1 ဝါယ် အန် တီ ဇဝ် ယေဆူ ကာလာင် အူဖာမာ ဒီ ဂေ ဒီဘဲ အန် လွင် လုဝ် ဆာခိုဝ် ဆေဆေ၊ ကွဲ့ တဲး ဂေ မိုဝ်း နဝ်း လိုဝ်။ 2 အန် တဝ်း၊ “န့ ဒွိုမ် မိုဝ်း မိူင် အူ မိူင်။ န့ မိုဝ်း ဒူအီ အီ ဆုင်ဖျာတ် အာမူ အီ။ အန် တူ ယုဝ် ဇဝ်ဖြာ၊ ဘော တူ ဆီ စွယ် ဒူအီ။ 3 ခဲင် မိူင် တီ န့ မိုဝ်း ဘော ယာ ဆီပြး အူ ဝီ၊ အန် နပ် ဒီ တး ဇမ် ဒူင် ကွယ် ဒူအီ အီ ဆုင်ဖျာတ် ဒါရာ အီ တူ ဆုင်ဖျာတ် မှာန် တွိုန်။ ယာ ဆီပြး မှာန့် ဘဲန် ဇေန့် ဘဲန် ဇေန့်၊ တဲး အန် ဆုင်ဖျာတ် အာမူ အန်။ အန် တဝ်း၊ ‘အုဝ် မှာန့်၊ တဲး မဲ စွယ် အုဝ်၊ တဲး မဲ ဆုင်ဖျာတ် အာမူ အုဝ်၊ ကွဲ့ တဲး ရန်ဆူ အုဝ် ဘူင် နာ တူ မွှိုမ် ဒီ အုဝ်။’

4 ဟဲ့ လှေန့်၊ ဒူအီ ဆုင်ဖျာတ် ဒါရာ တွိုန် တူ ဆီ စွယ် အန်။ ဟဲ့ ဟွတ့် ပန် တီ အန် တဝ်း ခဲင် နဝ်း အန်၊ ‘အုဝ် တူ ယုဝ် ဇဝ်ဖြာ၊ တူ ရုဝ်ဆေ ဒူအီ၊ 5 အုဝ် ယီ လုဝ် ဆုင်ဖျာတ်၊ လုဝ် စွယ် အာမူ ယာ ဆီပြး နီ။ ယုဝ် အန် တး ဒီလဲ အုဝ် ဆေဆေ၊ တူ တဲး အုဝ် မိုဝ်း နဝ်း ဂျီတ်။’”

6 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ အန် ဝီ တဝ်း ဒီ ဒီဘဲ အန်၊ “ဘေ လုဝ် ထူမ် ဂြုဝ်း ပီ ကာလာင် ဒူအီ အီ ဆုင်ဖျာတ် ဒါရာ အီ တူ မှာန်။ 7 ဆေ ဒူအီ တူ မွှိုမ် ဟဲ့ နပ် ဒီ ဘူင် ပါယ် တီ၊ ဇဝ်ဖြာ ဒီ ဘော နပ် ဒီ ဆုင်ဖျာတ် နာ မှာန် ဒီ ဒွန် အီ အီ ဒူပ် ဆီချာ အန်၊ အီ မုး ဒူအီ ပီ ရဝ်း အန် ဇဝ်။ ဆေ ဂေ ဒူအီ မှာန့် ဒီ ဇဝ်ဖြာ ဆေဆေ၊ တဲး အန် စွယ် ဂေ၊ အန် ဒီ ဘော စွယ်။ အန် တူ တဲး ဂေ နှဝ့် လှေန့် အာတ့် စွယ် အန်။ အန် ဒီ ဘော စွယ် ဂေ အူ ဇေန့်။ 8 အုဝ် တဝ်း ဒီ ဘေ၊ ဇဝ်ဖြာ ဒီ အွန် ဒီ ဆုင်ဖျာတ် နာ မှာန် ဒီ ဂေ အီ ဒူပ် ဆီချာ အန်။ ဆေ ဒူအီ အီ ဟဲ့ ဘဲန် ဂွန် ဒူအီ ယီ ဝီ တး ဇမ် ဒဲင် ကာဒါယ် နီ၊ အုဝ် တူ နပ်၊ ယုဝ် အန် ဒီ ယိုဝ် ဒူအီ အီ ညှိုမ် ခဲင် နဝ်း ဂေ ပါယ် တီ။”

