1 ဝါယ် အန် တီ ဂေ ဒူအီ ဂဲပ် ရွိုန် စိုင် ဘော ဂေ ဒူအီ မိုဝ်း မှာပ် ဒွန် မျုဝ်၊ ဂေ ဒွန် အီ ဟဲ့ တး ဇမ် ဒူင် ကွယ် ဇဝ် ယေဆူ။ ဂေ တဝ်း ဒီ ထူမ် ဂြုဝ်း ပီ ကာလာင် အန်။ 2 ဂေ ဖိုင် ဖာရီဆဲ ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ တူ အိုင် ဒူအီ ဇိုဝ် တီ တး။ ဂေ ကာလာင် လွင် ဇဝ် ယေဆူ တဝ်း၊ “မှဝ် န့ ပါယ် ပီ ရွုး ဒူအီ နီ ဂေ ဒူအီ အီ မိုဝ်း မှာပ်။း မှဝ် န့ ပါယ် ပီ ဟူမ် ရိုမ် အန် ဒူပ် ဂေ။း”

3 ပန် တီ ဇဝ် ယေဆူ ဝီ ကာလာင် အူဖာမာ ဒီ ဂေ။ အန် တဝ်း၊ 4 “ဆေ န့ မိုဝ်း ဒူအီ အူ ဝီ ကာတဲ ဘေ၊ ဆေ အန် မိုဝ်း မာဘူ အူ မာယဝ်း ဒုဝ်၊ ဆေ ယီ မိုဝ်း အူ ဒုဝ် အီ ဟဲ့ ဘျုဝ်း၊ ဒါ အီ ဟျီင် မာဘူ တီ ဒီ ဘော ဘ့လေး အုန် မာဘူ ဒိမ် ဂိုဝ် ဒီ ဒိမ် ဒုဝ် တွိုန် ခဲင် မာန်၊ ဝီ ဟာဝ် ဟြေတ့် အူ ဒုဝ် အီ ဟဲ့ ဘျုဝ်း တွိုန်၊ တဲး အန် ကော ဝီ ကာဒုး။ 5 ဒူအီ တီ၊ ဒေါ ဝီ ယိုဝ် အန် မာဘူ အီ ဟဲ့ ဘျုဝ်း၊ အန် ဘော ခူယ် ကာဆဝ်။ ဟဲ့ ဟွတ့်၊ အန် ဒီ ဘော ပုဝ် မာဘူ တီ ဒဲင် ယ အန်၊ ဝီ ဝေန့် ဒီ ကာင် အန်။ 6 အန် ဟဲ့ ဟွတ့် ဇမ် ကာင် အန်၊ အန် ဒီ ဘော ဒဲ့ အီ ဟဝ်၊ အီ မုး ဂိုက် အန်၊ တဲး ဂေ ဘောကာဂ့လျီတ် တး။ အန် ဒီ ဝီ တဝ်း ဒီ ဂေ၊ ‘တဲး ဘော ဘေ ဒါခိုယ် ပီ အုဝ် ဟဲ့ ဒါခိုယ်။ အုဝ် ဟဲ့ ဝီ ကာဒုး မာဘူ အီ ဘျုဝ်း တွိုန်။’ 7 အုဝ် တဝ်း ဒီ ဘေ၊ န့ ဘော ပါယ် တီ ခဲင် မိူင် ဂါင်ဟြာဝ်။ ဆေ န့ မိုဝ်း ဒူအီ ဒိမ် ဂိုဝ် ဒီ ဒိမ် ဝီ ဒဲင် ကာဒါယ်၊ ဆေ ဂေ မိုဝ်း နဝ်း ဆိူဝ်၊ နဝ်း မှာန်၊ ဂေ အီ ကွယ် ဂါင်ဟြာဝ်၊ ဂေ ဒီ မိုဝ်း နဝ်း ဒါခိုယ် လွင် ဂေ တီ။ ဆေ န့ ယီ မိုဝ်း ဒူအီ အူ ဝီ၊ အီ ဟဲ့ လှုဝ်း မှာပ် အန်၊ ဝဲန် နဝ်း ဘြိမ် အန်၊ ဂေ ဒူအီ အီ ကွယ် ခဲင် မိူင် ဂါင်ဟြာဝ်၊ ဂေ ဒီ မိုဝ်း နဝ်း ဒါခိုယ် လွှိုမ် ဒါခိုယ် ဂေ လွင် ဒူအီ ဒိမ် ဂိုဝ် ဒီ ဒိမ် ဝီ တွိုန်၊ အီ ဟူ လုဝ် လှုဝ်း မှာပ် ဂေ ဘော ဝဲန် နဝ်း ဘြိမ်။”

