1 ဝါယ် အန် တီ ဇဝ် ယေဆူ ဟာဝ် ဘဲန် ပ့လုဝ့် ဘဲန် ပ့လုဝ့်၊ ကာလာင် လွင် ဇဝ်ဖြာ ဒီ အိုပ် ကာဒါယ်၊ တဲး ဂေ ထူမ် ဒွန် ရဝ် ဒွန် မိူင်။ ဘော ဂေ ဒီဘဲ အန် ဂိုဝ် ဒီ အာ ဝီ ဟဲ့ ဟာဝ် ဒူပ် အန်။ 2 ဘော မိုဝ်း ဘော ဂေ အီဘိုန့် ပဲ့ ဟဲ့ ပီကဲန် ဇဝ် ယေဆူ ဆဝ် ဂေ၊ ဘော ဂေ အီဘိုန့် ပဲ့ ဟဲ့ ဆုတ့် လေး ဇဝ် ယေဆူ ကာနမ် ခဲင် ဒုဝ် ဂေ၊ ဘော ဂေ ဟဲ့ ဒူပ် အန်။ အီဘိုန့် ဂေ တီ၊ အူ ဝီ အန် စိူဝ် နာင် မာရီ။ အီ ဟဝ် ဘော တဝ်း၊ အန် စိူဝ် နာင် မာရီ အီ တး မိူင် မာက်ဒါလာ။ ဇဝ် ယေဆူ ဟဲ့ ဒွိုမ် ဆုတ့် ကာနမ် ဘူ ဒုဝ် လေး ခဲင် ဒုဝ် အန်။ 3 န့ ဘော မိုဝ်း ဘော နာင် ယုဝ်ဟာနာ အီ မုး အီဘိုန့် အာခူဆာ။ အာခူဆာ တီ မုး ဒါ ကာညာ အီ လိုမ်လာ ဒွန် မျုဝ် ခဲင် ဟုဝ် ခုန်ဒီခမ် အာဟေရူတ်။ န့ ဘော မိုဝ်း ဘော နာင် ဆူဆာနာ ဘော အီဘိုန့် ဝီ ဟဝ် ဂေ ကိူန်။ အီဘိုန့် ဂေ တီ ဟဲ့ ဒိုဝ်း ကြုဝ်ကြာမ် ဂေ၊ စွယ် ဇဝ် ယေဆူ ဂေ ဒီဘဲ အန်။

4 ဒူအီ ဘဲန် မိူင် ဘဲန် မိူင် တး ကာဇု ဒူင် ကွယ် ဇဝ် ယေဆူ။ ဒေါ အန် တီ ဇဝ် ယေဆူ ကာလာင် ဘဲန် မျုဝ် ဘဲန် မျုဝ် ဒီ ဂေ၊ တဲး န့ ဘဲန် အူဖာမာ။ 5 အန် တဝ်း၊ “န့ မိုဝ်း ဒူအီ အူ ဝီ၊ အန် ဟာဝ် ဘြတ် ဆီမာ ငှုဝ်။ ဒေါ ဘြတ် အန် ငှုဝ် တွိုန်၊ ဆီမာ ငှုဝ် မင် ဘူင့် စုဝ်း ဒီ ခူပ် န့တေန့်။ ဒူအီ ဘော ညဲတ့်။ မာဆိမ် ဘော တး ဇုဝ့် ဟူမ်။ 6 ဆီမာ မင် ဘူင့် ဘော စုဝ်း ဒဲင် မာဝ် အီ မိုဝ်း ကာဒါယ် ဒီဟြေဝ် နာ ဒဲင်။ အန် ဟဲ့ ဟွတ့် လတ့်၊ အန် ဘော ဝီ ဟျီ့ ကာဟဝ်း အူ ဇေန့်၊ ကူပ် ကာဟဝ်း ကာဒါယ် ဒူင် ကွယ် အန်။ 7 ဆီမာ မင် ဘူင့် စုဝ်း ဒဲင် ကာဒါယ် အီ မိုဝ်း ဒဝ် မာအာတ့်။ ဒဝ် မာအာတ့် ယီ ကြဲ ဒီ တာင်၊ ဝီ ယာပ် ငှုဝ်၊ တဲး န့ ကြဲ ဒီ ယမ်။ 8 ဆီမာ မင် ဘူင့် စုဝ်း ဒူင် မုး ကာဒါယ် ဘွတ်။ န့ ဘော ကြဲ ဒီ တာင်။ အူ ဘုန် ဝီ မိုဝ်း လေး အန် အူ မာယဝ်း ဘုန်။”

ဇဝ် ယေဆူ တဝ်း ပေါ အူ စိုပ်၊ “အာဆေ မိုဝ်း ဟျုဝ့် အီ နပ် ဒီ ထူမ်၊ တဲး အန် ထူမ် ဂြုဝ်း အုဝ် တီ။”

9 ဂေ ဒီဘဲ အန် ဝီ တး ဒီမွှတ် ဇဝ် ယေဆူ လွင် အူဖာမာ ပီ ကာလာင် အန် တီ။ 10 ဇဝ် ယေဆူ ဝီ တဝ်း ဒီ ဂေ၊ “အုဝ် တဲး ဘေ နပ် ဆီချာ ပီ တူ ဒွိုမ် နပ် အီ ဟဝ် လွင် မိူင် ပီ အိုပ် ဇဝ်ဖြာ။ အီ မုး ဒူအီ ဟဝ်၊ အုဝ် လုဝ် မာနုဝ် လွင် အန် တီ ဒီ ဂေ၊ တဲး န့ ဘဲန် အူဖာမာ အန်၊ တဲး ဂေ ပွိုန် ဒီ ယိုဝ်၊ ယီ တူ လိုဝ်း ဆီချာ ဒီ ဂေ။ တဲး ဂေ ပွိုန် ဒီ ထူမ် ဂြုဝ်း၊ ယီ တူ နပ် ဆီဖဝ် အန်။

