ခါန် 11
လွင် ဇဝ် ယေဆူ မာနုဝ် ပီ ဒီ ပါယ် ဒီ ဆာခိုဝ် ဒီ ဇဝ်ဖြာ
1 အူ ဆီငဲ၊ ဇဝ် ယေဆူ ကွယ် ဆာခိုဝ် အူ ပ့လုဝ့်။ ဝါယ် ဟဲ့ ဟွတ့် အန် ဆာခိုဝ်၊ ဒီဘဲ အန် အူ ဝီ တဝ်း၊ “အိုယ် မဲ ဇဝ်၊ မှာန့် မဲ မာနုဝ် ဘော ယေ၊ တဲး ယေ နပ် မှဝ် ဒီ ပါယ် ဒီ ဆာခိုဝ်၊ တဲး န့ ပီ ဒါ ဆာရာ အာယောဟာန် ဟဲ့ မာနုဝ် ဒီဘဲ အန်။”
2 ပန် တီ ဇဝ် ယေဆူ တဝ်း ဒီ ဂေ၊ “ဒေါ ဆာခိုဝ် ဘေ၊ ဘေ လုဝ် တဝ်း၊
‘အိုယ် ဂုန့် ယေ အီ ကွယ် ဂါင်ဟြာဝ်၊ တဲး ယေ ဒူအီ မိုဝ်း နဝ်း အီ ရုဝ်ဆေ ရီမာတ် မဲ ဇဝ်။ အာခြာဝ် ဒီ အိုပ် မဲ ဒူအီ ဒဲင် ကာဒါယ်၊ တဲး မဲ တဲး န့ တး၊ တဲး န့ ဇမ်။
3 ဒွန် ဆီငဲ ဒွန် ဆီငဲ တဲး မဲ ဇဝ် ဒွါ ပီ ဒီ ဟူမ် ဒီ ယေ။
4 တဲး မဲ ဇဝ် ဘ့လွာ့ ဝဲန် မှာပ် ပဲ့ ဟဲ့ ဘူင် ယေ၊ တဲး န့ ပီ၊ ဘော ယေ ဘ့လွာ့ ဝဲန် မှာပ် ပဲ့ ဟဲ့ ဘူင် ကာလိုပ် ဒူအီ ဟဝ် ဒီ ယေ။ ယေ ဘော မှာန့် ဒီ မဲ ဇဝ်၊ ကွဲ့ တဲး ယေ ဒူပ် ဒူအီ အီ ကာဆုး ယေ ဘူင် မှာပ်။ တဲး ယေ လွတ် နာ တူ မွှိုမ်။’a
ဘေ လုဝ် ဆာခိုဝ် ပါယ် တီ။”
5 ပန် တီ ဇဝ် ယေဆူ ဝီ တဝ်း ဒီ ဒီဘဲ အန်၊ “ဆေ န့ ဘော မိုဝ်း ဒူအီ အူ ဝီ ကာတဲ ဘေ၊ ဆေ ဂိုက် အန် ဟဲ့ တး ဒူင် ကွယ် အန် ခဲင် မှိုဝ်၊ အန် ဒီ ဘော ဝီ ဟာဝ် ဒီ ကာင် ဂိုက် အန် ပေါ ဝီ၊ မှာန့် ဒီ အန် တဝ်း၊ ‘အိုယ် ဂိုက်၊ အုဝ် မှာန့် ဒီ ကာရဝ်း ခါမုန် မဲ အူယ် ဘူင့်။ 6 ဂိုက် အုဝ် အူ ဝီ ဟဲ့ တး ဇမ် ဒူင် ကွယ် အုဝ် ဒေါ တီ နီ။ အုဝ် ယီ တူ မိုဝ်း ဒီ ဟျီင် အန် ဟူမ် မာဆေ။’
7 ဆေ အန် ဟဲ့ ဟွတ့် မှာန့် ပါယ် တီ၊ ဂိုက် အန် အီ ကွယ် ခဲင် ကာင် တွိုန်၊ အန် ဒီ ဘော တဝ်း၊ ‘ကွဲ့ ဒီလဲ အုဝ်။ အုဝ် ဟဲ့ ဆွင့် ရိတ် မာလုဝ်း ကာင် အုဝ်။ ဘော အုဝ် ဘော ဂွန် အုဝ်၊ ယေ ဟဲ့ ဟွတ့် လိုပ် အိတ်။ အာဝ် ဟူ ပွိုန် ယိတ့် ဒွါ မာဆေ ဒီ မဲ။’ 8 