1 ဆီငဲ ဒီလှဝ် အူ ဆီငဲ၊ ဇဝ် ယေဆူ ဟာဝ် ဒူပ် န့တေန့် ခဲင် မာန်။ ဘော ဂေ ဒီဘဲ အန် ဟာဝ် ရိုမ် ဒူပ် အန်။ ဒေါ အန် တီ ဂေ ဟဲ့ ဆီကတ် ကာယူင့် ငှုဝ်၊ ဆီဘွတ် ဟူမ်။ 2 ဂေ ဖိုင် ဖာရီဆဲ မင် အီ၊ ဂေ ယီ တဝ်း ဒီ ဇဝ် ယေဆူ၊ “မှဝ် န့ ပါယ် ပီ ဘူင် ဘေ ပီ ခြဲ ဒါရာ အေ ဘူင် ဒေါ မုး ဆီငဲ ဒီလှဝ်။း”

3 ဇဝ် ယေဆူ ဝီ တဝ်း ဒီ ဂေ၊ “ဘေ တူ ဒွိုမ် တိး ခဲင် ဘပ် ဇဝ်ဖြာ လွင် အာဒါဝိတ် ဘော ဂေ အီ ဒူပ် အန်။း ဒေါ ကာပြာန့် ဂေ ပီ ဒီ ဟူမ်၊ 4 အာဒါဝိတ် ဟဲ့ ဟာဝ် လိုပ် ခဲင် ကာင် ဒူင် ကြိုပ် ဂေ ဇဝ်ဖြာ၊ ဒိုဝ်း ခါမုန် ပီ ဘ့လေး ဂေ ဒီ အာတ့် ဇဝ်ဖြာ၊ ဝီ တဲး ဘော အန် ဘော ဂိုက် အန် ဟူမ်။ ဆေ အာဝ် မုး ဒူအီ အီ လှူ ဒီ ဇဝ်ဖြာ၊ ဒါရာ ဇဝ်ဖြာ တူ တဲး အီ ဟူမ် ခါမုန် တီ။ မာလဲ၊ ဇဝ်ဖြာ တူ ဒမ် မှာပ် ဒီ အန် ကူပ် ဘူင် အန် ပါယ် တီ။” 5 ဇဝ် ယေဆူ ဘော ဝီ တဝ်း ဒီ ဂေ၊ “အုဝ် အီ ဟဲ့ ဘဲန် ဂွန် ဒူအီ၊ န့ မုး အုဝ် အီ အိုပ် ဆီငဲ ဒီလှဝ်။”

6 န့ ဘော ဇမ် ဆီငဲ ဒီလှဝ် ပေါ အူ ဆီငဲ၊ ဇဝ် ယေဆူ ဟုဝ့် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ မာနုဝ် ဂေ ဒူအီ အီ ကွယ် ခဲင် ဇူင် တွိုန်။ န့ မိူဝ် မိုဝ်း ဒူအီ အူ ဝီ၊ ဒဲ အန် ဘ့လာက် အာအး ဟဲ့ ယမ်။ 7 န့ ဘော မိုဝ်း ဂေ ဒါ ဆာရာ အီ မာနုဝ် ဒါရာ ဇဝ်ဖြာ ဘော ဂေ ဖိုင် ဖာရီဆဲ မင် အီ။ ဂေ နှဝ့် ဒီ ယွတ်၊ ယုဝ် ဇဝ် ယေဆူ ဒီ ပီကဲန် တူ ပီကဲန် ဒူအီ တွိုန် ဒေါ မုး ဆီငဲ ဒီလှဝ်။ ဂေ ဆီ ဟြေတ့် ဒင်၊ တဲး ဂေ ပွိုန် ဒီ ဖျာက် ဇဝ် ယေဆူ။ 8 ဇဝ် ယေဆူ ယီ နပ် လွင် ပီ ခြာမ် ဂေ ခဲင် နဝ်း ဂေ။ အန် တဝ်း ဒီ ဒူအီ အီ မိုဝ်း ဒဲ အီ ဟဲ့ ယမ် ဘ့လာက်၊ “တဲး မဲ ယိတ့် တး ကွယ် နာ အာတ့် နီ။” ဟဲ့ ဟွတ့် တဝ်း ပါယ် တီ၊ ဒူအီ တွိုန် ဘော ယိတ့် ဟာဝ် ဇမ် ဒီ အာတ့် ဇဝ် ယေဆူ။

