1 န့ ဝီ ဇမ် ဆီငဲ ဒီလှဝ် ပေါ အူ ဆီငဲ၊ ဇဝ် ယေဆူ ဟာဝ် ဟူမ် ဘူမ် ခဲင် ကာင် ဒါ တာင် ခဲင် ဖိုင် ဖာရီဆဲ အူ ဝီ။ ဂေ ဒူအီ ကိူန် ဘ်ု ဒီ ယွတ် ဇဝ် ယေဆူ၊ တဲး ဂေ ပွိုန် ဒီ ကာယွင့် အန်။ 2 န့ မိုဝ်း ဒူအီ အူ ဝီ၊ အန် မိုဝ်း ဆဝ် အီ တဲး အန် အဝ်း ဘော ဒုဝ်။ အန် ဟဲ့ တး ဇမ် ဒူင် ကွယ် ဇဝ် ယေဆူ။ 3 ဇဝ် ယေဆူ ဒီမွှတ် ဂေ ဒါ ဆာရာ အီ မာနုဝ် ဒါရာ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ လွင် အန် တီ။ အန် တဝ်း၊ “ဆေ အုဝ် တဲး ဒူအီ ဆဝ် တီ ဝီ ကဲန် ဒေါ မုး ဆီငဲ ဒီလှဝ်၊ ဒါရာ တဲး အုဝ် ဘူင်၊ တူ တဲး အုဝ် ဘူင်။း” 4 ဂေ တူ ဝျီ့ ဂြုဝ်း အန်။ ပန် တီ ဇဝ် ယေဆူ ပါ ဒူအီ တွိုန်၊ ဘော တဲး ဆဝ် အန် ဟြာယ်။ ဝါယ် အန် တီ ဇဝ် ယေဆူ ဝီ စ်ု အန် ဝိဝ် ဒီ ကာင် အန်။

5 ဟဲ့ ဟွတ့်၊ ဇဝ် ယေဆူ ဝီ တဝ်း ဒီ ဒူအီ ဘောကာဂ့လျီတ်၊ “ဆေ န့ မုး ဆီငဲ ဒီလှဝ်၊ ဆေ န့ မုး ဂွန် ဘေ ဘော မက် အာလူင့် ဘေ အီ ဟဲ့ စုဝ်း ခဲင် အိုမ် ခိုမ်၊ ဘေ ဒွန် အီ ဒီ ဘော ဟာဝ် ဒိုဝ်း လေး အန် အူ ဇေန့်။” 6 ပန် တီ ဂေ ဒူအီ တွိုန် တူ ပွိုန် ဝျီ့ ဂြုဝ်း အန် တီ။

