1 အူ ဆီငဲ၊ ဇဝ် ယေဆူ တး ဒီ ခူပ် အိုမ် ဒိုင် အီ စိူဝ် အိုမ် ကေနေဆာရေတ်။^a ဂေ ဒူအီ ကိူန် မိူဝ် ဟဲ့ တး ဒူင် ကွယ် အန် တီ။ ဂေ ဘော လာယ် ကာဆျီ့၊ တဲး ဂေ ပွိုန် ဒီ ထူမ် ဂြုဝ်း ဇဝ်ဖြာ။ 2 ဇဝ် ယေဆူ ယိုဝ် ရိုဝ် အာ လှာင် ကွယ် ဒီ ခူပ် အိုမ်။ ဂေ ဒါ အီ မှေတ့် မာဂါ၊ ဟဲ့ လေး ခဲင် ရိုဝ်၊ လး န့ရပ် ဂေ။ 3 ရိုဝ် တွိုန်၊ န့ မုး ရိုဝ် အာဆီမူန်။ ဇဝ် ယေဆူ ဘော လိုပ် ကွယ် ခဲင် ရိုဝ် အူ လှာင်၊ စ်ု အာဆီမူန်၊ တဲး အန် ပဝ့် ရိုဝ်၊ လိုပ် ဟာဝ် ခဲင် အိုမ် အီ စဲက်။ ဟဲ့ ဟွတ့်၊ အန် ဘော တုတ့် ခဲင် ရိုဝ် တွိုန်၊ မာနုဝ် ဂေ ဒူအီ အီ ကွယ် ဒီ ခူပ် အိုမ်။

4 အန် ဟဲ့ ဟွတ့် မာနုဝ်၊ အန် ဝီ တဝ်း ဒီ အာဆီမူန်၊ “တဲး မဲ ဝီ ပဝ့် ရိုဝ်၊ ဟာဝ် ဇမ် ဒူင် လိုက် အိုမ်။ ဟဲ့ ဟွတ့်၊ ဘော မဲ ဘော ဂိုက် မဲ၊ တဲး ဘေ ဘျွာ န့ရပ် ဘေ၊ တဲး ဘေ ထေဝ် ဒီ မှေတ့် မာဂါ။”

5 အာဆီမူန် ဝီ တဝ်း ဒီ အန်၊ “အိုယ် မဲ ဒါ ဆာရာ၊ ယေ ဟဲ့ ဘျွာ န့ရပ် ယေ နွင် ခိူန်၊ ယေ ယီ တူ ပွိုန် မာဆေ။ ကူပ် ဟဲ့ စ်ု မဲ ဇဝ် ဒီ အုဝ်၊ အုဝ် ဒီ ဘော ဘျွာ န့ရပ် ယေ ပေါ အူ ဇေန့်။”

6 ဟဲ့ ဟွတ့် ပန် တီ ဂေ ဝီ ဘျွာ န့ရပ် ဂေ၊ ဝီ ပွိုန် မာဂါ ကိူန် ကာဆဝ်၊ တဲး န့ရပ် ဂေ ကော ကာပျာတ့်။ 7 အာဆီမူန် ဘော ဂေ ဒူအီ အီ ကွယ် ရိုမ် ဒူပ် အန်၊ ဂေ ဘော ဒဲ့ ဂိုက် ဂေ အီ ကွယ် ခဲင် ရိုဝ် ပေါ အူ လှာင်၊ တဲး ဂေ တး စွယ် ဂေ။ ဂေ ဘော ဝီ တး စွယ်၊ ဝီ ဒိုဝ်း အုန် မာဂါ ခဲင် ရိုဝ်၊ တဲး ရိုဝ် ဘော အာ လှာင် ကော ရိန် ဒီ စေတ့် လူင် ခဲင် အိုမ်။

8 အာဆီမူန်၊ အီ စိူဝ် ဘော အာပေတာရူ၊ အန် ဘော ယိုဝ် လွင် အန် တီ၊ အန် ဘော ခြိုပ်ခြဝ် ဒီ အာတ့် ဇဝ် ယေဆူ၊ ဝီ ကြိုပ် အန် တဝ်း၊ “အိုယ်၊ မဲ ဇဝ်၊ အုဝ် မှာန့်၊ တဲး မဲ လေး ဒူင် ကွယ် အုဝ်။ အုဝ် မုး ဒူအီ အီ မိုဝ်း မှာပ်။” 9 ပန် တီ အာဆီမူန် ဂေ ဂိုက် အန်၊ ဂေ အာမ် ကာဆဝ် ဒီ ပွိုန် ဂေ မာဂါ ကိူန် ခဲ့ တီ။ 10 အာယာကူပ် ဂါယ် အာယောဟာန်၊ အီ မုး ဂွန် အာဇေဘေဒေ၊ ဂါယ် အီ ဘူင် ရိုမ် ဂါန်၊ ဘော အာဆီမူန်၊ ဂေ ဘော အာမ် ကာဆဝ် လွင် အန် တီ။

