1 ဝါယ် အန် တီ ဇဝ် ယေဆူ ဒဲ့ ဒီဘဲ အန် ဂိုဝ် ဒီ အာ ဝီ တး ကာဇု ဒူင် ကွယ် အန်။ အန် မိူဝ် ဒွါ ပွုန် ဒီ ဂေ တဲး ဂေ ပွိုန် ဒီ ဆုတ့် ကာနမ် လေး ခဲင် ဒုဝ် အီ။ အန် မိူဝ် တဲး ဂေ ပဲ ပီဟြာယ် ဆဝ် အီ။ 2 အန် မိူဝ် စ်ု ဂေ ဟာဝ် ကာလာင် ဒီ အီ လွင် ဇဝ်ဖြာ ဟဲ့ ကာတတ် ဒီ တး အိုပ် ကာဒါယ်။ အန် ဘော တဲး ဂေ ပဲ ပီဟြာယ် ဆဝ် ဒူအီ ဟဝ်။ 3 အန် မိူဝ် တဝ်း ဒီ ဂေ၊ “ဘေ ကွဲ့ ဒိုဝ်း ဟာဝ် မာဆေ ဒေါ ဟာဝ် ဘေ ဒူပ် န့တေန့် ဘေ။ ကွဲ့ ဂူင့် န့ကြွုန်။ ဘော ပီ ဒီ ဟူမ် ပီ ဒီ ဟာပ် ဘေ၊ ဘော ရွိုန် ဒီ စိုဝ်း ကြုဝ်၊ ကွဲ့ တဲး ဘေ ဂူင့် ဇိုဝ် တီ။ ဘော ဆီတုဝ် ကာပ့လု ဘေ၊ ကွဲ့ တဲး ဘေ ဂူင့်။ 4 ဆေ ဘေ ဘော လိုပ် ခဲင် ကာင် အီ မှဝ်၊ တဲး ဘေ ကွယ် ခဲင် ကာင် တီ၊ တဲး ကော ဇမ် အာခြာဝ် ဒီ လေး ဘေ ခဲင် မိူင် တီ။ 5 ဆေ န့ ဘော မိုဝ်း ဒူအီ အီ တူ ရွုး ဘေ၊ ဒေါ လေး ဘေ ခဲင် မိူင် ဂေ၊ တဲး ဘေ ဒီယိုဝ်း ရး ကာပုး ဒီ ပ့လဝ် ဘေ၊ တဲး ဂေ နပ်၊ ပီ တူ ထူမ် ဂေ၊ န့ တူ မွှိုမ်။” ဇဝ် ယေဆူ တဝ်း ပါယ် တီ ဒီ ဂေ။ 6 ပန် တီ ဂေ ဒီဘဲ ဇဝ် ယေဆူ၊ ဂေ မိူဝ် ဟာဝ် ဘဲန် မိူင် ဘဲန် မိူင်။ ဂေ ဘော ကာလာင် လွင် ဇဝ်ဖြာ အီ ချွတ် ဒူအီ။ ဒွန် ပ့လုဝ့် ဂေ ဘော ပီကဲန် ဒူအီ ဆဝ်။

7-8 ဒေါ အန် တီ ဂေ ဒူအီ မင် အီ ဟဲ့ ထာင်၊ ဇဝ် ယေဆူ မုး ဒါ ဆာရာ အာယောဟာန် အီ စိုပ် ဒူအီ ခဲင် အိုမ်၊ အီ ဟဲ့ ဝီ ယိတ့် ဝီ အိမ်။ ဘော မင် အီ တဝ်း၊ အာအေလီယ ဟဲ့ ဝီ ယိတ့် ဝီ အိမ်၊ ဝီ ဘဲန် ဇဝ် ယေဆူ။ ဘော မင် အီ ဝီ ထာင်၊ ဒူအီ အီ ဘျာန် ဂြုဝ်း ဇဝ်ဖြာ အူ ဝီ ဟဲ့ ဝီ ယိတ့် ဝီ အိမ်၊ ဝီ ဘဲန် ဇဝ် ယေဆူ။ ခုန်ဒီခမ် အာဟေရူတ် အီ မုး ဒါ ကာညာ အီ အိုပ် ဖွုန် မိူင်၊ အန် ဘော ထူမ် လွင် ဇဝ် ယေဆူ၊ အန် ဝီ ဇေန့်ဇာ ခဲင် နဝ်း အန်။ 9 အန် တဝ်း၊ “အုဝ် ဟဲ့ ဟွတ့် တဲး ဒူအီ ဒဲပ် ဂိန့် အာယောဟာန် တွိုန်။ ဇဝ် ယေဆူ တီ၊ အန် ယီ မုး အာဆေ။း” ခုဝ် အန် တီ အန် ဘော ဟြေတ့် ပီ ဒီ ပါယ် တဲး အန် ပွိုန် ဒီ ယိုဝ် ဇဝ် ယေဆူ။

