1 ဝါယ် အန် တီ ဂေ ဒူအီ ဘဲန် ဟြဲန့် ဘဲန် ဟြဲန့် ဟဲ့ တး ကာဇု။ ဂေ မိူဝ် လာယ် ကာဆျီ့။ ဒေါ အန် တီ ဇဝ် ယေဆူ ကာလာင် ဂြုဝ်း ဒီ ဂေ ဒီဘဲ အန် အာတ့် ကာလာင် အန် ဒီ ဒူအီ ဟဝ်။ အန် တဝ်း၊ “ဘေ လုဝ် ဆာဒိက် ဂေ ဒူအီ ဖိုင် ဖာရီဆဲ။ ဂေ ညိုင်ရာင် ဒီ ဘဲန် ဒူအီ ဘွတ်။ န့ ယီ တူ မှာန်။ ဂေ ပီ ဆီနမ် ဘြး ခါမုန်။ 2 ဒူအီ တူ ပွိုန် ချြီင် မာဆေ။ ခဲ့ ပီ ကာဘိတ် ဒူအီ၊ ကွဲ့ တဲး ဒူအီ ယိုဝ်၊ န့ ဒီ ဝီ လိုဝ်း ဆီချာ၊ ဝီ တဲး ဒွန် အီ ပွိုန် ဒီ ယိုဝ်။ ပီ ဆီ ချြီင် ဒူအီ၊ ကွဲ့ တဲး အီ ဟဝ် နပ်၊ အူ ဆီငဲ န့ ဒီ ဝီ လိုဝ်း ဆီချာ၊ တဲး ဒွန် အီ ကော နပ်။ 3 ခဲ့ မိုဝ်း ပီ ပြာ မဲ ဒီ ကာလာင် ဒေါ အပ် ဝွင့်၊ ကွဲ့ တဲး အီ ယိုဝ်၊ ဂေ ဒူအီ ဒီ ကာလာင် လွင် အန် တီ ဒေါ ကာတဲ ဆီငဲ၊ တဲး ဒွန် အီ ကော ယိုဝ်။ ပီ ကာလာင် ဖူဖာပ် မဲ ခဲင် ဟူင်၊ ဂေ ဒူအီ ဒီ ဒတ် တာင် ဒဲင် ဂြး၊ တဲး ဒွန် အီ ပွိုန် ဒီ ထူမ် လွင် အန် တီ။

4 ဘေ ဒူအီ အီ ဟဲ့ ဘဲန် ဂိုက် အုဝ်၊ အုဝ် တဝ်း ဒီ ဘေ၊ ကွဲ့ တဲး ဘေ ယုဝ် ဂေ ဒူအီ အီ ပွိုန် ငဝ်း ယမ် ဒုဝ် ဘူင့် ဘေ။ ဒဲင် တီ၊ ဂေ ယီ တူ ပွိုန် ဘူင် မာဆေ။ 5 အုဝ် ယီ ကာလာင် ဒီ ဘေ၊ အာဆေ ဟဲ့ မွှိုမ် ယုဝ်။ ဘေ လုဝ် ယုဝ် ဇဝ်ဖြာ အီ ပဲ ဒီ တဲး ဒူအီ ယမ်။ ဟဲ့ ဟွတ့် ယမ်၊ အန် ဘော မိုဝ်း ပွုန် ဒီ တဲး ဘေ စုဝ်း ကာလုဝ့် ငါရာယ်။ န့ မုး ဇဝ်ဖြာ အီ ဟဲ့ မွှိုမ် ယုဝ် အာခါခ်ု။ 6 ဘေ ဘော နပ်၊ ဂေ ဒူအီ နပ် ဒီ ယွင့် မာဆီလဝ်း ဖန် ဒုဝ် အူ ထေ။ ဇဝ်ဖြာ ယီ တူ ပိဝ် မာဆီလဝ်း တွိုန်၊ အာဒါ အူ ဒုဝ် မိူဝ်၊ အန် တူ ပိဝ်။ 7 န့ ဘော ပါယ် တီ။ ဇဝ်ဖြာ လိုမ်လာ ဆီချာ ဘေ။ ဘော ဟိုက် ဂိန့် ဘေ၊ န့ ပီ ဇဝ်ဖြာ ဟဲ့ တိး ဒွန် ညွင့်။ ကွဲ့ တဲး ဘေ ယုဝ် မာဆေ။ ငဝ်း ဘေ ဟဲ့ တာင် လွှိုမ် မာဆီလဝ်း ဂေ ကိူန်။

