1 ဇဝ် ယေဆူ ဟဲ့ ဟွတ့် ကာလာင် ပါယ် တီ ဒွန် မျုဝ်၊ တဲး ဂေ ဒူအီ ဘောကာဂ့လျီတ် ထူမ်၊ အန် ဝီ ဟာဝ် လိုပ် ခဲင် မိူင် ကာပေနာရိုမ်။

2 ခဲင် မိူင် တီ၊ န့ မိုဝ်း ဒါ ဘုဝ် အီ အိုပ် ဒါ ဆိုက် အူ မာယဝ်း ဝီ။ အန် တူ မုး အာမျုဝ် အီဆာရေလ။ အန် မိုဝ်း မှာယ် ပီ ရွက့် ကာဆဝ် အန် အူ ဝီ။ မှာယ် အန် တီ ဟဲ့ ဆဝ် ကာဆဝ်၊ ဟဲ့ ရိန် ဒီ ယမ်။ 3 ဒါ အီ အိုပ် ဒါ ဆိုက် အူ မာယဝ်း တွိုန်၊ အန် ဘော နပ် လွင် ဇဝ် ယေဆူ တး ဇမ် ခဲင် မိူင် ဂေ၊ အန် ဝီ ဒဲ့ ဂေ ဒါ တာင် ယူဒါ မင် အီ၊ တဲး ဂေ ဟာဝ် ဒူင် ကွယ် ဇဝ် ယေဆူ၊ ဒဲ့ ဇဝ် ယေဆူ တး ဒူင် ကွယ် အန်၊ ပီဟြာယ် ဆဝ် မှာယ် အန် တွိုန်။ 4 ဂေ ဒါ တာင် တး မှာန့် ကာဆဝ် ဒီ ဇဝ် ယေဆူ လွင် အန် တီ။ ဂေ တဝ်း၊ “ဒါ အီ အိုပ် ဒါ ဆိုက် အူ မာယဝ်း တီ၊ ဟဲ့ ကာအာပ် မဲ စွယ် ဒဲစေန့် အန်။ 5 အန် ဟဲ့ ရွက့် ဒူအီ အာမျုဝ် အေ။ အန် မိူဝ် ဟဲ့ ဆမ် ဒွါ ဇူင် ကြိုပ် အေ ဒူအီ အာယူဒါ ဇဝ်ဖြာ။” 6 ဂေ ဟဲ့ ဟွတ့် တဝ်း ပါယ် တီ ဒီ ဇဝ် ယေဆူ၊ အန် ဘော ဟာဝ် ရိုမ် ဒူပ် ဂေ။

ဒေါ ဟဲ့ တး ကာတတ် ဂေ ကာင် အန်၊ ဒါ အီ အိုပ် ဒါ ဆိုက် အူ မာယဝ်း တွိုန် ဟဲ့ တဲး ဂိုက် အန် ဟာဝ် ကာလာင် ဒီ ဇဝ် ယေဆူ တဝ်း၊ “အိုယ် မဲ ဇဝ်၊ ကွဲ့ ဟူ တဲး န့ ဘဲန် ဒုက် ဘဲန် ညှာပ် ဒီ မဲ ကူပ် အုဝ် ပေါ န့ ပွါ။ အုဝ် တူ ကာအာပ် တဲး မဲ ဇဝ် တး လိုပ် ခဲင် ကာင် အုဝ်။ 7-8 ဒူင် ကွယ် မဲ၊ အုဝ် မိူဝ် တူ ကာအာပ် ဟာဝ် ဇမ်။ အုဝ် ကွယ် ခြိုမ် ဒူအီ အီ မိုဝ်း ပွုန် တာင် လွှိုမ် အုဝ်။ အုဝ် ဘော မိုဝ်း ဒါ ဆိုက် အီ ကွယ် ခြိုမ် အုဝ်၊ အီ ဘူင် ဒူပ် ဂြုဝ်း အုဝ်။ ဆေ အုဝ် တဝ်း ဒီ အူ ဝီ ‘မဲ ဟာဝ်၊’ အန် ဘော ဟာဝ်။ ဆေ အုဝ် တဝ်း ဒီ ပေါ အူ ဝီ၊ ‘မဲ တး၊’ အန် ဒီ ဘော တး။ ဆေ အုဝ် စ်ု မှာယ် အုဝ်၊ ‘မဲ ဘူင် အာတီ၊’ အန် ဒီ ဘော ဘူင် ပီ စ်ု အုဝ်။ ပါယ် တီ၊ ဘော မဲ၊ ဆေ မဲ ကာလာင် ဂြုဝ်း အူ မျုဝ်၊ မှာယ် အုဝ် ဒီ ကဲန်။”