10 ဝါယ် အန် တီ ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ဝီ တး ဇမ် ဒူင် ကွယ် ဇဝ် ယေဆူ။ ဂေ ဝီ ကာလာင် တူတ့် လွင် ပဲ့ ဟဲ့ ဘူင် ဂေ။ ဇဝ် ယေဆူ စ်ု ဂေ၊ တဲး ဂေ ဒူပ် အန်၊ ဟာဝ် ဒူင် တူ မိုဝ်း အီ ဟဝ် နာ ရေတ့် မိူင် ဘေတ်ဆီဒါ။ 11 ဂေ ဒူအီ ကိူန် ကော နပ် လွင် အန်။ ဂေ ဘော ဟာဝ် ဒူပ် အန်။ ဇဝ် ယေဆူ မိူဝ် ဒါခိုယ် ဒီ ရွုး ဂေ။ အန် ဝီ စုး ဒီ ကာလာင် ဒီ ဂေ လွင် ပန် ဒီ တး ဇဝ်ဖြာ အိုပ် ကာဒါယ်။ ဂေ ဒူအီ ဆဝ် အီ ဆီ တဲး ဇဝ် ယေဆူ စွယ် ဂေ၊ ဇဝ် ယေဆူ မိူဝ် ပီကဲန် ဂေ ဒွန် အီ။

12 ဆီငဲ အန် တီ၊ ဘာ ဒီ အပ်၊ ဂေ ဒီဘဲ အန် ဂိုဝ် ဒီ အာ ဝီ၊ ဂေ တး ဒူင် ကွယ် ဇဝ် ယေဆူ။ ဂေ တဝ်း၊ “မဲ လုဝ် တဲး ဒူအီ ကိူန် ဂေ နီ ဝေန့်၊ တဲး ဂေ ဟြေတ့် ပီ ဒီ ဟူမ် ဘော ဒူင် ဒီ တမ် ခဲင် ရဝ် ခဲင် မိူင် အီ ကွယ် ကာတတ် ဒူင် ကွယ် အေ နီ။ ဒီ နီ မုး ဒူင် ကာဟဝ်း ကာဟန့်။ အာဝ် မိုဝ်း မာဆေ။”

13 ဂေ ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ ဂေ၊ “တဲး ဘေ ဒွါ ပီ ဒီ ဟူမ် ဒီ ဂေ။”

ဂေ ယီ ဝီ တဝ်း ဒီ အန်၊ “ယေ မိုဝ်း မီ ခါမုန် ဖန် ဘူင့် ဘော မာဂါ အာ ဒုဝ်။ မဲ ဆီ တဲး ယေ ဟာဝ် စိုဝ်း ပီ ဒီ ဟူမ် ဒွါ ဒီ ဒူအီ ဒွန် အီ အီ ကွယ် ဒီ နီ။း” 14 ဒူအီ အီ ကွယ် ဒူင် တွိုန်၊ မိုဝ်း မီ အီမာယ် ကာဘက် ဖန် ဟြဲန့် ဝီ။ အာဝ် ဘာ့ အီဘိုန့် ဂေ ဂွန်။