8 အုဝ် မိူဝ် တဝ်း ဒီ ဘေ၊ အာဆေ ကာလာင် ဒီ အီ ဟဝ် လွင် ညှိုမ် အန် ဒီ အုဝ်၊ အုဝ် အီ ဟဲ့ ဘဲန် ဂွန် ဒူအီ၊ အုဝ် မိူဝ် ဒီ ဝီ ကာလာင် လွင် ဒူအီ တီ ဒီ အာတ့် ဂေ အာမူ အာမာတ် ဇဝ်ဖြာ။ 9 ဆေ ဒူအီ ယီ တဝ်း ဒီ အီ ဟဝ်၊ အန် တူ နပ် အုဝ်၊ အုဝ် မိူဝ် ဒီ တဝ်း ဒီ ဂေ အာမူ အာမာတ် ဇဝ်ဖြာ လွင် ဒူအီ ဝီ တီ၊ ‘အုဝ် တူ နပ် အန်။’ 10 အာဆေ ဒီ ကာလာင် နာ တူ မွှိုမ် လွင် အုဝ် အီ ဟဲ့ ဘဲန် ဂွန် ဒူအီ၊ ဇဝ်ဖြာ ဒီ ဂဝ်း ဝဲန် မှာပ် ပီ ဘူင် အန်။ အာဆေ ယီ တဝ်း နာ စီစိဝ် လွင် နဝ်း ဖွိုမ် ဇဝ်ဖြာ၊ အန် ဇဝ် ယီ တူ ဂဝ်း ဝဲန် မှာပ် အန် တီ ဒေါ မှဝ်။

11 ဆေ ဂေ ဒီ ဘော ကာယွင့် ဘေ၊ စ်ု ဘေ ဟာဝ် ကာလာင် လွင် အန် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ ဘော ဒီ အာတ့် ဂေ ဒါ ကာညာ ဘော ဂေ ဒါ တာင် အီ အိုပ် မိူင်၊ ကွဲ့ တဲး နဝ်း ဘေ ကာဟွာ့။ ကွဲ့ တဲး ဘေ ဇေန့်ဇာ ဒီ အာတ့် လွင် ပီ ဒီ လုဝ် ကာလာင် ဘေ ဒီ ဂေ ဒူအီ ဇိုဝ် တီ။ 12 ခဲ့ ပီ ဒီ လုဝ် ဘေ ကာလာင်၊ နဝ်း ဖွိုမ် ဇဝ်ဖြာ ဒီ တဲး ဘေ နပ် တူတ့် ဒွန် မျုဝ် ဒေါ အန် တီ။” ပါယ် တီ ဇဝ် ယေဆူ ဝီ မာနုဝ် ဒီဘဲ အန်။

13 ကာတဲ ဂေ ဒူအီ ကိူန် တွိုန်၊ န့ မိုဝ်း ဒူအီ အူ ဝီ၊ အန် တဝ်း ဒီ ဇဝ် ယေဆူ၊ “မဲ ဒါ ဆာရာ၊ မဲ လုဝ် စ်ု အီကတ် အုဝ်၊ တဲး အန် ကာဆာင် ဒွါ ဒီ အုဝ် ခါဂုန် ပီ ဒွါ ဂုန့် ယာယ်။”

14 ဇဝ် ယေဆူ ဝီ တဝ်း ဒီ အန်၊ “အိုယ်၊ အုဝ် တူ မုး ဒါ အီ ဆုင်ဖျာတ် ဒါရာ ဒီ ဒူအီ ဟဝ်။ အုဝ် တူ မုး ဒါ အီ ဒီ ကာယဝ်း ကြုဝ်ကြာမ် အီ။” 15 ပန် တီ ဇဝ် ယေဆူ ဝီ တဝ်း ဒီ ဒူအီ ဘောကာဂ့လျီတ်၊ “ဘေ လုဝ် ဆာဒိက်၊ ဘေ လုဝ် ဝဲန် နဝ်း ဆီ ပွိုန် ဒွန် မျုဝ်။ ကြုဝ်ကြာမ် ဒွန် မျုဝ် တူ ပွိုန် ပီတူင့် အာဆာက် ဒူအီ။”