ဂိုက် အန် တွိုန် တဝ်း ပါယ် တီ။ အုဝ် ယီ တဝ်း ဒီ ဘေ၊ ဆေ ဂိုက် အန် အီ ကွယ် ခဲင် ကာင် တူ ယိတ့် ဒွါ ဒီ အန် ကူပ် မုး ဂါယ် အူ ဂိုက်၊ အန် ဒီ ဘော ဒွါ ကူပ် မှာန့် တူ စူ တူ ဖ့လာ အန်။ ဂိုက် တီ ဒီ ဘော ယိတ့် ဒိုဝ်း ဒွါ ဒီ အန် ခဲ့ ပီ ဆီ ပွိုန် အန်။ 9 အုဝ် တဝ်း ဒီ ဘေ၊ ဆေ ဘေ မှာန့်၊ ဘေ ဒီ ပွိုန်။ ဆေ ဘေ ဟြေတ့်၊ ဘေ ဒီ ယိုဝ်။ ဆေ ဘေ ဒွယ် မာလုဝ်း၊ ဘေ ဒီ ပွိုန် ဒီ လိုပ်။ 10 ခုဝ်၊ ဒွန် အီ အီ မှာန့်၊ အန် ဒီ ပွိုန်။ ဒွန် အီ အီ ဟြေတ့်၊ အန် ဒီ ယိုဝ် ပီ ဟြေတ့် အန်။ ဘော ဒွန် အီ အီ ဒွယ် မာလုဝ်း၊ အန် ဒီ ပွိုန် ဒီ လိုပ် ခဲင် မာလုဝ်း တီ။
11 ဆေ န့ မုး ဂုန့် အီ ကွယ် ကာတဲ ဘေ၊ ဆေ ဂွန် အန် မှာန့် မာဂါ ဒီ အန်၊ န့ တူ မိုဝ်း ဂုန့် ဝီ မှဝ် အီ ဝီ ဒွါ မာဟန့် ဒီ ဂွန် အန်။ 12 ဆေ ဂွန် အန် မှာန့် ပွိုန် အျီန် ဒီ အန်၊ အန် တူ ဝီ ဒွါ မာ မဲင်ငဝ် ဒီ ဂွန် အန်။ 13 န့ ဘော ပါယ် တီ။ ဘေ အီ မုး ဒူအီ မိူက် ယီ နပ် ဒီ ဒွါ နာ မွှိုမ် ဒီ ဂွန် ဘေ။ ပါယ် တီ ဂုန့် ဘေ၊ အီ ကွယ် ဂါင်ဟြာဝ်၊ အန် နပ် ဒီ ဒွါ အီ မွှိုမ် လွှိုမ် တီ။ အန် ဒီ ဒွါ နဝ်း ဖွိုမ် ဇဝ်ဖြာ ဒီ ဒွန် အီ အီ မှာန့် ဒီ အန်။”
လွင် ပွုန် ဇဝ် ယေဆူ ဂါယ် ပွုန် ဘုဝ် ကာနမ်
14 ဒေါ အန် တီ န့ ဘော မိုဝ်း ဒူအီ အူ ဝီ။ ကာနမ် အီ တူ နပ် ဒီ ကာလာင် ဂြုဝ်း ဟဲ့ လိုပ် ကွယ် ခဲင် ဒုဝ် ဘူင့် အန်။ ဇဝ် ယေဆူ ဆုတ့် ကာနမ် တီ လေး ခဲင် ဒုဝ် ဘူင့် ဒူအီ တီ။ ဒေါ ဟဲ့ ဟွတ့် လေး ကာနမ် တီ၊ ဒူအီ တီ ဝီ ပွိုန် ကာလာင် ဂြုဝ်း အူ ဇေန့်။ ဂေ ဒူအီ ကိူန် မိူဝ် အာမ် လွင် အန် တီ။ 15 ဒူအီ မင် အီ၊ ဂေ ယီ တဝ်း လွင် ဇဝ် ယေဆူ၊ “ဒူအီ တီ၊ အန် ဒိုဝ်း ပွုန် ဘုဝ် ကာနမ် အီ စိူဝ် ဘေဆေဘူ၊b တဲး အန် ဆုတ့် ကာနမ် လေး ခဲင် ဒုဝ် ဘူင့် ဒူအီ။” 16 ဂေ ဒူအီ မင် အီ၊ ဂေ ယီ ဆီ ထေဝ် ဇဝ် ယေဆူ။ ဂေ ဘော မှာန့်၊ တဲး အန် ဘျ နာ မွှိုမ် အာမ် ကာဆဝ် ဒီ ဂေ၊ တဲး ဂေ ကော နပ် ဆီချာ၊ န့ မုး ဇဝ်ဖြာ၊ အီ တိုယ် အန် တး လူင် ဒဲင် ကာဒါယ်။