ဇဝ် ယေဆူ ဝီ တဝ်း ဒီ ဒီဘဲ အန်၊ “တဲး ဘေ တဲး ဒူအီ တုတ့် ဘဲန် ဖိုင် ဘဲန် ဖိုင်၊ အူ ဖိုင် ကာဘက် ဖန် ဂိုဝ် ဝီ။” 15 ဟဲ့ ဟွတ့် ပန် တီ ဂေ ဒီဘဲ အန် ဘော တဲး ဒူအီ တုတ့် ဘောကာဂ့လျီတ်။ 16 ဇဝ် ယေဆူ မိူဝ် ဒိုဝ်း ခါမုန် ဖန် ဘူင့် ဘော မာဂါ အာ ဒုဝ်၊ ဝီ ဆာကိုဝ်း ယွတ် ဂါင်ဟြာဝ်၊ ကာလာင် ဂုင် ဂေဇူ ဒီ ဇဝ်ဖြာ၊ ဘော ကာဘက် ခါမုန် ဂေ မာဂါ၊ ဝီ ဒွါ ဒီ ဒီဘဲ အန်၊ တဲး ဂေ ဝီ ကာဆာင် ဒီ ဒူအီ ကိူန်။ 17 ဂေ ဘောကာဂ့လျီတ် ပွိုန် ဒီ ဟူမ် ဖဲ။ ဝါယ် ဟဲ့ ဟွတ့် ဟူမ် ဂေ၊ ဂေ ဒီဘဲ ဇဝ် ယေဆူ ဘော ဂဲပ် ကာဇု ကာလူယ် ဟူမ် ဂေ။ ကော ဝီ နုဝ့် ဂိုဝ် ဒီ အာ ကာတဲပ်။

18 အူ ဆီငဲ ဇဝ် ယေဆူ ကွယ် အူ ဝီ၊ ဆာခိုဝ် ဒီ ဇဝ်ဖြာ။ ဒေါ အန် တီ ဂေ ဒီဘဲ အန် တး ဇမ် ဒူင် ကွယ် အန်။ ဇဝ် ယေဆူ ယီ ဒီမွှတ် ဂေ တဝ်း၊ “အီ ဟဝ်၊ ဂေ တဝ်း အုဝ် မုး အာဆေ။း”

19 ဂေ ဝီ တဝ်း ဒီ အန်၊ “မင် အီ တဝ်း၊ မဲ မုး ဒါ ဆာရာ အာယောဟာန် တွိုန် အီ ဟဲ့ ဝီ ယိတ့် ဝီ အိမ်။ မင် အီ တဝ်း မဲ မုး အာအေလီယ တွိုန်၊ အီ ဟဲ့ ဝီ ယိတ့် ဝီ အိမ်။ ဘော မင် အီ တဝ်း၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ အူ ဝီ အီ ဟဲ့ ဝီ ယိတ့် ဝီ အိမ်။”

20 ဂေ ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ ဒီမွှတ် ဂေ။ အန် တဝ်း၊ “ဆေ န့ မုး ဘေ၊ ဘေ တဝ်း အုဝ် မုး အာဆေ။း”

အန် ဟဲ့ ဟွတ့် ကာလာင် ပါယ် တီ၊ အာပေတာရူ ဝီ တဝ်း ဒီ အန်၊ “မဲ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။”

21 ဝါယ် အန် တီ ဇဝ် ယေဆူ ဝီ ဒမ် ဂေ၊ ကွဲ့ တဲး ဂေ ကာလာင် လွင် အန် တီ ဒီ ဒူအီ ဟဝ်။ 22 အန် မိူဝ် တဝ်း၊ “ဒူအီ အီ ဟဲ့ ဘဲန် ဂွန် ဒူအီ၊ အန် လုဝ် ခမ် ဒုက် ဘဲန် မျုဝ် ဘဲန် မျုဝ်။ ဂေ ဒါ တာင် ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ တူ ဆီ ယိုဝ် အန်၊ တူ ဆီ ထူမ် ဂြုဝ်း အန်။ ဂေ ဒီ ဘော ငဝ်း ဝဲန် အာဆာက် အန်။ ဟီ နုဝ့် အူယ် ဆီငဲ၊ ဇဝ်ဖြာ ယီ ဒီ တဲး အန် ဝီ ယိတ့် ဝီ အိမ်။”

