ခါန် 10
လွင် အီဘိုန့် အီမာယ် လာယ် ဝဲန်
3 ဇဝ် ယေဆူ ဝီ တဝ်း၊ “မာဆေ ပီ စ်ု ဒါ ဆာရာ အာမုဝ်ဆဲ ဘေ ဘူင်။း”
4 ဂေ ဝီ တဝ်း၊ “ဒါ ဆာရာ အာမုဝ်ဆဲ တွိုန် ဟဲ့ ခ့ဝါင် အီမာယ် ဒဲမ် ပဲ့ လွင် လာယ် ဝဲန်။ ဟဲ့ ဟွတ့် အန် ပွိုန် ဝဲန် အီဘိုန့်။”
5 ဇဝ် ယေဆူ ဝီ တဝ်း၊ “ကူပ် တူ မိုဝ်း ဘေ နဝ်း ရွက့် ကာဝေ ဒူအီ၊ ဒါ ဆာရာ အာမုဝ်ဆဲ ဟဲ့ ဒဲမ် အုန် ဒါရာ တီ။ 6 အူ ဆိန့် ဒေါ ဘူင် ဘ့လေး ဇဝ်ဖြာ ဒူအီ၊ အန် ယီ ဘူင် တဲး န့ မိုဝ်း ဘော အီမာယ် ဘော အီဘိုန့်။ 7 ခုဝ် အန် တီ အီမာယ် ဒီ လေး ခဲင် ကာင် ဂုန့် မာ အန်၊ ဝီ ဒူပ် အီဘိုန့် အန်။ 8 ဂါယ် မိူဝ် ဒီ ဘဲန် ပီ ဒုဝ် ဘူင့် အူ ဘူင့်။ န့ ပီ ဂါယ် အာဝ် ဟူ မုး ဒူအီ အာ ဝီ။ ဂါယ် ဟဲ့ ဘဲန် ပီ အူ ဝီ။ 9 ခုဝ်၊ ဆေ ဇဝ်ဖြာ ဟဲ့ တဲး အာ ဝီ ခတ် လာယ် ဒိုဝ်း၊ ဝီ ဘဲန် ပီ အူ ဝီ၊ ဒူအီ အာဝ် ပွိုန် ဘူင်၊ တဲး ဂါယ် ဝီ ကာယဝ်း။”
10 ဝါယ် အန် တီ ဒေါ ဝီ လိုပ် ကွယ် ဂေ ခဲင် ကာင်၊ ဂေ ဒီဘဲ ဇဝ် ယေဆူ ဝီ ဒီမွှတ် အန် လွင် ဂြုဝ်း တီ။ 11 ဇဝ် ယေဆူ ဝီ တဝ်း၊ “အာဆေ ဝဲန် အီဘိုန့် အန်၊ ဝီ ဒိုဝ်း အီဘိုန့် ပေါ အူ ဝီ၊ မှာပ် အန် ပီ မှာပ် လုတ့် အီဘိုန့် အီ။ အန် ဘူင် မှာပ် တီ ဒီ အီဘိုန့် ဘြိမ် အန်။ 12 ပါယ် တီ၊ ဘော အီဘိုန့်။ ဆေ အီဘိုန့် ဝဲန် အီမာယ် အန်၊ ဝီ ဒိုဝ်း အီမာယ် ပေါ အူ ဝီ၊ မှာပ် အန် မုး အူ မျုဝ်။”
လွင် ဂွန် တး ဒူင် ကွယ် ဇဝ် ယေဆူ
13 ဂေ ဒူအီ ကိူန် ဝီ တး တိုယ် ဂွန် ဒီတဲတ် ဂေ၊ တဲး ဇဝ် ယေဆူ ပါ ဂေ။ ဂေ ဒီဘဲ အန် ယီ အေး ဂေ အီ တး တိုယ် ဂွန် တီ။ 14 ဇဝ် ယေဆူ ဝီ ယိုဝ် ပီ ပါယ် ဂေ တီ၊ အန် တူ အိုင်။ အန် တဝ်း ဒီ ဒီဘဲ အန်၊ “တဲး ဂေ ဂွန် ဒီတဲတ် တး ဒီ အုဝ်။ ကွဲ့ ခြဲ ဂေ။ အာဆေ ဆီ ကွယ် ခဲင် မိူင် ပီ အိုပ် ဇဝ်ဖြာ၊ အန် လုဝ် ဘဲန် ပီ ဂွန် ဂေ နီ။ 15 အုဝ် တဝ်း အာခ်ု ဒီ ဘေ။ အာဆေ ဆီ လိုပ် ခဲင် မိူင် ပီ အိုပ် ဇဝ်ဖြာ၊ ယီ တူ ဘ့လေး နဝ်း အန် ပီ ဂွန် ဒီတဲတ်၊ အန် တူ ပွိုန် ဒီ လိုပ် ဒေါ မှဝ်။” 16 အန် ဟဲ့ ဟွတ့် တဝ်း ပါယ် တီ၊ အန် ဝီ ငျီမ် ဂွန် ဂေ တွိုန်။ ဝီ ဒါင် ဒဲ အန် ဒဲင် ဂိန့် ဂေ၊ ဝီ မွင့်ကာရာ တဲး ဒီ ဂေ။
