘူင် ဂေ ဂါန် ဂေ၊ ဂေ နပ် ဒီ လာယ် ပီလွှက့် လွှိုမ် ဂေ ဒူအီ အီ ကွယ် ဘ့လာက် မိုဝ်း ဘ့လာင် ဇဝ်ဖြာ။ 9 ခုဝ် အန် တီ အုဝ် ယီ တဝ်း ဒီ ဘေ၊ တဲး ဘေ ကာဆာင် ကြုဝ်ကြာမ် ဘေ၊ တဲး ဘေ ပွိုန် ဂိုက် ကိူန်။ ဆေ ကြုဝ်ကြာမ် ဘေ ဒဲင် ကာဒါယ် နီ ဟဲ့ တူတ့်၊ ဇဝ်ဖြာ ယီ ဒီ ရွုး ဘေ၊ တဲး ဘေ ကွယ် ခဲင် ကာင် အန်၊ အီ မန် ဆီချာ ဆေဆေ။

10 အာဆေ ကာဆိူဝ် ဒီ ဘူင် ဂါန် အီ အာရေ တူ တာင်၊ အန် ဒီ ဘော ကာဆိူဝ် ဒီ ဘူင် ဂါန် အီ အာရေ တာင်။ အာဆေ ယီ တူ ကာဆိူဝ် ဒီ ဘူင် ဂါန် အီ အာရေ တူ တာင်၊ အန် မိူဝ် တူ ပဲ ဒီ ဘူင် ကာဆိူဝ် ဂါန် အီ အာရေ တာင်။ 11 ဘော ဘေ၊ ဆေ ဘေ တူ နပ် ဒီ လိုမ်လာ ဆီချာ ကြုဝ်ကြာမ် ဘေ၊ ဘော ဇဝ်ဖြာ တူ အာပ် ကြုဝ်ကြာမ် အန် ဒီ ဘေ အီ တူ ပွိုန် စှိုမ်၊ တူ ပွိုန် ဟြာယ်။ 12 ဆေ ဘေ တူ ကာဆိူဝ် ဒီ လိုမ်လာ ကြုဝ်ကြာမ် ဒူအီ ဟဝ်၊ န့ တူ မိုဝ်း အာဆေ အီ ယ ဒွါ ကြုဝ်ကြာမ် အန် ဒီ ဘေ။

13 အာဝ် မိုဝ်း ဒူအီ အီ ပွိုန် ဘဲန် မှာယ် ဒါ ကာညာ အာ ဝီ။ ဆေ အန် ရွက့် အူ ဝီ၊ အန် ဒီ ဝီ ဇွင့် ပေါ အူ ဝီ။ ဆေ အန် ဘော ထူမ် ဂြုဝ်း အူ ဝီ၊ အန် တူ ဝီ ရုဝ်ဆေ ပေါ အူ ဝီ။ ပါယ် တီ၊ ဘော ဘေ၊ ဘေ တူ ပွိုန် ဒူပ် ဆီချာ ဇဝ်ဖြာ ဘော ဘူင် ဘဲန် မျုဝ် ဘဲန် မျုဝ် တဲး ဘေ ပွိုန် ကိူန် ရွိုန်။” ဇဝ် ယေဆူ ဟဲ့ မာနုဝ် ပါယ် တီ။

14 ဂေ ဖိုင် ဖာရီဆဲ၊ ဂေ ယီ မုး ဒူအီ အီ ရွက့် ရွိုန်။ ဒေါ ထူမ် ဂေ ဒွန် မျုဝ် ပီ မာနုဝ် ဇဝ် ယေဆူ၊ ဂေ ကာညး ဇဝ် ယေဆူ။ 15 ဇဝ် ယေဆူ ဝီ တဝ်း ဒီ ဂေ၊ “ဘေ နပ် ဒီ ကာလာင် တဲး ဂေ ဒူအီ ဟဝ် ထာင် ဘေ ဟဲ့ မွှိုမ် ဟဲ့ ဘွတ်။ ဇဝ်ဖြာ ယီ နပ် နဝ်း ဘေ။ ဆေ ဒွန် အီ ဒဲင် ကာဒါယ် တဝ်း၊ မျုဝ် နီ မျုဝ် နီ ဟဲ့ မွှိုမ်၊ ဟဲ့ ဘွတ်၊ ဇဝ်ဖြာ ယီ တဝ်း၊ အာဝ် မုး၊ အာဝ် မွှိုမ်။ န့ မွှိုမ် ကာအိး ဒီ ငါယ် အန်။