8 ဝါယ် အန် တီ ဇဝ် ယေဆူ ဝီ တဝ်း၊ “အုဝ် တဝ်း ပေါ အူ မျုဝ်။ ဆေ န့ မိုဝ်း အီဘိုန့် အူ ဝီ၊ အီ မိုဝ်း ရွိုန် ဂိုဝ် ဘူင့်၊ ဆေ အူ ဘူင့် ယီ ဘျုဝ်း၊ အန် ဘော နပ် ဒီ ပီဒဝ့် ငဝ် အွမ်၊ ဘိး ကာင်၊ ဟြေတ့် ဆီချာ၊ တဲး န့ ကော ဝီ ကာဒုး။ 9 ဆေ အန် ဟဲ့ ယိုဝ်၊ အန် ဝီ ဒဲ့ အီ ဟဝ် ဂေ ဂိုက် အန်၊ တဲး ဂေ တး ဘောကာဂ့လျီတ်။ အန် ဘော တဝ်း ဒီ ဂေ၊ ‘တဲး ဘေ ဒါခိုယ် ပီ အုဝ် ဟဲ့ ဒါခိုယ်။ အုဝ် ဟဲ့ ဝီ ယိုဝ် ရွိုန် ပီ ဘျုဝ်း အုဝ် တွိုန်။’ 10 အုဝ် တဝ်း ဒီ ဘေ။ ဆေ န့ မိုဝ်း ဒူအီ အူ ဝီ၊ အီ ဝဲန် မှာပ် အန်၊ ဝဲန် နဝ်း ဘြိမ် အန်၊ ဒိုဝ်း နဝ်း ကာမာယ် ပီ ဒွါ ဇဝ်ဖြာ၊ ဂေ အာမူ အာမာတ် ဇဝ်ဖြာ ဒီ ခူယ် ဒါခိုယ် ခဲင် နဝ်း ဂေ လွင် ဒူအီ ဝီ တီ။”

11 ဟဲ့ ဟွတ့် ပန် တီ ဇဝ် ယေဆူ ဝီ တဝ်း ဒီ ဂေ၊ “န့ ဟဲ့ ဒွိုမ် မိုဝ်း ဒူအီ အူ ဝီ။ အန် မိုဝ်း ဂွန် အီမာယ် အာ ဝီ။ 12 ဂွန် ဝီ တျီ့၊ အန် တဝ်း ဒီ ဂုန့် အန်၊ ‘အိုယ် ဂုန့်၊ တဲး မဲ ကာဆာင် ကြုဝ်ကြာမ် မဲ၊ ဒွါ ဒီ အုဝ် ခဲ့ လုဝ် အုဝ် ပွိုန်။’ ဟဲ့ ဟွတ့် တဝ်း၊ ဂုန့် အန် ဘော ကာဆာင် တူတ့် ကြုဝ်ကြာမ် အန်၊ ဒွါ ဒီ ဂွန် အန် ခဲ့ ပီ လုဝ် အန် ပွိုန်။

13 ဝါယ် အန် တီ အာ အူယ် ဆီငဲ၊ ဂွန် ဝီ တျီ့၊ အန် ယွင့် မာန် အန်၊ တဲး ကြုဝ်ကြာမ် အန် ဘောကာဂ့လျီတ် ဘဲန် ရွိုန်။ ဟဲ့ ဟွတ့်၊ အန် လေး ခဲင် ကာင် အန်၊ ဟာဝ် ဇမ် ခဲင် မိူင် တူင့်၊ ဇာယ် ဒီရိုဝ် ဒီဒေတ့် ရွိုန် အန်၊ တဲး န့ ကော တူတ့် ခဲ့ ပီ မိုဝ်း အန်။ 14 မျုဝ် ကြုဝ်ကြာမ် အန် ဟဲ့ ဟွတ့် တူတ့် ဒွန် မျုဝ်၊ န့ ဘော ဇမ် အာခြာဝ် တူ မိုဝ်း ပီ ဒီ ဟူမ် ခဲင် မိူင် တွိုန်။ န့ ဘော ညှာပ် ကာဆဝ် ဒီ အန်။ 15 အန် ဘော ဟာဝ် မှာန့် ဒီ ဇာင် ဒီ ဒူအီ အူ ဝီ ခဲင် မိူင် တွိုန်။ ဒူအီ ဝီ တီ တဲး အန် ဟာဝ် ဘ်ု မာလေတ့် ခဲင် ကာပိုမ်။ 16 အန် ဆီ ဟူမ် ကာဆဝ် ပီ ဒီ ဟူမ် ဖိုင် မာလေတ့် တွိုန်၊ ကွဲ့ တဲး ဝတ့် အန် ဟျီ့။ န့ ယီ တူ မိုဝ်း အာဆေ ခ့ဝါင် အန် ဟူမ်။

