1 ဒေါ အန် တီ ဒူအီ မင် အီ၊ အီ ကွယ် ဒူင် ကွယ် ဇဝ် ယေဆူ တွိုန်၊ ဂေ ကာလာင် ဒီ အန် လွင် ပဲ့ ဟဲ့ ဘူင် ဒါ တာင် အီ အိုပ် အိူင် ယူဒါ၊ အီ စိူဝ် အာဖီလာတ်။ အန် ဟဲ့ ငဝ်း ယမ် ဂေ ဒူအီ မင် အီ အီ တး အိူင် ဂါလီလေ။ အန် ဟဲ့ ငဝ်း ယမ် ဂေ ဒေါ လှူ ဂေ ဒီ ဇဝ်ဖြာ။ ဒေါ အန် တီ နှာမ် ဂေ ဘော ပီ ဒီ လှူ ဂေ ဟဲ့ ကာဆူ ကာဝ်ု။ 2 ဇဝ် ယေဆူ ဝီ တဝ်း ဒီ ဂေ၊ “ဂေ ဒူအီ ဂါလီလေ၊ အီ ပီ ငဝ်း ယမ် အန်၊ ဘေ ထာင် မှာပ် ဂေ ဟဲ့ တာင် လွှိုမ် ဒူအီ အာမျုဝ် ဂါလီလေ ဘောကာဂ့လျီတ်။း 3 အာဝ် မုး ပါယ် တီ။ အုဝ် တဝ်း ဒီ ဘေ၊ ဆေ ဘေ တူ ဝဲန် နဝ်း ဘြိမ် ဘေ၊ ဆေ ဘေ တူ ဒိုဝ်း နဝ်း ကာမာယ် ပီ ဒွါ ဇဝ်ဖြာ ဒီ ဘေ၊ ဘေ ဒီ ဘော ယမ် တူတ့် ဒွန် ဝီ၊ တဲး အာဆာက် ဘေ စှိုမ်။ 4 ဘေ မိူဝ် ထာင် ပါယ် မှဝ် လွင် ဒူအီ ဂိုဝ် ဒီ ဒါ ဝီ၊ အီ ယမ် ဒေါ ကေး ဟုဝ် စာ အီ မုး ဒူင် ဘ်ု ဒူအီ ခဲင် မိူင် ဆီလုဝ်အာမ် တွိုန်။း ဘေ ထာင် ဂေ မိုဝ်း မှာပ် တာင် လွှိုမ် ဒူအီ ဘောကာဂ့လျီတ် အီ ကွယ် ခဲင် မိူင် ယေရူဆာလဲမ်။း 5 အာဝ် မုး ပါယ် တီ။ အုဝ် တဝ်း ဒီ ဘေ၊ ဆေ ဘေ တူ ဝဲန် နဝ်း ဘြိမ် ဘော ဒိုဝ်း နဝ်း ကာမာယ် ပီ ဒွါ ဇဝ်ဖြာ ဒီ ဘေ၊ ဘေ ဒွန် အီ ဒီ ဘော ယမ်။ အာဆာက် ဘေ ဒီ ဘော စှိုမ်။”