9 ပန် တီ ဇဝ် ယေဆူ ဝီ တဝ်း ဒီ ဂေ ဒူအီ အီ ကွယ် ခဲင် ဇူင် တွိုန်၊ “အုဝ် ဆီ ဒီမွှတ် ဘေ၊ မာဆေ ပီ ထာင် ဘေ။ ဆေ န့ မုး ဆီငဲ ဒီလှဝ်၊ လုဝ် ဘူင် နာ မွှိုမ်၊ လုဝ် ဘူင် နာ တူ မွှိုမ်။း လုဝ် ချွတ် ဒူအီ။း လုဝ် ဘူင် တဲး အီ ယမ်။း မာဆေ ပီ ဒမ် ဒါရာ ဇဝ်ဖြာ အေ ဘူင်။း”

10 ဟဲ့ ဟွတ့်၊ ဇဝ် ယေဆူ ယွတ် ဂေ ဒူအီ ဘောကာဂ့လျီတ်။ အန် ဝီ တဝ်း ဒီ ဒူအီ တွိုန်၊ “တဲး မဲ စုဝ့် ဒဲ မဲ။” ဟဲ့ ဟွတ့်၊ ဒူအီ တွိုန် ဘော စုဝ့် ဒဲ အန်။ န့ ဘော ကဲန် အူ ဇေန့်။ 11 ဒူအီ ဂေ တွိုန် ဘော ရူ ကာဆဝ် ခဲင် နဝ်း ဂေ။ ဂေ ဘော လာယ် ဆင်ချာင် လွင် ပီ ဒီ ပါယ် ဂေ ဒီ ဘူင် ဒီ ဇဝ် ယေဆူ။

12 ဒေါ အန် တီ ဇဝ် ယေဆူ ဟုဝ့် ဒဲင် နွန် အူ ပ့လုဝ့် တဲး အန် ဆာခိုဝ် ဒီ ဇဝ်ဖြာ။ အန် ဘော ဆာခိုဝ် နွင် ခိူန်၊ ကော ဇမ် ဆိန့်ဝး။ 13 ပြဲ ဟဲ့ ဝး၊ အန် ဝီ ဒဲ့ ဂေ ဒီဘဲ အန် တး ဇမ် ဒူင် ကွယ် အန်။ ခဲ့ ကွယ် ဂေ ဒီဘဲ အန်၊ အန် ရဝ်း ဂိုဝ် ဒီ အာ ဝီ၊ တဲး ဂေ ဘဲန် ဒူအီ ပီ ရဝ်း ပီ တိုယ် ဇဝ် ယေဆူ။ 14 ဒူအီ ပီ ရဝ်း အန် ဘော စိူဝ် အာဆီမူန်။ ဇဝ် ယေဆူ ဝီ တဲး အန် စိူဝ် အာပေတာရူ။ အန် ဘော ရဝ်း အာအန်ဒါရူ အီ မုး ဝါ အာဆီမူန် ဘော အာယာကူပ် ဂါယ် အာယောဟာန်၊ အာဖီလိပ် ဂါယ် အာဘာထုဝ်လုဝ်မုဝ် 15 ဘော အာမာထဲ ဂါယ် အာထုဝ်မာတ်၊ အာယာကူပ်၊ အီ မုး ဂွန် အာလာဖဲ ဘော အာဆီမူန်၊ အီ ဟဲ့ ဒွိုမ် ဘဲန် ဒါ ဇူန် 16 ဘော အာယူဒတ်၊ အီ မုး ဂွန် အာယာကူပ် ဘော အာယူဒတ် အီ စိူဝ် ဘော အာဆာခါရီအူတ်၊ အီ အာပ် ဇဝ် ယေဆူ ဒီ ရန်ဆူ အန်။