23 ဇဝ် ယေဆူ ဝီ ကာလာင် ဒီ ဂေ ဒူအီ ဘောကာဂ့လျီတ် အီ ထူမ် ဂြုဝ်း အန် တဝ်း၊ “အာဆေ ဆီ ဒူပ် အုဝ်၊ ကွဲ့ တဲး အန် ဘူင် ပီ အိုင် အန်။ ဒွန် ဆီငဲ၊ ဒွန် ဆီငဲ၊ အန် လုဝ် ဘ့လေး နဝ်း အန် တဝ်း၊ ‘ဆေ အုဝ် ဘော လုဝ် ယမ်၊ အုဝ် ယီ ဒီ ဒူပ် အန် ဇဝ် ဆေဆေ။’ 24 အာဆေ ကာဝေ အာဆာက် အန်၊ အာဆာက် အန် ဒီ စှိုမ်။ အာဆေ ယီ တူ ယုဝ် ဒီ ယမ် ကူပ် ညှိုမ် အန် ဒီ အုဝ်၊ အန် ဒီ ဝီ ပွိုန် အာဆာက် ကာမာယ်။ 25 ဆေ ဒူအီ အူ ဝီ ပွိုန် တူတ့် ဒွန် မျုဝ် အီ မိုဝ်း ဒဲင် ကာဒါယ် နီ၊ အာဆာက် အန် ယီ စှိုမ်၊ မှဝ် န့ ဒီ ပါယ် ဒီ ဘဲန် အာဂျိုဝ် ဒီ အန်။း 26 ဆေ ဒူအီ ဆာယ် ဒီ တဝ်း၊ အန် ညှိုမ် အုဝ် ဘော ဂြုဝ်း အုဝ်၊ န့ ဒီ ဇမ် အူ ဆီငဲ၊ အုဝ် မိူဝ် ဒီ ဆာယ် ဒီ တဝ်း၊ ‘အုဝ် ဟဲ့ နပ် ဒူအီ ဝီ တီ။’ အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဒီ ဝီ တး လူင် ဒဲင် ကာဒါယ် နီ။ အုဝ် ဒီ ဘော ဘျ အာရူင် ဘ့လာင် အုဝ်၊ ဘျ ဘော အာရူင် ဘ့လာင် ဂုန့် အုဝ် ဘော ဂေ အာမူ အာမာတ် အန် အီ ဟဲ့ ဘွတ် ကာဆဝ်။ ပန် အန် တီ၊ အုဝ် ဒီ ဘော ဆာယ် ဒီ တဝ်း၊ အုဝ် ဟဲ့ နပ် ဒူအီ ဝီ တီ။ 27 အုဝ် တဝ်း အာခ်ု ဒီ ဘေ၊ ကာတဲ ဂေ ဒူအီ အီ ကွယ် ဒူင် ကွယ် အုဝ် နီ၊ န့ မိုဝ်း မင် အီ၊ ဂေ တူ ယမ် အာတ့် ယိုဝ် ဂေ အာခြာဝ် ဒီ အိုပ် တူတ့် ဇဝ်ဖြာ ဒဲင် ကာဒါယ် နီ။” ပါယ် တီ ဇဝ် ယေဆူ မာနုဝ် ဂေ ဒူအီ ကိူန် အီ ထူမ် ဂြုဝ်း အန်။