6 ဟဲ့ ဟွတ့် ကာလာင် ပါယ် တီ၊ ဇဝ် ယေဆူ ဝီ စုး ဒီ ကာလာင် အူဖာမာ ဒီ ဂေ။ အန် တဝ်း၊ “ဒူအီ အူ ဝီ မိုဝ်း ဟေ ဒီပူ အူ ကာဒင် ကွယ် ခဲင် မာန် မာငုန် အန်။ အန် ဟာဝ် ဟြေတ့် ဘ့လေ ဒီပူ ဒီ ဟေ တီ။ အန် ယီ တူ ယိုဝ် ဘ့လေ မာဆေ။ 7 ဟဲ့ ဟွတ့်၊ အန် တဝ်း ဒီ ဒူအီ အီ ဘ်ု မာန် အန်၊ ‘အိုယ်၊ န့ ဟဲ့ နုဝ့် အူယ် ဆီနမ် အုဝ် ဟဲ့ တး ဒူင် ကွယ် ဟေ နီ။ အုဝ် ဟဲ့ တး ယွတ် ဘ့လေ ဒီပူ နီ။ အုဝ် ယီ တူ ယိုဝ် ဘ့လေ အန် မာဆေ။ တဲး မဲ ဂ်ု ဝဲန် ဟေ နီ။ ကွဲ့ တဲး အန် ကွယ် ပီယေန့် ဒဲင် ကာဒါယ် နီ။’ အန် ဟဲ့ ဟွတ့် ကာလာင် ပါယ် တီ၊ 8 ဒူအီ အီ ဘ်ု မာန် တွိုန် ဝီ တဝ်း၊ ‘အိုယ် ဒါ ကာညာ၊ တဲး မဲ တဲး အန် ကွယ် ပေါ အူ ဆီနမ်။ အုဝ် ဒီ ဂိုဝ်း ကာဒါယ် ဒီ ဒင် ဟေ တီ ဘော ဟပ် ဖုန်။

9 ဆီနမ် ဒီ တး၊ ဆေ အန် ဘော မိုဝ်း ဘ့လေ၊ ဟဲ့ ဒါခိုယ်။ ဆေ အန် ယီ တူ မိုဝ်း ဘ့လေ၊ တဲး မဲ ဂ်ု ဝဲန် အန်။’”

10 န့ မိုဝ်း ဆီငဲ ဒီလှဝ် အူ ဆီငဲ၊ ဇဝ် ယေဆူ မာနုဝ် ဒူအီ ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ 11 ခဲင် ဇူင် တီ မိုဝ်း အီဘိုန့် အူ ဝီ။ ကာနမ် ဟဲ့ ဒွါ ဒုက် ဒီ ဒုဝ် ဘူင့် အန်။ အာဒါ ဂိုဝ် ဒီ ဒါ ဆီနမ် အန် ဟဲ့ ခမ် ဒုက် ပီ ဒွါ ကာနမ် ဒီ အန်။ ကာနမ် တီ တဲး အန် ကွယ် ကာဂုဝ့် ဆေဆေ။ အန် တူ ပွိုန် ကွယ် ဆိူဝ်။ 12 ဒေါ ယိုဝ် ဇဝ် ယေဆူ အီဘိုန့် တီ၊ ဇဝ် ယေဆူ မိူဝ် ဒဲ့ အန် တး ဒူင် ကွယ် အန်။ အန် တဝ်း ဒီ အန်၊ “အိုယ် ဂိုန့်၊ ဒုက် မဲ ဟဲ့ လေး ခဲင် ဒုဝ် ဘူင့် မဲ။” 13 အန် မိူဝ် ဒါင် ဒဲ အန် ဒဲင် ဂိန့် အန်။ ဒေါ အန် တီ အီဘိုန့် တီ ဝီ ပွိုန် ကွယ် ဆိူဝ် အူ ဇေန့်။ အန် မိူဝ် စုး ဒီ အိူပ် ဇဝ်ဖြာ လွင် အန် တီ။

14 ဂေ ဒါ တာင် အီ ကွယ် ခဲင် ဇူင် တွိုန်၊ ဂေ ယီ ရူ ကူပ် ဟဲ့ ပီကဲန် ဇဝ် ယေဆူ အီဘိုန့် တီ ဒေါ မုး ဆီငဲ ဒီလှဝ်။ ဂေ ဘော ကာလာင် ဒီ ဒူအီ ဟဝ် တဝ်း၊ “ဟဲ့ မိုဝ်း ဒဝ် ဆီငဲ၊ ဒူအီ ပွိုန် ဘူင် ဂါန်။ ကာန်ု ဒဝ် ဆီငဲ တီ၊ ဘေ ဟဲ့ ပွိုန် တး ခဲင် ဇူင်၊ တဲး အီ ပီကဲန် ဆဝ် ဘေ။ ဟီ ဇမ် ဆီငဲ ဒီလှဝ်၊ ကွဲ့ တး တဲး အီ ပီကဲန် ဆဝ် ဘေ။”

