4 ဒီဘဲ အန် ဝီ တဝ်း၊ “မှဝ် အေ ဒီ ပါယ် ဒီ ဟျီင် ဂေ ဟူမ် ဒူင် ကွယ် အေ နီ။း ခဲင် ပြဲ ကာဟဝ်း နီ အာဝ် မိုဝ်း မာဆေ။”

5 ဇဝ် ယေဆူ ဝီ ဒီမွှတ် ဒီဘဲ အန် တဝ်း၊ “ခါမုန် နှာင် ဘူင့် ဘေ မိုဝ်း။း” ဂေ ဝီ တဝ်း၊ “ဘူ ဘူင့်။”

6 ပန် တီ အန် စ်ု ဂေ ဒူအီ ကိူန် တဲး ဂေ တုတ့် ဒဲင် ကာဒါယ်။ အန် ဘော ဒိုဝ်း ခါမုန် ဘူ ဘူင့်၊ ဝီ ကာလာင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ဝီ ကာဘက် ခါမုန်၊ ဝီ ဒွါ ဒီ ဒီဘဲ အန်၊ တဲး ဂေ ဝီ ဒွါ ဒီ ဒူအီ ကိူန်။ ဂေ ဒီဘဲ ဇဝ် ယေဆူ ဝီ ဘူင် ပီ စ်ု အန်။ 7 ဂေ မိုဝ်း ဘော မာဂါ မင် ဒုဝ်။ ခုဝ်၊ ဇဝ် ယေဆူ ဝီ ဒါင် ဂုင် ဂေဇူ ဒီ ဇဝ်ဖြာ၊ ဝီ စ်ု ဂေ ဒီဘဲ အန်၊ တဲး ဂေ ကာဆာင် ဘော မာဂါ တီ။ 8 ပါယ် တီ၊ ဂေ ဒူအီ ကိူန် ဝီ ပွိုန် ဒီ ဟူမ် ဖဲ။ ဂေ ဒွန် အီ ဟဲ့ ဟွတ့် ဟူမ်၊ ဂေ ဒီဘဲ ဇဝ် ယေဆူ ဝီ ကာဇု ကာလူယ် ဟူမ် ဂေ၊ ကော နုဝ့် ဘူ ခွန်။ 9 န့ မိုဝ်း အီမာယ် ဖွုန် ဟြဲန့် ဝီ၊ အီ ဟဲ့ ကွယ် ရိုမ် ဒူပ် ဇဝ် ယေဆူ ဒေါ အန် တီ။ ဝါယ် အန် တီ ဇဝ် ယေဆူ ဝီ စ်ု ဂေ ဝိဝ်။ 10 ဂေ ဟဲ့ ဟွတ့် ဝိဝ်၊ ဇဝ် ယေဆူ ဘော ဒီဘဲ အန် ဝီ လိုပ် ခဲင် ရိုဝ်၊ ဝီ ပဝ့် ဟာဝ် ပေါ အူ ပ့လုဝ့် အီ စိူဝ် ဒါမာနူထာ။

11 ဂေ ဟဲ့ ဟွတ့် ဇမ် ဒူင် တီ၊ န့ ဝီ မိုဝ်း ဂေ ဒူအီ ဖိုင် ဖာရီဆဲ မင် အီ၊ ဂေ တး ဝီ ဒီမွှတ် ဇဝ် ယေဆူ။ ဂေ ဆီ ထေဝ် ပွုန် အန်၊ မှာန့်၊ တဲး အန် ဘူင် ဘျ ပွုန် အန်၊ တဲး ဂေ ယိုဝ် အီ မွှိုမ် အာမ် ကာဆဝ်။ 12 ဇဝ် ယေဆူ ယီ ဟိုဝ်း ဖွိုမ် တာင် ကူပ် ဟဲ့ ဒုက် ဒီ နဝ်း အန်။ အန် တဝ်း၊ “ဒူအီ အီ ကွယ် ဇာတ် နီ၊ ဂေ ဆီ ယိုဝ် နာ မွှိုမ် အာမ် ကာဆဝ်။ အုဝ် ယီ တဝ်း အာခါခ်ု။ ဂေ တူ ပွိုန် ဒီ ယိုဝ် နာ မွှိုမ် အာမ် မာဆေ။” 13 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ဒူင် ကွယ် ဂေ၊ ဝီ လိုပ် ခဲင် ရိုဝ်၊ ဝီ ပဝ့် ဟာဝ် နာ တ အိုမ် ဒိုင် တွိုန်။

