ခါန် 10
လွင် ဇဝ် ယေဆူ စ်ု ဒူအီ ဘူ ဂိုဝ် ဝီ ဘူင် ဂါန် အန်
1 ဝါယ် အန် တီ ဇဝ် ယေဆူ ဘော ရဝ်း ဒူအီ ဘူ ဂိုဝ် ဝီ၊a တဲး ဂေ ဟာဝ် ဘဲန် ဂူ ဘဲန် ဂူ၊ ယဲတ့် ဒီ အာတ့် အန်၊ ကာလာင် လွင် ဇဝ်ဖြာ။ အန် စ်ု ဂေ ဟာဝ် ခဲင် ရဝ် ခဲင် မိူင်၊ ဒူင် ဒီ ဝီ ဒူပ် အန် ဒီ ပန် ဂေ ဒွန် နာ ဒွန် ပ့လုဝ့်။ 2 အန် ဘော တဝ်း ဒီ ဂေ လွင် ဂါန် ပီ ဒီ ဘူင် ဂေ၊ “ဒူအီ အီ ဆီ ထူမ် လွင် ဇဝ်ဖြာ ဂေ ကိူန်။ ဂေ ပီ မာန် ငှုဝ် အီ ဟဲ့ ဆိန်၊ အီ ဟဲ့ လုဝ် ဆုဝ့်။ ဂေ ဒူအီ အီ ဆုဝ့် ငှုဝ် တီ ယီ ပြေတ့်။ ခုဝ်၊ တဲး ဘေ မှာန့် ဒီ ဇဝ်ဖြာ အီ မုး ဒါ ကာညာ မာန် ငှုဝ် တီ၊ တဲး အန် တိုယ် ဒူအီ အီ ဘူင် ဂါန် ဇဝ်ဖြာ၊ တဲး ဂေ ပီ ဒူအီ ဆုဝ့် ငှုဝ်။ 3 ဒူင် ဒီ ဟာဝ် ဘေ၊ န့ ပါယ် နီ။ ဘေ ပီ ဂွန် မာဘူ အီ ဟာဝ် ဒူင် ကွယ် မာဆုဝ် ပြဲ အီ ဆီ ကဝ့် ယမ် မာဘူ။ 4 ကွဲ့ တဲး ဘေ ငဲ့ ဟူ၊ ကွဲ့ တဲး ဘေ ဂူင့် ရွိုန် ဂေ ခြိဝ်။ ကွဲ့ တဲး ဘေ ဂူင့် ခူဒိန့် ကာပ့လု၊ ဟာဝ် ဒူပ် န့တေန့်။ ဒေါ ဟာဝ် ဘေ ဒူပ် န့တေန့်၊ ဆေ ဘေ ဘော ကာတုန့် ဒူအီ ဟဝ်၊ ကွဲ့ တဲး ဘေ ကာမွုန် ဒီ အန်။
5 ဆေ ဘေ ဒီ ဘော လိုပ် ခဲင် ကာင် အီ ဟဝ်၊ အာတ့် ကာလာင် ဘေ ဘဲန် မျုဝ် ဘဲန် မျုဝ်၊ ဘေ လုဝ် မွင့်ကာရာ တဲး ဒီ ဂေ တဝ်း၊ ‘တဲး ဇဝ်ဖြာ ဒွါ နဝ်း ဂျီတ် ဒီ ဘေ ဒွန် အီ အီ ကွယ် ခဲင် ကာင် နီ။’ 6 ဆေ ဒူအီ အီ ကွယ် ခဲင် ကာင် တီ ဘော ရပ် မွင့်ကာရာ ပီ ဒွါ ဘေ၊ တဲး န့ ဘော ကွယ် ရိုမ် ဒူပ် ဂေ။ ဆေ ဂေ ယီ တူ ရပ် မွင့်ကာရာ ပီ ဒွါ ဘေ၊ ဘေ လုဝ် ဝီ ဒိုဝ်း ဝိဝ် မွင့်ကာရာ တီ။ 7 ဘေ လုဝ် ကွယ် ခဲင် ကာင် ဂေ ဒူအီ အီ ရပ် ဘေ တီ။ ကွဲ့ တဲး ဘေ ဟာဝ် ကွယ် ပေါ အူ ကာင်။ ဘေ ဘော လုဝ် ဟူမ် ပီ ဒွါ ဂေ ဒီ ဘေ ခဲင် ကာင် တီ။ ခုဝ်၊ အာဆေ ဘူင် ဂါန်၊ အန် ဟဲ့ ကာအာပ် ပွိုန် ရုး အန်။
