ခါန် 7
လွင် ဒါရာ ပီ မာနုဝ် ဒါ ဆာရာ အာမုဝ်ဆဲ
5 ဂေ ဒူအီ ဖိုင် ဖာရီဆဲ ဘော ဂေ ဒါ ဆာရာ အီ မာနုဝ် ဒါရာ ယူဒါ တွိုန်၊ ဂေ ဘော ယိုဝ် ဒီဘဲ ဇဝ် ယေဆူ တူ ဒူပ် ဟိတ် ဂေ၊ ဂေ ဝီ ဒီမွှတ် ဇဝ် ယေဆူ။ ဂေ တဝ်း၊ “မှဝ် န့ ပါယ် ပီ တူ ဒူပ် ဒီဘဲ မဲ ဟိတ် အေ။း မှဝ် န့ ပါယ် ပီ တူ ဘူင် ဒူပ် ဂေ ပီ မာနုဝ် ဒါ တာင် အေ ဒီ အေ။း ဂေ ဟူမ် ဘူမ် ဂေ၊ တာ ဒဲ အီ တူ ဆီငါ။”
6 ဇဝ် ယေဆူ ဝီ တဝ်း၊ “ဂြုဝ်း ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ တွိုန်၊ န့ ဟဲ့ မှာန်၊ ဟဲ့ မုး။ အန် ဟဲ့ ဒွိုမ် ကာလာင် လွင် ဘေ ဒူအီ အီ ညိုင်ရာင် ဘွတ်။ အန် ဟဲ့ ဒဲမ် အုန် ခဲင် ဘပ် အန် ပါယ် နီ။ ‘ဂေ ရုဝ်ဆေ အုဝ် မီ ခဲ့ ဂြုဝ်း ဂေ။ နဝ်း ဂေ ယီ တူ နမ်လှုဝ်း အုဝ်။
7 ဂေ ဘော ကြိုပ် အုဝ် ပီယေန့်။ ပီ မာနုဝ် ဂေ၊ န့ တူ မုး ဒါရာ အုဝ်။ န့ မုး ဒါရာ ပီ ဘူင် ဂေ ဒူအီ။’ ပါယ် တီ အာအီဆာယ တွိုန် ဟဲ့ ဒဲမ် အုန် ဂြုဝ်း ဇဝ်ဖြာ။
8 ပါယ် တီ ဘော ဘေ ဟဲ့ ဝဲန် ဒါရာ ဇဝ်ဖြာ၊ ဝီ ဒူပ် ဟိတ် ဒူအီ။” ခဲ့ တီ ဇဝ် ယေဆူ ဝီ ကာလာင် ဒီ ဂေ။
9 ဟဲ့ ဟွတ့်၊ အန် ဝီ တဝ်း၊ “ဘေ ဟဲ့ လွှက့် ဒီ ဝဲန် ဒါရာ ဇဝ်ဖြာ၊ တဲး ဘေ ပွိုန် ဒီ ဒူပ် ဟိတ် ဘေ။ 10 အုဝ် ဒီ ကာလာင် အူဖာမာ ဒီ ဘေ။ ဒါ ဆာရာ အာမုဝ်ဆဲ၊ အန် ဟဲ့ ဒွိုမ် တဝ်း၊ တဲး ဘေ ရုဝ်ဆေ ဂုန့် မာ ဘေ။ အန် ဘော တဝ်း၊ အာဆေ ဒိူင် ဂုန့် မာ အန်၊ အန် လုဝ် ခမ် ဒီ ယမ်။ 11 ဘေ ယီ မာနုဝ် ပေါ အူ မျုဝ်။ ဆေ န့ မိုဝ်း ဒူအီ အူ ဝီ၊ အန် တဝ်း ဒီ ဂုန့် မာ အန်၊ ‘ပီ ဒီ လုဝ် ဒွါ အုဝ် ဒီ ဘာယ်၊ အုဝ် အာဝ် ဟူ မိုဝ်း ဒီ ဒွါ။ အုဝ် ဟဲ့ ဟွတ့် လှူ ဒီ ဇဝ်ဖြာ၊’ ဘေ တဝ်း၊ ဟဲ့ မှာန် ပီ ဘူင် အန်။ 12 ပါယ် တီ၊ ဘေ မာနုဝ် ဒူအီ၊ ကွဲ့ ဟူ တဲး ဂေ စွယ် ဂုန့် မာ ဂေ။ 13 ပါယ် တီ ဘေ နပ် ဒီ ဝဲန် ဂြုဝ်း ဇဝ်ဖြာ၊ ဝီ တဲး ဒွန် အီ ထူမ် ဒူပ် ဟိတ် ဘေ၊ ပဲ့ ဟဲ့ ဒူပ် ဘော ဂုန့် ဒါ ဘေ အီ ကွယ် ခါ အာတ့်။ ဘေ မိူဝ် ဘူင် ဘဲန် မျုဝ် ဘဲန် မျုဝ် ဇိုဝ် တီ။”