11 အူဖာမာ ပီ ကာလာင် အုဝ် လွင် ဒူအီ ဘြတ် ဆီမာ ငှုဝ်၊ န့ ပါယ် နီ။ ဆီမာ ငှုဝ်၊ န့ ပီ ဂြုဝ်း ဇဝ်ဖြာ။ 12 ဆီမာ ငှုဝ် မင် ဘူင့် အီ စုဝ်း ဒီ ခူပ် န့တေန့်၊ န့ ပီ ဂေ ဒူအီ အီ ထူမ် ဂြုဝ်း ဇဝ်ဖြာ။ ဘုဝ် ကာနမ် ယီ တး ဒိုဝ်း ဝဲန် ဂြုဝ်း တီ၊ ကွဲ့ တဲး န့ လိုပ် ခဲင် နဝ်း ဂေ၊ ကွဲ့ တဲး ဂေ ညှိုမ် ဂြုဝ်း ဇဝ်ဖြာ၊ ကွဲ့ တဲး န့ ချွတ် ဂေ။ 13 ဆီမာ ငှုဝ် အီ စုဝ်း ဒဲင် မာဝ်၊ န့ ပီ ဂေ ဒူအီ အီ ထူမ် ဂြုဝ်း ဇဝ်ဖြာ။ ဟဲ့ ဟွတ့်၊ ဂေ မိူဝ် ညှိုမ် ဘော ခူယ် ဒါခိုယ်။ နဝ်း ဒါခိုယ် တီ ယီ တူ ကွယ် လှေန့် ဒီ ဂေ။ န့ ပီ ဂေ တူ တဲး ရျီး အန် လိုပ် ခဲင် နဝ်း ဂေ။ ဂေ ဒီ ညှိုမ် အူ ကာစန်။ ဆေ ဘုဝ် ကာနမ် တး ကာဆုး ဂေ ဘူင် နာ တူ မွှိုမ် ဒွန် မျုဝ်၊ ပီ ညှိုမ် ဂေ၊ န့ ဝီ ဟြာယ် အူ ဇေန့်။ 14 ဆီမာ ငှုဝ် အီ စုဝ်း ဒူင် မိုဝ်း ဒဝ် မာအာတ့်၊ န့ ပီ ဂေ ဒူအီ ထူမ် ဂြုဝ်း ဇဝ်ဖြာ။ ဟဲ့ ဟွတ့်၊ ဂေ ဝီ မိုဝ်း နဝ်း ကာဟွာ့ လွင် ဘဲန် မျုဝ် ဘဲန် မျုဝ်။ ဂေ ဘော အွန် ဒီ လိုမ်လာ ကြုဝ်ကြာမ် ဂေ။ ဟဲ့ ဟွတ့် ဂေ ဘော ဟြေတ့် ဘဲန် မျုဝ် ဘဲန် မျုဝ် အီ တဲး ဂေ မိုဝ်း နဝ်း ဒါခိုယ်။ ပီ ဘူင် ဂေ ဇိုဝ် တီ၊ န့ ပီ၊ ဒဝ် မာအာတ့် အီ ယာပ် ငှုဝ်။ ပါယ် တီ ဘော ဂြုဝ်း ဇဝ်ဖြာ အီ ဟဲ့ လိုပ် ခဲင် နဝ်း ဂေ တူ ဘဲန် အာဂျိုဝ် ဒီ ဂေ။ 15 ဆီမာ ငှုဝ် အီ စုဝ်း ဒူင် မိုဝ်း ကာဒါယ် ဘွတ်၊ န့ ပီ ဂေ ဒူအီ အီ ထူမ် ဂြုဝ်း ဇဝ်ဖြာ။ ဂေ မိူဝ် ညှိုမ်၊ တဲး န့ လိုပ် ခဲင် နဝ်း ဂေ၊ တဲး န့ ဘဲန် နဝ်း မှာန် နဝ်း မွှိုမ် ဒီ ဂေ။ ဂေ ဘော တဲး ဂြုဝ်း ဇဝ်ဖြာ ကွယ် ခဲင် နဝ်း ဂေ၊ ကွဲ့ တဲး ဂေ ပိဝ်၊ တဲး န့ မိုဝ်း အာဂျိုဝ် အန် ပီ ငှုဝ် အီ မိုဝ်း လေး ကိူန်။” ပါယ် တီ ဇဝ် ယေဆူ မာနုဝ် ဒီဘဲ အန်။

16 ဇဝ် ယေဆူ ဝီ တဝ်း၊ “အာဝ် မိုဝ်း အာဆေ၊ အီ ပီဒဝ့် ငဝ် အွမ်၊ ဝီ ဆီဘ့လိုက် တာ ဆီလယ့်။ န့ မိူဝ် တူ မိုဝ်း အာဆေ အီ ဝီ ဘ့လေး အုန် ခြိုမ် ကာစှူင့် အိတ်။ ဒွန် အီ ဒီ ဘ့လေး အုန် ငဝ် အွမ် အီ ဟဲ့ ဟွတ့် ပီဒဝ့် ဒဲင် ဒင် အန်၊ တဲး န့ ဘ့လာင် ဒီ ဂေ ဒူအီ အီ လိုပ် ခဲင် ကာင်။ 17 ဒွန် မျုဝ် ပီ ချြီင် ဒူအီ ခဲင် အပ် ဝွင့်၊ ဂေ ဒီ ဝီ ဒိုဝ်း ဘျ ခဲင် ဘ့လာင် တဲး အီ ယိုဝ်။ ဘော ဒွန် မျုဝ် ပီ ဆီဘ့လိုက် အုန် ဂေ ကွဲ့ တဲး အီ နပ်၊ ဂေ ဒီ ဝီ ဘျ၊ တဲး ဒွန် အီ ကော နပ်။ 18 ဘေ လုဝ် ဆာဒိက် ဆီချာ ဂြုဝ်း ဇဝ်ဖြာ ပီ ထူမ် ဘေ။ အာဆေ နပ် လွင် ဂြုဝ်း ဇဝ်ဖြာ၊ အန် ဒီ ဝဲ နပ် ကာပွါ။ အာဆေ ယီ တူ ဆာဒိက်၊ ခဲ့ ပီ ဒွိုမ် ထူမ် အန်၊ အန် ဒီ ပိဝ်၊ ကွဲ့ ဟူ တဲး အန် လှုဝ်း မာဆေ။” ပါယ် တီ ဇဝ် ယေဆူ ဝီ မာနုဝ် ဂေ ဒီဘဲ အန်။