17 ဇဝ် ယေဆူ ယီ နပ် ပီ ဇေန့်ဇာ ဂေ။ အန် ဝီ တဝ်း ဒီ ဂေ၊ “ဆေ န့ မိုဝ်း မိူင် အူ မိူင်၊ ဆေ ဒူအီ အီ ကွယ် ခဲင် မိူင် တီ လာယ် ကာယဝ်း လာယ် ကာဂုဝ်း၊ မိူင် တီ၊ န့ ဒီ လိုဝ်၊ အာဝ် ပွိုန် ကွယ်။ န့ဟူမ် ဒူအီ မိူဝ် ပါယ် တီ။ ဆေ ဂေ အူ န့ဟူမ် လာယ် ကာယဝ်း၊ န့ ဘော လိုဝ် တူတ့်။ 18 ဆေ ဘုဝ် ကာနမ် အီ စိူဝ် ဆာတာန် ဝီ လာယ် ကာလုတ့် ဒီ ဂေ ကာနမ် ခဲင် ဖိုင် အန်၊ မိူင် ပီ အိုပ် အန် အာဝ် ပွိုန် ကွယ်။ န့ ဘော ပါယ် တီ၊ ဆေ ဘေ တဝ်း၊ အုဝ် ဒိုဝ်း ပွုန် ကာနမ် ဘေဆေဘူ တွိုန်၊ ဆုတ့် ကာနမ် လေး ခဲင် ဒုဝ် ဘူင့် ဒူအီ။ 19 ဆေ ဟဲ့ မှာန် ပီ တဝ်း ဘေ တီ၊ န့ ယီ မုး ဘော ဂေ ဒူအီ အာမျုဝ် ဘေ၊ ဘော ဂေ ဆုတ့် ကာနမ် လေး ခဲင် ဒုဝ် ဘူင့် အီ ဟဝ်။ ဘော ဂေ ဒိုဝ်း ပွုန် ဇိုဝ် တီ။ န့ ယီ မုး ဂေ ဒူအီ အာမျုဝ် ဘေ တီ၊ ဂေ ဒီ ဝီ ဆုင်ဖျာတ် လွင် ဂြုဝ်း ဘေ၊ တဝ်း န့ တူ မှာန်။ 20 ဆေ န့ ယီ မုး နဝ်း ဖွိုမ် ဇဝ်ဖြာ အီ တဲး အုဝ် ဆုတ့် လေး ကာနမ် ခဲင် ဒုဝ် ဘူင့် အီ၊ န့ ဟဲ့ လိုဝ်း ဆီချာ လွင် မိူင် ပီ အိုပ် ဇဝ်ဖြာ။ အန် ဟဲ့ ဟွတ့် တး ဒူင် ကွယ် ဘေ၊ တဲး အန် ဇဝ် အိုပ် တူတ့် ဒွန် မျုဝ် ဒဲင် ကာဒါယ် နီ။
21 ဆေ န့ မိုဝ်း ဒါ အီ မိုဝ်း ပ့လူမ် မိုဝ်း ဟဲန့်၊ စှိုပ် ခြိုင် ကာဂုဝ်း၊ ဘ်ု ကာင် အန်၊ န့ တူ မိုဝ်း အာဆေ အီ ယ လိုပ် ပြာ ကြုဝ်ကြာမ် အန်။ 22 ဆေ န့ ယီ မိုဝ်း ဒူအီ အီ မိုဝ်း ပ့လူမ် မိုဝ်း ဟဲန့် လွှိုမ် ဒါ အီ တွိုန်၊ ဆေ အန် တး ကာဂုဝ်း ပဲ၊ အန် ဒီ ပွိုန် ဒီ ဒိုဝ်း တူတ့် ခြိုင် ကာဂုဝ်း ဒူင် နဝ်း တာင် ဒူအီ တွိုန်။ ဟဲ့ ဟွတ့်၊ အန် ဒီ ပွိုန် ဒီ ဒိုဝ်း တူတ့် ကြုဝ် ဒူအီ တီ၊ ဝီ ကာဆာင် ဒွါ ဘော ဒီ ဂိုက် အန်။