17 ဝါယ် အန် တီ အန် ဘော လှုဝ်း ကာင် အန်။ အန် တဝ်း ခဲင် နဝ်း အန်၊ ‘ဂေ မှာယ် ဂုန့် အုဝ် ဘဲန် ဝီ ဘဲန် ဝီ၊ ဂေ တူ တူတ့် ဒီ ဟူမ် ပီ ဒီ ဟူမ် ဂေ။ အုဝ် ယီ ကွယ် ဒီ နီ၊ အုဝ် ဘော ငှာ ဒီ ယမ် ဒီ ကာပြာန့် ပီ ဒီ ဟူမ်။ 18 အုဝ် ဒီ ဝေန့် ဒူင် ကွယ် ဂုန့် အုဝ်။ အုဝ် ဒီ တဝ်း ဒီ အန်၊ “အိုယ် ဂုန့် အုဝ်၊ အုဝ် ဟဲ့ ဘူင် နာ တူ မွှိုမ် ကာဆဝ် ဒီ ဇဝ်ဖြာ။ အုဝ် မိူဝ် ဟဲ့ ဘူင် နာ တူ မွှိုမ် ဘော ဒီ မဲ။ 19 အာဝ် ဟူ ကာအာပ် မဲ တဝ်း ဂွန် ဒီ အုဝ်။ အုဝ် မှာန့်၊ တဲး မဲ တဲး အုဝ် ဘဲန် မှာယ် မဲ။”’ 20 ဝါယ် အန် တီ အန် ဝီ ယိတ့် ဝေန့် ဒူင် ကွယ် ဂုန့် အန်။ ဂုန့် အန် ဘော ယိုဝ် ဒေါ ဆီ ကွယ် တူင့် အန်။ အန် ဘော ကာဝေ ဂွန် အန် ဘော ကာဘ့လဲပ် ဟာဝ် အူ ဇေန့်၊ ဟာဝ် ငျီမ် ဂွန် အန်၊ အုး အန်။

21 ဂွန် အန် တွိုန် တဝ်း၊ ‘အိုယ် ဂုန့်၊ အုဝ် ဟဲ့ ဘူင် နာ တူ မွှိုမ် ကာဆဝ် ဒီ ဇဝ်ဖြာ။ အုဝ် မိူဝ် ဟဲ့ ဘူင် နာ တူ မွှိုမ် ဘော ဒီ မဲ။ အာဝ် ဟူ ကာအာပ် အုဝ် မုး ဂွန် မဲ။’

22 ဂုန့် အန် ယီ စ်ု ဒဲစေန့် အန် တဝ်း၊ ‘တဲး ဘေ ပီခြန် ဘေ၊ ဟာဝ် ဒိုဝ်း ဆီတုဝ် အီ စှိတ် လွှိုမ် ဒွန် ဘူင့်၊ တဲး ဘေ တဲး အန် စှိုပ်။ စှိုပ် ဘော ဆီကာနူ ဘော ခူဒိန့် ဒီ အန်။ 23 ဟဲ့ ဟွတ့်၊ တဲး ဘေ ဟာဝ် ဒိုဝ်း ဂွန် မာမက် အာလူင့် ဒီတဲတ်၊ တဲး ဘေ ငဝ်း။ တဲး အေ ဟျီင် အန် ဟူမ်။ တဲး အေ ကွယ် ဒါခိုယ် ဘူင် ဘ့လွယ်။ 24 ဂွန် အုဝ် နီ၊ ခါ အာတ့် နူ၊ န့ ပီ အန် ဟဲ့ ဟွတ့် ယမ်။ ဒေါ တီ နီ န့ ပီ အန် ဟဲ့ ဝီ ယိတ့် ဝီ အိမ်။ ခါ အာတ့် အန် ဟဲ့ ဘျုဝ်း၊ ဒေါ တီ နီ၊ ယေ ဟဲ့ ဝီ ကာဒုး အန်။’ ပန် တီ ဂေ ဒွန် အီ ဘော ဘဲန် နဝ်း ဒါခိုယ်။