7 ဇဝ် ယေဆူ ယီ ယွတ် ဂေ ဒူအီ တး ဟူမ် ခဲင် ကာင် တွိုန်။ အန် ဘော ယိုဝ် ဂေ ဆီ ကွယ် ဒူင် စာ။ ပန် တီ အန် မိူဝ် စုး ဒီ ကာလာင် အူဖာမာ ဒီ ဂေ။ အန် တဝ်း၊ 8 “ဆေ ဒူအီ ဟဝ် အူ ဝီ ဘာင် ဘေ ဟာဝ် ဘ့လွယ် ခတ်၊ ကွဲ့ ဟာဝ် တုတ့် ဒူင် စာ၊ ကွဲ့ ကွယ် ရိုမ် ဒူပ် ဂေ ဒါ တာင်။ ဆေ န့ ဒီ ဘော မိုဝ်း ဒူအီ ပေါ အူ ဝီ ပီ ဘာင် ဒူအီ တွိုန် အီ ဟဲ့ တာင် လွှိုမ် ဘေ၊ 9 ဆေ ဒူအီ အီ ဘာင် ဘေ တွိုန် ဘော တး ဘော ကာလာင် ဒီ ဘေ တဝ်း၊ ‘တဲး ဒူအီ ဝီ နီ တုတ့် ဒူင် ကွယ် မဲ နီ။’ ဆေ အန် တဝ်း ဒီ ဘေ ပါယ် တီ၊ န့ မွှိုမ် ဆာယ် ကာဆဝ်။ ဘေ ဘော လုဝ် ဝီ တုတ့် နာ ပန် ဒူအီ ဟဝ် ဒွန် ဝီ။ ကွဲ့ တဲး န့ ဘဲန် ပါယ် တီ။ 10 ဘေ ယီ လုဝ် ဘူင် ပါယ် နီ။ ဆေ ဒူအီ ဘာင် ဘေ ဟာဝ် ဟူမ် ဘူမ် ရိုမ် ဒူပ် ဂေ၊ ဘေ လုဝ် လိုပ် တုတ့် ဒီ ပန် ဒူအီ ဟဝ် ဒွန် ဝီ။ ပန် တီ ဒူအီ အီ ဘာင် ဘေ ဟူမ် ခဲင် ကာင် အန် တွိုန်၊ အန် ဒီ ပွိုန် ဒီ တး တဝ်း ဒီ ဘေ၊ ‘အိုယ် မဲ ဂိုက်၊ တဲး မဲ တုတ့် နာ ကွာ နီ။’ ဆေ အန် ဒီ တဝ်း ပါယ် တီ၊ ဂေ ဒူအီ တး ဟူမ် ရိုမ် ဒူပ် ဘေ၊ ဂေ အီ ယိုဝ် လွင် အန် တီ၊ ဂေ ဒီ ဘော ရုဝ်ဆေ ဘေ။ 11 အာဆေ ပီခိုက် အန်၊ အာဆေ တဝ်း၊ အန် တာင် လွှိုမ် အီ ဟဝ်၊ ဂေ အီ ဟဝ် တူ ဝီ ရုဝ်ဆေ အန်။ အာဆေ ယီ မိုဝ်း နဝ်း ဆိူဝ်၊ အာဆေ တူ တဝ်း အန် တာင် လွှိုမ် အီ ဟဝ်၊ ဂေ အီ ဟဝ် ဒီ ဝီ ရုဝ်ဆေ အန်၊ တဝ်း အန် မုး ဒါ တာင်။”

12 ပန် တီ ဇဝ် ယေဆူ ကာလာင် ဒီ ဒူအီ အီ ဟဲ့ ဘာင် အန် ဟူမ် ဘူမ် ခဲင် ကာင် အန် တဝ်း၊ “ဒေါ ဘာင် မဲ ဒူအီ ဟာဝ် လိုပ် ခဲင် ကာင် မဲ၊ ဟူမ် ဘူမ် ဆီငဲ၊ ဘူမ် မှိုဝ်၊ မဲ ကွဲ့ ဘာင် ဂိုက် မဲ၊ ဂေ ဘီနွင် မဲ၊ ဂေ ခြိုဝ် မဲ ဘော ဂေ ဒူအီ ခြမ် ခဲင် မိူင် မဲ။ ကွဲ့ တဲး မဲ ဘာင် ဂေ ဒူအီ ဇိုဝ် တီ။ ခုဝ်၊ မဲ နပ် ဆီချာ၊ ဂေ ဒီ ဝီ ဘာင် ဘော မဲ ဟူမ် ခဲင် ကာင် ဂေ၊ တဲး ဂေ ဝီ ဒွါ ဒီ မဲ ခဲ့ ပီ ဒွါ မဲ ဒီ ဂေ။ 13 ဆေ မဲ ဆီ ဟျီင် အီ ဟဝ် ဟူမ်၊ တဲး မဲ ဘာင် ဂေ ဒူအီ ဂိန်၊ ဒူအီ ယမ် ဘ့လာက်၊ ဂေ ဒူအီ ပ့လဝ် ယမ်၊ ဘော ဂေ ဒူအီ ငါယ် အပ်၊ တဲး ဂေ ဟာဝ် ဟူမ် ဘူမ် ခဲင် ကာင် မဲ။ 14 ဆေ မဲ ဘူင် ပါယ် တီ၊ န့ ဒီ ဘဲန် မွင့်ကာရာ ဒီ မဲ။ ခုဝ်၊ ဂေ ဒူအီ ဇိုဝ် တီ၊ ဂေ တူ ပွိုန် ဝီ ဒွါ မာဆေ ဒီ မဲ။ မဲ ဒီ ဝီ ပွိုန် အာဂျိုဝ် အန် တီ၊ ပန် ဒီ တဲး ဇဝ်ဖြာ ဂေ ဒူအီ မိုဝ်း နဝ်း ဆိူဝ် နဝ်း မှာန် ဝီ ယိတ့် ဝီ အိမ်။”