ဇဝ် ယေဆူ ဝီ တဝ်း ဒီ အာဆီမူန်၊ “ကွဲ့ တဲး မဲ ယုဝ်။ အူ ဆိန့် ဒေါ တီ နီ ဟာဝ် နာ အာတ့်၊ ဘေ ဒီ ဘော ပွိုန် ဒီ ဒဲ့ ဒူအီ တး ဒူပ် အုဝ်၊ တဲး န့ ပီ ပီ မှေတ့် ဘေ မာဂါ တီ။” 11 အန် ဟဲ့ ဟွတ့် ကာလာင် ပါယ် တီ၊ ဂေ ဘော ဘ့လေး အုန် ရိုဝ် ဂေ ဒီ ခူပ် အိုမ်၊ ဘ့လေး ကြုဝ်ကြာမ် ဂေ ဒွန် မျုဝ်၊ ဝီ ဟာဝ် ဒူပ် ဇဝ် ယေဆူ။

12 အူ ဆီငဲ ဒေါ ကွယ် ဇဝ် ယေဆူ ခဲင် မိူင် အူ မိူင်၊ န့ ဘော မိုဝ်း ဒူအီ အူ ဝီ၊ အန် မိုဝ်း ဆဝ် ဒု။^b ဒေါ ယိုဝ် အန် ဇဝ် ယေဆူ၊ အန် ခြိုပ်ခြဝ် ဒီ အာတ့် ဇဝ် ယေဆူ၊ မှာန့် ကာဆဝ် ဒီ အန် ဇဝ်။ အန် တဝ်း၊ “အိုယ် မဲ ဇဝ်၊ ဆေ မဲ မိုဝ်း နဝ်း ဆီ ဘူင်၊ မဲ ဘော ပဲ ပီကဲန် အုဝ်၊ တဲး အုဝ် ဆီငါ ဒူပ် ပီ ဒမ် ဒါရာ။”

13 အန် ဟဲ့ ဟွတ့် တဝ်း၊ ဇဝ် ယေဆူ ဘော ဒိုဝ်း ဒဲ အန် ဟာ ဒိုဝ် ဒူအီ ဆဝ် တီ။ အန် မိူဝ် တဝ်း၊ “အုဝ် ဟဲ့ ဆီ ဘူင်။ တဲး မဲ ကဲန်။” အန် ဟဲ့ ဟွတ့် ကာလာင် ဂြုဝ်း တီ၊ ဆဝ် ဒု အန် တီ မိူဝ် ဟြာယ် အူ ဇေန့်။

14 ဇဝ် ယေဆူ ဝီ ဒမ် အန် တဝ်း၊ “ကွဲ့ ကာလာင် မာဆေ ဒီ ဒူအီ ဟဝ်။ မဲ ယီ လုဝ် ဟာဝ် ဒူင် ကွယ် ဒူအီ အီ လှူ ဒီ ဇဝ်ဖြာ၊ တဲး အန် ယွတ် ဒုဝ် မဲ။ ဟဲ့ ဟွတ့်၊ မဲ လုဝ် လှူ ခဲ့ ပီ ဒမ် ဒါ အာမုဝ်ဆဲ ဘေ လှူ၊ တဲး ဒွန် အီ နပ်၊ မဲ ဟဲ့ ကဲန်။”

15 လွင် ပီ ဘူင် ဇဝ် ယေဆူ တီ၊ န့ ယီ ဘြဲ ဒွန် ပ့လုဝ့် လွှိုမ် ခါ အာတ့်။ ဂေ အီ ကိူန် အီ တး ထူမ် အန် ဇဝ်၊ ဂေ မိူဝ် ဆီ တဲး အန် ပီဟြာယ် ဆဝ် ဂေ ဒွန် မျုဝ်။ 16 ဘဲန် ဇေန့် ဘဲန် ဇေန့် ဇဝ် ယေဆူ ယီ လေး ဟာဝ် ဆာခိုဝ် ဒူင် တူ မိုဝ်း ဒူအီ။