9 ဇဝ် ယေဆူ ဟဲ့ ဟွတ့် ထူမ် ဂြုဝ်း တီ၊ အန် အာမ် ဒူအီ တီ။ အန် ဝီ တဝ်း ဒီ ဒူအီ ကိူန် အီ ဒူပ် အန်၊ “အုဝ် တဝ်း ဒီ ဘေ၊ ခဲင် မိူင် အီဆာရေလ ဘော မိူင် အုဝ် တူ ဒွိုမ် ယိုဝ် ဒူအီ ခေါ အူ ဝီ အီ ညှိုမ် ဆီချာ ပီ ဒူအီ ဝီ နီ။” 10 ဝါယ် အန် တီ ဂေ ဒူအီ ပီ စ်ု ဒါ ဘုဝ် တဲး ဂေ ဟာဝ် ဒူင် ကွယ် ဇဝ် ယေဆူ တွိုန်၊ ဂေ ဘော ဝီ ဝေန့် ဇမ် ကာင်၊ ဂေ ဘော ယိုဝ် ဆဝ် မှာယ် အန် တွိုန် ဟဲ့ ဟြာယ်၊ ဟဲ့ ကဲန်။

11 ဝါယ် အန် တီ အာဝ် ဘော လှေန့်၊ ဇဝ် ယေဆူ ဘော ဟာဝ် ဇမ် ခဲင် မိူင် နာအိန်။ ဘော ဂေ ဒီဘဲ အန်၊ ဘော ဂေ ဒူအီ ဟဝ် ဂေ ကိူန် ဟဲ့ ဟာဝ် ရိုမ် ဒူပ် အန်။ 12 ဒေါ တး ဇမ် အန် ကာတတ် မာလုဝ်း မိူင်၊ အန် ကာတုန့် ဂေ ဒူအီ အီ ဟာဝ် ဒိပ် ဒူအီ ယမ်။ ဒူအီ ယမ် တီ မုး ဂွန် အီမာယ်။ မာ အန် မုး ယာ ဆီပြး အီ မိုဝ်း မီ ဂွန် အူ ဝီ တီ။ ဒူအီ ကွယ် ခဲင် မိူင် တွိုန်၊ ဂေ ကိူန် ဟာဝ် ရိုမ် ဒူပ် မာ အန်၊ ဟာဝ် တိုယ် ဂွန် အန်။ 13 ဒေါ ယိုဝ် ဇဝ် ယေဆူ အီဘိုန့် တွိုန်၊ အန် ကာဝေ ယာ တီ။ အန် ဘော တဝ်း၊ “ကွဲ့ ယာမ်။”

14 ပန် တီ ဇဝ် ယေဆူ ဝီ ပါ ကာလာတ့် ဒူအီ ယမ် တွိုန်။ ဂေ ဒူအီ အီ ကာဂွတ် အန် မိူဝ် စွင့် အူ ဇေန့်။ အန် တဝ်း၊ “အိုယ် ကာညူမ်၊ အုဝ် တဝ်း ဒီ မဲ၊ မဲ ယိတ့် ဒေါ တီ နီ၊” 15 ဟဲ့ ဟွတ့် တဝ်း ပါယ် တီ၊ ဒူအီ ယမ် ယိတ့် အူ ဇေန့်၊ ကာလာင် ဂြုဝ်း ဒီ ဒူအီ ဟဝ်။ ဇဝ် ယေဆူ ဝီ အာပ် ကာညူမ် တွိုန် ဒီ မာ အန်။