14 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဒါ ဆာရာ ယူဒါ၊ အန် ဝီ ဒဲ့ ဂေ ဒူအီ ကိူန်၊ တဲး ဂေ ဝီ ထူမ် ဂြုဝ်း အန်။ အန် တဝ်း၊ “တဲး ဘေ ဒွန် အီ ထူမ် ဂြုဝ်း အုဝ်၊ တဲး န့ ဘော လိုဝ်း ဒီ နဝ်း ဘေ။ 15 ပီ ဒီ ဟူမ် အီ လိုပ် ခဲင် ဒုဝ် ဘူင့် ဒူအီ၊ န့ တူ တဲး အန် ဘဲန် ဒူအီ တူ ဘွတ်။ န့ ယီ မုး ပီ ဘူင် အန် ဘော ပီ ကာလာင် အန်၊ အီ လေး ခဲင် နဝ်း အန်၊ ဇိုဝ် တီ အီ တဲး န့ ဘဲန် မှာပ် ဒီ ဒူအီ၊ တူ တဲး အန် ဆီငါ။ 16 အာဆေ မိုဝ်း ဟျုဝ့် အီ နပ် ဒီ ထူမ်၊ တဲး အန် ထူမ် ဂြုဝ်း အုဝ် နီ။”
17 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ဒူင် ကွယ် ဂေ ဒူအီ ကိူန်၊ ဝီ ဟာဝ် ခဲင် ကာင် အူ ကာင်။ ဂေ ဒီဘဲ အန် ဝီ ဒီမွှတ် အန် လွင် အူဖာမာ ပဲ့ ဟဲ့ မာနုဝ် အန်။ 18 ဇဝ် ယေဆူ ဝီ တဝ်း၊ “ဘေ တူ မိုဝ်း အာငျာန်။ မှဝ် န့ ပါယ် ပီ တူ လိုဝ်း ဒီ နဝ်း ဘေ ဂြုဝ်း ပဲ့ ဟဲ့ ကာလာင် အုဝ်။း ပီ ဒီ ဟူမ် အာဝ် ပွိုန် လိုပ် ခဲင် နဝ်း တဲး နဝ်း တူ ဘွတ်။ 19 န့ လိုပ် ခဲင် ဝတ့်။ ဟဲ့ ဟွတ့်၊ န့ ဝီ လေး ခဲင် ဝတ့်။” ပီ ကာလာင် အန် ဇိုဝ် တီ၊ န့ ဘော လေး ဆီဖဝ် ပေါ အူ မျုဝ်။ န့ ပီ ဇဝ် ယေဆူ တဝ်း၊ ဟဲ့ ပွိုန် ဟူမ် ပီ ဒီ ဟူမ် ဒွန် မျုဝ်။ အာဝ် မိုဝ်း ပီ ဒီ ဟူမ် အီ ဘွတ် တူ ဘွတ်။
20 အန် ဝီ တဝ်း၊ “န့ ယီ မုး ပီ ဘူင် ဒူအီ၊ ပီ ကာလာင် အန်၊ အီ လေး ခဲင် နဝ်း အန်၊ န့ တဲး ဒူအီ တူ ဘွတ်။ 21 ခုဝ်၊ နာ တူ မွှိုမ်၊ န့ လေး ခဲင် နဝ်း ဒူအီ။ ဆေ ဒူအီ ဘော မိုဝ်း အာငျာန် တူ မွှိုမ်၊ လုတ့် အီဘိုန့် အီ၊ ပြာ ကြုဝ်ကြာမ် အီ၊ ဆီ ငဝ်း ဒူအီ၊ လာယ် အီဘိုန့် အီ ဟဝ်၊ 22 ဆေ အန် ဘော မိုဝ်း နဝ်း လောဖ၊ နဝ်း ဟာယ်၊ ကာလုဝ် ဆေဆေ၊ ဘူင် ပီ တူ ကာအာပ် ဘူင်၊ မိုဝ်း နဝ်း ဆီ ပွိုန် ခဲ့ မိုဝ်း အီ ဟဝ်၊ ကာလာင် စာဝ် လွင် အီ၊ မိုဝ်း နဝ်း ပီခိုက် ဘော နဝ်း ရိုဝ်၊ တူ မိုဝ်း အာငျာန်၊ 23 နာ တူ မွှိုမ် ဇိုဝ် တီ ဒွန် မျုဝ်၊ န့ လေး ခဲင် နဝ်း ဒူအီ၊ တဲး အန် တူ ဘွတ်။”
လွင် အီဘိုန့် အူ ဝီ အီ ညှိုမ် ဇဝ် ယေဆူ
27 ဇဝ် ယေဆူ ယီ တဝ်း ဒီ အန်၊ “ဒွန် အီ လုဝ် တဲး ဂွန် အန် ဟူမ် ဖဲ ဒီ အာတ့်။ ပီ ဒီ လုဝ် ဒွါ ဂွန် ဟူမ်၊ အာဝ် ကာအာပ် ဝဲန်၊ တဲး မာဆုဝ် ဟူမ်။”a