17 ဟဲ့ ဟွတ့် ဇဝ် ယေဆူ ဘော ဂေ ဒီဘဲ အန် လေး လူင် ဒဲင် နွန်။ ဂေ တး ဇမ် ဒူင် ဂ့လင် အူ ပ့လုဝ့်။ ဘော ဂေ ဒီဘဲ အန်၊ ဘော ဂေ ဒူအီ ကိူန် ဟဲ့ ကွယ် ရိုမ်။ ဂေ အီ ကွယ် ခဲင် အိူင် ယူဒါ၊ ဘော ဂေ အီ တး ခဲင် မိူင် ယေရူဆာလဲမ် ဘော မိူင် ထူရုဝ် ဂါယ် မိူင် ဆီဒူန်၊ ဘော ဂေ ဒူအီ အီ ကွယ် ကာတတ် အိုမ် နမ်မုက်ဆာရာ၊ ဂေ ဘောကာဂ့လျီတ် ဟဲ့ တး ကာဇု ဒူင် တွိုန်။ 18 ဂေ ဟဲ့ တး ထူမ် ဂြုဝ်း ပီ ကာလာင် ဇဝ် ယေဆူ။ ဂေ ဆီ တဲး အန် ပီကဲန် ဘော ဆဝ် ဂေ။ ဂေ ဒူအီ အီ မိုဝ်း နဝ်း လိုဝ် ကူပ် ဟဲ့ ပ့လိုက် ကာနမ် ဒီ ဂေ၊ ဇဝ် ယေဆူ ဘော တဲး န့ ဟြာယ် တူတ့် ဒွန် မျုဝ်။ 19 ဂေ ဒွန် အီ ထေဝ် ဒီ တာ ဒိုဝ် ဇဝ် ယေဆူ။ ခုဝ်၊ ဂေ ဟဲ့ နပ်၊ ပွုန် အန် ဒီ လေး ဒီ ဒုဝ် အန်၊ တဲး ဆဝ် ရောဂါ ဂေ ဟြာယ် ဒွန် အီ။

20 ဝါယ် အန် တီ ဇဝ် ယေဆူ ဝီ ယွတ် ဂေ ဒီဘဲ အန်။ အန် ဝီ စုး ဒီ ကာလာင် ဒီ ဂေ တဝ်း၊

23 ဆေ ဂေ ဘော ဘူင် ပါယ် တီ ဒွန် မျုဝ် ဒီ ဘေ၊ ဘေ လုဝ် ဒါင် ဂုင် ဂေဇူ ဒီ ဇဝ်ဖြာ။ ဘေ ဘော လုဝ် ခူယ်။ ခုဝ်၊ ရုး ပီ ဒီ ပွိုန် ဘေ ခဲင် မိူင် ဂါင်ဟြာဝ်၊ န့ ဒီ ကိူန်။ ဘော ဂုန့် ဒါ ဂေ ဟဲ့ ဒွိုမ် ဘူင် နာ တူ မွှိုမ် ဇိုဝ် တီ ဒီ ဂေ ဒူအီ အီ ဘျာန် ဂြုဝ်း ဇဝ်ဖြာ ဒေါ မွိုန်။

27 အုဝ် တဝ်း ဒီ ဘေ ဒူအီ အီ ထူမ် ဂြုဝ်း အုဝ် နီ၊ ဘေ လုဝ် ရွက့် ရန်ဆူ ဘေ။ ဘေ လုဝ် ဘူင် နာ မွှိုမ် ဒီ ဂေ ဒူအီ အီ ဇွင့် ဘေ။ 28 ဘေ လုဝ် မွင့်ကာရာ တဲး ဒီ ဂေ ဒူအီ အီ ဒိူင် ဒီ ဘေ။ ဘေ လုဝ် ဆာခိုဝ် ဒါင် ဂေ ဒူအီ ဒီ ဘူင် နာ စာဝ် ဒီ ဘေ။ 29 ဆေ န့ မိုဝ်း ဒူအီ ဒီ ကာထ ကာလာ ဘေ အူ ဘ့လာက်၊ တဲး ဘေ ဝီ မာငး၊ တဲး အန် ကာထ ပေါ ဘ့လာက်။ ဆေ န့ ဘော မိုဝ်း ဒူအီ အီ ဖာတ် ဒိုဝ်း ဆီတုဝ် တာင် ဘေ၊ ဘေ လုဝ် ဝီ ဘုတ့် ဒွါ ဘော ဆီတုဝ် ဖိူန် နာ ခဲင် ဒီ အန်။ 30 ဆေ ဒူအီ မှာန့် ဒွန် မျုဝ် ဒီ ဘေ၊ တဲး ဘေ ဒွါ ဒီ အန်။ ဆေ န့ မိုဝ်း ဒူအီ ဒိုဝ်း ကြုဝ် ဘေ ဒွန် မျုဝ်၊ ကွဲ့ မှာန့် တဲး အန် ဝီ ဒွါ ဝိဝ် ဒီ ဘေ။ 31 ဘေ ဆီ တဲး ဒူအီ ဟဝ် ဘူင် မျုဝ် မှဝ် ဒီ ဘေ၊ ဘေ ဝီ လုဝ် ဘူင် မျုဝ် တီ ဒီ အီ ဟဝ်။