19 ဒေါ အန် တီ မာ ဂေ ဝါ ဇဝ် ယေဆူ ဟဲ့ တး ဇမ် ဒူင် ကွယ် အန်။ ဂေ ယီ တူ ပွိုန် လိုပ် ဒူင် ကွယ် အန်၊ ကူပ် ကာဆျီ့ ကိူန် ဒူအီ အီ ကွယ် ဒူပ် အန်။ 20 န့ ယီ မိုဝ်း ဒူအီ အီ တး ကာလာင် ဒီ ဇဝ် ယေဆူ၊ “မာ မဲ ဂေ ဝါ မဲ ဟဲ့ တး၊ ဆီ ယိုဝ် မဲ။ ဂေ ကွယ် နှဝ့် မဲ နာ ရေတ့်။” 21 ဇဝ် ယေဆူ ဝီ တဝ်း ဒီ ဂေ အီ ကွယ် ရိုမ် ဒူပ် အန် “ဘေ ဒူအီ အီ ထူမ် ဂြုဝ်း ဇဝ်ဖြာ ဘော ဘူင် ဒူပ်၊ ဘေ မုး မာ အုဝ် ဂေ ဝါ အုဝ် အာခါခ်ု။”

22 အူ ဆီငဲ၊ ဇဝ် ယေဆူ ဂေ ဒီဘဲ အန် ဝီ လိုပ် ခဲင် ရိုဝ်။ အန် ဘော တဝ်း ဒီ ဒီဘဲ အန်၊ “တဲး အေ ကာလုဝ်း အိုမ် ဒိုင် နီ၊ ဟာဝ် ဇမ် ဘ့လာက် နာ တ ဒွယ်။” ဂေ ဘော ဟာဝ် အူ ဇေန့်။ 23 ဒေါ ကွယ် ဂေ ခဲင် ရိုဝ်၊ ဇဝ် ယေဆူ ဟဲ့ အိတ်။ ဒေါ အန် တီ န့ မိုဝ်း ခုန် တာင် တး ဘုတ် ခဲင် အိုမ် တီ။ အိုမ် ဘော လိုပ် နုဝ့် ခဲင် ရိုဝ် ဂေ အူ ဇေန့်။ ဂေ ဟဲ့ ရိန် ဒီ စေတ့် ခဲင် အိုမ်။

24 ဂေ ဒီဘဲ ဇဝ် ယေဆူ ဘော ဘျိတ့် အန်။ ဂေ တဝ်း၊ “အိုယ် မဲ ဒါ ဆာရာ၊ အေ ဒီ စေတ့် ယမ် ခဲင် အိုမ်။”

ဇဝ် ယေဆူ ယိတ့်၊ ဝီ စ်ု ခုန် ဘော မာ အိုမ် တဲး န့ ယေန်။ ဝါယ် အန် တီ ခုန် ဘော ယေန်။ မာ အိုမ် အာဝ် ဟူ ဆီလွယ်၊ ဘော ယေန် ဒါခိုယ် အူ ဇေန့်။ 25 ဇဝ် ယေဆူ ဝီ တဝ်း ဒီ ဂေ ဒီဘဲ အန်၊ “မှဝ် န့ ပါယ် ပီ တူ ညှိုမ် ဘေ ဒီ အုဝ်။း”

ဝါယ် အန် တီ ဂေ ဘော အာမ် ဘော ယုဝ် ကာဆဝ် လွင် အန် တီ။ ဂေ ဝီ လာယ် ကာမွုန် တဝ်း၊ “ဒူအီ နီ၊ အန် မုး အာဆေ။း ဘော ခုန် ဘော မာ အိုမ် နပ် ဒီ ထူမ် ဂြုဝ်း အန်။”