8 ဆေ ဘေ ဘော လိုပ် ခဲင် မိူင် အူ မိူင်၊ ဆေ ဂေ ဒူအီ ဘော ရွုး ဘေ၊ တဲး ဘေ ဟူမ် ပီ ဒွါ ဂေ ဒီ ဘေ။ 9 ခဲင် မိူင် တီ၊ ဘေ လုဝ် ဘူင် တဲး ဒူအီ ဆဝ် ဝီ ကဲန်။ ဘေ ဘော လုဝ် ကာလာင် ဒီ ဒူအီ ခဲင် မိူင် တီ၊ ‘ဇဝ်ဖြာ ဟဲ့ ကာတတ် ဒီ တး အိုပ် ကာဒါယ်။’ 10 ဆေ ဘေ ဘော လိုပ် ခဲင် မိူင် အူ မိူင်၊ ဆေ ဂေ အီ ကွယ် ခဲင် မိူင် တီ တူ ရွုး ဘေ၊ ဘေ လုဝ် လေး နာ ရေတ့် ကာင်၊ ဟာဝ် ဒီ န့တေန့် တဝ်း၊ 11 ‘ကာပုး ခဲင် မိူင် ဘေ အီ ဒိုက် ဒီ ပ့လဝ် ယေ၊ ယေ ဒီ ဒီယိုဝ်း အုန် တဲး န့ ဘျ ခဲ့ တူ မွှိုမ် ဘေ။ ဘေ ယီ လုဝ် လှုဝ်း၊ လုဝ် နပ် ဆီချာ၊ ဇဝ်ဖြာ ဟဲ့ ကာတတ် ဒီ တး အိုပ် ကာဒါယ်။’
12 အုဝ် တဝ်း ဒီ ဘေ၊ ဆေ ဇဝ်ဖြာ ဒီ ဆုင်ဖျာတ် ဒါရာ ဒီ ဒူအီ ဘောကာဂ့လျီတ်၊ ဂေ ဒူအီ အီ ကွယ် ခဲင် မိူင် ဆုဝ်ဒူမ်၊ ဂေ ဒီ လုဝ် ခမ် မှာပ် ကိူန်။ ဂေ ယီ တူ လုဝ် ခမ် ကိူန် ခဲ့ ပီ လုဝ် ခမ် ဂေ ဒူအီ အီ ကွယ် ခဲင် မိူင် တီ။” ပါယ် တီ ဇဝ် ယေဆူ ကာလာင် ဒီ ဂေ ဒူအီ ဘူ ဂိုဝ် ဝီ။
13 ဇဝ် ယေဆူ ဝီ ကာလာင် လွင် ဒူအီ အီ တူ ညှိုမ် အန်။ အန် တဝ်း၊ “ဘေ ဒူအီ အီ ကွယ် ခဲင် မိူင် ခုဝ်ရာဆိန် ဘော မိူင် ဘေတ်ဆီဒါ၊ ဘေ ဒီ ဇမ် ဒုက် တာင်။ အီ မွှိုမ် အာမ် ကာဆဝ် ပဲ့ ဟဲ့ ဘူင် အုဝ် ခဲင် မိူင် ဘေ၊ အုဝ် တူ မိုဝ်း ဒီ ဘူင် ခဲင် မိူင် ထူရုဝ် ဂါယ် မိူင် ဆီဒူန် တွိုန်။ ဆေ အုဝ် ယီ ဘူင် ဇိုဝ် တီ ခဲင် မိူင် ထူရုဝ် ဂါယ် မိူင် ဆီဒူန် တီ၊ ဂေ ဒူအီ အီ ကွယ် ခဲင် မိူင် တီ၊ ဂေ ဒီ ဘော စှိုပ် ခြိုင် စာန် ဘော ကွယ် ခဲင် ဘြဝ် ငဝ် အူ ဇေန့်၊ တဲး န့ ဘျ၊ ဂေ ဟဲ့ ဝဲန် နဝ်း ဘြိမ်၊ ဝီ ဒိုဝ်း နဝ်း ကာမာယ်။ 14 ဆေ ဟီ ဇမ် ဆီငဲ ဒီ ဆုင်ဖျာတ် ဇဝ်ဖြာ အာမူ ဒူအီ ဒွန် အီ၊ ဂေ ဒူအီ ခဲင် မိူင် ထူရုဝ် ဂါယ် မိူင် ဆီဒူန် တွိုန်၊ ဂေ တူ လုဝ် ခမ် မှာပ် ခဲ့ ပီ လုဝ် ခမ် ဘေ။ 15 ဘေ ဒူအီ အီ ကွယ် ခဲင် မိူင် ကာပေနာရိုမ်၊ ဆေ ဘေ ထာင် ဘေ ဒီ ပွိုန် ဒီ ဟုဝ့် ဂါင်ဟြာဝ်၊ န့ တူ မှာန်။ ဘေ ဒီ လုဝ် လူင် ခဲင် မိူင် မာရာန။”