17 အူ ဆီငဲ ဇဝ် ယေဆူ ဘော မာနုဝ် ဒူအီ။ ဂေ ဖိုင် ဖာရီဆဲ မင် အီ ဘော ဂေ ဒါ ဆာရာ အီ မာနုဝ် ဒါရာ ယူဒါ မင် အီ၊ ဂေ ဘော ကွယ် ထူမ် ပီ ကာလာင် ဇဝ် ယေဆူ။ ဂေ ဟဲ့ တး ခဲင် အိူင် ဂါလီလေ ဘော ခဲင် အိူင် ယူဒါ ဒွန် ရဝ်။ ဘော ဂေ ဒူအီ ကွယ် မိူင် ယေရူဆာလဲမ် ဟဲ့ တး ကာဇု။ ပွုန် ဇဝ်ဖြာ ကွယ် ရိုမ် ဒူပ် ဇဝ် ယေဆူ တဲး အန် ပဲ ဒီ ပီဟြာယ် ဆဝ် ဂေ။ 18 ဒေါ အန် တီ ဒူအီ မင် အီ ဘော တး တိုယ် ဒူအီ အူ ဝီ အီ ဟဲ့ ယမ် ဘ့လာက်။ ဂေ တး ကာဂွတ် အန် ဒဲင် ကာစှူင့် အိတ် အန်၊ တဝ်း ဒီ တိုယ် အန် ဇမ် ခဲင် ကာင် ဒူင် ကွယ် ဇဝ် ယေဆူ၊ တဲး ဂေ ဘ့လေး အန် ဒီ အာတ့် ဇဝ် ယေဆူ။ 19 န့ ယီ တူ မိုဝ်း ဒူင် ဒီ ပွိုန် လိုပ်၊ ကူပ် ကိူန် ဂေ ဒူအီ အီ ကွယ် ဒီ ကာင် တွိုန်။ ဂေ ဝီ ကာဂွတ် အန် ဟုဝ့် ဒဲင် ကာတု ကာင်။ ဂေ ဘော ယဝ်း ကာတု ကာင်၊ တဲး န့ မိုဝ်း ကာဒဝ်။ ဟဲ့ ဟွတ့်၊ ဂေ ဝီ ဘျွာ လူင် အန် ဘော ကာစှူင့် အိတ် အန်၊ ဇမ် ဒီ အာတ့် ဇဝ် ယေဆူ။^c

20 ဇဝ် ယေဆူ ဘော ယိုဝ် နဝ်း ညှိုမ် ဂေ ဒူအီ တွိုန်၊ အန် တဝ်း ဒီ ဒူအီ ဆဝ်၊ “အိုယ် ဝါ၊ မှာပ် ပီ ဘူင် မဲ၊ အုဝ် ဟဲ့ ဟွတ့် ဘ့လွာ့ ဝဲန်။”

21 အန် ဟဲ့ ဟွတ့် ကာလာင် ပါယ် တီ၊ ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒူအီ ခဲင် ဖိုင် ဖာရီဆဲ၊ ဂေ ကာဖာ ခဲင် နဝ်း ဂေ၊ “ဒူအီ တီ ဟဲ့ ခဲန့် ဇဝ်ဖြာ။ အန် မုး ဒူအီ ပါယ် မှဝ်။း အာဝ် မိုဝ်း အာဆေ အီ ပဲ ဒီ ဘ့လွာ့ ဝဲန် မှာပ် အီ။ န့ မိုဝ်း မီ ဇဝ်ဖြာ အူ ကာဒင် အီ ပဲ ဒီ ဘ့လွာ့ မှာပ် အီ။”