16 အူ ဆိန့် ဒေါ ဂုဝ် အန် ကော ဇမ် စုဝ် ဒါ ဆာရာ အာယောဟာန် အီ စိုပ် ဒူအီ ခဲင် အိုမ်၊ ဒူအီ ဟဲ့ ပွိုန် ဒီ ထူမ် ဒါရာ ပီ ဒွါ ဇဝ်ဖြာ ဘော ဒါရာ ပီ ဒဲမ် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဝီ စုး ဆိန့် စုဝ် အာယောဟာန် တီ၊ ဒူအီ ဝီ ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ ဘော လွင် မိူင် ပီ အိုပ် ဇဝ်ဖြာ။ ဂေ ဒူအီ အီ ထူမ် လွင် အန် တီ၊ ဂေ ကိူန် ဘော လာယ် ကာဖာ့၊ လာယ် ကာဆျီ့ ဒီ လိုပ် ခဲင် မိူင် တီ။ 17 ဆေ ကာဒါယ် ဘော ဂါင်ဟြာဝ် ဒီ ဘော ဟြာယ်၊ ဒါရာ ဇဝ်ဖြာ တူ ဟြာယ် ဒေါ မှဝ်။ ဆိး ဒီတဲတ် အီ ဒိုက် ဒီ ဒုဝ် ထမ် အူ ဒုဝ် ခဲင် ဘပ် ဒါရာ ဇဝ်ဖြာ မိူဝ် တူ ဟြာယ် ဒေါ မှဝ်။

18 ဆေ ဒူအီ ဝဲန် အီဘိုန့် အန်၊ ဝီ ဒိုဝ်း အီဘိုန့် ကာမာယ်၊ ဒူအီ တွိုန် မိုဝ်း မှာပ် လုတ့် အီဘိုန့်။ ဒူအီ အီ ဒိုဝ်း အီဘိုန့် အီ ဟဲ့ ဟွတ့် ခတ် ဒီ အီ ဟဝ်၊ ဘော အန် ဟဲ့ ဘူင် မှာပ် လုတ့် အီဘိုန့် အီ။”

19 ဝါယ် အန် တီ ဇဝ် ယေဆူ ဝီ တဝ်း၊ “န့ ဟဲ့ ဒွိုမ် မိုဝ်း ဒူအီ ခြမ် အူ ဝီ၊ အန် စှိုပ် ဆေဆေ ခြိုင် အီ ရေန့် အီ ကာလှဲ ပီ စှိုပ် ခုန်ဒီခမ်။ ဒွန် ဆီငဲ အန် ဘော ဟူမ် ဖဲ ဟူမ် ဆီငဲး၊ ကွယ် ဒါခိုယ်၊ တူ အေတ့် မာဆေ။ 20 န့ ဘော မိုဝ်း ဒူအီ ဂိန် အူ ဝီ။ အန် စိူဝ် အာလာဇာရုတ်။ အန် မိုဝ်း ဒိမ် ဘော ဒုဝ်။ ဂေ ဒူအီ ဟဝ် ဟဲ့ တး ဘ့လေး အုန် အန်၊ တဲး အန် ကွယ် ကာတတ် မာလုဝ်း ကာင် ဒူအီ ခြမ် တွိုန်။ 21 ဒူအီ ဂိန် တီ ဘ်ု ဒီ ဟူမ် ဘူမ် အီ ကာလူယ် ခဲင် ကာင် ဒူအီ ခြမ်။ န့ ဘော မိုဝ်း မာဆုဝ် တး လျီ့ ဒိမ် အန်။

22 ဟဲ့ ဟွတ့် ပန် တီ ဒူအီ ဂိန် တွိုန် ဘော ယမ်။ ဂေ အာမူ အာမာတ် ဇဝ်ဖြာ တး ဒိုဝ်း အန်၊ တဲး အန် ကွယ် ရိုမ် ဒူပ် ဒါ အာဘြာဟမ် တွိုန်။ ဝါယ် အန် တီ ဘော ဒူအီ ခြမ် ဟဲ့ ဝီ ယမ်။ ဂေ ဘော ဒိပ် ဒုဝ် အန် ခဲင် ဘာရေဝ်။ 23 ဒေါ ကွယ် ဒူအီ ခြမ် ခဲင် မိူင် မာရာန၊ ဒေါ ခမ် အန် ဒုက် ဘဲန် မျုဝ် ဘဲန် မျုဝ်၊ အန် ဘော ဆာကိုဝ်း ယွတ် ဒါ အာဘြာဟမ် နာ ကာတူင့်။ ဘော အာလာဇာရုတ် ကွယ် ခူပ် အာဘြာဟမ်။ 24 အန် ဝီ ဒတ် တာင် တဝ်း၊ ‘အိုယ် ဒါ အာဘြာဟမ်၊ တဲး မဲ ကာဝေ အုဝ်။ အုဝ် မှာန့်၊ တဲး မဲ တဲး အာလာဇာရုတ် တး ဒူင် ကွယ် အုဝ် နီ၊ တဲး အန် စိုပ် ကာနူ အန် ခဲင် အိုမ်၊ တဲး အန် ဇုတ် ဒီ ဆီဒ အုဝ်၊ တဲး န့ ဂျီတ် ဒီ အုဝ် အီ စဲက်။ အုဝ် ဟဲ့ ဒုက် ကာဆဝ် ခဲင် ငဝ် နီ။’