32 ဆေ ဘေ ရွက့် မီ ဂေ ဒူအီ အီ ရွက့် ဘေ၊ အာဝ် မိုဝ်း ဒီခုဝ် မာဆေ။ ဘော ဂေ ဒူအီ မိုဝ်း မှာပ် ကိူန်၊ ဂေ ဘော နပ် ဒီ ရွက့် အီ ရွက့် ဂေ။ 33 ဆေ ဘေ ဘော ဘူင် နာ မွှိုမ် ဒီ ဂေ အီ ဝီ ဘူင် နာ မွှိုမ် ဒီ ဘေ၊ အာဝ် မိုဝ်း ဒီခုဝ် မာဆေ။ ဘော ဂေ ဒူအီ အီ မိုဝ်း မှာပ် ကိူန်၊ ဂေ ဘော နပ် ဒီ ဘူင် ပါယ် တီ။ 34 ဆေ ဘေ တဲး ဒူအီ ဟဝ် ဝါယ် ကြုဝ် ဘေ ကူပ် ဟဲ့ နပ် ဘေ၊ ဂေ မိုဝ်း ကြုဝ် ပီ ဒီ ပွိုန် ဂေ ဒီ ဝီ ဝျီ့ ဒီ ဘေ၊ အာဝ် မိုဝ်း ဒီခုဝ် မာဆေ။ ဘော ဂေ ဒူအီ မိုဝ်း မှာပ် ကိူန်၊ ဂေ လာယ် ကာဝါယ် ဒွန် မျုဝ်၊ တဲး ဂေ ဝီ ပွိုန် ခဲ့ ပီ ဒွါ ဂေ ခါ အာတ့်။ 35 ဘေ ယီ တူ လုဝ် ဘူင် ပါယ် တီ။ ဘေ လုဝ် ရွက့် ရန်ဆူ ဘေ။ ဘေ လုဝ် ဘူင် နာ မွှိုမ် ဒီ ဂေ။ ဘေ လုဝ် တဲး ဒူအီ ဝါယ် ဒွန် မျုဝ် ဒီ ဘေ၊ ကွဲ့ တဲး ဘေ နှဝ့် န့ဒဝ့် ဂေ ဒီ ဝီ ဒွါ ဝိဝ် ဒီ ဘေ။ ဆေ ဘေ ဘူင် ပါယ် တီ၊ ဘေ ဒီ ပွိုန် ရုး ကိူန် နာ အာတ့် နီ ဟာဝ်။ န့ ဒီ ဘော လိုဝ်း ဆီချာ လွင် မုး ဘေ ဂွန် ဇဝ်ဖြာ အီ တာင် လွှိုမ် တူတ့်။ ခုဝ်၊ ဘော ဇဝ်ဖြာ ဘူင် နာ မွှိုမ် ဒီ ဂေ ဒူအီ ဟာယ် ဘော ဒီ ဂေ ဒူအီ အီ တူ လှုဝ်း ဂေဇူ အန်။ 36 ဘေ လုဝ် ကာဝေ ဒူအီ၊ တဲး န့ ပီ ဂုန့် ဘေ ဟဲ့ ကာဝေ အီ ဟဝ်။