23 အာဆေ တူ ဖြူမ် အုဝ်၊ အန် ဘဲန် ရန်ဆူ အုဝ်။ အာဆေ တူ ဒဲ့ ကာဇု ဒူအီ ရိုမ် ဒူပ် အုဝ်၊ န့ ပီ အန် ဘူင် တဲး ဂေ ကာယဝ်း ဒီ အုဝ်။
24 ဆေ န့ မုး ကာနမ် အီ ဟဲ့ လေး ခဲင် ဒုဝ် ဘူင့် ဒူအီ၊ အန် ဝီ ဟာဝ် ဝိန် ဒီ လဲ ခဲင် ဒူင် ကာဟဝ်း၊ ဟြေတ့် ဒူင် ဒီ ပွိုန် ကွယ် အန်၊ ယီ တူ ယိုဝ် မာဆေ။ ဒေါ အန် တီ အန် ဒီ တဝ်း ခဲင် နဝ်း အန်၊ ‘အုဝ် ဒီ ဝီ ဝေန့် လိုပ် ဒူင် ကွယ် ဘြိမ် အုဝ် တွိုန်။’ 25 ဒေါ တး ဇမ် အန် ဒူင် ကွယ် ဘြိမ် အန်၊ န့ ပီ ဒူအီ တွိုန် ဟဲ့ ဟွတ့် ဘိး ယး ကာင် အန်၊ ဟဲ့ ဟွတ့် ဘူင် တဲး န့ ကာလဲပ် ဆီချာ တူတ့် ဒွန် မျုဝ်။ 26 ပန် တီ အန် မိူဝ် ဟာဝ် ဒဲ့ ကာနမ် ပေါ ဘူ ဒုဝ်၊ အီ ဟာယ် လွှိုမ် အန်၊ တဲး ဂေ ဘောကာဂ့လျီတ် ကွယ် ဒူင် ဘြိမ် အန်။ ဒူအီ ဝီ ပီ လိုပ် ကွယ် ဂေ တီ၊ အန် ဘော ဇမ် ဒုက် တာင် လွှိုမ် ခါ အာတ့်။”
27 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ န့ မိုဝ်း အီဘိုန့် အူ ဝီ ကွယ် ကာတဲ ဒူအီ ကိူန်။ အန် ဘော စုး ဒီ ကာလာင် ဂြုဝ်း တာင် ဒီ ဇဝ် ယေဆူ။ အန် တဝ်း၊ “အိုယ်၊ အီဘိုန့် အီ မုး မာ ဂွိုတ် မဲ၊ အီ တဲး မဲ ညွှတ် အိုမ် ပူ အန်၊ အန် ဟဲ့ မိုဝ်း နဝ်း ဒါခိုယ် အာခ်ု။”
28 ဇဝ် ယေဆူ ဝီ တဝ်း ဒီ အန်၊ “ဂေ ဒူအီ အီ ထူမ် ဂြုဝ်း ဇဝ်ဖြာ ဘော ဘူင် ဒူပ် ပီ စ်ု အန် ဇဝ် ဂေ ဘူင်၊ န့ မုး ဂေ ဒူအီ ဇိုဝ် တီ၊ ဂေ ဒီ ပွိုန် နဝ်း ဒါခိုယ်။”
လွင် အာယုဝ်နာ တွိုန်