16 ဇဝ် ယေဆူ ဝီ တဝ်း ဒီ ဂေ ဒီဘဲ အန်၊ “အာဆေ ထူမ် ဂြုဝ်း ဘေ၊ အန် ဒီ ဘော ထူမ် ဂြုဝ်း အုဝ်။ အာဆေ ယီ တူ ညှိုမ် ဘေ၊ အန် ဒီ ဘော တူ ညှိုမ် အုဝ်။ အာဆေ ယီ တူ ညှိုမ် အုဝ်၊ အန် ဒီ ဘော တူ ညှိုမ် ဘော အန် ဇဝ် အီ တိုယ် အုဝ် တး ဇမ် ဒီ နီ။”
17 ဝါယ် အန် တီ ဂေ ဒူအီ ဘူ ဂိုဝ် ဝီ ပီ ရဝ်း ဇဝ် ယေဆူ တွိုန်၊ ဂေ ဝီ တး ဇမ် ဒူင် ကွယ် ဇဝ် ယေဆူ။ နဝ်း ဂေ ဘော ဒါခိုယ် ကာဆဝ်။ ဂေ တဝ်း၊ “အိုယ် မဲ ဇဝ်၊ ဒေါ ဂါဝ် ယေ ပွုန် မဲ၊ စ်ု ကာနမ် လေး ခဲင် ဒုဝ် ဘူင့် အီ၊ ဂေ ဟဲ့ ထူမ် ဒူပ် ပီ တဝ်း ယေ။”
18 ဇဝ် ယေဆူ ဝီ တဝ်း ဒီ ဂေ၊ “အုဝ် ဟဲ့ ယိုဝ် ဘုဝ် ကာနမ် စုဝ်း လူင် ခဲင် ဂါင်ဟြာဝ် ပီ ပ့လ မ့ပ့လေတ့်။ 19 တဲး ဘေ ထူမ်။ အုဝ် ဟဲ့ ဒွါ ပွုန် ဒီ ဘေ၊ တဲး ဘေ ပွိုန် ဒီ ညဲတ့် မာဟန့် ဂေ မာ မဲင်ငဝ်၊ တဲး ဘေ ဘော မိုဝ်း ပွုန် ဒီ အိုပ် ကာနမ် အီ ဆီ အိုပ် ဘေ ဒွန် မျုဝ်။ န့ ယီ တူ မိုဝ်း မာဆေ အီ ပဲ ဒီ ဘူင် တဲး န့ ဘဲန် ဒုက် ဒီ ဘေ။ 20 ကွဲ့ တဲး ဘေ ခူယ် ကူပ် ထူမ် ကာနမ် ဂြုဝ်း ဘေ။ တဲး ဘေ ယီ မိုဝ်း နဝ်း ဒါခိုယ် ကူပ် ဟဲ့ ဒဲမ် အုန် ဇဝ်ဖြာ စိူဝ် ဘေ ခဲင် ဇာရာင် ဒူအီ ဒီ ပွိုန် လိုပ် ခဲင် မိူင် ဂါင်ဟြာဝ်။”
21 ဒေါ အန် တီ နဝ်း ဖွိုမ် ဇဝ်ဖြာ တဲး ဇဝ် ယေဆူ ဘဲန် နဝ်း ဒါခိုယ် ကာဆဝ်။ အန် ဘော တဝ်း၊ “အိုယ် မဲ ဂုန့် အုဝ်၊ မဲ မုး ဒါ ကာညာ အီ အိုပ် ဘော ဂါင်ဟြာဝ် ဘော ကာဒါယ်။ အုဝ် အိူပ် မဲ ဇဝ်။ လွင် ပီ မာနုဝ် အုဝ် ဇိုဝ် တီ၊ မဲ တူ တဲး န့ လိုဝ်း ဒီ ဂေ ဒါ တာင် ဘော ဒီ ဂေ ဒူအီ မိုဝ်း အာငျာန်။ န့ ယီ မုး ဂေ ဒူအီ အီ ပီ ဂွန် ဒီတဲတ်၊ ဂေ နပ် ဆီချာ လွင် အန် တီ ကူပ် ဟဲ့ ဘျ မဲ၊ တဲး န့ လိုဝ်း ဒီ နဝ်း ဂေ။ မဲ ဂုန့် အုဝ်၊ မဲ ဟဲ့ အိုင် ဒီ ဘူင် ပါယ် တီ။ ခုဝ်၊ အုဝ် အိူပ် မဲ။” ဟဲ့ ဟွတ့် အန် ဝီ တဝ်း ဒီ ဂေ အီ ကွယ် ဒူပ် အန်၊