37 ကွဲ့ တဲး ဘေ ဆုင်ဖျာတ် ပီ ပါယ် အီ ဟဝ်။ ပါယ် တီ ဇဝ်ဖြာ မိူဝ် တူ ဆုင်ဖျာတ် ပီ ပါယ် ဘေ။ ကွဲ့ တဲး ဘေ ဒမ် မှာပ် ဒီ ဒူအီ ဟဝ်။ ပါယ် တီ ဇဝ်ဖြာ မိူဝ် တူ ဒမ် မှာပ် ဒီ ဘေ။ ဘေ ယီ လုဝ် ဂဝ်း ဝဲန် မှာပ် ဒူအီ ဟဝ်။ ပါယ် တီ ဇဝ်ဖြာ မိူဝ် ဒီ ဂဝ်း ဝဲန် မှာပ် ဘေ။ 38 ဘေ လုဝ် ဒွါ ဒွန် မျုဝ် ဒီ ဒူအီ ဟဝ်။ ပါယ် တီ ဇဝ်ဖြာ ဒီ ဘော ဒွါ ဒွန် မျုဝ် ဒီ ဘေ။ ပီ ဒီ ဒွါ ဇဝ်ဖြာ ဒီ ဘေ၊ န့ ယီ ကာလွှိုမ် ပီ ဒွါ အီ ဟဝ်။ န့ ပီ ဘေ မိုဝ်း ဘ့လဲ ဒီဂါဝ်။ အန် ဇဝ် ဒီ ကာခြုး ဘော ဒဲတ့်၊ တဲး န့ ကော ကာဒန်။ ပီ ပွိုန် ဘေ န့ ဒီ ကိူန် လွှိုမ် ပီ ဒွါ ဘေ။ န့ ပီ၊ ဘေ ဒီ ဘူင် ဒီ အီ မျုဝ် မှဝ်၊ ဘေ ဒီ ဝီ ပွိုန် မျုဝ် တီ။” ပါယ် တီ ဇဝ် ယေဆူ မာနုဝ် ဒီ ဂေ ဒီဘဲ အန်။

39 ဇဝ် ယေဆူ ဝီ ကာလာင် အူဖာမာ ဒီ ဂေ။ အန် တဝ်း ပါယ် နီ။ “ဆေ န့ မိုဝ်း ဒူအီ ငါယ် အပ်၊ အန် တူ ပဲ ဒီ ယဲတ့် ဒူအီ ငါယ် အပ် ပေါ အူ ဝီ၊ တဲး အန် ဟာဝ် ဒူပ် န့တေန့် မှာန်။ ဂါယ် ဘော အာ ဝီ ဒီ စုဝ်း ခဲင် ကာဒဝ်။ 40 ဆေ န့ မုး ဒီဘဲ အီ၊ အန် တူ တာင် လွှိုမ် ဒါ ဆာရာ အန်။ ဆေ ဂေ ဒီဘဲ ယီ ဟဲ့ ဟွတ့် ဟေန် တူတ့်၊ ဂေ ဒီ နပ် တူတ့် ခဲ့ ပီ နပ် ဒါ ဆာရာ ဂေ။

41-42 ဘေ ဒူအီ ညိုင်ရာင် ဘွတ်၊ ဘေ ပီ ဒူအီ အီ မိုဝ်း န့ဂူင့် ကာဒး ငါယ် ဘေ။ ဘေ ယီ တူ နပ် လွင် အန် တီ။ ဟဲ့ ဟွတ့်၊ မှဝ် ဘေ ဒီ ပါယ် ဒီ ပွိုန် ယိုဝ် ကာအး ဒီတဲတ် အီ ကွယ် ခဲင် ငါယ် ဘီနွင် ဘေ။ ဘေ လုဝ် ဒိုဝ်း ဝဲန် န့ဂူင့် အီ ကာဒး ငါယ် ဘေ၊ တဲး န့ လေး ဒီ အာတ့်။ ဟဲ့ ဟွတ့်၊ ဘေ ဒီ ဘော ပွိုန် ယိုဝ် တဲး န့ ကော လိုဝ်း ကာအး ဒီတဲတ် အီ ကွယ် ခဲင် ငါယ် ဘီနွင် ဘေ၊ တဲး ဘေ ပဲ ဒီ ဒိုဝ်း ဝဲန်၊ တဲး န့ လေး။