လွင် ဒူအီ ခြမ် အူ ဝီ
17 ဇဝ် ယေဆူ ဝီ စုး ဒီ ဟာဝ် ဒူပ် န့တေန့်။ ဒေါ အန် တီ န့ မိုဝ်း ဒူအီ အူ ဝီ၊ အန် ကာဘ့လဲပ် တး ဒူင် ကွယ် ဇဝ် ယေဆူ၊ ခြိုပ်ခြဝ် ဒီ အာတ့် အန်။ အန် တဝ်း၊ “မဲ ဆာရာ ဘွတ်၊ မာဆေ ပီ လုဝ် ဘူင် အုဝ်၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။း”
18 ဇဝ် ယေဆူ ဝီ တဝ်း၊ “မှဝ် န့ ပါယ် ပီ တဝ်း မဲ ‘ဆာရာ ဘွတ်’ ဒီ အုဝ်။း အာဝ် မိုဝ်း ဒူအီ အီ ဘွတ်။ မီ ဇဝ်ဖြာ အူ ကာဒင် ဟဲ့ ဘွတ်။ 19 မဲ နပ် ဒါရာ ပီ ဒဲမ် အုန် ခဲင် ဘပ် ဇဝ်ဖြာ။း ကွဲ့ ငဝ်း အာဆာက် ဒူအီ၊ ကွဲ့ လုတ့် အီဘိုန့် အီ၊ ကွဲ့ ပြာ ကြုဝ် အီ၊ ကွဲ့ ကာလုဝ် ဒေါ ဘဲန် မဲ ဆက်ဆေ လွင် အီ ဟဝ်၊ ကွဲ့ ကာလုဝ် အီ ဟဝ်၊ ရုဝ်ဆေ ဂုန့် မာ မဲ။း”
20 ဒူအီ တွိုန် ဝီ တဝ်း၊ “ဆာရာ၊ ဆိန့် ဒေါ မုး အုဝ် ဂွန် ဒီတဲတ်၊ အုဝ် ဟဲ့ ဘူင် တူတ့် ဇိုဝ် တီ။”
21 ဇဝ် ယေဆူ ဝီ ယွတ် အန်၊ ဘော ရွက့် အန်။ အန် ဝီ တဝ်း၊ “န့ ဆီ မိုဝ်း အူ မျုဝ် ပီ လုဝ် မဲ ဘူင်။ မဲ လုဝ် ယွင့် တူတ့် ကြုဝ်ကြာမ် မဲ။ ခဲ့ ပီ ပွိုန် မဲ၊ မဲ လုဝ် ဝီ ကာဆာင် ဒီ ဒူအီ ဂိန်။ ဆေ မဲ ဘူင် ပါယ် တီ၊ န့ ပီ ကြုဝ်ကြာမ် ပီ ဒီ ပွိုန် မဲ ခဲင် ဂါင်ဟြာဝ်၊ န့ ဒီ ကိူန်။ မဲ ဟီ ဟွတ့် ဘူင် ပါယ် တီ၊ မဲ လုဝ် ဝီ တး၊ ဒူပ် အုဝ်။”
22 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ နာ ဒူအီ တွိုန် အာဝ် ဒါခိုယ်။ အန် က့လိုဝ် ကာဆဝ်၊ ဝီ ဝေန့်။ ခုဝ်၊ အန် ဟဲ့ ခြမ် ကာဆဝ်။
23 ဇဝ် ယေဆူ ဝီ မာငး ယွတ် အီ ဟဝ်၊ ဝီ ကာလာင် ဒီ ဒီဘဲ အန် တဝ်း၊ “န့ ညှာပ် ကာဆဝ် တဲး ဒူအီ ခြမ် ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”