22 “ဂုန့် အုဝ် ဟဲ့ အာပ် ဒွါ တူတ့် ဒွန် မျုဝ် ဒီ အုဝ်၊ တဲး အုဝ် နပ် တူတ့်။ န့ မိူဝ် တူ မိုဝ်း အာဆေ အီ နပ် ဂွန် ဇဝ်ဖြာ။ န့ မုး မီ ဂုန့် အုဝ် အီ နပ် ဂွန် အန်။ န့ မိူဝ် တူ မိုဝ်း အာဆေ အီ နပ် ဇဝ်ဖြာ အီ မုး ဂုန့် အုဝ်။ န့ မုး မီ ဂွန် အန် အီ နပ် ဂုန့် အန်။ ဘော ဂေ ဒူအီ အီ ပွိုန် ယိုဝ် ဂြုဝ်း ပီ ကာလာင် ဂွန် ဇဝ်ဖြာ လွင် ဂုန့် အန်၊ ဘော ဂေ ဒီ နပ် ဇဝ်ဖြာ၊ အီ မုး ဂုန့် အုဝ်။”
23 ဟဲ့ ဟွတ့် ပန် တီ ဇဝ် ယေဆူ ယွတ် ဂေ ဒီဘဲ အန်။ အန် ဘော တဝ်း ဒီ ဂေ ဒေါ တူ မိုဝ်း အီ ဟဝ် ထူမ်၊ “အာဆေ ဟဲ့ ပွိုန် ယိုဝ် ဒွန် မျုဝ် ပဲ့ ဟဲ့ ယိုဝ် ဘေ၊ အန် ဟဲ့ ဘဲန် နဝ်း ဒါခိုယ်။ 24 အုဝ် တဝ်း ဒီ ဘေ၊ န့ ဒွိုမ် မိုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ခုန်ဒီခမ် ဘဲန် ကာဒင် ဘဲန် ကာဒင်၊ ဂေ ဟဲ့ ဆီ ယိုဝ် ပီ ယိုဝ် ဘေ ဒွန် မျုဝ်။ ဂေ ယီ တူ ပွိုန် ဒီ ယိုဝ်။ ဂေ ဘော ဆီ ထူမ် ပဲ့ ဟဲ့ ပွိုန် ဘေ ဒီ ထူမ်၊ ဂေ ယီ တူ ပွိုန် ဒီ ထူမ်။”
လွင် ဒူအီ အာမျုဝ် ဆာမာရီ
25 ဒေါ အန် တီ န့ မိုဝ်း ဒူအီ အူ ဝီ၊ အန် မာနုဝ် ဒါရာ ဇဝ်ဖြာ။ အန် တး ထေဝ် ဇဝ် ယေဆူ။ အန် ဘော တဝ်း၊ “အိုယ် မဲ ဒါ ဆာရာ၊ မာဆေ ပီ လုဝ် အုဝ် ဘူင်၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။း”
26 အန် ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ အန်၊ “မာဆေ ပီ မာနုဝ် ဘပ် ဒါရာ ဇဝ်ဖြာ ဒီ မဲ။း ဆေ မဲ တိး ဘပ် ဇဝ်ဖြာ၊ န့ ကာလှုး ပါယ် မှဝ် ဒီ မဲ။း”