26 ဂေ ဘော ပဝ့် ဟာဝ် ရိုဝ် တး ဇမ် မိူင် ကေဆာရေန် အီ ကွယ် ဘ့လာက် နာ တ အိုမ် ဒိုင်။ 27 ဒေါ လေး ဇဝ် ယေဆူ ခဲင် ရိုဝ်၊ အန် ကာတုန့် ဒါ အူ ဝီ အီ မိုဝ်း ကာနမ် ခဲင် ဒုဝ် ဘူင့် အန်။ ဟဲ့ လှေန့်၊ အန် တူ တာ ခြိုင်။ အန် မိူဝ် တူ ဆီ ကွယ် ခဲင် ကာင် ဒူပ် ဒူအီ။ အန် ယီ ကွယ် ခဲင် ဘာရေဝ်။ 28 ဒေါ ယိုဝ် ဒူအီ တီ ဒီ ဇဝ် ယေဆူ၊ အန် ဝီ ဒတ် တာင် ဘော ကေး ဒီ အာတ့် ဇဝ် ယေဆူ အူ ဇေန့်။ အန် တဝ်း၊ “အိုယ် မဲ ဇဝ် ယေဆူ၊ မဲ မုး ဂွန် ဇဝ်ဖြာ အီ တာင် လွှိုမ် တူတ့်။ မာဆေ ပီ လုဝ် မဲ ဒီ အုဝ်။း အုဝ် မှာန့်၊ ကွဲ့ တဲး မဲ ဒွါ ဒုက် ဒီ အုဝ်။” 29 အန် တဝ်း ပါယ် တီ ခုဝ်၊ ဇဝ် ယေဆူ ဟဲ့ ဟွတ့် စ်ု ကာနမ် ဟာယ် တွိုန် လေး ခဲင် ဒုဝ် ဘူင့် ဒူအီ တီ။ ကာနမ် ယီ ဟဲ့ ဒွိုမ် ပ့လိုက် ဒူအီ တီ ဘဲန် ဇေန့် ဘဲန် ဇေန့်။ ဂေ မိူဝ် ဟဲ့ ပက် ဒဲ အန်။ ဂေ ဘော ပက် ဝန် ဟိန် ဒီ ပ့လဝ် အန်၊ ဘ်ု အန်။ ဘဲန် ဇေန့် ဘဲန် ဇေန့် အန် ယီ ဟဲ့ ပျာတ့် ဝဲန် တူတ့်။ ကာနမ် ဟာယ် မိူဝ် ဟဲ့ ဆုတ့် ဒူအီ တွိုန် ဟာဝ် ကွယ် ခဲင် ပြဲ ကာဟဝ်း။

30 ဇဝ် ယေဆူ ယီ ဒီမွှတ် အန် တဝ်း၊ “မာဆေ ပီ စိူဝ် မဲ။း”

အန် ဝီ တဝ်း၊ “အုဝ် စိူဝ် အူ ဟြဲန့်၊” အန် တဝ်း ပါယ် တီ ကူပ် ဟဲ့ ကိူန် ဂေ ကာနမ် အီ ဟဲ့ လိုပ် ကွယ် ခဲင် ဒုဝ် ဘူင့် အန်။ 31 ဂေ ကာနမ် တွိုန် ဘော မှာန့် ကာဆဝ် ဒီ ဇဝ် ယေဆူ၊ ကွဲ့ တဲး အန် ဆုတ့် ဂေ လူင် ခဲင် ကာလုဝ့် ငါရာယ်။

32 ဒူင် ကွယ် ဂေ တွိုန် ယီ မိုဝ်း ဖိုင် မာလေတ့်။ ဂေ ကုန် ကာဒါယ် ဟြေတ့် ပီ ဒီ ဟူမ် ဘာင် နွန်။ ကာနမ် ဂေ မှာန့်၊ တဲး ဇဝ် ယေဆူ ခ့ဝါင် ဂေ လိုပ် ခဲင် မာလေတ့် ဂေ တီ။ ဇဝ် ယေဆူ ဘော ခ့ဝါင် ဂေ လိုပ်။ 33 ဂေ ကာနမ် ဘော လေး တဝ် ခဲင် ဒုဝ် ဘူင့် ဒူအီ တွိုန်၊ ဟာဝ် လိုပ် ခဲင် ဖိုင် မာလေတ့် တီ။ မာလေတ့် ဘော ဖိုင် ဝီ ဒဲန် လူင် ဒီ ဒါအာင် ဒါအွုး၊ ဝီ ဘျွာ ခဲင် အိုမ်၊ တဲး ဂေ ဘော ဖိုင် ကော ယမ် တူတ့်။