24 ဂေ ဒီဘဲ အန် ဟဲ့ အာမ် ကာဆဝ် ဂြုဝ်း အန် တီ။ ဇဝ် ယေဆူ ဝီ တဝ်း ပေါ အူ ဇေန့်၊ “အိုယ် ဘေ ဝါ အုဝ်၊ န့ ဟဲ့ ညှာပ် ကာဆဝ် ဒီ လိုပ် ခဲင် မိူင် ပီ အိုပ် ဇဝ်ဖြာ။ 25 ဆေ ဒူအီ လုဝ် ဟပ် ဝန် တာင်၊a တဲး န့ လိုပ် ခဲင် ကာဒဝ် ဟျုဝ့် မာလတ့်၊ န့ ငှိုယ် လွှိုမ် ဒူအီ ခြမ် အူ ဝီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”
26 ဂေ ဒီဘဲ ဇဝ် ယေဆူ ဟဲ့ ဟွတ့် ထူမ် ဂြုဝ်း တီ၊ ဂေ ဝီ အာမ် ကာဆဝ် လွှိုမ် ခါ အာတ့်။ ဂေ ဝီ လာယ် ကာလာင် တဝ်း၊ “ဆေ န့ ပါယ် တီ၊ န့ နှဲန် အာဝ် မိုဝ်း အာဆေ အီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”
27 ပန် တီ ဇဝ် ယေဆူ ယွတ် ဂေ၊ ဝီ တဝ်း၊ “ပီ တူ ပွိုန် ဘူင် ဒူအီ၊ ဇဝ်ဖြာ ယီ ပွိုန် ဘူင် တူတ့် ဒွန် မျုဝ်။ အာဝ် မိုဝ်း မာဆေ ပီ တူ ပွိုန် ဘူင် ဇဝ်ဖြာ။”
28 အာပေတာရူ ဝီ တဝ်း ဒီ ဇဝ် ယေဆူ၊ “ယေ ဟဲ့ ဟွတ့် ဝဲန် တူတ့် ဒွန် မျုဝ်၊ တဲး ယေ ပွိုန် ဒီ ဒူပ် မဲ။”
29 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ။ ဆေ န့ မိုဝ်း ဒူအီ၊ ဆေ အန် ဝဲန် ကာင် အန် ဘော အူကတ် အူဝါ အန်၊ ဆေ အန် ဝဲန် ဘော ဂုန့် မာ ဂေ ဂွန် အန်၊ ဝဲန် ဘော မာန် အန် ကူပ် ညှိုမ် အန် ဒီ အုဝ် ဘော ဒူပ် ဒါရာ အီ တဲး နဝ်း ဒူအီ ဒါခိုယ်၊ 30 ဆေ န့ မိုဝ်း ဒူအီ ဘူင် ဇိုဝ် တီ၊ အန် ဒီ ဝီ ပွိုန် အူ မာယဝ်း ဘုန် ခဲ့ ပီ ဝဲန် အန်။ ဒေါ မုး ဇာတ် နီ၊ အန် ဒီ ဝီ ပွိုန် ဘော ကာင် ဘော အူကတ် အူဝါ ဘော မာ ဂေ ဂွန် အန်။ အန် ဒီ ဝီ ပွိုန် ဘော မာန် ဂေ ဒူင် နာ အန်။ အန် ဒီ ပွိုန် တူတ့် ဇိုဝ် တီ ဘော လုဝ် ကာဒုး ဒုက် ဘဲန် မျုဝ် ဘဲန် မျုဝ်။ ပန် ဇာတ် ဒီ တး၊ အန် ဘော ပွိုန် ကွယ် ရိုမ် ဒူပ် ဇဝ်ဖြာ ဆေဆေ။ 31 အာဆေ ယီ တဝ်း ဒီ ယဲတ့် ဒီ အာတ့် အီ၊ အန် ဒီ ဝီ ဒူပ် ဒီ ပန်။ အာဆေ ဝီ ဒူပ် ဒီ ပန်၊ အန် ပွိုန် ဒီ ယဲတ့် ဒီ အာတ့်။”
လွင် ဇဝ် ယေဆူ ဝီ ကာလာင် ပန် ဒီ ယမ် အန်
လွင် ပီ ဆီ ပွိုန် ဒီဘဲ အာ ဝီ
35 ဝါယ် အန် တီ န့ မုး အာယာကူပ် ဂါယ် အာယောဟာန်၊ အီ မုး ဂွန် အာဇေဘေဒေ၊ ဂါယ် ဝီ တး ကာလာင် ဒီ ဇဝ် ယေဆူ။ ဂါယ် တဝ်း၊ “ဆာရာ၊ တဲး မဲ ဒွါ ဒီ ယာယ် ခဲ့ ပီ မှာန့် ယာယ်။”
36 ဇဝ် ယေဆူ ဝီ တဝ်း၊ “မာဆေ ပီ လုဝ် ဘာယ်။း”
37 ဂါယ် ဝီ တဝ်း၊ “န့ မုး ယာယ် အာ ဝီ၊ ဆေ မဲ ဟဲ့ ပွိုန် အာဖုင် ဒင်ခုဝ် မဲ၊ တဲး မဲ ခ့ဝါင် အူ ဝီ ကွယ် ဘ့လာက် အာအး မဲ၊ ပေါ အူ ဝီ ကွယ် ဘ့လာက် အာဂ မဲ။”
38 ဂါယ် ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း၊ “ဘာယ် တူ နပ် ပီ မှာန့် ဘာယ်။ အုဝ် ဝီ ဒီမွှတ် ဘာယ်။ ဘာယ် ခမ် ဒီ ဒျီင် ခဲင် ဆီလယ့် ပီ ဒျီင် အုဝ်၊ အီ တဲး အုဝ် ယမ်။း ဘော ဘာယ် ဒီ ခမ် ဒီ စိုပ် ခဲင် အိုမ် ပီ ခမ် အုဝ် ဒီ စိုပ်။း”b
39 ဂါယ် ဝီ တဝ်း၊ “ဟဲ့ ခမ်။” ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း၊ “ဟဲ့ မုး။ ဘာယ် ဒီ လုဝ် ဒျီင် ခဲင် ဆီလယ့် ပီ ဒျီင် အုဝ်။ ဘာယ် ဒီ လုဝ် ခမ် ဒီ စိုပ် ခဲင် အိုမ် ပီ ခမ် အုဝ် ဒီ စိုပ်။ 40 အုဝ် ယီ တူ ပွိုန် တဲး ဘာယ် ကွယ် ဘ့လာက် အာအး ဂါယ် ဘ့လာက် အာဂ အုဝ်။ ဇဝ်ဖြာ ဟဲ့ ဟွတ့် ရဝ်း ဒူအီ အီ ပွိုန် ဒီ ကွယ် ခူပ် အုဝ်။ ဒူင် ဆီ ကွယ် ဘာယ် တီ၊ အန် ဒီ ဒွါ ဒီ ဒူအီ ပီ ရဝ်း အန်။”
41 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဘော ဂေ ဒီဘဲ ဇဝ် ယေဆူ ဂိုဝ် ဝီ ဘော နပ် လွင် ပီ မှာန့် ဂါယ်။ ခုဝ်၊ ဂေ တူ အိုင် အာယာကူပ် ဂါယ် အာယောဟာန်။ 42 ပန် တီ ဇဝ် ယေဆူ ဝီ ဒဲ့ ဂေ ဂိုဝ် ဒီ အာ ဝီ။ အန် ဝီ တဝ်း ဒီ ဂေ၊ “ဘေ ဟဲ့ နပ်၊ ဆေ န့ မုး ဒါ တာင် အီ အိုပ် ဒူအီ အာမျုဝ် ဟဝ်၊ ဂေ နပ် ဒီ ဒိုဝ်း ပွုန် ဂေ၊ စ်ု ကာဆဝ် ဒူအီ ပီ အိုပ် ဂေ၊ တဲး န့ ညှာပ် ဒီ ဂေ။ ဘော ဂေ ဒါ တာင် ခဲင် မိူင် အီ ဟဝ် နပ် ဒီ ခါနှာပ် ဂေ။ 43 ဘေ ယီ တူ လုဝ် ဘူင် ပါယ် တီ။ အာဆေ ဆီ ဘဲန် ဒါ တာင် ကာတဲ ဘေ၊ အန် လုဝ် ဝီ ဘဲန် မှာယ် ဒွန် အီ။ 44 အာဆေ ဆီ ယဲတ့် အီ၊ အန် ဝီ လုဝ် ဘဲန် ဝါ ဒွန် အီ၊ စွယ် ဒွန် အီ။ 45 ပါယ် တီ ဘော အုဝ်၊ အီ ဟဲ့ ဘဲန် ဂွန် ဒူအီ၊ အုဝ် တူ တး တဲး အီ ဟဝ် စွယ် အုဝ်။ အုဝ် ဟဲ့ တး ဇမ် ဒဲင် ကာဒါယ် နီ၊ တဲး အုဝ် လိုမ်လာ ဘော စွယ် ဘေ။ အုဝ် မိူဝ် ဟဲ့ တး၊ တဲး အုဝ် ယမ် ကာဒါင် အီ၊ တဲး အုဝ် ချွတ် အာဆာက် ဒူအီ ကိူန်။”
လွင် အာဘာထီမေ
46 ဇဝ် ယေဆူ ဟဲ့ ဟွတ့် ကာလာင် ဒီ ဒီဘဲ အန် ဂြုဝ်း တီ၊ ဂေ ဝီ ဇမ် မိူင် ယေရီခုဝ်။ ဘော ဇဝ် ယေဆူ ဘော ဒီဘဲ အန်၊ ဘော ဂေ ဒူအီ ကိူန်၊ ဂေ ဟဲ့ ဟွတ့် ပွုန် မိူင် ယေရီခုဝ်၊ ဝီ ကာတတ် ဒီ လေး ခဲင် မိူင်။ ဒေါ အန် တီ န့ မိုဝ်း ဒူအီ ငါယ် အပ်။ အန် စိူဝ် အာဘာထီမေ၊ မုး ဂွန် အာထီမေ။ အန် ကွယ် ဒီ ခူပ် န့တေန့် မှာန့် ရွိုန် ဒီ အီ။ 47 အာဘာထီမေ ဘော ယိုဝ်၊ န့ မုး ဇဝ် ယေဆူ အီ တး မိူင် နာဆာရေတ့် တွိုန်၊ အန် ဟဲ့ တး ကာလုဝ်း ပွုန် ဒူင် ကွယ် အန်၊ အန် မိူဝ် ဝီ စုး ဒီ ဒတ် တာင်။ အန် ဒတ် တဝ်း၊ “အိုယ် အာယေဆူ၊ အီ မုး လှုက်လှာန် အာဒါဝိတ်၊ ကာဝေ အုဝ်။”
48 ဂေ အီ ဟဝ်၊ ဂေ ကိူန် ဝီ စ်ု အန်၊ ကွဲ့ ဂြုဝ်း။ အန် နဲ့ ဒတ် ပွါ တဝ်း၊ “မဲ လှုက်လှာန် အာဒါဝိတ်၊ ကာဝေ အုဝ်။”
49 ဇဝ် ယေဆူ ဝီ ဂိူတ်၊ ဝီ တဝ်း၊ “ဒဲ့ အန် တး ဒီ အုဝ်။” ဟဲ့ ဟွတ့် ကာလာင်၊ ဂေ ဝီ ဒဲ့ ဒူအီ ငါယ် အပ်။ ဂေ တဝ်း၊ “တဲး မဲ ဒါခိုယ်၊ ယိတ့်၊ အန် ဟဲ့ ဒဲ့ မဲ။” 50 အန် ဝီ ဘုတ့် ဝဲန် ဆီတုဝ် အန်၊ ယိတ့် အူ ဇေန့်၊ ဝီ ဟာဝ် ဇမ် ဒီ အာတ့် ဇဝ် ယေဆူ။
51 ဇဝ် ယေဆူ ဝီ ဒီမွှတ် အန်။ အန် တဝ်း၊ “မာဆေ ပီ ဆီ တဲး မဲ အုဝ် ဘူင်။း” ဒူအီ ငါယ် အပ် ဝီ တဝ်း၊ “ဆာရာ၊ အုဝ် ဆီ ယိုဝ်။”
52 ဇဝ် ယေဆူ ဝီ တဝ်း၊ “ဟာဝ်။ မဲ ဟဲ့ ကဲန် ကူပ် ညှိုမ် မဲ။” အူ ဇေန့် ဒူအီ တီ ဟဲ့ ပွိုန် ဒီ ယိုဝ်။ အန် ဝီ ဟာဝ် ဒူပ် ဇဝ် ယေဆူ။