9 ဇဝ် ယေဆူ ဝီ ကာလာင် အူဖာမာ ဒီ ဂေ ဒူအီ မင် အီ အီ ထာင် ဂေ မွှိုမ်။ ဂေ ဘော ပီဖုင် ဂေ လွှိုမ် ဒူအီ ဟဝ်။ 10 အန် တဝ်း၊ “ဟဲ့ ဒွိုမ် မိုဝ်း ဒူအီ အာ ဝီ၊ ဟုဝ့် လိုပ် ခဲင် ဟုဝ် ဇဝ်ဖြာ၊ တဝ်း ဒီ ဆာခိုဝ် ဒီ ဇဝ်ဖြာ။ အူ ဝီ ဟဲ့ မုး ဒူအီ ခဲင် ဖိုင် ဖာရီဆဲ။ ပေါ အူ ဝီ၊ အန် မုး ဒူအီ ဂဲပ် ရွိုန် စိုင်။ 11 ဒူအီ ခဲင် ဖိုင် ဖာရီဆဲ တွိုန်၊ အန် ယိတ့် ဆာခိုဝ်၊ တဝ်း ပါယ် နီ၊ ‘အိုယ် မဲ ဇဝ်ဖြာ၊ အုဝ် ဒါင် ဂုင် ဂေဇူ ဒီ မဲ ဇဝ်။ ခုဝ်၊ အုဝ် တူ ဘဲန် ဒူအီ တူ မွှိုမ် ပီ ဂေ ဒူအီ ဟဝ် ဘဲန် မျုဝ် ဘဲန် မျုဝ်။ အုဝ် တူ ပီ ဂေ ဒူအီ ကာလုဝ် ဆေဆေ၊ ဘော ဂေ ဒူအီ အီ ဘူင် နာ တူ မွှိုမ်။ အုဝ် မိူဝ် တူ ပီ ဒူအီ အီ လုတ့် အီဘိုန့်။ အုဝ် ဒါင် ဂုင် ဂေဇူ မဲ၊ မဲ တူ တဲး အုဝ် ပီ ဒူအီ ဂဲပ် ရွိုန် စိုင် တွိုန်။ 12 ဘူ ဆီငဲ အာ ဇေန့် အုဝ် ယိူန် ပီ ဒီ ဟူမ်။ ခဲ့ ပီ မိုဝ်း အုဝ် ဒွန် မျုဝ်၊ အုဝ် မိူဝ် ဒွါ ဂိုဝ် ဘုန် အူ ဘုန်၊ လှူ ဒီ မဲ ဇဝ်။’

13 ဒူအီ ဂဲပ် ရွိုန် စိုင် တွိုန်၊ အန် ယီ ကွယ် ကာတူင့်။ အန် တူ ယ ဆာကိုဝ်း ဂါင်ဟြာဝ်။ အန် ဘော ပါ ဘာင်နဝ်း အန်။ တဝ်း၊ ‘အိုယ် မဲ ဇဝ်၊ အုဝ် ဟဲ့ ဘူင် မှာပ်။ အုဝ် မှာန့်၊ တဲး မဲ ဇဝ် ကာဝေ အုဝ်။’”

14 ပန် တီ ဇဝ် ယေဆူ ဝီ တဝ်း၊ “အုဝ် တဝ်း ဒီ ဘေ။ ဇဝ်ဖြာ ထူမ် ဂြုဝ်း ဒူအီ အီ ဂဲပ် ရွိုန် စိုင် တွိုန်။ ဇဝ်ဖြာ မိူဝ် တဲး အန် မိုဝ်း နဝ်း မှာန်၊ တဲး အန် ဝေန့် ခဲင် ကာင် အန်။ ဒူအီ ခဲင် ဖိုင် ဖာရီဆဲ တွိုန် ယီ တူ ပါယ် တီ။ ဆေ န့ မိုဝ်း ဒူအီ အီ ပီဖုင် ဂေ၊ ဘော ထာင် ဂေ ဟဲ့ အာရေ တာင် လွှိုမ် အီ ဟဝ်၊ ဇဝ်ဖြာ ဒီ ဝီ တဝ်း၊ ဂေ အာဝ် အး။ ဆေ ဒူအီ ယီ တူ ပီခိုက် နဝ်း အန်၊ အန် ဇဝ် ဒီ တဲး အန် ဘဲန် ဒါ တာင်။” ဇဝ် ယေဆူ မာနုဝ် ဂေ ပါယ် တီ။