34 ဒူအီ ဟျီင် မာလေတ့်၊ ဒေါ ယိုဝ် ဂေ ဒွန် မျုဝ် ဇိုဝ် တီ၊ ဂေ ဘော တဝ်၊ ဝီ ဝေန့် ကာလာင် ဒီ ဒူအီ အီ ကွယ် ခဲင် မိူင် ဘော ဒီ ဂေ ဒူအီ အီ ကွယ် နာ ရေတ့် မိူင်။ 35 ဂေ ဒူအီ ဝီ တး ဒူင် ကွယ် ဇဝ် ယေဆူ၊ တဝ်း ဒီ ယွတ် လွင် အန် တီ။ ဒေါ တး ဇမ် ဂေ ဒီ အာတ့် ဇဝ် ယေဆူ၊ ဂေ ဘော ယိုဝ် ဒူအီ အီ ဟဲ့ ဒွိုမ် မိုဝ်း ကာနမ် ခဲင် ဒုဝ် ဘူင့် အန်။ အန် တုတ့် ခူပ် ဇဝ် ယေဆူ။ အန် ဟဲ့ ဝီ စှိုပ် ခြိုင် အန် ဘော ဟဲ့ ဝီ လှုဝ်း ဒုဝ် အန်။ ဟဲ့ ဟွတ့် ပန် တီ ဂေ ဒူအီ ကိူန် ကော ယုဝ် လွင် အန် တီ။ 36 ဂေ ဒူအီ အီ ဟဲ့ ယိုဝ် ဒီ ငါယ် ဂေ၊ ဂေ ဝီ ဟာဝ် ကာလာင် လွင် ဇဝ် ယေဆူ ဟဲ့ ပီကဲန် ဒူအီ တီ။ 37 ပန် တီ ဂေ ဒူအီ အီ ကွယ် ခဲင် မိူင် ကေဆာရေန် တွိုန် ဘော ဂေ ဒူအီ အီ ကွယ် နာ ရေတ့် မိူင်၊ ဂေ ဘော မှာန့်၊ တဲး ဇဝ် ယေဆူ လေး ခဲင် မိူင် ဂေ။ ခုဝ်၊ ဂေ ဒွန် အီ ယုဝ် ကာဆဝ် အန်။ ပန် တီ အန် မိူဝ် လိုပ် ခဲင် ရိုဝ်၊ ဝီ ဟာဝ် ပေါ အူ ပ့လုဝ့်။

38 ဒူအီ အီ ဟဲ့ ဒွိုမ် မိုဝ်း ကာနမ် တွိုန်၊ အန် မှာန့်၊ တဲး ဇဝ် ယေဆူ ခ့ဝါင် အန် ဟာဝ် ရိုမ် ဒူပ် ဇဝ် ယေဆူ။ ဇဝ် ယေဆူ ယီ စ်ု အန် ဝေန့် ဒူင် ကွယ် အန်။ 39 ဇဝ် ယေဆူ တဝ်း၊ “တဲး မဲ ဝေန့် ဒီ ကာင် မဲ။ တဲး မဲ ကာလာင် ဒီ ဒူအီ လွင် ဒွန် မျုဝ် ပဲ့ ဟဲ့ ဘူင် ဇဝ်ဖြာ ဒီ မဲ။” ဟဲ့ ဟွတ့်၊ ဒူအီ တွိုန် ဝေန့် ခဲင် မိူင် အန်၊ ဝီ ကာလာင် လွင် ပဲ့ ဟဲ့ ဘူင် ဇဝ် ယေဆူ ဒီ အန်။