15 ဂေ ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ ဂေ၊ “ဘေ မုး ဒူအီ ညိုင်ရာင် ဘွတ်။ ဘေ ဒွန် အီ၊ ဆေ ဘေ မိုဝ်း မက် အာလူင့် ဂေ မာလာ၊ ဆီငဲ ဒီလှဝ် ဘေ ဘော ဂဝ်း ဝန် ပီ ပက် ဘေ ဒုဝ် ဆတ်ဒါဝါ ဘေ ခဲင် ထိုပ်၊ တဲး ဂေ ပွိုန် ဒီ လေး ဟာဝ် ဒျီင် အိုမ်။ 16 အီဘိုန့် နီ၊ အန် ယီ မုး လှုက်လှာန် ဒါ အာဘြာဟမ်။ ဘုဝ် ကာနမ် ဆာတာန် ဟဲ့ ဒွါ ဒုက် ဒီ အန် အာဒါ ဂိုဝ် ဒီ ဒါ ဆီနမ်။ န့ ပီ ကာနမ် ဟဲ့ ပက် ဒုဝ် အန်။ မှဝ် န့ ပါယ် ပီ တူ ဆီ တဲး ဘေ အုဝ် တဲး အန် လွတ် ဆီငဲ ဒီလှဝ်။း”

17 ဂြုဝ်း ဇဝ် ယေဆူ တီ တဲး ဂေ အီ တူ အိုင် ပီ ဘူင် အန် ဘဲန် မွှိုမ် ဆာယ် ဒီ ဂေ။ မာလဲ၊ ဂေ ဒူအီ ကိူန်၊ ဂေ ဟဲ့ ဒါခိုယ် လွင် ပဲ့ ဟဲ့ ဘူင် ဇဝ် ယေဆူ ဒွန် မျုဝ် အီ မွှိုမ် အာမ် ကာဆဝ်။

18 ဝါယ် အန် တီ ဇဝ် ယေဆူ တဝ်း၊ “မိူင် ပီ အိုပ် ဇဝ်ဖြာ၊ န့ ပါယ် မှဝ်။း အုဝ် ဒီ ဘော လာယ် ကာဂဝ် ဒီ မာဆေ။း 19 အုဝ် တဝ်း၊ န့ ပီ ကာအာင် ဒဝ် ဆျီမ် အူ မျုဝ် ပီ ဆမ် ဒူအီ ခဲင် မာန် အန်။ န့ ကြဲ ဒီ တာင်၊ ကော ဘဲန် ယွုန်၊ တဲး မာဆိမ် ကော ပွိုန် ဘူင် ကာဟုန် ဒီ ရာ အန်။”

20 ပေါ အူ ဇေန့် ဇဝ် ယေဆူ တဝ်း၊ “မိူင် ပီ အိုပ် ဇဝ်ဖြာ၊ အုဝ် ဒီ ဘော လုဝ် ကာဂဝ် ဒီ မာဆေ။း 21 န့ ဘော ပီ ဆီနမ် ဘြး ခါမုန် ပီ ဒိုဝ်း အီဘိုန့် အူ ဝီ၊ ကာဝ်ု ခဲင် ကာပဲ့ ခဝ်ချုင် အူယ် ဘ့လဲ၊ တဲး န့ ကော ပြာင် ကော ဘြး တူတ့် ကာပဲ့ တီ။”

22 ဒေါ ဟာဝ် ဇဝ် ယေဆူ ဒူပ် န့တေန့် အီ ဟုဝ့် မိူင် ယေရူဆာလဲမ်၊ အန် ဘော ဟာဝ် လိုပ် ခဲင် မိူင် ဘဲန် မိူင် ဘဲန် မိူင်၊ မာနုဝ် ဒူအီ။ 23 န့ ဘော မိုဝ်း ဒူအီ အူ ဝီ၊ အန် ဒီမွှတ် ဇဝ် ယေဆူ တဝ်း၊ “အိုယ် ဒါ ဆာရာ၊ အုဝ် တူ နပ်၊ ဒူအီ ပီ ဒီ ချွတ် မဲ၊ ယုဝ် မိူဝ် န့ ဒီ ပြေတ့် ကာဆဝ်။း”