43 န့ တူ မိုဝ်း ဟေ မွှိုမ်၊ အီ မိုဝ်း ဘ့လေ တူ မွှိုမ်။ န့ မိူဝ် တူ မိုဝ်း ဟေ တူ မွှိုမ်၊ အီ ဒီ မိုဝ်း ဘ့လေ မွှိုမ်။ 44 ဟေ ဒွန် မျုဝ်၊ ဒူအီ နပ် အာမျုဝ် အန်၊ ဆေ ဂေ ယွတ် ဘ့လေ အန်။ ဒွန် အီ ဘော နပ်၊ အာဝ် ပွိုန် ဘေတ့် ဘ့လေ ဒီပူ ဒီ ဟေ ကြေန့်။ ဘော၊ ဘ့လေ မာငုန် အာဝ် ပွိုန် ဘေတ့် ဒီ ယွုန် မာအာတ့်။ 45 ဆေ န့ မိုဝ်း ဒူအီ မွှိုမ်၊ ခဲ့ ကွယ် နာ မွှိုမ် ခဲင် နဝ်း အန်၊ န့ ဒီ ဘော လေး။ ဆေ န့ ယီ မိုဝ်း ဒူအီ တူ မွှိုမ်၊ န့ ဒီ ဘော လေး ခဲ့ ကွယ် နာ တူ မွှိုမ် ခဲင် နဝ်း အန်။ ခဲ့ မိုဝ်း အီ ကွယ် နုဝ့် ခဲင် နဝ်း ဒူအီ၊ မူတ့် အန် မိူဝ် နပ် ဒီ ကာလာင် လွင် အန် တီ။

46 မှဝ် န့ ပါယ် ပီ ဒဲ့ ဘေ ဒီ အုဝ် တဝ်း၊ ‘မဲ ဇဝ်’။း ဘေ ယီ တူ ထူမ်၊ တူ ဘူင် ဒူပ် ပီ တဝ်း အုဝ် ဒီ ဘေ။ 47 အာဆေ ယီ တး ဇမ် ဒူင် ကွယ် အုဝ်၊ အာဆေ ဘော ထူမ် ဂြုဝ်း အုဝ်၊ အုဝ် ဒီ ဝီ ကာလာင် ဒီ ဘေ လွင် အန် တီ။ အန် ပီ ဒူအီ ပီ ကာလာင် အုဝ် ခဲင် အူဖာမာ နီ။ 48 ဒူအီ တီ၊ အန် ပီ ဒူအီ ဆမ် ကာင်၊ ဂိုဝ်း ကာဒဝ် ရွင့် တဲး န့ လိုက်၊ တဲး န့ ကွယ် ဒဲင် မာဝ်။ ဟဲ့ ဟွတ့် ပန် တီ ဆေ အိုမ် ပြဲ့ တာင် တး ဇုး စေန့် ရွင့် တွိုန်၊ န့ တူ ပဲ ဒီ တဲး ကာင် ကေး ကူပ် ဟဲ့ မန် ဆီချာ စေန့် ရွင့်။ 49 အာဆေ ယီ ထူမ် ဂြုဝ်း ပီ ကာလာင် အုဝ် နီ၊ တူ ဘူင် ဒူပ် ပီ တဝ်း အုဝ်၊ အန် ပီ ဒူအီ အီ ဆမ် ကာင် ဒဲင် ကာဒါယ် အီ တူ မိုဝ်း ပ့လူမ် မာဆေ။ ဒေါ ဝီ တး ဇုး အိုမ် ပြဲ့ တာင် ဒီ စေန့် ရွင့် ကာင် တွိုန်၊ န့ ဒီ ကေး ကာပျာတ့် လိုဝ် တူတ့် အူ ဇေန့်။” ဇဝ် ယေဆူ ဟဲ့ မာနုဝ် ပါယ် တီ။