29 ပန် တီ ဒူအီ ကိူန် ကာဆဝ် ဟဲ့ တး ကာဇု။ ဇဝ် ယေဆူ တဝ်း ဒီ ဂေ၊ “ဒူအီ ဇာတ် နီ ဟဲ့ မိူက်။ ဂေ ဆီ ယိုဝ် နာ မွှိုမ် အာမ် ကာဆဝ် ပီ ဘျ ဇဝ်ဖြာ ဒီ ဂေ။ ဇဝ်ဖြာ ယီ ဟဲ့ တဲး ဂေ ယိုဝ် နာ မွှိုမ် အာမ် ကာဆဝ် ပီ ဘူင် အန် ဒီ အာယုဝ်နာ တွိုန်။ ဒဲင် တီ အန် တူ တဲး ဂေ ယိုဝ် မာဆေ။ 30 အာယုဝ်နာ မုး ဒူအီ အီ ဘျာန် ဂြုဝ်း ဇဝ်ဖြာ။ ပဲ့ ဟဲ့ ကာလာင် အန် ဟဲ့ ဘဲန် နာ မွှိုမ် အာမ် ကာဆဝ် ပီ ဘျ ဇဝ်ဖြာ ဒီ ဂေ ဒူအီ အီ ကွယ် ခဲင် မိူင် နီနီဝေ တွိုန်။ ပါယ် တီ၊ ဘော အုဝ် အီ ဟဲ့ ဘဲန် ဂွန် ဒူအီ၊ န့ ပီ အုဝ် ဟဲ့ ဘဲန် အီ မွှိုမ် အာမ် ကာဆဝ် ဒီ ဒူအီ ဇာတ် နီ။ 31 ဒေါ မွိုန်၊ ဘော နာင် ဟောခမ် အီ ကွယ် မိူင် တေတ့်၊ အန် ဟဲ့ ဒွိုမ် တး ခဲင် မိူင် တူင့် ကာဆဝ်၊ ဇမ် မိူင် ပီ အိုပ် ခုန်ဒီခမ် အာဆာလုဝ်မုဝ် တွိုန်၊ တဲး အန် ပွိုန် ဒီ ယိုဝ် ဒီ ထူမ် အာငျာန် အာဆာလုဝ်မုဝ်။ အုဝ် ယီ တဝ်း ဒီ ဘေ ဒူအီ အီ ကွယ် ဇာတ် နီ၊ ဘေ ဟဲ့ ယိုဝ် ဒူအီ အီ မိုဝ်း အာဖုင် ဒင်ခုဝ် တာင် လွှိုမ် ခုန်ဒီခမ် အာဆာလုဝ်မုဝ် တွိုန်။ ခုဝ် အန်၊ ဒေါ ဇမ် ဆီငဲ ဒီ ဆုင်ဖျာတ် ဇဝ်ဖြာ ဒါရာ၊ နာင် ဟောခမ် တွိုန် ဒီ ယိတ့် ဖျာက် ဒူအီ ဇာတ် နီ။ 32 ပန် ဒီ ဆုင်ဖျာတ် ဇဝ်ဖြာ ဒါရာ ဒီ အီ၊ ဘော ဂေ ဒူအီ အီ ဒွိုမ် ကွယ် မိူင် နီနီဝေ တီ၊ ဂေ ဒီ ယိတ့် ဖျာက် ဘေ။ ဂေ ဟဲ့ ဒွိုမ် ဝဲန် နဝ်း ဘြိမ် ဂေ၊ ဒိုဝ်း နဝ်း ကာမာယ် ဒေါ ကာလာင် အာယုဝ်နာ လွင် ဒါရာ ဇဝ်ဖြာ ဒီ ဂေ။ ဘေ အီ ကွယ် ဒီ နီ၊ ဘေ ယီ ဟဲ့ ယိုဝ် ဒူအီ အီ တာင် လွှိုမ် အာယုဝ်နာ တီ။ ဘေ ယီ တူ ထူမ် ဂြုဝ်း အန်။”
လွင် ဘ့လာင် ခဲင် ဒုဝ် အီ
33 ဇဝ် ယေဆူ ဝီ တဝ်း၊ “အာဝ် မိုဝ်း အာဆေ အီ ပီဒဝ့် ငဝ် အွမ်၊ ဝီ ဘ့လေး အုန် နာ ခြိုမ်။ အန် မိူဝ် တူ ပီဒဝ့် ငဝ် အွမ် ဝီ ဆီဘ့လိုက် အုန် ခြိုမ် ဆီလယ့်။ ဒွန် အီ အီ ပီဒဝ့် ငဝ် အွမ်၊ အန် နပ် ဒီ အုန် တဲး အန် ကွယ် ဒဲင် ဒင် အန်၊ တဲး န့ ဘ့လာင် ဒီ ဒူအီ အီ တး လိုပ် ခဲင် ကာင် တွိုန်။ 