ဇဝ် ယေဆူ ဝီ တဝ်း ဒီ အန်၊ 24 “န့ ပီ ဘေ လုဝ် ဂျုဝ်ဂျာ ဒီ လိုပ် ခဲင် မာလုဝ်း တျီ့။ အုဝ် တဝ်း ဒီ ဘေ၊ ဒူအီ ဘဲန် ဝီ ဘဲန် ဝီ တဝ်း ဒီ လိုပ် ခဲင် မာလုဝ်း တီ။ ဂေ ယီ တူ ပဲ ဒီ လိုပ်။ 25 ဒေါ အန် တီ န့ ပီ ဒါ ကာညာ ကာင် ဒီ ယိတ့် ကာဘိတ် မာလုဝ်း ကွဲ့ ဟူ တဲး အာဆေ ပွိုန် ဒီ လိုပ်။ ဘေ ဒီ ဘော ကွယ် နာ ရေတ့်။ ဆေ ဘေ ဘော ဒွယ် မာလုဝ်း၊ ဘေ ဒီ တဝ်း၊ ‘အိုယ် မဲ ဇဝ်၊ တဲး မဲ ဝိုဝ်း မာလုဝ်း၊ တဲး ဘော ယေ ပွိုန် ဒီ လိုပ်၊’ ဒါ ကာညာ ကာင် တွိုန်၊ အန် ဒီ ဝီ တဝ်း ဒီ ဘေ၊ ‘အုဝ် တူ နပ် ဘေ။ အုဝ် တူ နပ်၊ ဘေ တး နာ မှဝ်။’

26 ဒေါ အန် တီ ဘေ ဒီ ဘော တဝ်း၊ ‘ယေ ဟဲ့ ဟူမ် ဘော ဒျီင် ရိုမ် ဒူပ် မဲ။ မဲ ဟဲ့ မာနုဝ် ဒူအီ ခဲင် မိူင် ယေ။’

27 ဒါ ကာညာ ကာင် တွိုန် ယီ ဝီ တဝ်း ဒီ ဘေ၊ ‘အုဝ် တူ နပ် နာ မှဝ် ဘေ တး။ ဘေ မုး ဒူအီ အီ ဘူင် နာ တူ မွှိုမ်၊ အီ ဝွင့် အျီ့၊ တဲး ဘေ လေး ဟာဝ် ဒူင် ကွယ် အုဝ်။’

28 ဒေါ အန် တီ ဘေ ဒီ ပွိုန် ယိုဝ် ဒါ အာဘြာဟမ်၊ အာဆဲက်၊ အာကူပ်၊ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ။ ဂေ ဒီ ကွယ် တူတ့် ဒွန် ဝီ ခဲင် မိူင် ပီ အိုပ် ဇဝ်ဖြာ။ ဘေ ယီ တူ ပွိုန် လိုပ်၊ လုဝ် ကွယ် နာ ရေတ့်။ ဒေါ အန် တီ ဘေ ဒီ ဘော ယာမ် တာင်။ ကုင်ကာပ် ဘေ ကော ကာဒွယ် ကူပ် ယုဝ် ဘေ။ 29 ဒူအီ ဘဲန် ဝီ ဘဲန် ဝီ ဒီ ဘော တး နာ လေး ဆီငဲ၊ တး နာ ဂေတ့် ဆီငဲ၊ တး နာ ကွာ၊ နာ တေတ့်။ ဂေ ဒီ တး ကာဇု၊ တုတ့် ဘော ဟူမ် ရိုမ် ဒေါ ဘူင် ဂေ ဘ့လွယ် ခဲင် မိူင် ပီ အိုပ် ဇဝ်ဖြာ။ 30 ဒေါ အန် တီ ဂေ အီ တး ဒီ ပန်၊ ဂေ ဒီ ပွိုန် ကွယ် နာ အာတ့်။ ဂေ အီ တး ဒီ အာတ့်၊ ဂေ ယီ လုဝ် ကွယ် နာ ပန်။”