16 ဒူအီ ဘောကာဂ့လျီတ် ဘော ယုဝ် လွင် အန် တီ။ ဂေ ဘော စုး ဒီ အိူပ် ဇဝ်ဖြာ။ ဂေ တဝ်း၊ “ဒူအီ ဘျာန် ဂြုဝ်း ဇဝ်ဖြာ ဝီ နီ ဟဲ့ ဘွတ် ကာဆဝ်။” ဂေ မိူဝ် တဝ်း၊ “ဇဝ်ဖြာ ဟဲ့ တး ဇမ် ဒူင် ကွယ် အေ၊ စွယ် အေ ဒူအီ ပီ ရဝ်း အန်။” 17 လွင် ပီ ဘူင် ဇဝ် ယေဆူ တီ၊ န့ ဘော ဘြဲ ဟာဝ် ဒွန် ပ့လုဝ့် ခဲင် အိူင် ယူဒါ ဘော ခဲင် မိူင် အီ ကွယ် ကာတတ် အိူင် ယူဒါ။

18 ဂေ ဒီဘဲ အာယောဟာန် တွိုန် ဝီ ဟာဝ် ကာလာင် လွင် ပီ ဘူင် ဇဝ် ယေဆူ ဒွန် မျုဝ် ဒီ အာယောဟာန်။ အာယောဟာန် ဝီ ဒဲ့ ဒီဘဲ အန် အာ ဝီ။ 19 အန် စ်ု ဂါယ် ဟာဝ် ဒူင် ကွယ် ဇဝ် ယေဆူ၊ တဲး ဂါယ် ဒီမွှတ် တဝ်း၊ “ဟဲ့ မှာန်၊ မုး မဲ ဒူအီ အီ ဒီ တး ချွတ် ယေ။း ဆေ အာဝ် ပါယ် တီ၊ ယေ လုဝ် နှဝ့် ပေါ အူ ဝီ။း”

20 ဂါယ် ဟဲ့ တး ဇမ် ဒူင် ကွယ် ဇဝ် ယေဆူ၊ ဂါယ် ဝီ တဝ်း ဒီ အန်၊ “ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တွိုန်၊ အန် ဟဲ့ တိုယ် ယာယ် တး ဒူင် ကွယ် မဲ။ အန် ဆီ နပ် ဆီချာ၊ ယုဝ် န့ မုး မဲ၊ ဝီ ပီ နှဝ့် ယေ ဒူအီ အီ ဒီ တး။း ယုဝ် ယေ လုဝ် နှဝ့် ပေါ အူ ဝီ။း” 21 ဒေါ တး ဂါယ်၊ ဂါယ် ယိုဝ် ဇဝ် ယေဆူ ဘူင် တဲး ဆဝ် ဒူအီ ဟြာယ် ဘဲန် မျုဝ် ဘဲန် မျုဝ်။ ဘော ကာနမ် ဟာယ် အန် ဆုတ့် လေး ခဲင် ဒုဝ် ဒူအီ။ ဘော ဒူအီ ငါယ် အပ်၊ အန် တဲး ငါယ် ဂေ ဝီ ဘ့လာင်။ 22 ဇဝ် ယေဆူ ဝီ ကာလာင် ဒီ ဒီဘဲ အာယောဟာန် တွိုန် တဝ်း၊ “တဲး ဘာယ် ဝေန့်၊ ကာလာင် ဒီ ဒါ ဆာရာ ဘာယ် လွင် ပဲ့ ဟဲ့ ယိုဝ် ပဲ့ ဟဲ့ ထူမ် ဘာယ်။ ဂေ ဒူအီ ငါယ် အပ် ဟဲ့ ပွိုန် ဝီ ယိုဝ်။ ဂေ ဒူအီ ပ့လဝ် ယမ် ဟဲ့ ပွိုန် ဝီ ဟာဝ်။ ဂေ ဒူအီ အီ မိုဝ်း ဆဝ် ဒု^a ဟဲ့ ဝီ ကဲန်။ ဂေ ဒူအီ ဟျုဝ့် ကာအာဝ် ဝီ ပွိုန် ထူမ်။ ဂေ ဒူအီ ဟဲ့ ဟွတ့် ယမ်၊ ဂေ ဝီ ယိတ့် ဝီ အိမ်။ ဘော ဂေ ဒူအီ ဇမ် ဒုက်၊ ဂေ ဒူအီ ဂိန်၊ ဂေ ဟဲ့ ပွိုန် ဒီ ထူမ် လွင် ဇဝ်ဖြာ ချွတ် ဒူအီ။ 23 တဲး ဘာယ် ဘော တဝ်း ဒီ အန်၊ အာဆေ တူ မိုဝ်း နဝ်း ကာလိင် ကာလဲ ကူပ် အုဝ်၊ အန် မိုဝ်း နဝ်း ဒါခိုယ်။ တဲး ဘာယ် ဝီ ကာလာင် ပါယ် တီ၊ ဒီ ဒါ ဆာရာ ဘာယ်။”

24 ဒီဘဲ အာယောဟာန် ဂါယ် တွိုန် ဟဲ့ ဟွတ့် ဝီ ဝေန့်၊ ဇဝ် ယေဆူ ဝီ စုး ဒီ ကာလာင် လွင် ဒါ ဆာရာ အာယောဟာန် ဒီ ဂေ ဒူအီ အီ ကွယ် ကာဇု ဒူင် ကွယ် အန်။ အန် တဝ်း ဒီ ဂေ၊ “ဒေါ ဟာဝ် ယွတ် ဘေ အာယောဟာန် ခဲင် ပြဲ ကာဟဝ်း၊ မာဆေ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ ပီ ကာဘာင် ဂုဝ်�လင် အီ ဒီယုး ဆေ ခုန် တး ဘုတ်။း အန် တူ ပီ ဒူအီ ဇိုဝ် တီ။ 25 ဆေ အာဝ် ပါယ် တီ၊ မာဆေ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ စှိုပ် ခြိုင် စှိတ်။း အာဝ် မုး ပါယ် တီ။ ဘေ ဘော နပ် ဆီချာ၊ ဂေ ဒူအီ အီ စှိုပ် ခြိုင် စှိတ် ဘော ကွယ် ဒူင် စှိတ်၊ ကွယ် ခဲင် ဟုဝ် ခုန်ဒီခမ်။ 26 ဆေ အာဝ် ပါယ် တီ၊ မာဆေ န့ မုး၊ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ ဘျာန် ဂြုဝ်း ဇဝ်ဖြာ။း အာတီ ဟဲ့ မုး၊ ဟဲ့ မှာန်။ အုဝ် တဝ်း ဒီ ဘေ၊ အန် မုး ဒူအီ အီ တာင် လွှိုမ် ဒူအီ အီ ဘျာန် ဂြုဝ်း ဇဝ်ဖြာ။ 27 လွင် ဒါ ဆာရာ အာယောဟာန် ဟဲ့ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊

‘တဲး မဲ ယွတ်၊ အုဝ် ဒီ တိုယ် ဒဲစေန့် အုဝ် အူ ဝီ၊ တဲး အန် ယဲတ့် ဒီ အာတ့် မဲ။ ဟီ ဇမ် ပန် ဒီ တး မဲ၊ ဒူအီ တီ၊ အန် ဒီ မ့ပြာယ် န့တေန့် မဲ။’

28 အုဝ် ယီ တဝ်း အာခ်ု ဒီ ဘေ၊ အူ ဆိန့် ဒေါ ဂုဝ် အန် ကော ဇမ် အာတိုဝ် နီ၊ န့ တူ ဒွိုမ် မိုဝ်း ဒူအီ အူ ဝီ အီ တာင် လွှိုမ် ဒါ ဆာရာ အာယောဟာန် အီ စိုပ် ဒူအီ ခဲင် အိုမ်။ ဆေ န့ ယီ မုး ခဲင် မိူင် ပီ အိုပ် ဇဝ်ဖြာ၊ ဒူအီ အီ တူ မိုဝ်း ဒီခုဝ် မာဆေ၊ အန် ဒီ တာင် လွှိုမ် အာယောဟာန် တီ။”