14 ဒေါ အန် တီ ဂေ ဒီဘဲ ဇဝ် ယေဆူ ဟဲ့ ပိဝ် ဒီ ဂူင့် ခါမုန် ပီ ဒီ ဟူမ် ဂေ။ ဂေ မိုဝ်း မီ ခါမုန် အူ ဘူင့် အီ ကွယ် ခဲင် ရိုဝ် ဂေ။ 15 ဇဝ် ယေဆူ ဝီ တဝ်း ဒီ ဂေ၊ “ဘေ လုဝ် ဆာဒိက် ဂေ ဒူအီ ဖိုင် ဖာရီဆဲ ဘော ခုန်ဒီခမ် အာဟေရူတ်။ ပီ ဘူင် ဂေ၊ န့ ပီ ဆီနမ် ဘြး ခါမုန်။”

16 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒီဘဲ အန် ဝီ လာယ် ဆင်ချာင် ဆီဖဝ် ဂြုဝ်း တီ။ ဂေ တဝ်း၊ “အန် ကာလာင် ဂြုဝ်း တီ ဒီ အေ ကူပ် ဟဲ့ ပိဝ် အေ ဒီ ဂူင့် ခါမုန်။”

17 ဇဝ် ယေဆူ ကော နပ်၊ မာဆေ ပီ လာယ် ကာလာင် ဂေ။ အန် ဝီ ဒီမွှတ် ဂေ။ အန် တဝ်း၊ “မှဝ် န့ ပါယ် ပီ လာယ် ကာလာင် ဘေ လွင် တူ မိုဝ်း ဘေ ခါမုန်။း န့ တူ လိုဝ်း ဒီ နဝ်း ဘေ၊ လွင် ပီ ဘူင် အုဝ်။း မှဝ် န့ ပါယ် ပီ ညှာပ် လိုဝ်း ခဲင် နဝ်း ဘေ။း 18 န့ ပီ ဘော ဘေ မိုဝ်း ငါယ် ယီ တူ ပွိုန် ဒီ ယိုဝ် ဆီချာ။ ဘေ မိုဝ်း ဟျုဝ့် ယီ တူ လိုဝ်း ဆီဘြုဝ်း ပီ ထူမ် ဘေ။ န့ မိူဝ် ပီ၊ ဘေ တူ လှုဝ်း ပဲ့ ဟဲ့ ဘူင် အုဝ် ခါ အာတ့်။ 19 ဒေါ ကာဘက် အုဝ် ခါမုန် ဖန် ဘူင့်၊ ကာဆာင် ဒီ ဒူအီ ဖန် ဟြဲန့် ဝီ၊ ဘေ ဝီ ကာဇု ကာလူယ် အန် နှာင် ကာတဲပ်။း” ဂေ ဝီ တဝ်း၊ “န့ မိုဝ်း ဂိုဝ် ဒီ အာ ကာတဲပ်။”

20 ဇဝ် ယေဆူ ဝီ တဝ်း၊ “ဒေါ ကာဘက် အုဝ် ခါမုန် ဘူ ဘူင့်၊ ကာဆာင် ဒီ ဒူအီ ဖွုန် ဟြဲန့် ဝီ၊ ကာလူယ် အန် နှာင် ခွန် ဘေ ဝီ ကာဇု အုန်။း”

ဂေ ဝီ တဝ်း၊ “ဘူ ခွန်။”

21 ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဝီ တဝ်း ဒီ ဂေ၊ “ဘေ ဟဲ့ ဟွတ့် ယိုဝ် ဇိုဝ် တီ၊ န့ ယီ တူ လိုဝ်း မာဆေ ဒီ နဝ်း ဘေ။”

24 အန် ဝီ ယွတ် နာ ဒဲင်၊ ဝီ တဝ်း၊ “အုဝ် ဟဲ့ ယိုဝ် ဒူအီ ဟာဝ် ဝိဝ် ဟာဝ် ဝေန့်။ ဂေ ယီ ပီ ဟေ။”