22 ဇဝ် ယေဆူ ယီ နပ် ပီ ကာဖာ ဂေ ခဲင် နဝ်း ဂေ။ အန် ဝီ တဝ်း၊ “မှဝ် န့ ပါယ် ပီ ထာင် ဘေ ပါယ် တီ ခဲင် နဝ်း ဘေ။း 23 ဆေ အုဝ် တဝ်း ဒီ ဒူအီ ဆဝ်၊ ‘မှာပ် ပီ ဘူင် မဲ၊ အုဝ် ဟဲ့ ဟွတ့် ဂဝ်း ဝဲန်၊’ ဘေ ထာင် န့ ငှိုယ် ကူပ် တူ ပွိုန် ယိုဝ် ဘေ၊ ယုဝ် န့ ဘဲန် တူ ဘဲန် ပီ တဝ်း အုဝ်။ ဆေ အုဝ် ယီ တဝ်း ဒီ အန်၊ ‘တဲး မဲ ယိတ့် ဟာဝ်၊’ ဘေ ထာင် န့ ညှာပ် ကူပ် ပွိုန် ယိုဝ် ဘေ န့ ဒီ ဘဲန် တူ ဘဲန် ပါယ် တီ။ 24 အုဝ် ယီ တဲး ဘေ နပ် ဆီချာ၊ အုဝ် အီ ဟဲ့ ဘဲန် ဂွန် ဒူအီ၊ အုဝ် ဟဲ့ မိုဝ်း ပွုန် ဒဲင် ကာဒါယ်၊ တဲး အုဝ် ပဲ ဒီ ဘ့လွာ့ ဝဲန် မှာပ် အီ။” ပန် တီ ဇဝ် ယေဆူ ဘော တဝ်း ဒီ ဒူအီ ယမ် ဘ့လာက် တွိုန်၊ “အုဝ် တဝ်း ဒီ မဲ၊ ယိတ့်၊ တဲး မဲ ဒိုဝ်း ဂူင့် ဘော ဒူင် အိတ် မဲ၊ ဝီ ဝေန့် ဒီ ကာင် မဲ။” 25 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ အန် မိူဝ် ယိတ့် အူ ဇေန့်၊ တဲး ဂေ ဒူအီ ယိုဝ်။ အန် ဘော ဒိုဝ်း ဒူင် အိတ် အန်၊ ဝေန့် ဒီ ကာင် အန်။ အန် မိူဝ် အိူပ် ဇဝ်ဖြာ ဒေါ ဝေန့် အန်။ 26 ဂေ ဒူအီ ကိူန် မိူဝ် အာမ် ကာဆဝ် လွင် အန် တီ။ ဂေ ဘော အိူပ် ဇဝ်ဖြာ ဘော ယုဝ် လွင် အန် တီ။ ဂေ ဝီ လာယ် ကာမွုန် တဝ်း၊ “ဒေါ တီ နီ အေ ဟဲ့ ယိုဝ် အီ မွှိုမ် အာမ် ကာဆဝ်။”

27 ဝါယ် အန် တီ ဇဝ် ယေဆူ ဝီ လေး ခဲင် ကာင် တွိုန်၊ ဝီ ဟာဝ် ယိုဝ် ဒူအီ အီ ဂဲပ် ရွိုန် စိုင် အူ ဝီ။ အန် စိူဝ် အာလေဝီ။ အန် တုတ့် ဒူင် ဂဲပ် ဂေ ရွိုန် စိုင်။ ဇဝ် ယေဆူ တဝ်း ဒီ အန်၊ “တး ဒူပ် အုဝ်။” 28 ဟဲ့ ဟွတ့် တဝ်း ပါယ် တီ၊ အာလေဝီ ဘ့လေး တူတ့် ကြုဝ် အန် ဒွန် မျုဝ်၊ ဟာဝ် ဒူပ် ဇဝ် ယေဆူ။

29 ဝါယ် အန် တီ အာလေဝီ ဘာင် ဇဝ် ယေဆူ ဟူမ် ဘူမ် ခဲင် ကာင် အန်။ အန် ဟျီင် ဘော ဇဝ် ယေဆူ ဘော ဂေ ဒူအီ ဟဝ်။ ဘော ဂေ ဒူအီ အီ ဂဲပ် ရွိုန် စိုင်၊ ဂေ ကိူန် ကွယ် ရိုမ်၊ ဟူမ် ဘူမ် ခဲင် ကာင် အန်။ 30 ဂေ ဒူအီ ဖိုင် ဖာရီဆဲ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ယီ ကာလာင် ဒီ ဂေ ဒီဘဲ ဇဝ် ယေဆူ လွင် ပီ ဘူင် အန်။ ဂေ တဝ်း၊ “မှဝ် န့ ပါယ် ပီ ဟူမ် ရိုမ် ဘေ ဒူပ် ဂေ ဒူအီ အီ ဂဲပ် ရွိုန် စိုင် ဘော ဒူပ် ဂေ ဒူအီ အီ ဘူင် မှာပ် ဒွန် မျုဝ်။း”

31 ဇဝ် ယေဆူ ဝီ တဝ်း၊ “ဆေ ဒူအီ ဟဲ့ ပ့လူမ် ခ၊ အန် တူ လုဝ် ဆာရာဝူန်။ အာဆေ မိုဝ်း ဆဝ် ရောဂါ၊ အန် ဟဲ့ လုဝ် ဆာရာဝူန်။ 32 အုဝ် မိူဝ် တူ တး တဲး အုဝ် ဘာင် ဒူအီ မွှိုမ် တး ဒူပ် အုဝ်။ အုဝ် ဟဲ့ တး တဲး အုဝ် ဘာင် ဂေ ဒူအီ အီ မိုဝ်း မှာပ် တး ဒူပ် အုဝ်၊ တဲး ဂေ ဝဲန် နဝ်း ဘြိမ် ဂေ၊ ဝီ ဒိုဝ်း နဝ်း ကာမာယ်။”