16 ဟဲ့ ဟွတ့်၊ ဇဝ် ယေဆူ ကာလာင် အူဖာမာ ဒီ ဂေ။ အန် တဝ်း၊ “ဟဲ့ ဒွိုမ် မိုဝ်း ဒူအီ ခြမ် အူ ဝီ။ ပီ ဆမ် ပီ ပိတ် အန် ခဲင် မာန်၊ န့ ဟဲ့ အွင် ဟဲ့ လေး ကိူန်။ 17 ဒူအီ တွိုန်၊ အန် ဝီ ဇေန့်ဇာ ခဲင် နဝ်း အန်။ အန် တဝ်း၊ ‘ခဲ့ ပီ ပွိုန် အုဝ် ငှုဝ်၊ န့ တူ ပွိုန် ဟပ် တူတ့် ခဲင် န့ဝေန် အုဝ်။ မာဆေ ပီ ဒီ လုဝ် အုဝ် ဘူင်။း

18 အုဝ် ဒီ ဘူင် ပါယ် နီ။ အုဝ် ဒီ ယဝ်း ဝဲန် န့ဝေန် အုဝ်။ အုဝ် ဒီ ဘော ဘူင် န့ဝေန် ကာမာယ်၊ အီ တာင် လွှိုမ် အီ ဘြိမ်။ ဝါယ် အန် တီ အုဝ် ဒီ ပွိုန် အုန် ငှုဝ် အုဝ်။ အုဝ် ဒီ ဘော ဘ့လေး အုန် ဆီချာ ကြုဝ်ကြာမ် အုဝ် ဒွန် မျုဝ်။’ 19 ဟဲ့ ဟွတ့်၊ အုဝ် ဒီ ဘော တဝ်း ခဲင် နဝ်း အုဝ်၊ ‘အိုယ်၊ မဲ နဝ်း အုဝ်၊ ဟဲ့ မိုဝ်း ကိူန် ဒွန် မျုဝ် ပီ ကာဇု အုန် မဲ။ န့ ဒီ ဂ့လိုမ် ဟူမ် ဘဲန် ဆီနမ် ဘဲန် ဆီနမ်။ တဲး မဲ ကွယ် ဆီချာ၊ ကွယ် ဒါခိုယ်။ တဲး မဲ ဘော ဟူမ် ဖဲ။ တဲး မဲ မိုဝ်း နဝ်း ဒါခိုယ် လွင် အန် တီ၊ ကွဲ့ တဲး မဲ ယုဝ် မာဆေ။’ အန် ဟဲ့ ဟွတ့် တဝ်း ပါယ် တီ၊

20 ဇဝ်ဖြာ ဘော တဝ်း ဒီ အန်၊ ‘အိုယ်၊ မဲ မုး ဒူအီ ရိုဝ်။ ခဲင် မှိုဝ် နီ၊ အုဝ် ဒီ ဒိုဝ်း အာဆာက် မဲ။ ပန် တီ ကြုဝ်ကြာမ် ဒွန် မျုဝ် ပီ ကာဇု အုန် မဲ နီ၊ အာဆေ ဒီ ဝီ ပွိုန်။း’

21 န့ ဘော ပါယ် တီ။ ဆေ ဒူအီ ဟဲ့ မိုဝ်း ဒီ ဂဲပ် အုန် ကြုဝ်ကြာမ် ဘဲန် မျုဝ် ဘဲန် မျုဝ်၊ ဆေ အန် ယီ တူ မိုဝ်း ကြုဝ် ပီ ဒွါ ဇဝ်ဖြာ၊ န့ တူ ဘဲန် အာဂျိုဝ် ဒီ အန်။” ဇဝ် ယေဆူ ဟဲ့ မာနုဝ် ပါယ် တီ။