28 ဝါယ် အန် တီ ဟဲ့ နုဝ့် ကာဘက် ဒါ ဆီငဲ၊ ဇဝ် ယေဆူ ဒဲ့ အာပေတာရူ၊ အာယောဟာန် ဘော အာယာကူပ်၊ တဲး ဂေ ဟုဝ့် ဆာခိုဝ် ဒဲင် နွန် အူ ပ့လုဝ့်။ 29 ဒေါ ဆာခိုဝ် ဇဝ် ယေဆူ၊ အာရိုပ် အန် ကာဘ့လိူင်။ ခြိုင် ပီ စှိုပ် အန် ဘော လုယ် ရာဝ်။ 30 န့ ဘော မိုဝ်း ဒူအီ အာ ဝီ တး ဒူင် ကွယ် အန်၊ ကာလာင် ဂြုဝ်း ဒီ အန်။ ဂါယ် မုး ဒါ အာမုဝ်ဆဲ ဂါယ် ဒါ အာအေလီယ။ 31 အာရူင် ဂါယ် ဟဲ့ ဘ့လာင် ကာဆဝ်။ ဂါယ် တး ကာလာင် ဒီ ဇဝ် ယေဆူ လွင် ဒီ လုဝ် ယမ် အန် ခဲင် မိူင် ယေရူဆာလဲမ်။ 32 ဒေါ အန် တီ အာပေတာရူ ဂေ ဂိုက် အန် ဘော ဘဲန် ဆီ အိတ် ကာဆဝ်။ ဒေါ ဝီ န့ဆိုဝ်း ဂေ၊ ဂေ ဘော ယိုဝ် အာရူင် ဇဝ် ယေဆူ ဟဲ့ ဘ့လာင်၊ ယိုဝ် ဂါယ် အာ ဝီ တွိုန်၊ အီ ကွယ် ရိုမ် ဒူပ် ဇဝ် ယေဆူ။ 33 ပန် တီ ဒေါ လေး ဝေန့် ဂါယ် ဒူင် ကွယ် ဇဝ် ယေဆူ၊ အာပေတာရူ ဝီ တဝ်း၊ “အိုယ် မဲ ဒါ ဆာရာ၊ န့ ဟဲ့ ဒါခိုယ် ကွယ် ဒီ နီ။ တဲး ယေ ဆမ် ထိုပ် အူယ် ထိုပ်။ တဲး ဘော မဲ ဘော အာမုဝ်ဆဲ ဘော အာအေလီယ ကွယ် အူ ဝီ အူ ထိုပ်။” အာပေတာရူ တဝ်း ပါယ် တီ ကူပ် တူ နပ် အန် ပီ ဒီ တဝ်း အန်။

34 ဒေါ ကာလာင် အန် ဂြုဝ်း တီ၊ န့အု ဘော တး ပ့လိုက် နာ ဒဲင် ဂေ ဘော ဖိုင်။ ဂေ ဒီဘဲ ဇဝ် ယေဆူ ဘော ယုဝ် ကူပ် ပ့လိုက် န့အု တီ ဒီ ဂေ။ 35 န့ မိူဝ် မိုဝ်း ဂြုဝ်း လေး ခဲင် န့အု တီ တဝ်း၊ “ဝီ နီ မုး ဂွန် ပီ ရွက့် အုဝ်။ တဲး ဘေ ထူမ် ဂြုဝ်း အန်။” 36 ဂေ ဟဲ့ ဟွတ့် ထူမ် ဂြုဝ်း တီ၊ ဂေ ဝီ ယိုဝ် မီ ဇဝ် ယေဆူ အူ ဝီ ကွယ် ရိုမ် ဒူပ် ဂေ။ ဂေ မိူဝ် နုဝ် အုန် လွင် အန် တီ ခဲင် နဝ်း ဂေ။ အာခြာဝ် ဒေါ ကွယ် ဂေ တွိုန်၊ ဂေ တူ ကာလာင် လွင် ပဲ့ ဟဲ့ ယိုဝ် ဂေ တီ။ ဂေ တူ တဲး အာဆေ နပ် လွင် အန် တီ။