40 ဇဝ် ယေဆူ ဟဲ့ ဟွတ့် ဝီ တး ဇမ် ဘ့လာက် နာ နီ၊ ဂေ ဒူအီ ကိူန် ဘ်ု ဒီ ရွုး အန်။ ဂေ ဟဲ့ ဟွတ့် နှဝ့် အန်။ 41-42 ဒေါ အန် တီ န့ မိုဝ်း ဒါ အီ အိုပ် ဇူင် ကြိုပ် ဂေ ဒူအီ အာယူဒါ ဇဝ်ဖြာ အူ ဝီ။ အန် စိူဝ် အာယာအီရုတ်။ အန် မိုဝ်း မီ ဂွန် အီဘိုန့် အူ ဝီ။ အာဆာက် ဂွန် တီ ဟဲ့ နုဝ့် ဂိုဝ် ဒီ အာ ဆီနမ်။ အန် မိူဝ် ဟဲ့ ဆဝ် ကာဆဝ်။ ဟဲ့ ရိန် ဒီ ယမ်။ ဒူအီ တီ ဘော တး အူ ဇေန့်၊ ကြိုပ် ဒီ အာတ့် ဇဝ် ယေဆူ။ အန် ဘော မှာန့်၊ တဲး ဇဝ် ယေဆူ ဝေန့် ဒီ ကာင် ဒူပ် အန်။

ဒေါ ဝေန့် ဇဝ် ယေဆူ ဒူပ် ဒူအီ တီ၊ ဂေ ဒူအီ ကိူန် လာယ် ကာဆျီ့ ကော ရူပ် ဇဝ် ယေဆူ။ 43 န့ ဘော မိုဝ်း အီဘိုန့် အူ ဝီ။ အန် မိုဝ်း ဆဝ် နှာမ် လေး အာဒါ ဂိုဝ် ဒီ အာ ဆီနမ်။ ကြုဝ်ကြာမ် အန် ဘော ရွိုန် အန်၊ အန် ဟဲ့ စှိုမ် တူတ့် ဒီ ဆာရာဝူန် အီ ဆီနမ် အန်။ ယီ တူ မိုဝ်း အီ ပဲ ပီဟြာယ် ဆဝ် အန်။ 44 အီဘိုန့် တွိုန် ဟာဝ် ဒီ ပန် ဇဝ် ယေဆူ ကာတဲ ဂေ ဒူအီ ကိူန်။ အန် ဘော ပါ ဘြုဝ် ဆီတုဝ် ဇဝ် ယေဆူ။ နှာမ် အန် ဘော ဟိတ် အူ ဇေန့်။

45 ဇဝ် ယေဆူ ဝီ ဒီမွှတ် တဝ်း၊ “အာဆေ ဟဲ့ ပါ အုဝ်။း” ဂေ ဒူအီ ဘောကာဂ့လျီတ် ဝီ တဝ်း၊ “အာဝ် မုး အုဝ်၊ အာဝ် မုး အုဝ်၊ အုဝ် တူ မိုဝ်း ဒီ ပါ မဲ။” အာပေတာရူ ဝီ တဝ်း၊ “အိုယ် မဲ ဒါ ဆာရာ၊ ဟဲ့ မိုဝ်း ဒူအီ ကိူန် အီ ကွယ် ရူပ် မဲ၊ ဟဲ့ လာယ် ကာဆျီ့ ခူပ် မဲ။ ဂေ ဒီ ဘော တာ ဒိုဝ် မဲ။”

46 ဇဝ် ယေဆူ ဝီ တဝ်း၊ “ဟဲ့ မိုဝ်း ဒူအီ အူ ဝီ အီ တာ ပါ အုဝ်။ အုဝ် ဟဲ့ နပ် လွင် အန် တီ။ ခုဝ်၊ ပွုန် အုဝ် ဟဲ့ လေး ခဲင် ဒုဝ် ဘူင့် အုဝ်။”