29 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ ဂေ ဒူအီ ကိူန် ဘော ဂေ ဒူအီ ဂဲပ် ရွိုန် စိုင်၊ ဂေ ဟဲ့ ဟွတ့် ထူမ် ဂြုဝ်း အန်၊ ဂေ ဘော အိူပ် ဇဝ်ဖြာ လွင် အန် တီ အူ ဇေန့်။ ဂေ တဝ်း၊ ဇဝ်ဖြာ ဟဲ့ မုး၊ ဟဲ့ မှာန် အာခါခ်ု။ ဒူအီ ဂေ တီ ဟဲ့ ဟွတ့် တဲး ဒါ ဆာရာ အာယောဟာန် စိုပ် ဂေ ခဲင် အိုမ်။ 30 န့ ယီ မိုဝ်း ဂေ ဒူအီ ဖိုင် ဖာရီဆဲ ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ တူ ခမ် ဒီ စိုပ် ခဲင် အိုမ်။ ဂေ တူ ညှိုမ် ခဲင် နဝ်း၊ တူ တဲး ဇဝ်ဖြာ ဘူင် ပီ အိုင် အန် ခဲင် နဝ်း ဂေ။

31 ဇဝ် ယေဆူ ဝီ တဝ်း၊ “ဂေ ဒူအီ အီ ကွယ် ဇာတ် နီ၊ အုဝ် ဒီ လုဝ် ကာဂဝ် ဂေ ဒီ အာဆေ။း ဂေ ဘော ပီ အာဆေ။း 32 ဂေ ပီ ဂွန်၊ အီ ကွယ် ဒီ ဂ့လ လာယ် ဒီလာဝ်၊ ဘော တဝ်း ဒီ ဂိုက် ဂေ၊ ‘ဒေါ ဟဲ့ က်ု ယေ ဂြိုင် ဒီ ဘေ၊ ဘေ တူ ဂါ၊ တူ ဘူင် ပီ အိုင် ယေ။ ဒေါ ဟဲ့ ယာမ် ယေ၊ ဘေ တူ ဝီ ကာဖြူမ် ဒီ ယာမ် ရိုမ် ဒူပ် ယေ။’ န့ ပီ၊ ဂိုက် ဂေ ဘော ဘူင် မာဆေ၊ ဂေ တူ အိုင်။

33 ပီ ဘူင် ဂွန် ဂေ တီ၊ န့ ပီ ပီ ဘူင် ဂေ အီ ဟဝ် ဒီ ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တွိုန်။ ဝါယ် ဟဲ့ တး အန်၊ အန် တူ ဟူမ် တူ ဒျီင် ပီ ဂေ ဒူအီ ဟဝ်။ ဘေ ယီ တူ အိုင် အန် ဘူင် ပါယ် တီ။ ဟဲ့ ဟွတ့်၊ ဘေ တဝ်း၊ အန် မိုဝ်း ကာနမ် လိုပ် ခဲင် ဒုဝ် ဘူင့် အန်။ 34 ပါယ် တီ န့ ဘော မုး ဝီ အီ ဟဲ့ ဘဲန် ဂွန် ဒူအီ။ ဘော အန် ဟဲ့ တး၊ ဘော ဟူမ် ဘော ဒျီင် ပီ ဒူအီ ဟဝ်။ ဘေ ယီ ကာလာင် လွင် အန်၊ ‘တဲး ဘေ ယွတ် ဒူအီ နီ။ အန် ဘော ဟူမ် တာင် ဟူမ် ဖဲ၊ အန် မိူဝ် ဒျီင် ပဝ်း။ အန် ဘဲန် ဂိုက် ဂေ ဒူအီ အီ ဂဲပ် ရွိုန် စိုင် ဘော ဂေ ဒူအီ အီ မိုဝ်း မှာပ်။’ အန် ဘော ဘူင် မာဆေ၊ ဘေ တူ အိုင်။ 35 ဆေ ဒူအီ ယီ မိုဝ်း အာငျာန် ပီ ဒွါ ဇဝ်ဖြာ၊ န့ ဒီ လိုဝ်း ဆီချာ လွင် ဟဲ့ မုး ဟဲ့ မှာန် ပီ ဘူင် ဇဝ်ဖြာ။”