37 ပါ ခဲညှာ ဝါယ် လူင် ဂေ ဒဲင် နွန် တွိုန်၊ ဒူအီ ကိူန် ဟဲ့ နှဝ့်၊ ဘ်ု ဒီ ရွုး ဇဝ် ယေဆူ။ 38 ခဲင် ဖိုင် ဒူအီ ကိူန် တီ၊ န့ မိုဝ်း ဒူအီ အူ ဝီ၊ အန် ဒတ် တာင်၊ တဝ်း ဒီ ဇဝ် ယေဆူ၊ “အိုယ်၊ ဒါ ဆာရာ၊ အုဝ် မှာန့်၊ တဲး မဲ ယွတ် ဂွန် အီမာယ် အုဝ် နီ။ အုဝ် မိုဝ်း ဂွန် အူ ဝီ နီ။ 39 အန် မိုဝ်း ကာနမ် တး ပ့လိုက် အန်၊ ဘူင် တဲး အန် ဒတ် တာင်၊ တဲး အန် ဒီယေန့် ဘော ဒုဝ်။ ပုး ဘော လေး ခဲင် မူတ့် အန်။ ကာနမ် ဘော ပ့လိုက် တဲး အန် ရုတ်။ ကာနမ် တီ တူ ဆီ လေး ခဲင် ဒုဝ် အန်။ 40 အုဝ် ဟဲ့ မှာန့် ဂေ ဒီဘဲ မဲ၊ တဲး ဂေ ဆုတ့် ကာနမ် လေး ခဲင် ဒုဝ် အန်။ ဂေ ယီ တူ ပဲ ဒီ ဆုတ့် လေး ကာနမ် တီ။” အန် ဟဲ့ ဟွတ့် ကာလာင် ပါယ် တီ၊

41 ဇဝ် ယေဆူ ဝီ တဝ်း၊ “ဘေ ဒူအီ အီ ကွယ် ဇာတ် နီ၊ ဘေ တူ မိုဝ်း နဝ်း ညှိုမ်။ ပီ ဇေန့်ဇာ ဘေ၊ ပီ ဘူင် ဘေ အာဝ် မွှိုမ်။ ခဲ့ မှဝ် န့ ဒီ လှေန့်၊ အုဝ် ဒီ ဘော လုဝ် ကွယ် ရိုမ် ဒူပ် ဘေ ဘော ခမ် ဇိုဝ် တီ။း” အန် ဘော တဝ်း ဒီ ဂုန့် တွိုန်၊ “တဲး ဂွန် မဲ တး ဒူင် ကွယ် အုဝ် နီ။”

42 ဒေါ ဟာဝ် ဇမ် ဂွန် တွိုန် ဒူင် ကွယ် ဇဝ် ယေဆူ၊ ကာနမ် တဲး အန် ကေး အူ ဇေန့်၊ တဲး အန် ဒီယေန့်။ ဇဝ် ယေဆူ စ်ု ကာနမ် လေး၊ တဲး ဂွန် တီ ဝီ ကဲန်။ ဟဲ့ ဟွတ့်၊ ဇဝ် ယေဆူ ဘော ဝီ အာပ် ဒွါ ဂွန် တီ ဒီ ဂုန့် အန်။ 43 ဂေ ဒူအီ ဘောကာဂ့လျီတ် အာမ် ကာဆဝ် ခဲ့ တာင် ပွုန် ဇဝ်ဖြာ။

ဒေါ ဆီငျာ အာမ် ဂေ လွင် ပီ ဘူင် ဇဝ် ယေဆူ တီ၊ ဇဝ် ယေဆူ ဝီ တဝ်း ဒီ ဒီဘဲ အန်၊

44 “ပီ ဒီ ကာလာင် အုဝ် ဒီ ဘေ ဒေါ တီ နီ၊ ဘေ လုဝ် နုဝ် အုန် ခဲင် နဝ်း ဘေ။ န့ မုး အုဝ် အီ ဟဲ့ ဘဲန် ဂွန် ဒူအီ၊ ဂေ ဒီ အာပ် အုဝ် ဒီ ရန်ဆူ အုဝ်။” 45 ဂေ ဒီဘဲ ဇဝ် ယေဆူ ယီ တူ နပ် ဆီဖဝ် ပီ ကာလာင် အန်။ ဇဝ်ဖြာ တူ တဲး န့ လိုဝ်း ဒီ နဝ်း ဂေ၊ တူ တဲး ဂေ နပ်။ ဂေ မိူဝ် တူ ယ ဒီမွှတ် ဇဝ် ယေဆူ လွင် အန် တီ။