27 ဒူအီ တွိုန် ဝီ တဝ်း၊ “ခဲင် ဘပ် ဇဝ်ဖြာ န့ တဝ်း ပါယ် နီ၊ ‘အန် ဇဝ် မုး ဇဝ်ဖြာ အီ အိုပ် ဘေ။ ဘေ လုဝ် ရွက့် အန် ဇဝ် တီ၊ တဲး ဘော နဝ်း ဘော တူတ့် ရွက့် အန်။ ခဲ့ ပွိုန် ဘေ ရွက့် ခဲင် နဝ်း၊ ခဲ့ မိုဝ်း ဘေ အာငျာန်၊ ခဲ့ မိုဝ်း ဘေ ပ့လူမ်၊ ဇိုဝ် တီ ဒွန် မျုဝ် ဘေ လုဝ် ဒိုဝ်း တူတ့်၊ ဝီ ရွက့် အန် ဇဝ်။ ဘေ ဘော လုဝ် ရွက့် အီ ဟဝ် တဲး န့ ပီ ဘေ ရွက့် ဒုဝ် ဘြိမ် ဘေ။’ အုဝ် တိး ခဲင် ဘပ် ဇဝ်ဖြာ ပါယ် တီ။”
28 ဇဝ် ယေဆူ ဝီ တဝ်း ဒီ အန်၊ “ဟဲ့ မုး ပီ တဝ်း မဲ တီ။ ဆေ မဲ မိူဝ် ဘူင် ပါယ် တီ၊ မဲ ဒီ ဘော ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။”
29 ဒူအီ တွိုန် ယီ တူ ဆီ တဲး ဆာရေ အန် စှိုမ်။ အန် ဝီ ဒီမွှတ် လွင် အန် တီ တဝ်း၊ “အီ ဟဝ် တီ၊ အန် မုး အာဆေ။း”
30 ဇဝ် ယေဆူ ဝီ တဝ်း ဒီ အန်၊ “ဒေါ မွိုန်၊ န့ မိုဝ်း ဒူအီ အာမျုဝ် ယူဒါ အူ ဝီ။ အန် လေး မိူင် ယေရူဆာလဲမ်၊ ဟာဝ် လူင် ဒီ မိူင် ယေရီခုဝ်။ ဒေါ ဟာဝ် အန် ဒူပ် န့တေန့်၊ အန် ကာတုန့် ဒါ ဇူန်။ ဒါ ဇူန် တီ ဘော ဒိုဝ်း ဟာဝ် ခြိုင် တာ အန် ဘော မး အန်၊ တဲး အန် ကော ယမ် ပိဝ်။ ဟဲ့ ဟွတ့်၊ ဒါ ဇူန် တီ ဝီ ဘ့လေး ဝဲန် အန် ဒီ တီ။ 31 ဒေါ အန် တီ န့ ဘော မိုဝ်း ဒူအီ အီ လှူ ဒီ ဇဝ်ဖြာ အူ ဝီ၊ အီ မုး အာမျုဝ် ယူဒါ။ အန် ဟာဝ် ဒူပ် န့တေန့် တွိုန်။ အန် ဘော ယိုဝ် ဒူအီ ဇမ် ဒုက် တွိုန်၊ အန် ဝီ ဝး ဟာဝ် ဒူပ် န့တေန့် ပေါ ဘ့လာက်၊ ဘော ကာလုဝ်း ပွုန် အန်။ 32 ပါယ် တီ၊ န့ ဘော မိုဝ်း ဒူအီ ပေါ အူ ဝီ အီ ဘူင် ဂါန် ခဲင် ဟုဝ် ဇဝ်ဖြာ။ အန် မိူဝ် ဟာဝ် ဒူပ် န့တေန့် တွိုန်။ ဒေါ တာ ယိုဝ် အန် ဒူအီ ဆဝ် တွိုန်၊ အန် ဝီ ဟာဝ် ပေါ အူ ဘ့လာက်၊ ကာလုဝ်း ပွုန် အန်။ 33 ပန် တီ န့ ဝီ မိုဝ်း ဒူအီ အာမျုဝ် ဆာမာရီ အူ ဝီ။ ဂေ ဒူအီ အာမျုဝ် ယူဒါ ဘော ဂေ ဒူအီ အာမျုဝ် ဆာမာရီ၊ ဂေ တူ လာယ် ကာလဝ့်။ ဒူအီ အာမျုဝ် ဆာမာရီ တီ မိူဝ် တာ ဟာဝ် ဒူပ် န့တေန့် တွိုန်။ ဒေါ တး ယိုဝ် အန် ဒူအီ ဆဝ် တီ၊ အန် မိူဝ် ကာဝေ အူ ဇေန့်။ 34 အန် ဘော ဟာဝ် ဒူင် ကွယ် ဒူအီ ဆဝ် တီ ဘော ဘာယ် ဒိမ် အန် တာ ပဝ်း အိုမ် မာငုန်။ အန် ဘော ဒိုဝ်း နာမန်၊ ဖဝ်း ဒူင် ဒိမ် တီ။ အန် ဝီ ဒိုဝ်း ဒူအီ ဆဝ် တွိုန်၊ ပဝ့် မာလာ အန်။ အန် ဘော တး ဇမ် ဒီ ဇေရူပ်၊ ဝီ လိုမ်လာ ဒူအီ ဆဝ် ဒေါ ကွယ် ဂါယ် ဒူင် တွိုန်။ 35 ပါ ခဲညှာ ဆိန့်ဝး၊ အန် ဝီ ဒိုဝ်း ရွိုန် အန် အာ ဘူင့်b ဒွါ ဒီ ဒါ ကာညာ ဇေရူပ် တွိုန်၊ တဝ်း၊ ‘တဲး မဲ လိုမ်လာ ဒူအီ နီ။ ဆေ မဲ ဘော တူတ့် ရွိုန် ကိူန် လွှိုမ် နီ၊ အုဝ် ဒီ ဝီ ဒွါ ဒီ မဲ ဒေါ ဝီ တး ဇမ် အုဝ် ဒီ နီ။’” ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ အန် ဝီ ဒီမွှတ် တဝ်း၊
36 “ခဲင် ဒူအီ အူယ် ဝီ တွိုန်၊ မဲ ထာင်၊ အာဆေ ဟဲ့ စွယ် ဒူအီ အီ ကာဒုး ဒုက် ဒီ ဒါ ဇူန် တွိုန်။း”
37 ဒါ အီ မာနုဝ် ဒါရာ တွိုန်၊ အန် ဝီ တဝ်း၊ “န့ မုး ဒူအီ အီ ကာဝေ ဒူအီ တွိုန်။” ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ အန်၊ “တဲး ဘော မဲ ဟာဝ် ဘူင် ပါယ် တီ။”
လွင် နာင် မာထာ ဂါယ် နာင် မာရီ
38 ဒေါ ဟာဝ် ဇဝ် ယေဆူ ဘော ဒီဘဲ အန် ဒွန် ပ့လုဝ့်၊ ဂေ ဘော တး ဇမ် ခဲင် မိူင် အူ မိူင်။ ခဲင် မိူင် တီ၊ န့ မိုဝ်း အီဘိုန့် အူ ဝီ၊ အန် ဘာင် ဇဝ် ယေဆူ ဟာဝ် လိုပ် ခဲင် ကာင် အန်။ အန် စိူဝ် နာင် မာထာ။ 39 နာင် မာထာ တွိုန် မိုဝ်း ဝါ အူ ဝီ အီ စိူဝ် နာင် မာရီ။ နာင် မာရီ တွိုန် တုတ့် ဒီ အာတ့် ဇဝ် ယေဆူ၊ ထူမ် ဂြုဝ်း ပီ တဝ်း အန် ဒီ ဂေ။ 40 နာင် မာထာ ယီ မိုဝ်း နဝ်း မှဲ ဒီ ရဲန် ပီ ဒီ ဟူမ်။ အန် လိုပ် ဒူင် ကွယ် ဇဝ် ယေဆူ၊ တဝ်း ဒီ အန်၊ “အိုယ် မဲ ဇဝ်၊ ဝါ အုဝ် နီ တဲး အုဝ် အူ ဝီ ဘူင် ဂါန် ဒွန် မျုဝ်။ မဲ တူ ကာဝေ အုဝ်။း တဲး မဲ စ်ု အန် တး စွယ် အုဝ်။”