31 န့ ဘော ဇမ် အူ ဆီငဲ၊ ဂေ ဒူအီ ခဲင် ဖိုင် ဖာရီဆဲ တး ဇမ် ဒူင် ကွယ် ဇဝ် ယေဆူ။ ဂေ တဝ်း၊ “တဲး မဲ လေး တဝ် ဒူင် ကွယ် မဲ နီ၊ ဟာဝ် ကွယ် ပေါ ပ့လုဝ့်။ ခုန်ဒီခမ် အာဟေရူတ်၊ အန် ဆီ ငဝ်း ယမ် မဲ။”

32 ဇဝ် ယေဆူ ယီ တဝ်း ဒီ ဂေ၊ “ဘေ လုဝ် ဟာဝ် ကာလာင် ဒီ ဒူအီ အီ ပီ မာဆုဝ် ပြဲ အီ လွှက့် ကာဆဝ် တီ။ တဲး ဘေ တဝ်း၊ ‘ဘော အာတိုဝ်၊ ဘော ခဲညှာ အုဝ် ဒီ ဆုတ့် ကာနမ် လေး ခဲင် ဒုဝ် ဘူင့် ဒူအီ။ အုဝ် ဘော တဲး ဆဝ် ဒူအီ ဟြာယ်။ ဟီ ဇမ် တ ညှာ၊ အုဝ် ဒီ ဘော ဟွတ့် တူတ့် ဂါန် ပီ ဘူင် အုဝ်။’ 33 ဘော အာတိုဝ်၊ ဘော ခဲညှာ၊ ဘော တ ညှာ၊ အုဝ် ယီ ဒီ ဘူင် ဟာဝ် ဇိုဝ် တီ ဒွန် မျုဝ်။ အုဝ် ဘော လုဝ် လေး ဟာဝ် ဒူပ် န့တေန့်၊ ကွဲ့ တဲး ဒူအီ အီ ဘျာန် ဂြုဝ်း ဇဝ်ဖြာ ယမ် ပေါ ပ့လုဝ့်။ အန် လုဝ် ယမ် ခဲင် မိူင် ယေရူဆာလဲမ်။

34 အိုယ်၊ ဘေ ဒူအီ ခဲင် မိူင် ယေရူဆာလဲမ်၊ ဘေ မုး ဒူအီ အီ ဟဲ့ ငဝ်း အာဆာက် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဘော ဂေ ဒူအီ ပီ ရဝ်း ပီ တိုယ် ဇဝ်ဖြာ၊ ဘေ ဟဲ့ ဒိုဝ်း မာဝ်၊ ဝိုန့် ဂေ၊ တဲး ဂေ ယမ်။ ဘဲန် ဇေန့် ဘဲန် ဇေန့် အုဝ် ဟဲ့ ထေဝ် ဒီ ဒဲ့ ဘေ တး ဒီ အုဝ်၊ တဲး န့ ပီ မာအျီန် ဒဲ့ မာလှိုမ် ဂွန် အန်။ ဘေ ယီ တူ ခမ်၊ တူ ညှိုမ် အုဝ်။ 35 တဲး ဘေ ထူမ် ဂြုဝ်း အုဝ်၊ အာဝ် လှေန့် ဟုဝ် ဇဝ်ဖြာ ဒီ ဘော လိုဝ်။ အာဝ် ဟူ မိုဝ်း အာဆေ ကွယ် နာ ခဲင်။ အုဝ် ဘော တဝ်း ဒီ ဘေ၊ ဘေ တူ ပွိုန် ဒီ ဝီ ယိုဝ် အုဝ်။ ဟီ ဇမ် အာခြာဝ် ဒီ ဝီ တး အုဝ် ဒူင် ကွယ် ဘေ၊ ဘေ ဒီ ဘော ရွုး အုဝ် တဝ်း၊ ‘အိူပ် အန် ဇဝ် ပီ တိုယ် ဇဝ်ဖြာ အီ အိုပ် အေ။’” ဇဝ် ယေဆူ ဟဲ့ ကာလာင် လွင် မိူင် ယေရူဆာလဲမ် ပါယ် တီ။