22 ဝါယ် အန် တီ ဇဝ် ယေဆူ တဝ်း ဒီ ဂေ ဒီဘဲ အန်၊ “ကူပ် ပီ တဝ်း အုဝ် ဒီ အီ ဟဝ် တွိုန်၊ အုဝ် ဝီ တဝ်း ဒီ ဘေ၊ ကွဲ့ တဲး ဘေ မိုဝ်း နဝ်း ကာဟွာ့ လွင် အာဆာက် ဘေ ဘော ဒုဝ် ဘူင့် ဘေ။ ကွဲ့ တဲး နဝ်း ဘေ ကာဟွာ့ လွင် ပီ ဒီ ဟူမ် ပီ ဒီ တာ ဘေ။ 23 အာဆာက် ဘေ၊ အာရေ အန် တာင် လွှိုမ် ပီ ဒီ ဟူမ် ဘေ။ ဘော ဒုဝ် ဘူင့် ဘေ၊ အာရေ အန် တာင် လွှိုမ် ခြိုင် ပီ ဒီ တာ ဘေ။ 24 တဲး ဘေ ယွတ် မာကာအ။ ဂေ တူ မိုဝ်း ဒီ ဆမ် မာဆေ၊ ဟဲ့ ဟွတ့်၊ ဂေ တူ ဝီ မိုဝ်း ဒီ ဆုဝ့် မာဆေ။ ဂေ မိူဝ် တူ မိုဝ်း ဒီ အုန် ပီ ဒီ ဟူမ် ခဲင် ဘု ငှုဝ်။ ဇဝ်ဖြာ ယီ ဟျီင် ဂေ။ န့ ယီ မုး ဘေ၊ ငဝ်း ဘေ ဟဲ့ တာင် လွှိုမ် ငဝ်း မာဆိမ်။

25 ဒဲင် တီ၊ အာဝ် မိုဝ်း အာဆေ အီ ပွိုန် ဘူင် တဲး အာဆာက် အန် တူင့် ပေါ န့ ပွါ ကူပ် မိုဝ်း အန် နဝ်း ကာဟွာ့။ အာဒါ အူ နာရီ မိူဝ်၊ အန် တူ ပဲ ဒီ ပီတူင့် အာဆာက် အန်။ 26 ဆေ အီ စဲက် တီ ဘေ တူ ပဲ ဒီ ဘူင်၊ မှဝ် န့ ပါယ် ပီ မိုဝ်း ဘေ နဝ်း ကာဟွာ့ လွင် ဘဲန် မျုဝ် ဘဲန် မျုဝ်။း

27 တဲး ဘေ ဘော ယွတ် ဘုဝ်း ခမ်ဆွန်၊ မှဝ် ဂေ ပါယ် ဒီ လတ့်။ ဂေ တူ ရန့် တူ ဘတ် ဆေန့် ဂေ။ အုဝ် ယီ တဝ်း ဒီ ဘေ၊ ခုန်ဒီခမ် အာဆာလုဝ်မုဝ် တွိုန်၊ အန် မိုဝ်း အာဖုင် ဒင်ခုဝ် တာင်။ ခြိုင် ပီ တာ အန် အီ ဟဲ့ စှိတ် ကာဆဝ်၊ ယီ တူ စှိတ် ပီ ဘုဝ်း အူ ဘူင့် တီ။ 28 ပေတ့် ဘော ကွယ် အာတိုဝ်။ ခဲညှာ ဂေ ဝီ တဲး ငဝ် ဟူမ် ပေတ့် တီ။ ဆေ ဇဝ်ဖြာ တဲး ဘုဝ်း ဂေ ပေတ့် စှိတ် ခဲ့ တီ၊ တဲး ဘေ ဘော နပ် ဆီချာ၊ အန် ဇဝ် ဒီ ဒွါ ခြိုင် တာ ဒီ ဘေ လွှိုမ် ပေတ့် တီ။ အိုယ် ဘေ ဒူအီ၊ မှဝ် န့ ပါယ် ပီ ညှိုမ် ဘေ အီ စဲက် ခဲင် နဝ်း ဘေ။း 29 ကွဲ့ တဲး ဘေ မိုဝ်း နဝ်း မှဲ၊ ကွဲ့ တဲး ဘေ ဇေန့်ဇာ ဆေဆေ လွင် ပီ ဒီ ဟူမ် ပီ ဒီ တာ ဘေ။ 30 ဂေ ဒူအီ အာမျုဝ် ဟဝ်၊ ဂေ ဘူင် ဘဲန် မျုဝ် ဘဲန် မျုဝ် တဲး ဂေ ပွိုန် ဇိုဝ် တီ ဒွန် မျုဝ်။ ဂုန့် ဘေ ယီ ဟဲ့ နပ်၊ ဘေ ဘော လုဝ် ဇိုဝ် တီ ဒွန် မျုဝ်။ 31 ဘေ ယီ လုဝ် ဂျုဝ်ဂျာ ဒီ ဘူင် ဒွန် မျုဝ် အီ တဲး ဇဝ်ဖြာ အိုပ် ကာဒါယ်။ ဆေ ဘေ ဘူင် ပါယ် တီ၊ ပီ ဒီ လုဝ် ဘေ ဒွန် မျုဝ်၊ ဘေ ဒီ ဘော ပွိုန် တူတ့် ဒွန် မျုဝ်။

