ခါန် 6
လွင် ဇဝ် ယေဆူ ဝီ ဟာဝ် ဇမ် မိူင် ကွယ် ဘြိမ် အန်
4 ဇဝ် ယေဆူ ဝီ တဝ်း ဒီ ဒူအီ ဇိုဝ် တီ၊ “ဆေ န့ မုး ဒူအီ အီ ဘျာန် ဂြုဝ်း ဇဝ်ဖြာ၊ ဒွန် အီ ဒီ ဘော ရုဝ်ဆေ အန်။ ဆေ အန် ယီ တး မိူင် ကွယ် ဘြိမ် အန်၊ ဂေ ဒူအီ အီ ဒွိုမ် ကွယ် ရိုမ် ဒူပ် အန်၊ ဂေ ဝေါဝဲ အန် ဘော ဂေ ဒူအီ အီ ကွယ် ခဲင် ကာင် အန်၊ ဒူအီ ဂေ တီ၊ ဂေ တူ ရုဝ်ဆေ အန်။” 5 ခုဝ်၊ ဒူင် ကွယ် ဘြိမ် အန် တီ၊ အန် ဒါင် ဒဲ အန် ဒဲင် ဂိန့် ဒူအီ ဆဝ် မင် အီ၊ တဲး ဂေ ကဲန်။ ဒဲင် တီ၊ အန် တူ ပွိုန် ဘူင် နာ မွှိုမ် အာမ် မာဆေ ပေါ န့ ပွါ။ 6 အန် မိူဝ် အာမ် ပီ တူ ညှိုမ် ဂေ ဒီ အန်။
လွင် ဇဝ် ယေဆူ တိုယ် ဒီဘဲ အန် ဟာဝ် ဘဲန် ပ့လုဝ့် ဘဲန် ပ့လုဝ့်
ဝါယ် အန် တီ ဇဝ် ယေဆူ ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ဝီ မာနုဝ် လွင် ဇဝ်ဖြာ ခဲင် ရဝ် ဘဲန် ရဝ် ဘဲန် ရဝ်။ 7 အန် ဝီ ဒဲ့ ဂေ ဒီဘဲ အန် ဂိုဝ် ဒီ အာ ဝီ၊ တဲး ဂေ တး ဒူင် ကွယ် အန်။ အန် ဝီ စ်ု ဂေ၊ တဲး ဂေ ဟာဝ် အူ ပ့လုဝ့် အာ ဝီ အာ ဝီ။ အန် ဘော ဒွါ ပွုန် ဒီ ဂေ၊ တဲး ဂေ ပွိုန် ဒီ အိုပ် ကာနမ် ဟာယ်။
8 အန် ဘော စ်ု ဂေ၊ ဒေါ ဟာဝ် ဂေ ဒူပ် န့တေန့်၊ ကွဲ့ တဲး ဂေ ဂူင့် ကြုဝ်ကြာမ် မာဆေ ဒဲင် န့ကြွုန် ဂေ။ ကွဲ့ တဲး ဂေ ဂူင့် ခါမုန် ဂေ ဟူ။ ကွဲ့ တဲး ဂေ ဟပ် အုန် ရွိုန် ခဲင် ဆဲ့ ဂေ။ 9 အန် ဘော စ်ု ဂေ စှိုပ် ခူဒိန့် ဂေ၊ ယီ တူ တဲး ဂေ ဒိုဝ်း ဆီတုဝ် ပေါ အူ ဖိူန်။ 10 အန် ဝီ တဝ်း၊ “ဆေ ဘေ လိုပ် ခဲင် ကာင် အီ ဟဝ်၊ တဲး ဘေ ကွယ် ခဲင် ကာင် တီ၊ တဲး ကော ဇမ် ပန် ဒီ လေး ဘေ ခဲင် မိူင် တွိုန်။ 11 ဆေ န့ ဘော မိုဝ်း အူ ပ့လုဝ့်၊ ဆေ ဂေ ဒူအီ တူ ရွုး ဘေ၊ တူ ထူမ် ဂြုဝ်း ဘေ၊ ဘေ လုဝ် လေး ဒူင် ကွယ် ဂေ ဘော ဒီယိုဝ်း ရး ကာပုး ဒီ ပ့လဝ် ဘေ၊ တဲး န့ ဘျ ဒီ ဂေ လွင် ပီ တူ ထူမ် ဂေ၊ န့ တူ မွှိုမ်။”