25 ပေါ အူ ဇေန့် ဇဝ် ယေဆူ ဝီ ပါ ငါယ် ဒူအီ တွိုန်။ ပန် တီ ငါယ် အန် ဘော လိုဝ်း၊ အန် ဝီ ပွိုန် ယိုဝ်၊ ဘော ဝီ လိုဝ်း ဆီချာ။

26 ပန် တီ ဇဝ် ယေဆူ ဝီ တိုယ် အန် ဝေန့် ဆိူဝ် ဒီ ကာင် အန် ဘော ဒမ် အန် တဝ်း၊ “ကွဲ့ ဝဝ့် နာ တေတ့် နာ တ ခဲင် မိူင်။ ကွဲ့ ခဲ ဒီ အာဆေ။”

27 ဇဝ် ယေဆူ ဂေ ဒီဘဲ အန် ဝီ ဟာဝ် ခဲင် ရဝ် ဘဲန် ရဝ် ဘဲန် ရဝ် အီ ကွယ် ကာတတ် မိူင် ကေဆာရေ ဖီလီဖီ။ ဒေါ ဟာဝ် ဂေ ဒူပ် န့တေန့်၊ အန် ဝီ ဒီမွှတ် ဒီဘဲ အန် တဝ်း၊ “ဂေ ဒူအီ ဟဝ်၊ ဂေ တဝ်း အုဝ် မုး အာဆေ။း”

28 ဂေ ဝီ တဝ်း၊ “မင် အီ တဝ်း၊ မဲ မုး ဒါ ဆာရာ အာယောဟာန် အီ စိုပ် ဒူအီ ခဲင် အိုမ်၊ အန် ဟဲ့ ဝီ ယိတ့် ဝီ အိုမ်။ မင် အီ တဝ်း၊ မဲ မုး ဒါ ဆာရာ အာအေလီယ တွိုန်၊ အီ ဟဲ့ ဝီ ယိတ့် ဝီ အိမ်။ ဘော မင် အီ တဝ်း၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ အူ ဝီ၊ အီ ကွယ် ဒေါ မွိုန်၊ အီ ဟဲ့ ဝီ ယိတ့် ဝီ အိမ်။”

29 ဇဝ် ယေဆူ ဝီ တဝ်း၊ “ဆေ န့ မုး ဘေ၊ ဘေ တဝ်း အုဝ် မုး အာဆေ။း” အာပေတာရူ ဝီ ဝျီ့ ဂြုဝ်း တီ။ အန် တဝ်း၊ “မဲ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး မဲ ချွတ် ဒူအီ။”

30 အာပေတာရူ ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဝီ ဒမ် ဂေ ဒီဘဲ အန်၊ ကွဲ့ တဲး ဂေ ကာလာင် ဂြုဝ်း တီ ဒီ အာဆေ။

31 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ စုး ဒီ ကာလာင် ဒီ ဒီဘဲ အန် လွင် ပီ ဒီ ပါယ် အာဆာက် အန်၊ အီ ဟဲ့ ဘဲန် ဂွန် ဒူအီ။ အန် တဝ်း၊ ဂွန် ဒူအီ တီ လုဝ် ကာဒုး ဒုက် ဒွန် မျုဝ်။ ဂေ ဒါ တာင် ယူဒါ၊ ဂေ မိူဝ် တူ လုဝ် အန်။ ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဒီ ဆုင်ဖျာတ် ဒီ ငဝ်း အာဆာက် အန်။ အန် ဟီ ဟွတ့် ယမ်၊ ဝါယ် အူယ် ဆီငဲ၊ အန် ဒီ ဝီ ယိတ့် ဝီ အိမ်။ 32 အန် ကာလာင် ဆိူဝ် လွင် ဇိုဝ် တီ။ အာပေတာရူ ယီ ဒဲ့ ဇဝ် ယေဆူ မာငး ပေါ ဘ့လာက်၊ ဝီ ခြဲ အန်၊ ကွဲ့ တဲး အန် ကာလာင် ဂြုဝ်း ဇိုဝ် တီ။