32 ဘေ ယီ ပီ ဖိုင် မာဘူ ဒီတဲတ်။ ကွဲ့ တဲး ဘေ ယုဝ် မာဆေ။ ဇဝ်ဖြာ အီ မုး ဂုန့် ဘေ ဟဲ့ အိုင် ဒီ တဲး ဘော ဘေ အိုပ် မိူင် ပီ အိုပ် အန် ဇဝ်။ 33 ဘေ လုဝ် ယွင့် ကြုဝ်ကြာမ် ဘေ။ ရွိုန် ပီ ပွိုန် ဘေ၊ တဲး ဘေ ဝီ ကာဆာင် ဒီ ဒူအီ ဂိန်။ ဆေ ဘေ ဘူင် ပါယ် တီ၊ န့ ပီ ဘေ ဟဲ့ ပွိုန် ဟူ ရွိုန် အီ တူ နပ် ဒီ ဘြိမ်၊ တူ နပ် ဒီ ကာပျာတ့်။ ဆေ ဘေ ဘူင် ပါယ် တီ၊ န့ ဘော ပီ ဘေ ဟဲ့ အုန် ကြုဝ်ကြာမ် ဘေ ဒွန် မျုဝ် ခဲင် မိူင် ဂါင်ဟြာဝ်။ ဒူင် တီ အာဝ် မိုဝ်း ဒါ ပြာ ပွိုန် လိုပ် ပြာ။ အာဝ် မိုဝ်း မာဝ အီ ပွိုန် ဟူမ်။ 34 ခုဝ်၊ ဒူင် အုန် ဘေ ကြုဝ်ကြာမ် ဘေ၊ ဘော နဝ်း ဘေ ဒီ ဘော နမ်လှုဝ်း ဒူင် တီ ဆေဆေ။”