12 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဂေ၊ ဂေ ဝီ ဟာဝ် ဝီ ကာလာင် ဒီ ဒူအီ၊ တဲး ဂေ လှုဝ်း ဝဲန် မှာပ် ဂေ။ 13 ဂေ ဆုတ့် ကာနမ် ကိူန် လေး ခဲင် ဒုဝ် ဘူင့် အီ ဟဝ်။ ဂေ ဘော ဖဝ်း နာမန် ဒီ ဂိန့် ဒူအီ ကိူန်၊ တဲး ဂေ ပီကဲန် ဆဝ် အီ။
လွင် ဒါ ဆာရာ အာယောဟာန် ဟဲ့ ယမ်
14 ဝါယ် အန် တီ ဒွန် အီ ဘော နပ် လွင် ဇဝ် ယေဆူ။ ဘော ခုန်ဒီခမ် အာဟေရူတ် ဝီ ယိုဝ် လွင် ပီ ကာလာင် အီ ဟဝ်။ မင် အီ ဂေ တဝ်း၊ “န့ မုး ဒါ ဆာရာ အာယောဟာန် တွိုန်၊ အီ ဟဲ့ စိုပ် ဒူအီ ခဲင် အိုမ်။ အန် ဟဲ့ ဟွတ့် ယမ်၊ ယီ ဟဲ့ ဝီ ယိတ့် ဝီ အိမ်၊ ဝီ ဘဲန် ဇဝ် ယေဆူ။ ခုဝ်၊ ဇဝ် ယေဆူ ဝီ မိုဝ်း ပွုန် အီ တဲး အန် ဘူင် နာ မွှိုမ် အာမ် ကာဆဝ်။”
15 ဘော မင် အီ ဂေ တဝ်း၊ “ဇဝ် ယေဆူ မုး ဒါ အာအေလီယ တွိုန်၊ အီ ဟဲ့ ယမ် ဝီ အိမ်။” ဘော မင် အီ ဂေ တဝ်း၊ “အန် မုး ဒူအီ အီ ဘျာန် ဂြုဝ်း ဇဝ်ဖြာ အူ ဝီ၊ အီ ဟဲ့ ယမ်၊ ဝီ အိမ်။”
16 ဒေါ ယိုဝ် ခုန်ဒီခမ် အာဟေရူတ် ဆာဒါင် ဘဲန် မျုဝ် ဘဲန် မျုဝ် ဇိုဝ် တီ၊ အန် တဝ်း၊ “န့ မုး ဒါ ဆာရာ အာယောဟာန် တွိုန်၊ အီ ဟဲ့ စိုပ် ဒူအီ ခဲင် အိုမ်။ အုဝ် ဟဲ့ ဟွတ့် တဲး ဒူအီ ဒဲပ် ဝဲန် ဂိန့် အန်၊ တဲး အန် ယမ်။ အန် ယဲ့ ဟဲ့ ဝီ ယိတ့် ဝီ အိမ်။”
17 ခုန်ဒီခမ် အာဟေရူတ် ထာင် ပါယ် တီ၊ ခုဝ်၊ အန် ဟဲ့ လှုဝ်း ဒေါ စ်ု အန် အီ ဟဝ်၊ တဲး ဂေ မှေတ့် အာယောဟာန်၊ ခြွင့် အန် ခဲင် ကာပိုမ်။ အန် ဟဲ့ မှေတ့် အာယောဟာန်၊ ကူပ် ဂြုဝ်း ပီ ဒွိုမ် ကာလာင် အာယောဟာန် ဒီ အာဟေရူတ် လွင် နာင် ဟေရုဝ်ဒီ၊ အီ မုး အီဘိုန့် ဝါ အာဟေရူတ်၊ အီ စိူဝ် အာဖီလိပ်။ အာဟေရူတ် ဟဲ့ ဟွတ့် ဒိုဝ်း နာင် ဟေရုဝ်ဒီ တွိုန်၊ တဲး အန် ဝီ ဘဲန် အီဘိုန့် အန်။ 18 ဒေါ အန် တီ အာယောဟာန် ဟဲ့ ဒွိုမ် ကာလာင် ဂြုဝ်း ဒီ အာဟေရူတ်။ အန် ဟဲ့ တဝ်း၊ “ပီ ဘူင် မဲ၊ န့ တူ ဒူပ် ဒါရာ။ အာဝ် ပွိုန် ဒိုဝ်း အီဘိုန့် ဝါ မဲ၊ တဲး အန် ဝီ ဘဲန် အီဘိုန့် မဲ။” 19 ကူပ် ဂြုဝ်း အန် တီ၊ ဘော နာင် ဟေရုဝ်ဒီ အုန် နဝ်း၊ တူ အိုင် အာယောဟာန်။ အန် ဘဲန် နဝ်း ဆီ ငဝ်း ဝဲန် ဒါ ဆာရာ အာယောဟာန်။ အန် ယီ တူ နပ် ပီ ဒီ ပါယ် ဒီ ဘူင်။ 20 န့ မုး အာဟေရူတ်၊ အန် ယုဝ် အာယောဟာန်။ ခုဝ်၊ အန် ဝီ ဘ်ု အာယောဟာန်။ အန် ဘော နပ်၊ ဒါ ဆာရာ အာယောဟာန် မုး ဒူအီ ဘွတ်၊ ဒူအီ မွှိုမ်။ ဒေါ ကာလာင် အာယောဟာန် ဂြုဝ်း တွိုန် ဒီ အာဟေရူတ်၊ နဝ်း အာဟေရူတ် ကော ကာဝှ်ု ကာဝျှီန် ကာဆဝ်။ အန် ယီ အိုင် ဒီ ထူမ် ဂြုဝ်း အာယောဟာန်။
21 န့ ဘော ဇမ် အူ ဆီငဲ၊ မုး ဆီငဲ ဂျာမ် နာင် တွိုန်။ ဆီငဲ အန် တီ မုး ဆီငဲ ဂွိုတ် ခုန်ဒီခမ်။ ဒေါ အန် တီ ခုန်ဒီခမ် အာဟေရူတ် ဝီ ဘူင် ဘ့လွယ်၊ ဝီ ဘာင် အာမူ အာမာတ် ဘော ဂေ ဒါ ဘုဝ် ဘော ဂေ ဒါ တာင် ခဲင် အိူင် ဂါလီလေ၊ တဲး ဂေ ဘောကာဂ့လျီတ် တး လိုပ် ဘ့လွယ် တီ။ 22 ဒေါ ဘူင် ဂေ ဘ့လွယ် တီ၊ န့ မိုဝ်း ဂွန် အီဘိုန့် နာင် ဟေရုဝ်ဒီ တွိုန်။ အန် တး လိုပ် ဘ့လွယ် တီ၊ ဘော ဂါ တဲး န့ လဝ့် နဝ်း အာဟေရူတ် ဘော ခဲတ့် အန်။
ပန် တီ ခုန်ဒီခမ် ဝီ တဝ်း ဒီ ဂွန် အီဘိုန့် တီ၊ “တဲး မဲ မှာန့် ဒီ အုဝ်။ ခဲ့ ပီ ဆီ ပွိုန် မဲ၊ အုဝ် ဒီ ဒွါ ဒီ မဲ။” 23 ပါယ် တီ၊ အန် ဝီ ဒိူင် ကာဆဲန့်၊ ဝီ တဝ်း၊ “ဆေ န့ ဘော မုး မိူင် ပီ အိုပ် အုဝ် အူ ကာတဲ၊ အုဝ် ဒီ ဒွါ ဒီ မဲ ခဲ့ ပီ မှာန့် မဲ။”
24 အန် ဟဲ့ ဟွတ့် ကာလာင် ပါယ် တီ၊ ဂွန် အီဘိုန့် ဝီ လေး ဒူင် ကွယ် ဂေ၊ ဝီ ဒီမွှတ် မာ အန် တဝ်း၊ “မာ ဆေ ပီ လုဝ် မှာန့် အုဝ်။း” မာ အန် ဝီ တဝ်း၊ “တဲး မဲ မှာန့် ဂိန့် ဒါ ဆာရာ အာယောဟာန်၊ အီ စိုပ် ဒူအီ ခဲင် အိုမ်။”