46 ဝါယ် အန် တီ ဂေ ဒီဘဲ ဇဝ် ယေဆူ၊ ဂေ လာယ် ကာခဲန့်၊ ကာလာင် ကာတဲ ဂေ၊ အာဆေ အီ ဒီ တာင် လွှိုမ် အာဆေ။ 47 ဇဝ် ယေဆူ ယီ နပ် ပီ ဇေန့်ဇာ ဂေ ခဲင် နဝ်း ဂေ။ အန် ဘော ဒဲ့ ဂွန် အူ ဝီ၊ တဲး အန် ကွယ် ကာတဲ ဂေ။ 48 အန် ဘော တဝ်း ဒီ ဒီဘဲ အန်၊ “အာဆေ ရွုး ဂွန် ဒီတဲတ် ပီ ဂွန် ဝီ နီ ကူပ် ညှိုမ် အန် ဒီ အုဝ်၊ န့ ပီ၊ အန် ရွုး အုဝ်။ အာဆေ ယီ ရွုး အုဝ်၊ အန် ဘော ရွုး အန် ဇဝ် အီ တိုယ် အုဝ် တး ဒဲင် ကာဒါယ် နီ။ ဆေ န့ ယီ မိုဝ်း ဒူအီ အူ ဝီ အီ ကွယ် ကာတဲ ဘေ၊ ဆေ အာရေ အန် အာဝ် တာင် မာဆေ၊ အန် ဟဲ့ မုး ဒူအီ အီ တာင် လွှိုမ် အီ ဟဝ်။”

49 ဝါယ် အန် တီ အာယောဟာန် တဝ်း ဒီ ဇဝ် ယေဆူ၊ “အိုယ် မဲ ဒါ ဆာရာ၊ ယေ ဟဲ့ ယိုဝ် ဒူအီ မင် အီ၊ ဂေ ဟဲ့ ဂါဝ် ပွုန် မဲ၊ ဆုတ့် ကာနမ် လေး ခဲင် ဒုဝ် ဘူင့် အီ။ ယေ ယီ ဟဲ့ ခြဲ ဂေ၊ ကွဲ့ တဲး ဂေ ဘူင် ပါယ် တီ။”

50 ဇဝ် ယေဆူ ဝီ တဝ်း၊ “ကွဲ့ ခြဲ ဂေ။ အာဆေ တူ ကာဂုဝ်း ဒီ အေ၊ အန် ဟဲ့ ဘဲန် ဂိုက် အေ။”

51 ဒေါ ဟဲ့ ကာတတ် အာခြာဝ် ဒီ ဒဲ့ ဇဝ်ဖြာ ဒီ ဇဝ် ယေဆူ၊ တဲး အန် ဝီ ဟုဝ့် ဂါင်ဟြာဝ်၊ ဇဝ် ယေဆူ ဟဲ့ အုန် နဝ်း ဒီ ဟုဝ့် မိူင် ယေရူဆာလဲမ်။ 52 အန် မိူဝ် တဲး ဒီဘဲ အန် မင် အီ ယဲတ့် ဒီ အာတ့် အန်။ ဂေ ဘော ဟာဝ် လိုပ် မိူင် အီ ကွယ် ခဲင် အိူင် ဆာမာရီ။ ခဲင် မိူင် တီ ဂေ တဝ်း ဒီ ရဲန် အုန် ဒွန် မျုဝ် ပီ ဒီ လုဝ် ဇဝ် ယေဆူ။ 53 ဂေ ဒူအီ အီ ကွယ် ခဲင် မိူင် တွိုန်၊ ဂေ ယီ တူ ရွုး ဇဝ် ယေဆူ ကူပ် နပ် ဂေ၊ အန် ဒီ ဟုဝ့် မိူင် ယေရူဆာလဲမ်။ 54 အာယာကူပ် ဂါယ် အာယောဟာန် အီ မုး ဒီဘဲ ဇဝ် ယေဆူ၊ ဂါယ် ဘော ယိုဝ် လွင် အန် တီ၊ ဂါယ် ဘော တဝ်း ဒီ ဇဝ် ယေဆူ၊ “အိုယ် မဲ ဇဝ်၊ မဲ ဆီ တဲး ယာယ် မှာန့်၊ တဲး ငဝ် လေး လူင် ခဲင် ဂါင်ဟြာဝ်၊ ကာဆိုမ် လိုဝ် မိူင် နီ၊ တဲး န့ ပီ ပီ ဒွိုမ် မှာန့် ဒါ ဆာရာ အာအေလီယ တွိုန်။း” 55 ဇဝ် ယေဆူ ယီ မာငး ယွတ် ဂါယ်၊ ဘော ခြဲ ဂါယ်။ အန် တဝ်း၊ “ဘာယ် တူ နပ် လွင် နဝ်း ဖွိုမ် မျုဝ် မှဝ် ဟဲ့ အိုပ် ဘာယ်။ 56 အုဝ် အီ မုး ဂွန် ဒူအီ၊ အုဝ် တူ တး တဲး အုဝ် ငဝ်း အာဆာက် အီ။ အုဝ် ဟဲ့ တး တဲး အုဝ် ချွတ် အီ။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဘော အန် ဘော ဖိုင် အီ ဒူပ် အန်၊ ဂေ လေး ဟာဝ် ပေါ ပ့လုဝ့်။^a