35 ဇဝ် ယေဆူ ဝီ တဝ်း၊ “တဲး န့ ပီ ဘေ ရိတ် ဆဲ့ ဒီ ညွယ် ဘေ၊ တဲး ဘေ ဘော ပီဒဝ့် အုန် ငဝ် အွမ် ဘေ။ 36 တဲး ဘေ ပီ ဒဲစေန့် အီ နှဝ့် ပန် ဒီ ဝီ တး ဒါ ကာညာ အန် ဒီ ဘ့လွယ် ခတ် ဒူအီ ဟဝ်။ ဒါ ကာညာ ဟီ တး ဒွယ် မာလုဝ်း ကာင် အန်၊ ဒဲစေန့် တွိုန် ဒီ ပွိုန် ဒီ ဝိုဝ်း မာလုဝ်း ဒီ အန် အူ ဇေန့်။ 37 ဂေ ဒဲစေန့် အီ ကွယ် ဘ်ု ဒေါ တး ဒါ ကာညာ ဂေ တွိုန်၊ ဂေ ဒီ ဘဲန် နဝ်း ဒါခိုယ်။ အုဝ် တဝ်း အာခ်ု ဒီ ဘေ၊ ဒါ ကာညာ ဂေ၊ အန် ဒီ ဘော ဒိုဝ်း ဆဲ့ အန်၊ ပက် ဒီ ညွယ် အန်၊ ဝီ တဲး ဂေ ဒဲစေန့် အန် ဝီ တုတ့် ဒီ ဟူမ် ဘူမ်၊ တဲး အန် ဟျီင် ဂေ ဟူမ်။ 38 ဒါ ကာညာ တွိုန် ပီ ဘော တး ကာတဲ ဆွိုမ်၊ ပီ ဘော တး အာတ့် ဝး ပြဲ၊ ဆေ အန် ယိုဝ် ဒဲစေန့် အန် ကွယ် နှဝ့် အန်၊ န့ ဒီ ဘဲန် နာ မွှိုမ် ဒီ ဂေ။ 39 အုဝ် ဝီ တဝ်း တဲး ဘေ နပ် ဆီချာ၊ ဆေ န့ မိုဝ်း ဒါ ကာညာ ကာင်၊ ဆေ အန် နပ် အာခြာဝ် ဒီ တး လိုပ် ဒါ ပြာ ခဲင် ကာင် အန်၊ အန် ဒီ ဘော ခြဲ ဒါ ပြာ ကွဲ့ တဲး အန် ပွိုန် ဒီ လိုပ် ပြာ ခဲင် ကာင် အန်။ 40 ဘော ဘေ လုဝ် ဘ်ု ဆေဆေ။ ခုဝ်၊ ဘော အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ ဝီ တး အာခြာဝ် ပီ တူ ထာင် ဘေ။”

41 အာပေတာရူ ယီ တဝ်း၊ “အိုယ် မဲ ဇဝ်၊ ပီ ကာလာင် မဲ တီ၊ ယေ တူ နပ် ယုဝ် မဲ မာနုဝ် အီ ယေ၊ ယုဝ် မဲ မာနုဝ် ဘော ဂေ ဒူအီ ဟဝ် ဘောကာဂ့လျီတ်။း”

42 ဇဝ် ယေဆူ ဝီ တဝ်း ဒီ အန်၊ “ဆေ န့ မိုဝ်း ဒဲစေန့် ဒါ ကာညာ အူ ဝီ၊ ဆေ ဒါ ကာညာ အန် ဟဲ့ စ်ု အန် တဲး အန် ယွတ် မဲန် ဂေ ဒဲစေန့် ဒွန် ဝီ၊ ဆေ အန် မိူဝ် ဒွါ ပီ ဒီ ဟူမ် ဒီ ဂေ ဒေါ လုဝ် ဂေ ပီ ဒီ ဟူမ်၊ ဒူအီ တီ ဟဲ့ ဘူင် ဆိူဝ် ဆိူဝ် မှာန် မှာန် ဆေဆေ။ 43 ဆေ ဒါ ကာညာ အန် ဘော တး ယိုဝ် ဒဲစေန့် အန် ဟဲ့ ဘူင် ပီ စ်ု အန်၊ န့ ဒီ ဘဲန် နာ မွှိုမ် ဒီ ဒဲစေန့် တီ။ 44 အုဝ် တဝ်း အာခ်ု ဒီ ဘေ၊ ဒါ ကာညာ ဒီ ဝီ ဒွါ ဒဲစေန့် ဝီ တီ၊ တဲး အန် အိုပ် တူတ့် ကြုဝ်ကြာမ် အန်။ 45 ဆေ ဒဲစေန့် ယီ တဝ်း ခဲင် နဝ်း အန်၊ ‘ဒါ ကာညာ အုဝ် နှဲန် ဒီ ကွယ် လှေန့်၊ အန် ညှမ် ငှိုယ် ငှာယ် ဒီ ဝီ ဝေန့်၊’ ဟဲ့ ဟွတ့်၊ အန် ဘော မး အီမာယ် အီဘိုန့် အီ မုး ဒဲစေန့် ပီ အန်၊ ဆေ အန် မိူဝ် ဟူမ် ရိုမ် ဒျီင် ရိုမ် ဒူပ် ဂိုက် အန် ဘော ယိုတ့် ပဝ်း၊ 46 ဆေ ဒါ ကာညာ အန် ယီ တး ဒေါ တူ ထာင် အန်၊ ဒါ ကာညာ အန် ဒီ ဘော ငဝ်း အာဆာက် အန်၊ ဘော ကာဒဲပ် ဒုဝ် အန် ဘဲန် ပွတ် ဘဲန် ပွတ်။ ဟဲ့ ဟွတ့်၊ ဒါ ကာညာ ဒီ ဘော ဝဲန် အန်၊ တဲး အန် ကွယ် ရိုမ် ဒူပ် ဂေ ဒူအီ အီ တူ ညှိုမ် ဇဝ်ဖြာ။