25 ဟဲ့ ဟွတ့် ပန် တီ ဂွန် အီဘိုန့် တွိုန် ဝီ ဟာဝ် အူ ဇေန့်၊ ဝီ ဇမ် ဒီ အာတ့် ခုန်ဒီခမ်၊ တဲး အန် ဝီ မှာန့် ဒီ အန်။ အန် တဝ်း၊ “အုဝ် လုဝ် မဲ ဒွါ ဂိန့် ဒါ ဆာရာ အာယောဟာန် အီ စိုပ် ဒူအီ ခဲင် အိုမ်။ တဲး မဲ ဘ့လေး ဒဲင် ဖာန်၊ ဒွါ ဒီ အုဝ် အူ ဇေန့်။”
26 အန် ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် ဘော က့လိုဝ်။ ကူပ် ဂြုဝ်း ပဲ့ ဟဲ့ ဒိူင် ဟဲ့ ကာဆဲန့် အန် တဲး ခဲတ့် အန် ထူမ်၊ အန် တူ ဆီ ဘျာန် ဝိဝ် ဂြုဝ်း ပီ တဝ်း အန် ဒီ ဂွန် အီဘိုန့် တွိုန်။ 27 ခုဝ်၊ အူ ဇေန့် အန် စ်ု ဒါ ဆိုက် အန်၊ ဟာဝ် ဒိုဝ်း တး ဂိန့် ဒါ ဆာရာ အာယောဟာန်။ ဒါ ဆိုက် တွိုန် ဝီ ဟာဝ် ခဲင် ကာပိုမ်၊ ဝီ ဒဲပ် ဝဲန် ဂိန့် ဒါ ဆာရာ အာယောဟာန်။ 28 အန် ဝီ တး ဇမ် ဒီ အာတ့် ခုန်ဒီခမ်၊ ဂူင့် ဂိန့် အန် ဒဲင် ဖာန်။ ခုန်ဒီခမ် ဝီ ဒွါ ဂိန့် တီ ဒီ ဂွန် အီဘိုန့် တွိုန်။ ဟဲ့ ဟွတ့် အန် ဝီ ဒွါ ဒီ မာ အန်။ 29 ဂေ ဒီဘဲ အာယောဟာန် ဝီ ယိုဝ် ဆာဒါင် လွင် အန် တီ၊ ဂေ ဝီ တး ဒိုဝ်း ဒုဝ် ဘူင့် အာယောဟာန်၊ ဝီ ဘ့လေး အုန် အန် ခဲင် ကာဒဝ် ဘာရေဝ်။
လွင် ဇဝ် ယေဆူ ဒွါ ပီ ဒီ ဟူမ် ဒီ ဒူအီ ဖန် ဟြဲန့် ဝီ
32 ဟဲ့ ဟွတ့် ကာလာင် ပါယ် တီ၊ ဂေ ဝီ ပဝ့် ရိုဝ် ဟာဝ် ဒူင် တူ မိုဝ်း ဒူအီ၊ ကွဲ့ တဲး အီ ဟဝ် ပွိုန် ဒီ ဒူပ် ဂေ။ 33 န့ ယီ မိုဝ်း ဒူအီ ကိူန်၊ ဂေ ဝီ ယိုဝ် ဇဝ် ယေဆူ ဘော ဒီဘဲ အန် ဒေါ လိုပ် ဟာဝ် ဂေ ခဲင် ရိုဝ် တွိုန်။ ဂေ ဝီ ကာဘ့လဲပ် ဟာဝ် ခူပ် အိုမ်၊ ဟာဝ် ရူပ် အိုမ် ဒိုင် တွိုန်။ ဂေ ကိူန် ဝီ လေး ခဲင် မိူင် ဘဲန် မိူင် ဘဲန် မိူင်၊ ဝီ ကာဘ့လဲပ် ဟာဝ် ဒူင် ဒီ ဟာဝ် ဇဝ် ယေဆူ။ ဂေ ဟဲ့ ဝီ ဇမ် အာတ့် ဇမ် ဇဝ် ယေဆူ ဂေ ဒီဘဲ အန်။ 34 ဒေါ ဇမ် ဇဝ် ယေဆူ ဒူင် တွိုန်၊ အန် ဝီ ယိုဝ် ဂေ ဒူအီ ကိူန် ကွယ် နှဝ့် အန်၊ အန် ဝီ ကာဝေ ဂေ။ ခဲင် နဝ်း အန်၊ အန် ထာင် ဂေ ပီ မာဘူ အီ တူ မိုဝ်း ဒါ အီ ဟျီင် ဂေ။ ခုဝ်၊ အန် ကာဝေ ဂေ။ အန် ဝီ စုး ဒီ မာနုဝ် ဂေ လွင် ဘဲန် မျုဝ် ဘဲန် မျုဝ်။
35 ဒေါ အန် တီ ဟဲ့ ဇမ် ဘာ ဒီ အပ်။ ခုဝ်၊ ဒီဘဲ ဇဝ် ယေဆူ ဝီ တး ဒီ အန်။ ဂေ တဝ်း၊ “ဒူင် ကွယ် အေ နီ မုး ဒူင် ကာတူင့် ဒီ ရဝ် အီ ဟဝ်။ အာဝ် လှေန့် ပြဲ ဒီ အပ်။ 36 တဲး မဲ တိုယ် ဂေ ဟာဝ် ခဲင် ရဝ် အီ ကွယ် ကာတတ် ဒီ နီ၊ တဲး ဂေ ပွိုန် ဒီ ဟာဝ် ဘဲန် ရဝ် ဘဲန် ရဝ်၊ စိုဝ်း ပီ ဒီ ဟူမ် ဂေ။”
37 ဇဝ် ယေဆူ ယီ တဝ်း၊ “တဲး ဘေ ဒွါ ပီ ဒီ ဟူမ် ဒီ ဂေ။” ဂေ ဝီ တဝ်း ဒီ အန်၊ “မဲ ဆီ တဲး ယေ ဒိုဝ်း ရွိုန် အာ မာယဝ်း ဘူင့်၊a ဟာဝ် စိုဝ်း ခါမုန်၊ ဒွါ ဒီ ဂေ။း”
38 ဇဝ် ယေဆူ ဝီ တဝ်း၊ “တဲး ဘေ ဟာဝ် ယွတ်၊ ခါမုန် နှာင် ဘူင့် ဘေ မိုဝ်း။း” ဂေ ဟဲ့ ဟွတ့် ယွတ်၊ ဂေ ဝီ တဝ်း၊ “ယေ မိုဝ်း ခါမုန် ဖန် ဘူင့် ဘော မာဂါ အာ ဒုဝ်။”
39 ပန် တီ ဇဝ် ယေဆူ ဝီ စ်ု ဂေ၊ တဲး ဂေ ကာလာင် ဒီ ဒူအီ ကိူန်၊ တဲး ဂေ တုတ့် ဒဲင် ပေတ့် ဘဲန် ဖိုင် ဘဲန် ဖိုင်။ အူ ဖိုင် ကာဘက် ဖန် ဂိုဝ် ဝီ၊ အူ မာယဝ်း ဝီ။ 40 အန် ဟဲ့ ဟွတ့် တဝ်း ပါယ် တီ၊ ဂေ ဝီ တုတ့် ဘဲန် ဖိုင် ဘဲန် ဖိုင်။ မင် ဖိုင် ကွယ် အူ မာယဝ်း ဝီ၊ မင် ဖိုင် ကွယ် ဖန် ဂိုဝ် ဝီ။ 41 ဇဝ် ယေဆူ ဝီ ဒိုဝ်း ခါမုန် ဖန် ဘူင့် ဘော မာဂါ အာ ဒုဝ် တွိုန်၊ ဝီ ဆာကိုဝ်း ယွတ် ဂါင်ဟြာဝ်၊ ကာလာင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ဝီ ကာဘက် ဝီ ဒွါ ခါမုန် ဒီ ဒီဘဲ အန်၊ တဲး ဂေ ဝီ ဒွါ ဒီ ဂေ ဒူအီ ကိူန်၊ တဲး ဂေ ဘောကာဂ့လျီတ် ပွိုန် ဒီ ဟူမ်။ အန် ဘော