28 အီဘိုန့် တွိုန် ဝီ တဝ်း၊ “ဂြုဝ်း ပီ ကာလာင် မဲ ဇဝ် ဟဲ့ မှာန်။ န့ ယီ မိုဝ်း ဂေ မာဆုဝ် အီ ကွယ် ခြိုမ် ကာင်၊ ဂေ ဝီ ပွိုန် ဒီ လျီ့ ဟူမ် အီ ရး ဒီ မူတ့် ဂွန်။”
29 အန် ဟဲ့ ဟွတ့် ကာလာင် ပါယ် တီ၊ ဇဝ် ယေဆူ ဝီ တဝ်း ဒီ အန်၊ “ကူပ် ကာလာင် မဲ ဂြုဝ်း တီ၊ တဲး မဲ ဝေန့် ဒီ ကာင် မဲ။ ကာနမ် ဟဲ့ ဟွတ့် လေး ခဲင် ဒုဝ် ဘူင့် ဂွန် မဲ။”
30 ဟဲ့ ဟွတ့်၊ အန် ဝီ ဝေန့် ဒီ ကာင် အန်။ အန် ဝီ ယိုဝ် ဂွန် အန် ကွယ် အိတ် ဒဲင် ကာစှူင့်။ ကာနမ် ဟဲ့ ဟွတ့် လေး ခဲင် ဒုဝ် အန်။
လွင် ဇဝ် ယေဆူ ပီကဲန် ဒူအီ အီ တူ နပ် ဒီ ကာလာင် ဂြုဝ်း
31 ဝါယ် အန် တီ ဇဝ် ယေဆူ ဝီ လေး ဒူင် ကွယ် အန် အီ ကွယ် ကာတတ် မိူင် ထူရုဝ်။ အန် ဝီ ကာလုဝ်း ဟာဝ် ခဲင် မိူင် ဆီဒူန်၊ ဟာဝ် လူင် ဒီ ခူပ် အိုမ် ဒိုင် ဂါလီလေ။ အန် ဇမ် ခဲင် အိူင် ဂိုဝ် မိူင် တွိုန်။ 32 ဒေါ ဇမ် အန် ဒူင် တီ န့ မိုဝ်း ဒူအီ မင် အီ၊ ဂေ တိုယ် ဒူအီ အူ ဝီ ဒီ ဇဝ် ယေဆူ။ ဟျုဝ့် ဒူအီ တီ ကာအာဝ်။ အန် ကာလာင် ဂြုဝ်း မိူဝ်၊ အာဝ် ဘြီ။ ဂေ ဝီ မှာန့် ဒီ ဇဝ် ယေဆူ၊ တဲး အန် ဒါင် ဒဲ အန် ဒဲင် ဂိန့် ဒူအီ တီ၊ တဲး ဒူအီ တီ ဝီ ကဲန်။
33 ဇဝ် ယေဆူ တဲး အန် ဟာဝ် ဒူင် တူ မိုဝ်း ဒူအီ ကိူန်။ ဟဲ့ ဟွတ့်၊ ဇဝ် ယေဆူ ဝီ ဟပ် ကာနူ အန် ခဲင် ဟျုဝ့် ဒူအီ တီ။ အန် ဘော ပတ့် ဒဲ အန်၊ ဝီ ပါ ဆီဒ ဒူအီ တီ။ 34 ဟဲ့ ဟွတ့်၊ အန် ဆာကိုဝ်း ဂါင်ဟြာဝ်၊ ဝီ ဟိုဝ်း ဖွိုမ် တာင် တဝ်း၊ “အေဖာထာ။” လွင် ဒါင် ဂြုဝ်း တီ မုး၊ “တဲး န့ လိုဝ်း။” 35 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဟျုဝ့် ဒူအီ တီ ဘော ဝီ လိုဝ်း။ ဆီဒ အန် ဝီ ပွိုန် ကာလာင် ဂြုဝ်း၊ တဲး န့ လေး ဆီဘြုဝ်း။
36 ဇဝ် ယေဆူ ဝီ ဒမ် ဂေ၊ ကွဲ့ တဲး ဂေ ကာလာင် ဒီ အီ လွင် အန် တီ။ အန် ယီ ဝီ ကာလာင် ဒီ ဂေ ခဲ့ မှဝ် မိူဝ်၊ ဂေ နဲ့ ဝီ ကာလာင် ပေါ န့ ပွါ။ 37 ဂေ ဒူအီ ကော အာမ် ကာဆဝ် လွင် အန် တီ။ ဂေ ဝီ တဝ်း၊ “ဇဝ် ယေဆူ နပ် ဒီ ဘူင် တဲး န့ ဆီချာ ဒွန် မျုဝ်။ ဘော ဒူအီ ဟျုဝ့် ကာအာဝ်၊ အန် နပ် ဒီ ပီကဲန်၊ တဲး န့ လိုဝ်း။ ဘော ဒူအီ တူ နပ် ဒီ ကာလာင် ဂြုဝ်း၊ အန် ပဲ ပီကဲန်၊ ဝီ တဲး ဒူအီ တီ ပွိုန် ကာလာင် ဆီဘြုဝ်း။”