34 ငါယ် ဘေ ပီ ငဝ် အွမ် တွိုန်၊ အီ တဲး န့ ဘ့လာင် တူတ့် ဒွန် ပ့လုဝ့်။ ဆေ ငါယ် ဘေ ဟဲ့ လိုဝ်း ဆီချာ၊ န့ ပီ ဒုဝ် ဘေ ဘော ဒုဝ် ဟဲ့ ဘ့လာင်။ ဆေ ငါယ် ဘေ ဟဲ့ လိုဝ်၊ န့ ပီ ဒုဝ် ဘေ ဘော ဒုဝ် ဟဲ့ အပ် ဝွင့်။ 35 ခုဝ်၊ ဘေ လုဝ် ဆာဒိက်၊ ကွဲ့ တဲး ဘ့လာင် အီ ကွယ် ခဲင် ဒုဝ် ဘေ တီ ဝီ ဘဲန် အပ် ဝွင့်။ 36 ဆေ ဘ့လာင် ကွယ် နုဝ့် ခဲင် ဒုဝ် ဘူင့် ဘေ၊ ဆေ အာဝ် ဟူ မိုဝ်း မာဆေ အီ အပ် ဝွင့် ခဲင် ဒုဝ် ဘူင့် ဘေ၊ န့ ဒီ ဘော ဘ့လာင် တူတ့်၊ တဲး န့ ပီ ဘ့လာင် ငဝ် အွမ် ဟဲ့ လိုဝ်း ဒွန် ပ့လုဝ့်၊ တဲး န့ ကော လိုဝ်း တူတ့် ဒွန် မျုဝ်။” ဇဝ် ယေဆူ ဟဲ့ မာနုဝ် ဂေ ဒူအီ ကိူန် ပါယ် တီ။
လွင် ဘဲန် ဝီ ဘဲန် ဝီ အီ ဒီ ဇမ် ဒုက် တာင်
37 ဟဲ့ ဟွတ့် ပန် တီ န့ မိုဝ်း ဒါ အူ ဝီ ခဲင် ဖိုင် ဖာရီဆဲ၊ အန် ဘာင် ဇဝ် ယေဆူ ဟာဝ် ဟူမ် ဘူမ် ခဲင် ကာင် အန်။ အန် ဇဝ် ဘော ဟာဝ် ရိုမ် ဒူပ် အန်။ ဇဝ် ယေဆူ ဟဲ့ လိုပ် ခဲင် ကာင် တွိုန်၊ အန် တုတ့် ဒီ မာတိန့်၊ တဝ်း ဒီ ဟူမ်။ 38 ဒါ အီ တွိုန်၊ ဒေါ ယိုဝ် အန်၊ ဇဝ် ယေဆူ တူ ဘာယ် ဒဲ အန် အာတ့် ဟူမ် အန် ဘူမ်၊ တူ ဘူင် ဒူပ် ဟိတ် ဂေ ဒူအီ အာယူဒါ၊ အန် ဘော အာမ် လွင် အန် တီ။
39 ဇဝ် ယေဆူ ယီ တဝ်း ဒီ အန်၊ “ဘေ ဒူအီ ဖိုင် ဖာရီဆဲ၊ ဘေ ပီ ဒူအီ အီ ဒိုဝ်း ကွက့် ဂေ ဆီလယ့်၊ ဘာယ် မီ နာ ရေတ့်။ နာ ခဲင် န့ ယီ ဆီ ကာဒါတ့်။ ခဲင် နဝ်း ဘေ ဘော ပါယ် တီ။ န့ မိုဝ်း လောဖ ဘော နာ မိူက် နာ ဟာယ် ကော နုဝ့် နာ ခဲင်။ 40 ဘေ ဟဲ့ ရိုဝ်။ မှဝ် န့ ပါယ် ပီ ထာင် ဘေ၊ န့ ပွိုန် ဘူင် ပါယ် တီ။း ဇဝ်ဖြာ အီ ဟဲ့ ဘူင် တဲး န့ မိုဝ်း နာ ရေတ့် ဒွန် မျုဝ်၊ အန် မိူဝ် ဟဲ့ ဘူင် တဲး န့ မိုဝ်း ဘော နာ ခဲင် ဒွန် မျုဝ်။ 41 တဲး ဘေ ယီ ဝဲန် လောဖ အီ ကွယ် ခဲင် နဝ်း ဘေ။ ဟဲ့ ဟွတ့်၊ တဲး ဘေ ဒွါ ဒီ ဒူအီ ဂိန်၊ ဒူအီ အီ ဇမ် ဒုက်။ ဆေ ဘေ ဘူင် ပါယ် တီ အီ ဆီ ကွယ် ခဲင် နဝ်း ဘေ ဒွန် မျုဝ်၊ န့ ဒီ ဆီငါ၊ န့ ဒီ ဘွတ် ဒီ ဘေ။