15 န့ ဘော မိုဝ်း ဒူအီ၊ ဂေ တိုယ် ဂွန် အာင ဂေ၊ တဲး ဂေ တး ဇမ် ဒူင် ကွယ် ဇဝ် ယေဆူ၊ တဲး အန် ပါ ဂေ။ ဂေ ဒီဘဲ အန်၊ ဒေါ ယိုဝ် ဂေ ပီ ဘူင် ဂေ ဒူအီ တွိုန်၊ ဂေ စုး ဒီ အေး ဂေ။ 16 ဇဝ် ယေဆူ ယီ ဘာင် ဂေ ဂွန် တး ဇမ် ဒူင် ကွယ် အန်။ အန် မိူဝ် တဝ်း ဒီ ဒီဘဲ အန်၊ “တဲး ဘေ တဲး ဂွန် ဂေ တီ တး ဇမ် ဒူင် ကွယ် အုဝ်။ ကွဲ့ ခြဲ ဂေ။ အာဆေ ဆီ ကွယ် ခဲင် မိူင် ပီ အိုပ် ဇဝ်ဖြာ၊ အန် လုဝ် ဘဲန် ပီ ဂွန် ဂေ နီ။ 17 အုဝ် တဝ်း အာခ်ု ဒီ ဘေ၊ အာဆေ တူ ညှိုမ် ဇဝ်ဖြာ၊ အာဆေ တူ မိုဝ်း နဝ်း ပီ ဂွန် ဒီတဲတ်၊ အန် တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ ဒေါ မှဝ်။”

18 ပန် တီ န့ ဘော မိုဝ်း ဒူအီ အူ ဝီ၊ အီ မုး ဒါ ကာညာ အီ အိုပ် ဂေ ဒူအီ အာယူဒါ။ အန် ဟဲ့ တး ဒီမွှတ် ဇဝ် ယေဆူ။ အန် တဝ်း၊ “မဲ ဒါ ဆာရာ ဘွတ်၊ မာဆေ ပီ လုဝ် ဘူင် အုဝ်၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။း”

19 ဇဝ် ယေဆူ ဝီ တဝ်း ဒီ အန်၊ “မှဝ် န့ ပါယ် ပီ တဝ်း မဲ အုဝ် ဘွတ်။း အာဝ် မိုဝ်း ဒူအီ ဘွတ်။ မီ ဇဝ်ဖြာ အူ ကာဒင် ဟဲ့ ဘွတ်။ 20 မဲ ဟဲ့ နပ်၊ ဒါရာ ပီ ဒဲမ် အုန် ခဲင် ဘပ် ဇဝ်ဖြာ၊ ‘ကွဲ့ လုတ့် အီဘိုန့် အီ ဟဝ်။ ကွဲ့ ငဝ်း ယမ် အာဆာက် အီ။ ကွဲ့ ပြာ ကြုဝ် အီ ဟဝ်။ ကွဲ့ ကာလုဝ် ဒေါ ကာလာင် ဘေ ဆက်ဆေ လွင် အီ ဟဝ်၊ ရုဝ်ဆေ ဂုန့် မာ ဘေ။’ မဲ နပ် လွင် အန် တီ ဒွန် မျုဝ်။”

21 ဒူအီ တွိုန် ဝီ တဝ်း ဒီ ဇဝ် ယေဆူ၊ “အုဝ် ဟဲ့ ဘူင် တူတ့် ဇိုဝ် တီ ဒွန် မျုဝ် အူ ဆိန့် ဒေါ မုး အုဝ် ဂွန် ဒီတဲတ်။”

22 ဝါယ် ဟဲ့ ထူမ် ဇဝ် ယေဆူ ဂြုဝ်း ပီ ကာလာင် ဒူအီ တီ၊ အန် ဝီ တဝ်း၊ “န့ ဆီ မိုဝ်း အူ မျုဝ် ပီ လုဝ် မဲ။ မဲ လုဝ် ယွင့် တူတ့် ကြုဝ်ကြာမ် မဲ။ ခဲ့ ပီ ပွိုန် မဲ၊ မဲ လုဝ် ဝီ ကာဆာင် ဒွါ ဒီ ဒူအီ ဂိန်။ ဆေ မဲ ဘူင် ပါယ် တီ၊ န့ ပီ ကြုဝ်ကြာမ် ပီ ဒီ ပွိုန် မဲ ခဲင် မိူင် ဂါင်ဟြာဝ်၊ န့ ဒီ ကိူန်။ မဲ ဟီ ဟွတ့် ဘူင် ပါယ် တီ၊ မဲ လုဝ် ဝီ တး ဒူပ် အုဝ်။”