15 ဒေါ ကာလာင် ဇဝ် ယေဆူ ဂြုဝ်း တီ၊ န့ မိုဝ်း ဒူအီ အူ ဝီ။ အန် ဟဲ့ ထူမ် တူတ့် ဒွန် မျုဝ် ဇိုဝ် တီ၊ အန် ဝီ တဝ်း ဒီ ဇဝ် ယေဆူ၊ “ဂေ ဒူအီ ဒီ ပွိုန် ကွယ် ဟူမ် ရိုမ် ဘူမ် ခဲင် မိူင် ပီ အိုပ် ဇဝ်ဖြာ၊ ဂေ ဒွန် အီ ဒီ မိုဝ်း နဝ်း ဒါခိုယ်။”

16 ဇဝ် ယေဆူ ဝီ တဝ်း ဒီ ဒူအီ တွိုန်၊ “ဒေါ မွိုန်၊ န့ မိုဝ်း ဒူအီ အူ ဝီ၊ အန် ဘူင် ဘ့လွယ်၊ ဘာင် ဒူအီ ကိူန် လိုပ် ဘ့လွယ် အန်။ 17 အာခြာဝ် ဒီ လုဝ် ဟူမ် ဂေ ဘူမ် ဟဲ့ ကာတတ် ဒီ ဇမ်၊ ဒူအီ တွိုန် စ်ု ဒဲစေန့် အန်၊ တဲး ဂေ ဟာဝ် ကာလာင် ဒီ ဂေ ဒူအီ ပဲ့ ဟဲ့ ဘာင် အန် တွိုန်၊ တဲး ဂေ တး။ အန် စ်ု ဒဲစေန့် အန် တဝ်း ဒီ ခဲတ့်၊ ‘တဲး ဘေ ဟာဝ် ဟူမ်။ ဟဲ့ ဟွတ့် ရဲန် ဒွန် မျုဝ်။ တဲး ဘေ တး ဒေါ တီ နီ။’

18 ဂေ ဒူအီ တွိုန် ယီ ကာလုဝ် ဒီ ကာလာင် ဂဝ်း ဒုဝ် ဂေ။ အူ ဝီ အန် တဝ်း၊ ‘အုဝ် ဟဲ့ စိုဝ်း မာန် အူ ပ့လုဝ့်။ အုဝ် လုဝ် ဟာဝ် ယွတ်။ အုဝ် ဒွင်ဘာန် မဲ၊ အုဝ် တူ ဒန်။’

19 ပေါ အူ ဝီ အန် တဝ်း၊ ‘အုဝ် ဟဲ့ စိုဝ်း မက် အာလူင့် ဖန် ဂူ။ အုဝ် လုဝ် ဟာဝ် ယွတ် ဂေ။ အုဝ် ဒွင်ဘာန် မဲ၊ အုဝ် တူ ဒန်။’

20 ပေါ အူ ဝီ ပီ ဝီ တဝ်း၊ ‘အုဝ် ဆော ပါယ် ဘော ခတ်။ ခုဝ်၊ အုဝ် တူ ပွိုန် လိုပ် ဘ့လွယ် တီ။’

21 ဒဲစေန့် တွိုန် ဝီ ကာလာင် တူတ့် ဒွန် မျုဝ် ဒီ ဒါ ကာညာ အန် လွင် ပီ တဝ်း ခဲတ့် ဂေ ဒီ အန်။ ဒါ ကာညာ တွိုန် ဘော ရူ ခဲင် နဝ်း အန်။ အန် တဝ်း ဒီ ဒဲစေန့် အန်၊ ‘မဲ လုဝ် ဟာဝ် ဒူပ် န့တေန့်၊ တဲး မဲ ကော ဇမ် ဒွန် နာ ဒွန် ပ့လုဝ့် ခဲင် မိူင် နီ။ တဲး မဲ ဘာင် ဒွန် အီ တး။ ဘော ဂေ ဒူအီ ဂိန်၊ ဂေ ဒူအီ ယမ် ဘ့လာက်၊ ဂေ ဒူအီ ပ့လဝ် ယမ်၊ ဂေ ဒူအီ ငါယ် အပ်၊ တဲး မဲ ဘာင် ဂေ ဘောကာဂ့လျီတ် တး ဒီ နီ။’

22 အန် ဟဲ့ ဟွတ့် စ်ု ပါယ် တီ၊ ဒဲစေန့် တွိုန် ဘော ဟာဝ်။ ဒေါ ဝီ တး အန်၊ အန် ဝီ တဝ်း၊ ‘အိုယ် ဒါ ကာညာ အုဝ်၊ အုဝ် ဟဲ့ ဘူင် တူတ့် ဒွန် မျုဝ် ပီ စ်ု မဲ အုဝ် ဘူင်။ ဂေ ဒူအီ ယီ ညှမ် နုဝ့် ခဲင် ဟုဝ် ဒူင် ဘူင် အေ ဘ့လွယ်။’

23 ဒါ ကာညာ ဝီ တဝ်း ဒီ ဒဲစေန့် အန်၊ ‘တဲး မဲ လေး ဟာဝ် ဒူပ် န့တေန့် တာင် ဘော န့တေန့် ဒီတဲတ်။ တဲး မဲ ကာလာင် ခဲမ် ဒီ ဒူအီ ဒီ တး ဒီ ဘ့လွယ် နီ၊ တဲး ဒူအီ ကော နုဝ့် ခဲင် ကာင် အေ။ 24 အုဝ် တဝ်း ဒီ မဲ၊ ဂေ ဒူအီ ပီ ဘာင် အုဝ် တး ခါ အာတ့် အူ ဝီ မိူဝ် တူ ပွိုန် ဒီ ဟူမ် ပီ ရဲန် အုဝ် နီ။’” ပါယ် တီ ဇဝ် ယေဆူ ကာလာင် ဒီ ဒူအီ တွိုန်။

25 ဒေါ အန် တီ ဂေ ဒူအီ ကိူန် ဘော ဟာဝ် ရိုမ် ဒူပ် ဇဝ် ယေဆူ။ အန် ယီ ယွတ် နာ ပန်၊ တဝ်း ဒီ ဂေ၊ 26 “ဆေ ဒူအီ ဆီ တး ကွယ် ဒူပ် အုဝ်၊ ဆေ အန် တူ ရွက့် အုဝ် လွှိုမ် ရွက့် အန် ဂုန့် မာ အန်၊ ဘော အူကတ် အူဝါ အန် ဘော အီဘိုန့် ဂေ ဂွန် အန်၊ ဆေ အန် မိူဝ် တူ ရွက့် အုဝ် လွှိုမ် ရွက့် အန် အာဆာက် အန်၊ အန် တူ ပွိုန် ဒီ ဘဲန် ဒီဘဲ အုဝ်။ 27 ဘေ လုဝ် ဘ့လေး နဝ်း ဘေ တဝ်း၊ ‘ဆေ အုဝ် ဒီ ဘော လုဝ် ယမ်၊ အုဝ် ယီ ဒီ ဒူပ် အန် ဇဝ် ဆေဆေ။’ အာဆေ တူ ဘ့လေး နဝ်း အန် ပါယ် တီ၊ အန် တူ ပွိုန် ဒီ ဘဲန် ဒီဘဲ အုဝ်။