42 အိုယ် ဘေ ဖိုင် ဖာရီဆဲ၊ ဘေ ဒီ ဇမ် ဒုက် တာင်။ ဘော ဒဝ် လှိုင် ဂါယ် ဒဝ် ဆီမုင် ဘော ဒဝ် ဘဲန် မျုဝ် ဘဲန် မျုဝ် ပီ ဟပ် ဘေ ခဲင် ဟာပ်၊ ဘေ နပ် ဒီ ဒွါ ဂိုဝ် ဘုန် အူ ဘုန်၊ လှူ ဒီ ဇဝ်ဖြာ။ ဘေ ယီ တူ ဒူပ် နာ မုး နာ မှာန်။ ဇဝ်ဖြာ မိူဝ်၊ ဘေ တူ ရွက့်။ ဘေ ယီ လုဝ် ဘူင် ဘော အာ မျုဝ်။ ဘေ လုဝ် ရွက့် ဇဝ်ဖြာ၊ ဘော ပီ ဒီ လှူ ဒွန် မျုဝ် တွိုန်၊ ဘေ တူ လုဝ် ပိဝ်။
43 ဘေ ဖိုင် ဖာရီဆဲ၊ ဘေ ဒီ ဇမ် ဒုက် တာင် ကူပ် ပီခိုက် ဘေ ဒီ ဘေ။ ဆေ ဘေ တုတ့် ခဲင် ဇူင် ဘေ၊ ဘေ ဘော အိုင် ဒီ တုတ့် ဒူင် စာ၊ တဲး ဒွန် အီ ယိုဝ် ဘေ။ ဆေ ဘေ ဘော ကာတုန့် ဒူအီ ဟဝ် ခဲင် ကာလး၊ ဘေ ဆီ တဲး ဂေ ဒူအီ ကြိုပ် ဘေ။
44 ဘေ ဒီ ဇမ် ဒုက် တာင်။ ဘေ ပီ အွုန် ဒူအီ ယမ်။ ဒေါ တး ဟာဝ် ဒူအီ နာ ဒဲင်၊ ဂေ ယီ တူ နပ် ဟဲ့ မုး အွုန် ဒူအီ ယမ်။”
45 န့ ယီ မိုဝ်း ဒါ ဆာရာ အီ မာနုဝ် ဒါရာ ဇဝ်ဖြာ အူ ဝီ၊ အန် တဝ်း ဒီ ဇဝ် ယေဆူ၊ “အိုယ် ဒါ ဆာရာ၊ ဆေ မဲ တဝ်း ပါယ် တီ၊ န့ ပီ၊ မဲ ဆီ တဲး အာဂျာင် ယေ လိုဝ်။”
46 ဇဝ် ယေဆူ ဝီ တဝ်း၊ “ဘော ဘေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဘေ ဒီ ဇမ် ဒုက် တာင်။ န့ ပီ ဘေ ဒိုဝ်း ကြုဝ် အီ စန် ကာဆဝ် ဒါင် ဒဲင် ဒူအီ ဟဝ်။ အီ မုး ဘေ၊ ကာနူ ဘေ အူ ဘူင့် မိူဝ်၊ ဘေ တူ ခမ် ဒီ စွယ် အီ စုဝ့်။
47 ဘေ ဒီ ဇမ် ဒုက် တာင် အာခါခ်ု။ ခုဝ်၊ ဘေ ဟဲ့ ဘူင် အွုန် ဒူအီ ယမ် အီ စှိတ် ကာဆဝ်၊ တဲး ဘေ အုန် ဒူအီ အီ ဘျာန် ဂြုဝ်း ဇဝ်ဖြာ နာ ခဲင်။ န့ ယီ မုး ဂုန့် ဒင် ဘေ၊ အီ ဟဲ့ ငဝ်း ယမ် ဒူအီ အီ ဘျာန် ဂြုဝ်း ဇဝ်ဖြာ ဂေ တီ။ 48 အာတီ ယီ တဲး န့ လိုဝ်း