33 ဒေါ အန် တီ န့ မိုဝ်း မင် အီ ဝီ ကာလာင် ဒီ ဇဝ် ယေဆူ တဝ်း၊ “ဘဲန် ဇေန့် ဘဲန် ဇေန့်၊ ဂေ ဒီဘဲ အာယောဟာန် ကဲမ် ဆိန့်၊ ခမ် ဒီ ယိူန် ပီ ဒီ ဟူမ် ဂေ ဘော ဆာခိုဝ် ဒီ ဇဝ်ဖြာ။ ဘော ဒီဘဲ ဂေ ဒူအီ ဖိုင် ဖာရီဆဲ ဘော ဘူင် ပါယ် တီ။ အီ မုး ဒီဘဲ မဲ၊ မှဝ် န့ ပါယ် ပီ ပွိုန် ဂေ ဟူမ် ဆေဆေ၊ တူ ဘူင် ပီ ဂေ။း”

34 ဂေ ဟဲ့ ဟွတ့် ဒီမွှတ် ပါယ် တီ၊ ဇဝ် ယေဆူ ဝီ တဝ်း ဒီ ဂေ၊ “ဆေ န့ မိုဝ်း ဘ့လွယ် ခတ်၊ ဒေါ ကွယ် ရိုမ် ကာညူမ် ဒူပ် ခဲတ့် အန်၊ ဘေ ထာင် ဂေ ဒူအီ အီ လိုပ် ဘ့လွယ် ဒီ ဘော ယိူန် ပီ ဟူမ် ဂေ။း ဘေ ဟဲ့ နပ် ဆီချာ၊ အာဝ် ပွိုန် ဘူင် ပါယ် တီ။ 35 န့ ယီ ဒီ ဇမ် အူ ဆီငဲ၊ ဂေ ဒီ ဒိုဝ်း ဝဲန် ကာညူမ် တီ။ ဒေါ အန် တီ ဂေ အီ လိုပ် ဘ့လွယ် တီ၊ ဂေ ဒီ ဝီ ယိူန် ပီ ဒီ ဟူမ် ဂေ။”

36 ဇဝ် ယေဆူ ဝီ မာနုဝ် ဂေ၊ တဲး န့ ဘဲန် အူဖာမာ။ အန် တဝ်း၊ “အာဝ် မိုဝ်း ဒူအီ ယာတ့် ဆီတုဝ် ကာမာယ် ဝီ ကာပါင် ဆီတုဝ် ဘြိမ်။ ဆေ အန် ဘူင် ပါယ် တီ၊ ဘော ဘိက် ကာမာယ် တွိုန် ဒီ ဝီ ပျာတ့် ဆီတုဝ် ဘြိမ် တဲး န့ လိုဝ်။ န့ တူ လာယ် ကာဇဝ်။ 37 န့ မိူဝ် အာဝ် မိုဝ်း ဒူအီ အီ ဟပ် အိုမ် မာငုန် ကာမာယ် ခဲင် ကာပဝ် ဘ့လေ ဘြိမ်။ ဆေ အန် ဘူင် ပါယ် တီ၊ အိုမ် မာငုန် ကာမာယ် တွိုန် ဒီ ဆီနမ် ခဲင် ကာပဝ် ဘ့လေ ဘြိမ် တီ၊ တဲး န့ ကော ကာလာတ့် လိုဝ်၊ တဲး န့ ကော စှိုမ်။ 38 ခုဝ်၊ အိုမ် မာငုန် ကာမာယ် လုဝ် ဟပ် ခဲင် ကာပဝ် ဘ့လေ ကာမာယ်။ 39 အာဆေ ယီ ဒျီင် အိုမ် မာငုန် ဘြိမ်၊ အန် တူ ဝီ ဆီ ဒျီင် အိုမ် မာငုန် ကာမာယ်။ အန် ဒီ တဝ်း၊ ‘အီ ဘြိမ် ဟဲ့ ဟွတ့် ဆီငဲး။’” ဇဝ် ယေဆူ ဟဲ့ မာနုဝ် ပါယ် တီ တဲး ဂေ နပ်၊ ဒါရာ ကာမာယ် ပီ မာနုဝ် အန် ဂါယ် ဒါရာ ဘြိမ် ပီ မာနုဝ် ဂေ ဒူအီ အာယူဒါ၊ အာဝ် ပွိုန် ကာဝ်ု။