47 ယီ မုး အီဘိုန့် တွိုန်၊ အန် ဝီ နပ်၊ အာဝ် ပွိုန် ချြီင် ပီ ဘူင် အန်။ အန် ဘော တး ဘော ဒီယေန့် ဒီယုဝ် ကာဆဝ်။ အန် တး ကြိုပ် ဒီ အာတ့် ဇဝ် ယေဆူ၊ ကာလာင် လွင် နဝ်း ဆီ ပါ ဇဝ် ယေဆူ ဘော ကာလာင် လွင် ဆဝ် အန် ဟဲ့ ဟြာယ် အူ ဇေန့်။ အန် ကာလာင် တူတ့် ဒွန် မျုဝ် တဲး ဒူအီ ဘောကာဂ့လျီတ် ကော နပ်။ 48 ဇဝ် ယေဆူ တဝ်း ဒီ အန်၊ “အိုယ် ဂိုန့်၊ ကူပ် ညှိုမ် မဲ၊ ဆဝ် မဲ ဟဲ့ ဟြာယ်။ တဲး မဲ ဝေန့်၊ တဲး နဝ်း မဲ ဒါခိုယ်။”

49 ဒေါ ကာလာင် အန် ဂြုဝ်း တီ၊ န့ မိုဝ်း ဒူအီ တး ဒီ ကာင် ဒါ တာင် တွိုန်။ ဂေ တဝ်း ဒီ အာယာအီရုတ်၊ “ဂွန် မဲ ဟဲ့ ဟွတ့် ယမ်။ အာဝ် ဟူ လုဝ် ဒဲ့ ဒါ ဆာရာ တး ဒီ ကာင် မဲ။”

50 ဇဝ် ယေဆူ ဟဲ့ ဟွတ့် ထူမ် ဂြုဝ်း တီ၊ အန် ဝီ တဝ်း ဒီ အာယာအီရုတ်၊ “ကွဲ့ တဲး မဲ ယုဝ်။ တဲး မဲ ညှိုမ်။ ဂွန် မဲ ဒီ ကဲန်။”

51 ဂေ ဟဲ့ ဇမ် ခဲင် ကာင် ဒါ တာင် တွိုန်၊ ဇဝ် ယေဆူ တူ တဲး ဒူအီ ဟဝ် လိုပ်။ အန် ယီ ဒဲ့ အာပေတာရူ၊ အာယောဟာန် ဘော အာယာကူပ် ဘော ဂုန့် မာ ဂွန် အီဘိုန့် တွိုန်၊ တဲး မီ ဂေ လိုပ် ဒူပ် အန်။ 52 ဂေ ဒူအီ အီ ကွယ် ဒူင် တွိုန် ဝီ ကာဖြူမ် ဒီ ယာမ် ဆီနန် ဆီနိူင်။ ဇဝ် ယေဆူ ဝီ တဝ်း ဒီ ဂေ၊ “ကွဲ့ ယာမ်၊ ဂွန် တီ တူ ယမ်။ အန် အိတ်။”

53 ဂေ ဘော ဖိုင် ဝီ ကာညး ဇဝ် ယေဆူ၊ ဂေ ဟဲ့ နပ် ဆီချာ ဂွန် တီ ဟဲ့ ဟွတ့် ယမ်။ 54 ဇဝ် ယေဆူ ဝီ ပါ ဒဲ ဂွန် တွိုန်။ အန် တဝ်း၊ “အိုယ် ဂွန်၊ ယိတ့်။” 55 အန် ဟဲ့ ဟွတ့် တဝ်း ပါယ် တီ၊ နဝ်း ဖွိုမ် ဂွန် တွိုန် ဘော ဝီ လိုပ် ခဲင် ဒုဝ် ဘူင့် အန်။ အန် ဘော ယိတ့် အူ ဇေန့်။ ဇဝ် ယေဆူ ဘော စ်ု ဂေ၊ တဲး ဂေ ဒိုဝ်း ပီ ဒီ ဟူမ်၊ ဒွါ ဒီ အန်။ 56 ဂုန့် မာ အန် ယီ အာမ် ကာဆဝ် လွင် အန် တီ။ ဇဝ် ယေဆူ ယီ စ်ု ဂါယ် ကွဲ့ တဲး ဂါယ် ကာလာင် လွင် အန် တီ ဒီ အာဆေ။