23 ဒူအီ တွိုန် ဟဲ့ ဟွတ့် ထူမ် ဂြုဝ်း ဇဝ် ယေဆူ ဇိုဝ် တီ ဒွန် မျုဝ်၊ အန် ဘော ဝီ က့လိုဝ် ကာဆဝ်။ ခုဝ်၊ အန် ခြမ် ကာဆဝ်။ 24 ဇဝ် ယေဆူ ယီ ယွတ် အန်။ အန် ဘော တဝ်း၊ “ဆေ န့ မုး ဒူအီ ခြမ်၊ န့ ညှာပ် ဒီ အန်၊ တဲး အန် ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ 25 ဆေ ဒူအီ လုဝ် ဟပ် ဝန် တာင်၊^a တဲး န့ လိုပ် ခဲင် ကာဒဝ် ဟျုဝ့် မာလတ့်၊ န့ ဆီ ငှိုယ် လွှိုမ် ဒူအီ ခြမ် အူ ဝီ ဒီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”

26 ဂေ ဒူအီ ထူမ် ပီ တဝ်း ဇဝ် ယေဆူ တီ၊ ဂေ ဒီမွှတ် အန် တဝ်း၊ “ဆေ န့ ပါယ် တီ၊ န့ နှဲန် တူ မိုဝ်း အာဆေ အီ ဒီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”

27 ဇဝ် ယေဆူ ဝီ တဝ်း ဒီ ဂေ၊ “ပီ တူ ပွိုန် ဘူင် ဒူအီ၊ ဇဝ်ဖြာ ယီ ပွိုန် ဘူင် တူတ့် ဒွန် မျုဝ်။”

28 ဒေါ အန် တီ အာပေတာရူ ဝီ တဝ်း၊ “အိုယ် မဲ ဇဝ်၊ ယေ ဟဲ့ ဟွတ့် ဝဲန် ကာင် ဂေ မာန် ယေ၊ တဲး ယေ ပွိုန် ဒီ ဒူပ် မဲ။”

29 ဇဝ် ယေဆူ ဝီ တဝ်း၊ “အုဝ် တဝ်း အာခါခ်ု ဒီ မဲ၊ ဆေ ဒူအီ ဒီ ဝဲန် ကာင် အန်၊ ဆေ အန် ဘော ဝဲန် အီဘိုန့် အန် ဂေ အူကတ် အူဝါ ဘော ဂုန့် မာ ဂေ ဂွန် အန်၊ ဆေ အန် ဘော ဘူင် ပါယ် တီ ကူပ် ဆီ တဲး ဇဝ်ဖြာ အိုပ် ကာဒါယ်၊ အန် ဒီ ပွိုန် ရုး အန်။ 30 ခဲ့ ပီ ဝဲန် ဒူအီ တီ၊ အန် ဒီ ဝီ ပွိုန် တူတ့် ဒေါ ဆီ မုး ဇာတ် နီ။ အန် ဒီ ဘော ပွိုန် ကာပွါ လွှိုမ် ဘြိမ် တီ။ ဇာတ် ဒီ တး၊ အန် ဒီ ဘော ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ၊ အာဝ် ဟူ ယမ် ဒေါ မှဝ်။” ဇဝ် ယေဆူ ဟဲ့ တဝ်း ပါယ် တီ ဒီ ဒီဘဲ အန်။

31 ဝါယ် အန် တီ ဇဝ် ယေဆူ ဒဲ့ ဒီဘဲ အန် ဂိုဝ် ဒီ အာ ဝီ၊ တဝ်း ဒီ ဂေ၊ “တဲး ဘေ ထူမ်။ အေ ဒီ ဟုဝ့် မိူင် ယေရူဆာလဲမ်။ ခဲ့ ပီ ဒဲမ် ဂေ ဒူအီ အီ ဘျာန် ဂြုဝ်း ဇဝ်ဖြာ လွင် ဂွန် ဒူအီ တွိုန်၊ န့ ဒီ ဘော ဘဲန် တူတ့် ဒွန် မျုဝ်၊ တဲး န့ ပီ ပီ ဒဲမ် ဂေ။ 32 ဂေ ဒူအီ ဒီ အာပ် ဒွါ အန် ဒီ ဒူအီ အာမျုဝ် ဟဝ်။ ဒူအီ အာမျုဝ် ဟဝ်၊ ဂေ ဒီ ကာညး အန် ဘော ကာလာင် နာ စာဝ် ဒီ အန်၊ ပတ့် နာ အန်။ 33 ဂေ ဒီ ဘော ဆီဘျြီ့ အန်၊ ငဝ်း ယမ် အန်။ ဝါယ် အန် တီ အူယ် ဆီငဲ၊ အန် ဒီ ဝီ ယိတ့် ဝီ အိမ်။”