ဒိုဝ်း မာဂါ ဝီ ကာဆာင် ဒီ ဂေ။ 42 ဂေ ဘောကာဂ့လျီတ် ပွိုန် ဒီ ဟူမ် ဖဲ။ 43 ဝါယ် ဟဲ့ ဟွတ့် ဟူမ်၊ ဂေ ဒီဘဲ ဇဝ် ယေဆူ ဝီ ဂဲပ် ကာဇု ကာလူယ် ဟူမ် ခဲင် ကာတဲပ်။ န့ ကော နုဝ့် ဂိုဝ် ဒီ အာ ကာတဲပ်။ 44 ဂေ တိး မီ အီမာယ် ဖန် ဟြဲန့် ဝီ၊ အီ ဟဲ့ ဟူမ် ဖဲ။
လွင် ဇဝ် ယေဆူ ဟာဝ် ဒဲင် အိုမ်
45 ဝါယ် အန် တီ အူ ဇေန့်၊ ဇဝ် ယေဆူ တဲး ဒီဘဲ အန် ဝီ ဟာဝ် လိုပ် ခဲင် ရိုဝ်၊ စ်ု ဂေ ယဲတ့် ဒီ အာတ့်၊ ဟာဝ် ဇမ် မိူင် ဘေတ်ဆီဒါ။ ဒေါ ဟာဝ် ဂေ၊ အန် တဝ်း ဒီ စ်ု ဘော ဂေ ဒူအီ ကိူန် ဟာဝ် ဝိဝ် ဒူင် ကွယ် ဂေ။ 46 ဂေ ဒူအီ ကိူန် ဟဲ့ ဟွတ့် ဟာဝ်၊ ဘော အန် ဟာဝ် ဟုဝ့် ဒဲင် နွန်၊ တဲး အန် ပွိုန် ဒီ ဆာခိုဝ်။
47 ပြဲ ကော အပ်၊ ရိုဝ် ဆင်ဖုဝ် တွိုန် ကွယ် နာ ကာတဲ အိုမ် ဒိုင်။ ဇဝ် ယေဆူ အူ ဝီ ယီ ကွယ် ဒဲင် ကာဒါယ်။ 48 အန် ယီ ပွိုန် ယိုဝ်၊ ဒီဘဲ အန် တူ ကူပ် ပဲ ဒီ ဝါယ် ရိုဝ်။ ဂေ လုဝ် ဟာဝ် နာ တး ခုန်။ ခဲင် မှိုဝ် တီ၊ ဒေါ ဟဲ့ ရိန် ဒီ ဝး ပြဲ၊ ဇဝ် ယေဆူ ဝီ လေး ဒူင် ဆာခိုဝ် အန်၊ ဝီ ဟာဝ် ဒဲင် အိုမ်၊ တဲး အန် ဇမ် ဒူင် ကွယ် ရိုဝ် ပီ ပဝ့် ဒီဘဲ အန်။ အန် တဝ်း ဒီ ဟာဝ် ကာလုဝ်း ဂေ။ 49 ဂေ ဒီဘဲ အန်၊ ဂေ ယီ ယိုဝ် အန် ဟာဝ် ဒဲင် အိုမ်၊ ဂေ ထာင် န့ မုး ကာပြဝ်။ ဂေ ဘော ဒတ် တာင်။ 50 ဂေ ဒွန် အီ ယိုဝ် အန်။ ခုဝ်၊ ဂေ ယုဝ် ကာဆဝ်။
ဇဝ် ယေဆူ ဝီ ကာလာင် ဂြုဝ်း ဒီ ဂေ အူ ဇေန့်။ အန် တဝ်း၊ “တဲး ဘေ ဒါခိုယ်၊ န့ မုး အုဝ်။ ကွဲ့ ယုဝ်။”
51 ဟဲ့ ဟွတ့်၊ အန် ဝီ လိုပ် ခဲင် ရိုဝ် ဂေ။ ဒေါ အန် တီ ခုန် ဘော ယေန်။ ဂေ ဝီ အာမ် ကာဆဝ် လွင် အန် တီ။ 52 ဂေ ယုဝ် ပါယ် တီ ခုဝ်၊ န့ တူ ကာလှုး ဒီ နဝ်း ဂေ လွင် ဇဝ် ယေဆူ ဒွါ ခါမုန် ဒီ ဂေ ဒူအီ ကိူန်။ ဂေ တူ တဲး ဇိုဝ် တီ လိုပ် ခဲင် နဝ်း။
53 ဂေ ