2 ဝါယ် အန် တီ ဘော နုဝ့် ဒဝ် ဆီငဲ၊ ဇဝ် ယေဆူ ဝီ ဒဲ့ အာပေတာရူ၊ အာယာကူပ် ဘော အာယောဟာန်၊ တဲး ဂေ ဟာဝ် ဒူပ် အန် ဟုဝ့် ဒဲင် နွန် စာ။ ဒူင် တီ တူ မိုဝ်း အီ ဟဝ်။ ဒေါ ကွယ် ဂေ ဒဲင် နွန် တီ၊ အာရိုပ် ဇဝ် ယေဆူ ဝီ ကာဘ့လိူင်။ 3 ခြိုင် ပီ စှိုပ် အန် ဝီ ဘဲန် ခြိုင် လုယ် ရာဝ်။ အာဝ် မိုဝ်း အာဆေ ဒဲင် ကာဒါယ်၊ အီ ပဲ ဒီ လး ခြိုင်၊ တဲး န့ လုယ် ပီ ခြိုင် ဇဝ် ယေဆူ တီ။ 4 ဘော ဒါ ဆာရာ အာအေလီယ ဘော ဒါ ဆာရာ အာမုဝ်ဆဲ တွိုန် တး ကာပ့လုး ဒီ အာတ့် ဂေ၊ ဝီ ဂြုဝ်း ဒီ ဇဝ် ယေဆူ။

5 ဒေါ အန် တီ အာပေတာရူ ဝီ တဝ်း ဒီ ဇဝ် ယေဆူ၊ “ဆာရာ၊ န့ ဒါခိုယ် ကွယ် ဒီ နီ။ တဲး ယေ ဆမ် ထိုပ် အူယ် ထိုပ်။ ဘော ထိုပ် မဲ၊ ဘော ထိုပ် အာမုဝ်ဆဲ၊ ဘော ထိုပ် အာအေလီယ။” 6 အန် ကာလာင် ဂြုဝ်း တီ ကူပ် ယုဝ် ကာဆဝ် အန်။ အန် အာဝ် ဟူ နပ်၊ မာဆေ ပီ ဒီ တဝ်း အန်။

7 ပန် တီ န့အု ဘော တး ပ့လိုက် ဂေ။ ဘော မိုဝ်း ဂြုဝ်း အီ လေး ခဲင် န့အု တဝ်း၊ “ဒူအီ နီ မုး ဂွန် ပီ ရွက့် အုဝ်။ တဲး ဘေ ထူမ် ဂြုဝ်း အန်။”

8 ဂေ ဟဲ့ ဟွတ့် ထူမ် ဂြုဝ်း တီ၊ ဂေ ဝီ ယွတ် ကော ရူပ် ဂေ၊ ဂေ အာဝ် ဟူ ယိုဝ် အာဆေ ကွယ် ရိုမ် ဒူပ် ဂေ။ ဟဲ့ ဂိတ် မီ ဇဝ် ယေဆူ ဆီ ကွယ် ဒီ တီ။

9 ဒေါ လူင် ဂေ ဒဲင် နွန်၊ ဇဝ် ယေဆူ ဝီ ဒမ် ဂေ၊ ကွဲ့ တဲး ဂေ ကာလာင် ဒီ အာဆေ လွင် ပဲ့ ဟဲ့ ယိုဝ် ဂေ။ ဝါယ် ဟဲ့ ဟွတ့် ယမ် အန် ဘော ဝါယ် ဝီ ယိတ့် ဝီ အိမ် အန်၊ ဂေ ဝီ ပွိုန် ကာလာင် လွင် အန် တီ။ 10 ပါယ် တီ၊ ဂေ မိူဝ် တူ ကာလာင် လွင် အန် တီ ဒီ အီ ဟဝ်။ ဂေ ယီ လာယ် ကာမွုန် လွင် ဆီဖဝ် ဒေါ တဝ်း ဇဝ် ယေဆူ၊ ဝါယ် ယမ် အန်၊ အန် ဒီ ဝီ ယိတ့် ဝီ အိမ်။

11 ပန် တီ ဂေ ဝီ ဒီမွှတ် ဇဝ် ယေဆူ။ ဂေ တဝ်း၊ “ဂေ ဒါ ဆာရာ အီ မာနုဝ် ဒါရာ၊ ဂေ တဝ်း၊ ဒါ ဆာရာ အာအေလီယ လုဝ် ဝီ တး လူင် ဒဲင် ကာဒါယ် နီ အာတ့် တး ဒူအီ ပီ ရဝ်း ပီ တိုယ် ဇဝ်ဖြာ တီ။ ကူပ် မာဆေ ပီ တဝ်း ဂေ ပါယ် တီ။း”

12 ဇဝ် ယေဆူ ဝီ တဝ်း၊ “ဟဲ့ မှာန်။ ဟဲ့ ဒဲမ် အုန် လွင် အာအေလီယ ဒီ တး ဒီ အာတ့်၊ တဲး အန် မ့ပြာယ် တူတ့် ဒွန် မျုဝ်။ ပါယ် တီ န့ ဘော ဒဲမ် အုန် လွင် အုဝ်၊ အီ ဟဲ့ ဘဲန် ဂွန် ဒူအီ၊ အုဝ် လုဝ် ကာဒုး ဒုက် တာင်၊ တဲး ဂေ ကော ငဝ်း ဝဲန် အုဝ်။ 13 အုဝ် ယီ တဝ်း ဒီ ဘေ၊ အာအေလီယ တွိုန် ဟဲ့ ဟွတ့် တး၊ ဝီ ဘဲန် ဒူအီ။ ဂေ ယီ ဟဲ့ ဘူင် တူတ့် ဒွန် မျုဝ် ပီ အိုင် ဂေ ဒီ အန်။ ဂေ ဟဲ့ ဘူင် တူတ့် ဒွန် မျုဝ်၊ တဲး န့ ပီ ပီ ဒဲမ် အုန် ခဲင် ဘပ် ဇဝ်ဖြာ။”

14 ဇဝ် ယေဆူ ဂေ ဒီဘဲ အန် အူယ် ဝီ ဘော ဝီ တး ဇမ် ဒူင် ကွယ် ဂေ ခါ အာတ့်။ ဂေ ဝီ ယိုဝ် ဒူအီ ကိူန် ဟဲ့ ဝီ တး ကွယ် ရိုမ် ဒူပ် ဂေ ဒီဘဲ အန် အီ ဆီ ကွယ် နာ ပန် တွိုန်။ န့ မိုဝ်း ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ ကာထဲန့် ဒီ ဒီဘဲ ဇဝ် ယေဆူ။ 15 ဂေ ဒူအီ ကိူန်၊ ဒေါ ယိုဝ် ဂေ ဇဝ် ယေဆူ၊ ဂေ မိူဝ် အာမ် ကာဆဝ်။ ဂေ ဟာဝ် ရွုး အန် အူ ဇေန့်။

16 ဇဝ် ယေဆူ ဝီ ဒီမွှတ် ဂေ။ အန် တဝ်း၊ “လွင် မာဆေ ပီ လာယ် ကာလာင် ဘေ။း”

17 ဒူအီ အူ ဝီ ဝီ တဝ်း၊ “ဆာရာ၊ အုဝ် ဟဲ့ တး တိုယ် ဂွန် အီမာယ် အုဝ်၊ တဲး အန် တး ဒီ မဲ။ အန် မိုဝ်း ကာနမ် ကွယ် ခဲင် ဒုဝ် ဘူင့် အန်။ ကာနမ် တီ တူ တဲး အန် ကာလာင် ဂြုဝ်း။ 18 ဆေ ကာနမ် တီ ပ့လိုက် အန်၊ အန် ကေး။ အိုမ် အာင် အန် မိူဝ် ပုး။ အန် ဘော ဆီဂိတ် ဟြာင် အန်။ ဒုဝ် အန် ဘော ပ့လူမ် ဘော ဒုဝ်။ အုဝ် ဟဲ့ ဟွတ့် မှာန့် ဒီ ဒီဘဲ မဲ၊ တဲး ဂေ ဆုတ့် ကာနမ် လေး။ ဂေ ယီ တူ ပဲ။”

19 ဇဝ် ယေဆူ ဝီ တဝ်း၊ “ဘေ ဇာတ် နီ၊ ဘေ တူ ညှိုမ် မာဆေ။ ခဲ့ မှဝ် န့ ဒီ ဘော လှေန့်၊ အုဝ် ဒီ လုဝ် ကွယ် ရိုမ် ဒူပ် ဘေ။း ခဲ့ မှဝ် န့ ဒီ ဘော လှေန့်၊ အုဝ် ဒီ လုဝ် ခမ် ဘေ ဒူအီ ဇိုဝ် တီ။း” ဟဲ့ ဟွတ့်၊ အန် ဝီ တဝ်း၊ “တိုယ် ဂွန် မဲ တး ဒီ အုဝ်။”

20 ပန် တီ ဂေ ဝီ တိုယ် ဂွန် အီမာယ် တွိုန်။ ကာနမ် ဘော ယိုဝ် ဇဝ် ယေဆူ၊ အန် ဝီ တဲး ဂွန် အီမာယ် တွိုန် ဒီယေန့် အူ ဇေန့်။ အန် ဘော ကေး အိတ် ကာလွှယ် ဒဲင် ကာဒါယ်၊ အိုမ် အာင် အန် ဝီ ပုး။

21 ဇဝ် ယေဆူ ဒီမွှတ် ဂုန့် အန်။ အန် တဝ်း၊ “ဒေါ မှဝ် န့ ဘဲန် ပါယ် တီ ဒီ အန်။း”

ဂုန့် အန် ဝီ တဝ်း၊ “အူ ဆိန့် ဒီတဲတ် အန် န့ ပါယ် တီ။ 22 ဘဲန် ဇေန့် ဘဲန် ဇေန့် ကာနမ် ဟဲ့ ဘူင် တဲး အန် ကေး ခဲင် ငဝ်၊ စုဝ်း ခဲင် အိုမ်၊ တဝ်း ဒီ ငဝ်း အာဆာက် အန်။ ဆေ မဲ ပဲ ဒီ ဘူင်၊ တဲး မဲ ဇဝ် ကာဝေ ယာယ်။”

23 ဇဝ် ယေဆူ ဝီ တဝ်း၊ “မဲ တဝ်း၊ ‘ဆေ မဲ ပဲ ဒီ ဘူင်။’ အုဝ် ယီ တဝ်း ဒီ မဲ၊ အာဆေ ညှိုမ်၊ အန် ပဲ ဒီ ဘူင် တူတ့် ဒွန် မျုဝ်။”

24 ပန် တီ ဂုန့် ဂွန် တီ ဝီ တဝ်း၊ “အုဝ် ဟဲ့ ညှိုမ်။ ဆေ န့ ဆီ မိုဝ်း ပီ တူ ညှိုမ် အုဝ်၊ မဲ ဇဝ် စွယ် အုဝ်။”

25 ဒေါ အန် တီ ဇဝ် ယေဆူ ယိုဝ်၊ န့ မိုဝ်း ဒူအီ ကိူန်၊ ကာဘ့လဲပ် တး ဒူင် ကွယ် အန်။ အန် ဝီ စ်ု ကာနမ် ဟာယ် တီ တဝ်း၊ “မဲ ကာနမ် အီ ဘူင် တဲး ဟျုဝ့် အီ ကာဒန် ဘော တူ တဲး အီ ပွိုန် ဒီ ကာလာင် ဂြုဝ်း၊ အုဝ် စ်ု မဲ လေး ခဲင် ဒုဝ် ဘူင့် ဒူအီ နီ၊ ကွဲ့ ဟူ တဲး မဲ ဝီ လိုပ် ဒေါ မှဝ်။”

26 ပန် တီ ကာနမ် ဝီ ဘူင် တဲး ဂွန် အီမာယ် တီ ဝီ ဒတ်၊ ဒီယေန့် ကာဆဝ်။ ဟဲ့ ဟွတ့်၊ အန် လေး။ ဝါယ် အန် တီ ဂွန် အီမာယ် ယီ ပီ ဒူအီ ယမ်။ ခုဝ်၊ မင် အီ တဝ်း၊ “အန် ဟဲ့ ဟွတ့် ယမ်။” 27 ဇဝ် ယေဆူ ယီ ပါ ဒဲ အန်၊ စွယ် အန် တဲး အန် ယိတ့် စွင့်။ ပါယ် တီ၊ အန် ဘော ယိတ့်။

28 ဝါယ် အန် တီ ဇဝ် ယေဆူ ဝီ လိုပ် ခဲင် ကာင်။ ဂေ ဒီဘဲ အန် ဝီ ဒီမွှတ် အန် ဒေါ တူ မိုဝ်း အီ ဟဝ် ထူမ်။ ဂေ တဝ်း၊ “မှဝ် န့ ပါယ် ပီ တူ ပဲ ယေ ဒီ ဆုတ့် ကာနမ် တီ လေး တဝ်။း”

29 အန် ဝီ တဝ်း၊ “ဆေ ဘေ တူ ယိူန် ဘူမ် ဘော ဆာခိုဝ် ဇဝ်ဖြာ၊ ကာနမ် ဇိုဝ် တီ တူ လေး။”

30 ဝါယ် အန် တီ ဂေ ဝီ လေး ဒူင် ကွယ် ဂေ၊ ဝီ ဟာဝ် ကာလုဝ်း အိူင် ဂါလီလေ။ ဇဝ် ယေဆူ တူ ဆီ တဲး အီ ဟဝ် နပ် ဒူင် ကွယ် ဂေ။ 31 ခုဝ်၊ အန် မာနုဝ် ဒီဘဲ အန်။ အန် တဝ်း ဒီ ဂေ၊ “န့ မုး အုဝ်၊ အီ ဟဲ့ ဘဲန် ဂွန် ဒူအီ၊ ဂေ ဒီ အာပ် အုဝ် ဒီ ရန်ဆူ အုဝ်။ ဂေ ဒီ ဘော ငဝ်း အာဆာက် အုဝ်။ ဝါယ် ဟဲ့ ဟွတ့် ယမ် အုဝ်၊ ဟီ နုဝ့် အူယ် ဆီငဲ၊ အုဝ် ဒီ ဝီ ယိတ့် ဝီ အိမ်။” 32 ဂေ ဒီဘဲ အန်၊ ဂေ ယီ တူ နပ် ဆီဖဝ် ဂြုဝ်း တီ။ ဂေ မိူဝ် တူ ယ ဒီ ဒီမွှတ် ဇဝ် ယေဆူ လွင် အန် တီ။

35 ပန် တီ ဇဝ် ယေဆူ ဝီ တုတ့်၊ ဝီ ဒဲ့ ဒီဘဲ အန် ဂိုဝ် ဒီ အာ ဝီ၊ ဝီ တဝ်း၊ “အာဆေ ဆီ ယဲတ့် ဒီ အာတ့်၊ အန် လုဝ် ဒူပ် ဒီ ပန်၊ ဘဲန် မှာယ် ဒွန် အီ။”

36 ပန် တီ အန် ဝီ ဒဲ့ ဂွန် အူ ဝီ တး ကွယ် ကာတဲ ဂေ။ အန် ဝီ ငျီမ် ဂွန် တီ၊ ဝီ တဝ်း၊ 37 “ဆေ န့ မိုဝ်း ဒူအီ အူ ဝီ အီ ရွုး ဂွန် ဒီတဲတ် ဇိုဝ် နီ ကူပ် ညှိုမ် အန် ဒီ အုဝ်၊ န့ ပီ အန် ရွုး အုဝ်။ အာဆေ ယီ ရွုး အုဝ်၊ န့ ပီ၊ အန် တူ ရွုး မီ အုဝ် အူ ဝီ။ အန် ရွုး ဘော ဇဝ်ဖြာ အီ ဟဲ့ တိုယ် အုဝ်။”

38 အာယောဟာန် ဝီ တဝ်း ဒီ ဇဝ် ယေဆူ၊ “ဆာရာ၊ ယေ ဟဲ့ ယိုဝ် ဒူအီ အူ ဝီ၊ အန် ဂါဝ် ပွုန် မဲ၊ ဆုတ့် ကာနမ် လေး ခဲင် ဒုဝ် ဘူင့် အီ။ ကူပ် တူ ဒူပ် အန် ဒီ အေ၊ ယေ ဟဲ့ စ်ု အန် ကွဲ့ ဘူင် ဇိုဝ် တီ။”

39 ဇဝ် ယေဆူ ဝီ တဝ်း၊ “ကွဲ့ ခြဲ အန်။ ဆေ န့ မိုဝ်း ဒူအီ အူ ဝီ အီ ဂါဝ် ပွုန် အုဝ်၊ ဝီ ဘူင် နာ မွှိုမ် အာမ် ကာဆဝ်၊ အန် တူ နပ် ဒီ ဝီ ကာလာင် နာ တူ မွှိုမ် လွင် အုဝ်။ 40 ခုဝ်၊ အာဆေ တူ ဘူင် နာ တူ မွှိုမ် ဒီ အေ၊ အန် ကွယ် ဘ့လာက် အေ။ 41 အုဝ် တဝ်း အာခ်ု ဒီ ဘေ။ ဆေ န့ မိုဝ်း ဒူအီ အူ ဝီ အီ နပ် လွင် အုဝ်၊ ဆေ အန် ဒွါ ဘေ ဒျီင် အိုမ် အူ ဆီလယ့် ကူပ် ဒူပ် ဘေ ဒီ အုဝ်၊ ဒူအီ တီ ဒီ ပွိုန် ရုး ပီ ကာအာပ် အန် ပွိုန်။”

42 ဇဝ် ယေဆူ ဝီ တဝ်း၊ “ဆေ န့ မိုဝ်း ဂွန် ဒီတဲတ် အီ ညှိုမ် အုဝ် ပီ ဂွန် နီ၊ ဆေ ဒူအီ အူ ဝီ ဝီ ကာဆုး ဂွန် တီ ဘူင် မှာပ်၊ န့ ကာအာပ် အီ ဒိုဝ်း မာဝ် တာင် ပီ ကြိတ် အီ ခါမုန်၊ ပက် ဒီ မဲင် အန်၊ ဝီ ဘျွာ ဘော အန် ဘော မာဝ် တီ ခဲင် အိုမ်။ 43-44 ဆေ န့ မုး ဒဲ မဲ အီ တဲး မဲ ဘူင် မှာပ်၊ ဒဲပ် ဝဲန် ဒဲ တီ။ ခုဝ်၊ န့ တဲး မဲ စုဝ်း ကာလုဝ့် ငါရာယ်။ ခဲင် ကာလုဝ့် ငါရာယ် ငဝ် တူ ယတ် ဒေါ မှဝ်။ ဆေ မဲ မိုဝ်း ဒဲ အူ ဘ့လာက်၊ ယီ ပွိုန် လိုပ် ကွယ် ခဲင် မိူင် ဂါင်ဟြာဝ်၊ န့ မွှိုမ် လွှိုမ် မိုဝ်း မဲ ဒဲ အာ ဘ့လာက်။ 45-46 ဆေ န့ ဘော မုး ပ့လဝ် မဲ အီ တဲး မဲ ဘူင် မှာပ်၊ ဒဲပ် ဝဲန် ဘော အန်။ ဆေ မဲ မိုဝ်း ပ့လဝ် အူ ဘ့လာက်၊ ယီ ပွိုန် လိုပ် ကွယ် ခဲင် မိူင် ဂါင်ဟြာဝ်၊ န့ မွှိုမ် လွှိုမ် မိုဝ်း မဲ ပ့လဝ် ဘော အာ ဘ့လာက်၊ ယီ စုဝ်း ကာလုဝ့် ငါရာယ်။ 47 ဆေ န့ ဘော မုး ငါယ် မဲ အီ တဲး မဲ ဘူင် မှာပ်၊ တဲး မဲ ဝီ ဂွဲ့ ဝဲန် ငါယ် တီ။ ဆေ မဲ မိုဝ်း ငါယ် အူ ဘ့လာက် ယီ ပွိုန် လိုပ် ခဲင် မိူင် ပီ အိုပ် ဇဝ်ဖြာ၊ န့ မွှိုမ် လွှိုမ် မိုဝ်း မဲ ငါယ် အာ ဘ့လာက်၊ ယီ စုဝ်း ကာလုဝ့် ငါရာယ်။

48 ခဲင် ကာလုဝ့် ငါရာယ် တီ၊ မင်ပြတ့် အီ ဟူမ် ယင် ဒူအီ တူ ယမ် ဒေါ မှဝ်။ ဘော ငဝ် အီ တဲး ဒူအီ ခမ် ဒုက် တာင် အာဝ် ပွိုန် ဘျတ်။ 49 ငဝ် ဒီ ဝီ ကာဆိုမ် နာ တူ မွှိုမ် ခဲင် နဝ်း ဒွန် အီ၊ တဲး န့ ပီ ဆယ့် အီ တဲး ပီ ဒီ ဟူမ် တူ အမ်။

50 ဆေ ဆယ့် ဟဲ့ ဆွင့်၊ န့ ဘွတ်။ ဆေ ယီ ဟြာယ် ဆွင့် ဆယ့်၊ အာဝ် ပွိုန် ဘူင် မာဆေ အီ ပဲ ဒီ တဲး ဆယ့် ဝီ ဆွင့်။ တဲး နဝ်း ဘေ ပီ ပီ ဒီ ဟူမ် အီ ဟပ် ဆယ့်။ တဲး ဘေ ဘော လာယ် ရွက့် ကာတဲ ဘေ၊ ကွဲ့ တဲး ဘေ လာယ် ရူ။”