36 န့ မိူဝ် မိုဝ်း ဒူအီ ဖိုင် ဖာရီဆဲ အူ ဝီ၊ အန် ဘာင် ဇဝ် ယေဆူ တး ဟူမ် ဘူမ် ခဲင် ကာင် အန်။ ဇဝ် ယေဆူ မိူဝ် ဟာဝ် လိုပ် ခဲင် ကာင် အန်၊ တဝ်း ဒီ ဟူမ် ရိုမ် ဒူပ် ဒူအီ တီ။ 37 ခဲင် မိူင် တွိုန် ယီ မိုဝ်း အီဘိုန့် အူ ဝီ။ ဂေ အီ ဟဝ် တဝ်း၊ အန် မိုဝ်း မှာပ် ကိူန်။ အန် ဘော ယိုဝ် လွင် ဇဝ် ယေဆူ တး ဟူမ် ဘူမ် ခဲင် ကာင် ဒူအီ ဖိုင် ဖာရီဆဲ တွိုန်၊ အန် ဘော ဟာဝ် ဂူင့် ကာပဝ် နာမန် အုး ငှုန်၊ တး ဇမ် ဒူင် ကွယ် ဇဝ် ယေဆူ။ 38 အန် ဟာဝ် ကွယ် နာ ပန် ဇဝ် ယေဆူ၊ ဝီ ဂိုပ် ကြိုပ် ဒီ ပ့လဝ် ဇဝ် ယေဆူ ဘော ယာမ်။ အိုမ် ငါယ် အန် စုဝ်း ဒီ ပ့လဝ် ဇဝ် ယေဆူ။ အန် ဘော ခုတ် ပ့လဝ် ဇဝ် ယေဆူ၊ တာ ဟိုက် ဂိန့် အန် ဘော ဝီ အုး ပ့လဝ် ဇဝ် ယေဆူ။ ဟဲ့ ဟွတ့် ပန် တီ အန် ဝီ ဒိုဝ်း နာမန် အုး ငှုန် ပီ ဂူင့် အန်၊ ဖဝ်း ဒီ ပ့လဝ် ဇဝ် ယေဆူ။

39 ဒူအီ ဖိုင် ဖာရီဆဲ အီ ဟဲ့ ဘာင် ဇဝ် ယေဆူ တး ဟူမ် ဘူမ် ခဲင် ကာင် အန် တွိုန်၊ အန် ဘော ယိုဝ် ပီ ဘူင် အီဘိုန့် တီ၊ အန် ဝီ ထာင် ခဲင် နဝ်း အန်၊ “ဆေ ဟဲ့ မှာန်၊ ဒူအီ နီ မုး ဒူအီ အီ ဘျာန် ဂြုဝ်း ဇဝ်ဖြာ၊ အန် ဒီ ဘော နပ် လွင် အီဘိုန့် အီ တး ပါ အန် တီ။ အန် ဒီ ဘော နပ်၊ အီဘိုန့် တီ အာဝ် မွှိုမ်၊ အာဝ် အး။”

40 ဒေါ ဇေန့်ဇာ အန် ခဲင် နဝ်း အန် ပါယ် တီ၊ ဇဝ် ယေဆူ တဝ်း ဒီ အန်၊ “အိုယ် အာဆီမူန်၊ အုဝ် ဆီ ကာလာင် ဂြုဝ်း ဒီ မဲ။” အာဆီမူန် ဝီ တဝ်း၊ “မဲ ဒါ ဆာရာ၊ တဲး မဲ ကာလာင်၊ အုဝ် ဟဲ့ ထူမ်။”

41 ပန် တီ ဇဝ် ယေဆူ တဝ်း ဒီ အန်၊ “န့ ဟဲ့ ဒွိုမ် မိုဝ်း အီမာယ် အာ ဝီ၊ ဂါယ် ဟဲ့ ကာရဝ်း ရွိုန် ဒီ ဒူအီ အူ ဝီ။ အူ ဝီ ဟဲ့ ကာရဝ်း ရွိုန် ဖန် မာယဝ်း ဘူင့်။ ပေါ အူ ဝီ ဟဲ့ ကာရဝ်း ရွိုန် ဖန် ဂိုဝ် ဘူင့်။^b 42 ဂါယ် အာ ဝီ တွိုန် ယီ တူ မိုဝ်း ဒီ ဒွါ ဝိဝ် ရွိုန် ပီ ကာရဝ်း ဂါယ်။ ဒါ ကာညာ ရွိုန် တွိုန် ဘော ထာယ် ဒီ ဂါယ် ခဲ့ ပီ ကာရဝ်း ဂါယ် ဒီ အန်။ မဲ ထာင် မာဆေ။း ဒူအီ အာ ဝီ တီ၊ အာဆေ အီ ဒီ ရွက့် ဒါ ကာညာ ရွိုန် လွှိုမ် ပေါ အူ ဝီ။း”