25 ဒါ အာဘြာဟမ် ဝီ တဝ်း၊ ‘အိုယ် လှာန်၊ မဲ လုဝ် လှုဝ်း၊ ဒေါ ကွယ် မဲ ဒဲင် ကာဒါယ်၊ မဲ ဟဲ့ ပွိုန် တူတ့် နာ မွှိုမ် ဒွန် မျုဝ်။ အာလာဇာရုတ် ယီ ဟဲ့ ပွိုန် အီ တူ မွှိုမ် ဒွန် မျုဝ် ဒေါ ကွယ် အန် ဒဲင် ကာဒါယ်။ ဒေါ တီ နီ၊ အာလာဇာရုတ် ဟဲ့ ပွိုန် ကွယ် ဒါခိုယ် ဒူင် ကွယ် အုဝ် နီ။ မဲ ယီ လုဝ် ခမ် ဒုက်။ 26 ဒဲင် တီ၊ န့ မိုဝ်း ကာဒဝ် ဟူလဝ် အီ လိုက် ကာတဲ အေ နီ။ ဆေ ဒူအီ ဆီ ကာလုဝ်း ဒူင် နီ၊ ဟာဝ် ဇမ် ဒူင် ကွယ် မဲ၊ အာဝ် ပွိုန်။ ဆေ န့ ဘော မိုဝ်း ဒူအီ ကွယ် ဘ့လာက် ဘေ၊ ဆေ ဂေ ဆီ တး ဇမ် ဒူင် နီ၊ ဘော ဂေ တူ ပွိုန် ဒီ တး ဇမ်။’

27 အန် ဟဲ့ ဟွတ့် ကာလာင် ပါယ် တီ၊ ဒူအီ ခြမ် တွိုန် ဝီ တဝ်း၊ ‘အိုယ် ဒါ အာဘြာဟမ်၊ ဒါ ယေ၊ ဆေ န့ ပါယ် တီ၊ အုဝ် မှာန့်၊ တဲး အာလာဇာရုတ် ဝေန့် ဒီ ကာင် ဂုန့် အုဝ်။ 28 အုဝ် ဆီ မိုဝ်း အူကတ် အူဝါ အုဝ် ဖန် ဝီ။ တဲး အာလာဇာရုတ် ကာလာင် ဒီ ဂေ၊ တဲး ဂေ ဆာဒိက်၊ ကွဲ့ တဲး ဘော ဂေ တး ဇမ် ဒူင် ကွယ် အုဝ် နီ။ ဒီ နီ မိုဝ်း မီ ဆဝ် ဂေ ဒုက် ဘဲန် မျုဝ် ဘဲန် မျုဝ် ပီ လုဝ် အီ ခမ်။’

29 ဒါ အာဘြာဟမ် ဝီ တဝ်း၊ ‘ဂေ အူကတ် အူဝါ မဲ၊ ဂေ ဟဲ့ မိုဝ်း ဘပ် ဇဝ်ဖြာ ပီ ဒဲမ် အုန် ဒါ အာမုဝ်ဆဲ တွိုန်။ ဂေ ဟဲ့ မိုဝ်း ဘော ဘပ် ဇဝ်ဖြာ ပီ ဒဲမ် အုန် ဂေ ဒူအီ အီ ဘျာန် ဂြုဝ်း ဇဝ်ဖြာ။ တဲး ဂေ အူကတ် အူဝါ မဲ တီ ထူမ် ပီ ဒဲမ် အုန် ခဲင် ဘပ် ဇဝ်ဖြာ။’

30 ဒူအီ ခြမ် ဝီ တဝ်း၊ ‘အိုယ် ဒါ အာဘြာဟမ်၊ ဒါ အုဝ်၊ န့ တူ ဘဲန် ပါယ် တီ။ ဆေ မိုဝ်း ဒူအီ ဟဲ့ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ်၊ ဆေ အန် ဒီ တး ဇမ် ဒူင် ကွယ် ဂေ၊ ဂေ ဒီ ဘော နပ် ဒီ ဝဲန် နဝ်း ဘြိမ် ဘော ဒိုဝ်း နဝ်း ကာမာယ်။’

31 ဒါ အာဘြာဟမ် ယီ တဝ်း၊ ‘ဆေ ဂေ တူ ဆီ ထူမ် ဂြုဝ်း ပီ ဒဲမ် အုန် ဒါ အာမုဝ်ဆဲ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဘော အီ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ်၊ ဂေ ဒီ ဝဲန် ဘော အန်၊ တူ ထူမ် ဂြုဝ်း အန်။’” ဇဝ် ယေဆူ မာနုဝ် ဂေ ဒူအီ ကိူန် ပါယ် တီ။