47 ဒဲစေန့် အီ နပ် ပီ လုဝ် ပီ အိုင် ဒါ ကာညာ အန်၊ ဆေ အန် ယီ တူ ဘူင် ပီ အိုင် ဒါ ကာညာ အန်၊ အန် လုဝ် ခမ် ဒါ ကာညာ အန် မး အန် ဘဲန် ဇေန့် ဘဲန် ဇေန့်။ 48 ဒဲစေန့် အီ တူ နပ် ဒီ အာတ့် ပီ အိုင် ပီ လုဝ် ဒါ ကာညာ အန်၊ ဟဲ့ ဟွတ့် အန် မိူဝ် ဘူင် အီ တူ လဝ့် နဝ်း ဒါ ကာညာ အန် တီ၊ ဘော အန် ဒီ ဝီ ခမ် ဒါ ကာညာ မး အန်၊ ယီ တူ မး ကာဆဝ်။ န့ ဘော ပါယ် တီ။ အာဆေ ဟဲ့ ပွိုန် ကိူန် ကြုဝ်ကြာမ် ပီ အာပ် အုန် ဒါ ကာညာ အန်၊ ဒါ ကာညာ အန် ဒီ ဘော ဝီ မှာန့် ကိူန် ဒီ အန်။ ဆေ ဒူအီ အူ ဝီ အုန် ကိူန် ဒီ အီ ဟဝ်၊ ပန် ဒီ ဝီ တး အန်၊ အန် ဒီ ဝီ မှာန့် ကိူန် လွှိုမ် ဘြိမ်။

49 အုဝ် ဟဲ့ တး ဒဲင် ကာဒါယ် နီ၊ တဲး အုဝ် ဆုင်ဖျာတ် ဒါရာ၊ တဲး န့ ပီ အုဝ် ဒီ ဒုဝ့် ငဝ်။ အုဝ် ဆီ လုဝ် ကာဆဝ် တဲး န့ ကုး ဟဲန့် ဇမ် ဒွန် ပ့လုဝ့်။ 50 အုဝ် ယီ လုဝ် ခမ် ဒုက် တာင် ဘော ခမ် ဒီ ယမ်။ အုဝ် ဟဲ့ အုန် နဝ်း အုဝ် ဒီ ဘူင် တဲး န့ ဟွတ့် တူတ့် ဇိုဝ် တီ။ 51 မာဆေ ပီ ထာင် ဘေ အုဝ် ဒီ တး ဘူင် ဒဲင် ကာဒါယ် နီ။း ဘေ ထာင် အုဝ် ဒီ တဲး ဒူအီ ကွယ် ရိုမ်၊ ကွယ် ဒါခိုယ်။း အာဝ် မုး ပါယ် တီ။ အုဝ် တဝ်း ဒီ ဘေ၊ ကူပ် တး အုဝ် ဒဲင် ကာဒါယ် နီ၊ ဂေ ဒူအီ ဒီ လာယ် ကာယဝ်း၊ လာယ် ကာဂုဝ်း။ 52 အူ ဆိန့် ဒေါ တီ နီ၊ ဆေ န့ မိုဝ်း ဒူအီ ဖန် ဝီ ခဲင် ကာင် အူ ကာင်၊ ဂေ ဒီ လာယ် ကာယဝ်း။ ဒူအီ အူယ် ဝီ ဒီ မိုဝ်း နဝ်း အူ မျုဝ်၊ ဘော အာ ဝီ ဒီ ဘ့လေး နဝ်း ဂါယ် ပေါ မျုဝ်။ 53 ဂုန့် ဒီ ကာယဝ်း ဒီ ဂွန် ဂေ။ ဂွန် ဂေ ဒီ ဝီ ကာယဝ်း ဒီ ဂုန့် ဂေ။ မာ ဒီ ကာယဝ်း ဒီ ဂွန် အီဘိုန့် အန်။ ဂွန် အီဘိုန့် အန် ဒီ ဝီ ကာယဝ်း ဒီ မာ အန်။ ဘော ဂိုန့် ဒီ ကာယဝ်း ဒီ အဝ် အန်။ အဝ် အန် တီ၊ အန် ဒီ ဝီ ကာယဝ်း ဒီ ဂိုန့် အန်။” ပါယ် တီ ဇဝ် ယေဆူ ကာလာင် ဒီ ဒီဘဲ အန်။