57 ဒေါ ဟာဝ် ဂေ ဒူပ် န့တေန့်၊ ဒူအီ အူ ဝီ တး ဇမ် ဒူင် ကွယ် ဇဝ် ယေဆူ။ အန် တဝ်း၊ “မဲ ဘော ဟာဝ် နာ မှဝ်၊ အုဝ် ဒီ ဒူပ် မဲ ဇဝ် ဆေဆေ။”

58 ဇဝ် ယေဆူ ဝီ တဝ်း၊ “ဂေ မာဆုဝ် ပြဲ ဟဲ့ မိုဝ်း ကာဒဝ်။ ဘော ဂေ မာဆိမ် ဟဲ့ မိုဝ်း ကာဟုန်။ န့ ယီ မုး အုဝ် အီ ဟဲ့ ဘဲန် ဂွန် ဒူအီ၊ အုဝ် တူ မိုဝ်း ဒူင် ဒီ တမ်။”

59 ဝါယ် အန် တီ ဇဝ် ယေဆူ ဝီ တဝ်း ဒီ ဒူအီ ပေါ အူ ဝီ၊ “တဲး မဲ တး ဒူပ် အုဝ်။” ဒူအီ တီ ဝီ တဝ်း၊ “အိုယ် မဲ ဇဝ်၊ အုဝ် မှာန့်၊ တဲး အုဝ် ဝေန့် ဒိပ် ဂုန့် အုဝ် ဒီ အာတ့်။ ဟဲ့ ဟွတ့်၊ အုဝ် ဒီ ဒူပ် မဲ။”

60 ဇဝ် ယေဆူ ဝီ တဝ်း ဒီ အန်၊ “တဲး ဂေ အီ တူ နပ် လွင် အာဆာက် ကာမာယ် ဝီ ဒိပ် ဒူအီ ယမ် ခဲင် ဘာရေဝ်။ မဲ ယီ လုဝ် ဟာဝ် ကာလာင် လွင် မိူင် ပီ အိုပ် ဇဝ်ဖြာ၊ တဲး ဂေ ဒူအီ ဟဝ် ထူမ် ဒွန် နာ ဒွန် ပ့လုဝ့်။”

61 န့ ဘော မိုဝ်း ဒူအီ အူ ဝီ၊ အန် တဝ်း၊ “အိုယ် မဲ ဇဝ်၊ အုဝ် ဒီ ဒူပ် မဲ။ အုဝ် ယီ မှာန့်၊ တဲး မဲ တဲး အုဝ် ဝေန့် ခဲင် ကာင် ဒီ အာတ့်၊ မှာန့်၊ တဲး ဂေ အီ ကွယ် ခဲင် ကာင် ခ့ဝါင် အုဝ် ဟာဝ်။”

62 ဇဝ် ယေဆူ ယီ တဝ်း ဒီ အန်၊ “ဆေ န့ မုး ဒူအီ ထဲ နာ၊ အန် တူ ယွတ် ဝိဝ် နာ ပန်။ ဆေ န့ ယီ မိုဝ်း ဒူအီ အီ ယွတ် ဝိဝ် နာ ပန်၊ ဒူအီ ဝီ တီ တူ ကာအာပ် ဘူင် ဂါန် ခဲင် မိူင် ပီ အိုပ် ဇဝ်ဖြာ။”