28 ဘော ဘေ၊ ဆေ န့ မိုဝ်း ဒူအီ ကာတဲ ဘေ၊ အီ ဆီ ဘူင် ကာစှူင့် စာ ဒူင် ဒီ ဘ်ု မာန် အန်၊ ခါ အာတ့် အန် လုဝ် ဇေန့်ဇာ၊ လုဝ် ဘက် ခဲ့ မှဝ် အန် ဒီ တူတ့်၊ တဲး အန် နပ်၊ ယုဝ် ရွိုန် အန် ဒီ ဂ့လိုမ်၊ ယုဝ် အန် ပဲ ဒီ ဘူင် ဟွတ့် ကာစှူင့် တွိုန်။ 29 ဆေ အန် တူ ဘူင် ပါယ် တီ ဒီ အာတ့်၊ အန် ဟီ ဟွတ့် ဆမ် စေန့် ရွင့်၊ ဆေ အန် ယီ တူ ပဲ ဒီ တဲး န့ ဟွတ့် တူတ့်၊ ဂေ အီ ယိုဝ် လွင် အန် တီ၊ ဂေ ဒီ ကာညး အန်။ 30 ဂေ ဒီ တဝ်း၊ ‘ဒူအီ တီ ဟဲ့ စုး ဒီ ဆမ် ကာစှူင့်၊ ယီ တူ ပဲ ဒီ ဘူင် တဲး န့ ကော ဟွတ့်။’

31 ဆေ န့ ဘော မုး ခုန်ဒီခမ်၊ ဆေ အန် ဆီ လေး ဟာဝ် ကာဂုဝ်း ဒီ ခုန်ဒီခမ် ပေါ အူ ကာဒင်၊ ခုန်ဒီခမ် တီ၊ အန် ဒီ ဘော တိး ဒါ ဆိုက် အန် ဒီ အာတ့်။ အန် ဒီ ဇေန့်ဇာ၊ ယုဝ် အန် လုဝ် ဒါ ဆိုက် အန် အာ မှိုန့် ဆေ အူ မှိုန့် တူ ဂ့လိုမ်၊ တဲး အန် ပဲ ရန်ဆူ အန်။ 32 ဆေ အန် ယီ ယုဝ် ဒါ ဆိုက် အန် တူ ပဲ ရန်ဆူ၊ အန် ဒီ ဘော တိုယ် အာမူ အာမာတ် အန်၊ တဲး ဂေ ဟာဝ် ဇမ် ဒူင် ကွယ် ရန်ဆူ အန်၊ ဒေါ ဆီ ကွယ် ကာတူင့် အန်။ တဲး ဂေ လာယ် ကာလာင်၊ မှာန့်၊ တဲး ဂေ လာယ် ဘဲန် ဂိုက်။ 33 န့ ဘော ပါယ် တီ။ ဆေ ဘေ တူ ဝဲန် တူတ့် ဒွန် မျုဝ် ခဲ့ ပီ မိုဝ်း ဘေ၊ ဘေ တူ ပွိုန် ဒီ ဘဲန် ဒီဘဲ အုဝ်။”

34 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ အန် ဝီ တဝ်း၊ “ဆေ ဆယ့် ဟဲ့ ဆွင့်၊ န့ ဘွတ်။ ဆေ ယီ ဟြာယ် ဆွင့် ဆယ့်၊ မာဆေ ပီ ဒီ ဟပ် ဘေ၊ တဲး ဆယ့် ဝီ ဆွင့်။း 35 ဆယ့် တီ၊ အာဝ် ပွိုန် ဘူင် မာဆေ။ အာဝ် ပွိုန် ဘြတ် ခဲင် မာန်၊ အာဝ် ပွိုန် ဘဲန် ဖုန်။ လုဝ် ဝဲန် တူတ့်။ အာဆေ မိုဝ်း ဟျုဝ့် တဲး အန် ထူမ်၊ တဲး န့ ကော လိုဝ်း။” ဇဝ် ယေဆူ ဟဲ့ မာနုဝ် ဂေ ဒူအီ ကိူန် ပါယ် တီ။