54 ပန် တီ ဇဝ် ယေဆူ ဘော တဝ်း ဒီ ဒူအီ ကိူန်၊ “ဆေ ဘေ ယိုဝ် န့အု ဒီ ဟုဝ့် ခဲင် ဂါင်ဟြာဝ် နာ ဂေတ့် ဆီငဲ၊ ဘေ နပ် ဒီ တဝ်း အူ ဇေန့်၊ ‘န့ ဒီ ဂ့လာယ်။’ ဟဲ့ ဟွတ့်၊ န့ ဒီ ဘော ဘဲန် ပါယ် တီ။ 55 ဒေါ ယိုဝ် ဘေ ခုန် အီ တး နာ တေတ့်၊ ဘေ ဝီ တဝ်း၊ ‘န့ ဒီ ကာဟွာ့ အာတိုဝ် နီ။’ ဟဲ့ ဟွတ့် တဝ်း ပါယ် တီ၊ န့ ဒီ ဘော ကာဟွာ့ အာခါခ်ု။ 56 ဘေ ယီ မုး ဒူအီ ညိုင်ရာင် ဘွတ်။ ဒေါ ယိုဝ် ဘေ ဒွန် မျုဝ် ဒဲင် ကာဒါယ် ဘော ခဲင် ဂါင်ဟြာဝ်၊ ဘေ နပ်၊ န့ ဒီ ဘဲန် ပါယ် မှဝ်။ ဘေ ယီ ဝီ ယိုဝ် ပီ ဘူင် ဇဝ်ဖြာ ဒေါ တီ နီ။ န့ တူ ဝီ လိုဝ်း ဆီဖဝ် အန် ခဲင် နဝ်း ဘေ။

57 ခဲင် နဝ်း ဘေ၊ ဘေ တူ နပ် ဒီ ကာယဝ်း အီ မွှိုမ် အီ တူ မွှိုမ် ပီ ဘူင် ဒူအီ။ 58 ခုဝ်၊ ဘေ နပ် ဒီ လာယ် ကာယွင့်၊ ဟာဝ် ဒီ ကာင် ဒါ တာင် အီ ဆုင်ဖျာတ် ဒါရာ။ ဒေါ ဟာဝ် ဘေ ဒူပ် န့တေန့် တီ၊ ဘေ လုဝ် ဂျုဝ်ဂျာ ဒီ တဲး ဘော ဘေ ဘော ရန်ဆူ ဘေ ဝီ လာယ် ဒါခိုယ်။ ဆေ ဘေ တူ ဘူင် ပါယ် တီ၊ ရန်ဆူ ဘေ ဒီ အာပ် ဘေ ဒီ ဒါ တာင် အီ ဆုင်ဖျာတ် ဒါရာ။ ဟဲ့ ဟွတ့်၊ ဒါ အီ ဆုင်ဖျာတ် ဒါရာ ဒီ ဘော အာပ် ဘေ ဒီ ဒါ ဆိုက်။ ဒါ ဆိုက် တွိုန် ဒီ ဝီ ပက် ဘေ အူ ဇေန့်၊ ခြွင့် ဘေ ခဲင် ကာပိုမ်။ 59 အုဝ် တဝ်း ဒီ ဘေ၊ အာတ့် ဒွါ ဘြေ့ ဘေ ရွိုန် ပီ မှာန့် ရန်ဆူ ဘေ တီ၊ ဘေ တူ ပွိုန် ဝီ လေး ခဲင် ကာပိုမ် တီ။” ဇဝ် ယေဆူ ဟဲ့ ကာလာင် ပါယ် တီ။