43 အာဆီမူန် ဝီ တဝ်း ဒီ အန်၊ “န့ ဒီ မုး ဒူအီ အီ ကာရဝ်း ရွိုန် ကိူန်။”

ဟဲ့ ဟွတ့်၊ ဇဝ် ယေဆူ ဝီ တဝ်း၊ “ဟဲ့ မှာန် ပီ တဝ်း မဲ တီ။”

44 ဒေါ အန် တီ ဇဝ် ယေဆူ ယွတ် အီဘိုန့် တွိုန်၊ ဘော ဝီ တဝ်း ဒီ အာဆီမူန်၊ “မဲ ယိုဝ် အီဘိုန့် နီ။း ဒေါ တး လိုပ် အုဝ် ခဲင် ကာင် မဲ၊ မဲ တူ မိုဝ်း ဒီ ဒိုဝ်း အိုမ်၊ ဘာယ် ပ့လဝ် အုဝ်။ အီဘိုန့် နီ ယီ ဟဲ့ ဘာယ် ပ့လဝ် အုဝ် တာ အိုမ် ငါယ် အန်၊ ဘော ဝီ ခုတ် တာ ဟိုက် ဂိန့် အန်။ 45 မဲ တူ ဝီ အုး အုဝ်။ အီဘိုန့် နီ ယီ ဟဲ့ အုး ပ့လဝ် အုဝ် အူ ဆိန့် ဒေါ တး လိုပ် အန် ခဲင် ကာင် နီ။^c 46 မဲ တူ ဖဝ်း နာမန် ဒီ ဂိန့် အုဝ်။ အီဘိုန့် နီ ယီ ဟဲ့ ဖဝ်း နာမန် အုး ငှုန် ဒီ ပ့လဝ် အုဝ်။ 47 အုဝ် တဝ်း ဒီ မဲ၊ ခဲ့ ကိူန် မှာပ် အန်၊ ဟဲ့ ဟွတ့် ဂဝ်း ဝဲန် တူတ့်။ ခုဝ်၊ အန် ဟဲ့ ရွက့် ကာဆဝ် အုဝ်။ အာဆေ ယီ ထာင်၊ အန် မိုဝ်း မီ မှာပ် အီ စဲက်၊ အန် မိူဝ် နပ် ဒီ ရွက့် အီ စဲက်။” ပါယ် တီ ဇဝ် ယေဆူ မာနုဝ် အာဆီမူန်။

48 ဝါယ် အန် တီ ဇဝ် ယေဆူ ဝီ တဝ်း ဒီ အီဘိုန့် တွိုန်၊ “မှာပ် ပီ ဘူင် မဲ ဒွန် မျုဝ် ဟဲ့ ဟွတ့် ဂဝ်း ဝဲန်။”

49 ဂေ ဒူအီ ဟဝ်၊ ဂေ အီ ဟူမ် ရိုမ် ဒူပ် ဇဝ် ယေဆူ၊ ဂေ ထာင် ခဲင် နဝ်း ဂေ၊ “ဒူအီ နီ၊ အန် မုး အာဆေ၊ အီ တဝ်း၊ အန် ပဲ ဒီ ဂဝ်း ဝဲန် မှာပ် ဒူအီ။း”

50 ဇဝ် ယေဆူ ယီ ဝီ တဝ်း ဒီ အီဘိုန့် တွိုန်၊ “ကူပ် ညှိုမ် မဲ ဒီ အုဝ်၊ န့ ဟဲ့ ချွတ် မဲ။ တဲး မဲ ဝေန့်၊ တဲး မဲ ဒါခိုယ်။”