ဆီချာ၊ ဘော ဘေ ဟဲ့ လာယ် ဖြူမ် ရိုမ် ဒူပ် ပဲ့ ဟဲ့ ဘူင် ဂေ ဒါ ဒါ ဘေ တီ။ ဂေ ဂုန့် ဒင် ဘေ တွိုန်၊ ဂေ ဟဲ့ ငဝ်း ယမ် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဟဲ့ ဟွတ့်၊ ဘေ ဟဲ့ ဝီ ဘူင် အွုန် ဂေ၊ တဲး န့ ကော စှိတ်။ 49 ဇဝ်ဖြာ မိူဝ် ဟဲ့ ဒွိုမ် ကာလာင် ဂြုဝ်း လွင် အန် တီ။ န့ မုး အာငျာန် အန် ဇဝ် အီ ဟဲ့ ဒွိုမ် တဝ်း၊ ‘အုဝ် ဒီ တိုယ် ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ဒါ ဆာရာ ပီ ရဝ်း အုဝ်၊ တဲး ဂေ ဟာဝ် ဇမ် ဒူင် ကွယ် ဂေ ဒူအီ တွိုန်။ ဂေ ယီ ဒီ ငဝ်း ယမ် ဒူအီ ပီ တိုယ် အုဝ် မင် အီ။ ဘော မင် အီ၊ ဂေ ဒီ ဘူင် နာ စီစိဝ် ဒီ ဂေ။’ 50 အုဝ် ဒီ ဘူင် ပါယ် တီ။ ခုဝ်၊ ပဲ့ ဟဲ့ ဘူင် ဒူအီ၊ အီ ငဝ်း ယမ် ဂေ ဒူအီ အီ ဘျာန် ဂြုဝ်း ဇဝ်ဖြာ တွိုန်၊ အုဝ် ဒီ တဲး မှာပ် ဂေ တီ ဘဲန် မှာပ် ဂေ ဒူအီ ဇာတ် နီ။ အူ ဆိန့် ဒေါ ဂုဝ် အန်၊ ဒေါ ဘူင် ဇဝ်ဖြာ ကာဒါယ်၊ ကော ဇမ် အာတိုဝ် နီ၊ ဂေ ဒီ လုဝ် ခမ် မှာပ် ဇိုဝ် တီ တူတ့် ဒွန် မျုဝ်။ 51 အုဝ် တဝ်း ဒီ ဘေ၊ အူ ဆိန့် ဒေါ ငဝ်း ဂေ အာဆာက် အာဘဲ တွိုန်၊ ကော ဇမ် ဒေါ ဝီ ငဝ်း ဂေ အာဆာခါရာ တွိုန်၊ အီ ယမ် ဒေါ ကွယ် အန် ဒီ ကာတဲ ကာစှူင့် လှူ ဂါယ် ဟုဝ် ဇဝ်ဖြာ၊ ဇဝ်ဖြာ ဒီ တဲး ဂေ ဒူအီ ဇာတ် နီ ဝီ ခမ် တူတ့် မှာပ် ဇိုဝ် တီ။
52 ဘေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဘေ ဒီ ဇမ် ဒုက် တာင်။ န့ ပီ ဘေ ဟဲ့ ဒိုဝ်း ဝဲန် လခတ်ဆဝ် အီ ပွိုန် ဝိုဝ်း မာလုဝ်း၊ တဲး အီ ဟဝ် လိုပ် ဟာဝ် ဒူပ် န့တေန့် အီ တဲး ဒူအီ နပ် ဒွန် မျုဝ်။ န့ ပီ၊ ကူပ် တူ လိုပ် ဘေ န့တေန့် တီ၊ ဘေ ဝီ ခြဲ ဘော အီ ဟဝ် အီ ဟဲ့ ဆီ လိုပ်။” ပါယ် တီ ဇဝ် ယေဆူ ကာလာင် ဂြုဝ်း ဒီ ဂေ အီ ကွယ် ခဲင် ကာင် ဒူအီ ဖိုင် ဖာရီဆဲ တွိုန်။