34 ဂေ ဒီဘဲ အန်၊ ဂေ တူ နပ် မာဆေ ပီ တဝ်း အန်။ ဇဝ် ယေဆူ တူ တဲး န့ လိုဝ်း ဒီ ဂေ။ ဂေ တူ နပ် မာဆေ ပီ တဝ်း ဇဝ် ယေဆူ ဒီ ဂေ လွင် အန် တီ။

35 ဒေါ ကာတတ် ဒီ ဇမ် ဇဝ် ယေဆူ ခဲင် မိူင် ယေရီခုဝ် တွိုန်၊ န့ မိုဝ်း ဒူအီ ငါယ် အပ် အူ ဝီ။ အန် ကွယ် ခူပ် န့တေန့်၊ မှာန့် ဒီ ဒူအီ။ 36 ဒူအီ တွိုန် ဟဲ့ ယိုဝ် ဂြန့် ဒူအီ ကိူန် ဟာဝ် ဒူပ် န့တေန့် တွိုန်၊ အန် ဘော ဒီမွှတ် မာဆေ န့ မုး လွင် ဒူအီ ကိူန် ဂေ တီ။ 37 ဂေ ဒူအီ ဝီ တဝ်း ဒီ အန်၊ “န့ မုး ဇဝ် ယေဆူ အီ တး မိူင် နာဆာရေတ့်၊ အန် ဟာဝ် ဒူပ် န့တေန့် နီ။”

38 ဒူအီ ငါယ် အပ် တွိုန် ဝီ ဒတ် တာင် တဝ်း၊ “အိုယ်၊ အာယေဆူ၊ အီ မုး လှုက်လှာန် အာဒါဝိတ် တွိုန်၊ အုဝ် မှာန့် တဲး မဲ ကာဝေ အုဝ်။”

39 ဂေ ဒူအီ အီ ဟာဝ် ဒီ အာတ့် ဖိုင် ဇဝ် ယေဆူ၊ ဂေ ခြဲ အန်၊ စ်ု အန် ကွဲ့ ဒတ်။ ဒူအီ ငါယ် အပ် တွိုန် ယီ ဝီ ဒတ် တာင် လွှိုမ် ခါ အာတ့် “အိုယ်၊ ဒူအီ အီ မုး လှုက်လှာန် အာဒါဝိတ်၊ အုဝ် မှာန့်၊ တဲး မဲ ကာဝေ အုဝ်။”

40 ဇဝ် ယေဆူ ဂိူတ် အူ ဇေန့်၊ စ်ု ဒူအီ အူ ဝီ၊ တဲး အန် ဒဲ့ ဒူအီ ငါယ် အပ် တး ဇမ် ဒူင် ကွယ် အန်။ အန် ဟဲ့ ဟွတ့် ဇမ်၊ ဇဝ် ယေဆူ ဒီမွှတ် အန် တဝ်း၊ 41 “မာဆေ ပီ လုဝ် မဲ အုဝ် ဘူင်။း” အန် ဝီ တဝ်း၊ “မဲ ဇဝ်၊ အုဝ် မှာန့်၊ တဲး မဲ ဘူင် တဲး ငါယ် အုဝ် ဝီ ဘ့လာင်။”

42 ဇဝ် ယေဆူ ဝီ တဝ်း၊ “အုဝ် တဲး မဲ ဝီ ပွိုန် ဒီ ယိုဝ် တူတ့် ဒွန် မျုဝ်။ ကူပ် ဟဲ့ ညှိုမ် မဲ ခဲင် နဝ်း မဲ၊ န့ တဲး မဲ ကဲန်။” 43 ဒူအီ ငါယ် အပ်၊ အန် ဟဲ့ ပွိုန် ဝီ ယိုဝ် အူ ဇေန့်။ အန် မိူဝ် ဟာဝ် ဒူပ် ဇဝ် ယေဆူ၊ စုး ဒီ အိူပ် ဇဝ်ဖြာ။ ဘော ဂေ ဒူအီ ကိူန်၊ ဒေါ ယိုဝ် ဂေ လွင် အန် တီ၊ ဂေ မိူဝ် အိူပ် ဇဝ်ဖြာ။