33 ဇဝ် ယေဆူ ယီ ဝီ မာငး ယွတ် ဂေ ဒီဘဲ အန် ဘောကာဂ့လျီတ်၊ ဝီ တဝ်း ဒီ အာပေတာရူ၊ “မဲ လေး ဒူင် ကွယ် အုဝ်။ ပီ ကာလာင် မဲ န့ ပီ ဂြုဝ်း ဘုဝ် ကာနမ် အီ စိူဝ် ဆာတာန်။ န့ တူ ဒူပ် အာငျာန် ဇဝ်ဖြာ။ န့ ဒူပ် အာငျာန် ဒူအီ။”

34 ဝါယ် အန် တီ ဇဝ် ယေဆူ ဝီ ဒဲ့ ဒီဘဲ အန် ဘော ဂေ ဒူအီ ကိူန်၊ တဲး ဂေ ဝီ ထူမ်။ အန် တဝ်း၊ “ဆေ န့ မိုဝ်း ဒူအီ အီ ဆီ ဒူပ် အုဝ်၊ အန် လုဝ် ဝဲန် ပီ အိုင် အန်။ အန် လုဝ် ဘ့လေး နဝ်း အန်၊ တဝ်း၊ ‘ဆေ အုဝ် ပီ ဘော လုဝ် ယမ် မိူဝ်၊ အုဝ် ယီ ဒီ ဒူပ် အန် ဇဝ် ဆေဆေ။’ အန် လုဝ် ဒူပ် အုဝ် တဲး န့ ပါယ် တီ။ 35 ခုဝ်၊ အာဆေ ကာဝေ အာဆာက် အန်၊ အာဆာက် အန် ဒီ စှိုမ်။ အာဆေ ယီ တူ ယုဝ် ဒီ ယမ် ကူပ် ညှိုမ် အန် ဒီ အုဝ် ဘော ဂြုဝ်း အုဝ်၊ အန် ဒီ ဝီ ပွိုန် အာဆာက် ကာမာယ်။ 36 ဆေ န့ ယီ မိုဝ်း ဒူအီ အူ ဝီ၊ အီ ဟဲ့ ပွိုန် တူတ့် ဒွန် မျုဝ် ဒဲင် ကာဒါယ် နီ၊ အာဆာက် အန် ယီ စှိုမ်၊ ယီ စုဝ်း ကာလုဝ့် ငါရာယ်၊ ကြုဝ် ပီ ပွိုန် အန် တီ အာဝ် ဘဲန် အာဂျိုဝ် မာဆေ ဒီ အန်။ 37 ဒူအီ မိူဝ် တူ ပွိုန် ဒွါ မာဆေ၊ တဲး ဇဝ်ဖြာ ချွတ် အန်၊ ကွဲ့ တဲး အာဆာက် အန် စှိုမ်။ 38 ဂေ ဒူအီ ဇာတ် နီ၊ ဂေ ဟဲ့ ဘူင် မှာပ် ဒွန် မျုဝ် ဘော ဝဲန် ဇဝ်ဖြာ။ ပီ ဘူင် ဂေ ဒီ ဇဝ်ဖြာ၊ န့ ပီ ပီ ဘူင် ဒူအီ အီ လုတ့် အီဘိုန့်။ ဂေ ဒူအီ ဇိုဝ် တီ ဒီ ဘော ဆာယ် ဒီ ကာလာင် ဒီ အီ ဟဝ် လွင် ညှိုမ် ဂေ ဒီ အုဝ် ဘော ဂြုဝ်း အုဝ်။ ဆေ န့ ပါယ် တီ၊ အုဝ် မိူဝ် ဒီ ဆာယ် ဒီ တဝ်း၊ ‘အုဝ် ဟဲ့ နပ် ဂေ။’ အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ ဝီ တး လူင် ဒဲင် ကာဒါယ်။ ဒေါ အန် တီ အုဝ် ဒီ ဘော ဘျ အာရူင် ဘ့လာင် ဂုန့် အုဝ်။ အုဝ် ဒီ ဘော ဒဲ့ ဂေ အာမူ အာမာတ် ဇဝ်ဖြာ အီ ဘွတ် ကာဆဝ်၊ တဲး ဂေ တး ရိုမ် ဒူပ် အုဝ်။ ဒေါ အန် တီ အုဝ် ဒီ ဘော ဆာယ် ဒီ ဂေ ဒူအီ အီ ဟဲ့ ဒွိုမ် ဆာယ် ဒီ ကာလာင် လွင် ညှိုမ် ဂေ ဒီ အုဝ်။”