25 ဒေါ အန် တီ ဂွန် ဂိန့် ဒါ အီ တီ ဟဲ့ ကွယ် ခဲင် မာန်။ ဒေါ ဝေန့် ဇမ် အန် ကာတတ် ကာင်၊ အန် ယိုဝ် ဟမ် အီ ဘး ဒိင်၊ က်ု ဂြိုင် ဘော ဂါ ခဲင် ကာင်။ 26 အန် ဝီ ဒဲ့ ဒဲစေန့် အန် အူ ဝီ၊ ဒီမွှတ် အန် လွင် မာဆေ န့ မုး၊ ပီ ဘူင် ဂေ။ 27 ဒဲစေန့် အန် ဝီ တဝ်း ဒီ အန်၊ ‘ဝါ မဲ ဟဲ့ ဝီ တး။ ဂုန့် မဲ ဟဲ့ ငဝ်း ဂွန် မာမက် အာလူင့် ဒီတဲတ်။ ခုဝ်၊ နဝ်း အန် ဒါခိုယ် ကူပ် ဟဲ့ ဝီ တး ဂွန် အန် ဘော ဟဲ့ ခ ဂျာမ်ဆာ။’

28 ပန် တီ အီကတ် အန် တွိုန် ဘော ရူ ခဲင် နဝ်း။ အန် တူ ဝီ လိုပ် ခဲင် ကာင်။ ဂုန့် အန် ဘော လေး ဒဲ့ အန် လိုပ်။ 29 အန် ယီ တဝ်း ဒီ ဂုန့် အန်၊ ‘တဲး မဲ ထူမ် ဂြုဝ်း အုဝ်။ ဟဲ့ လှေန့်၊ အုဝ် ဟဲ့ ဘူင် ဂါန် မဲ။ န့ တူ ဒွိုမ် မိုဝ်း ဒေါ တူ ထူမ် ဒူပ် အုဝ် ပီ တဝ်း ပီ စ်ု မဲ အုဝ် ဘူင်။ မဲ ယီ တူ ဒွိုမ် ဒွါ ဂွန် မာပဲ ဒီ အုဝ်၊ တဲး အုဝ် ပွိုန် ဒီ ဘာင် ဂိုက် အုဝ်၊ ဟူမ် ရိုမ်၊ ကွယ် ဒါခိုယ်။ 30 ဂွန် မဲ တီ၊ အီ ဟဲ့ ဟွတ့် ဝဲန် ကြုဝ်ကြာမ် မဲ၊ ဟဲ့ စှိုမ် တူတ့် ဒီ ယာ မာလမ်၊ အန် ယီ ဟဲ့ ဝီ တး ဇမ် ဒီ နီ၊ ဟဲ့ ဟွတ့်၊ မဲ ဟဲ့ ငဝ်း ဂွန် မာမက် အာလူင့် ဒီတဲတ် အာဒါ အန်။’

31 ဂုန့် အန် ဝီ တဝ်း ဒီ အန်၊ ‘အိုယ် ဂွန် အုဝ်၊ မဲ ဟဲ့ ကွယ် ရိုမ် ဒူပ် အုဝ် ဆေဆေ။ ခဲ့ ပီ မိုဝ်း အုဝ် ကြုဝ်ကြာမ် တူတ့် ဒွန် မျုဝ်၊ န့ မုး ဘော ကြုဝ်ကြာမ် မဲ။ 32 ဒေါ တီ နီ အေ ဒွန် အီ ယီ ဟဲ့ လုဝ် ဘဲန် နဝ်း ဒါခိုယ်။ ခုဝ်၊ ဝါ မဲ ဟဲ့ ပီ အန် ဟဲ့ ယမ်။ ဒေါ တီ နီ န့ ပီ အန် ဟဲ့ ဝီ ယိတ့် ဝီ အိမ်။ ခါ အာတ့် အန် ဟဲ့ ဘျုဝ်း။ ဒေါ တီ နီ အေ ဟဲ့ ဝီ ကာဒုး အန်။’ ဂုန့် အန် တဝ်း ပါယ် တီ ဒီ ဂွန် အန်။”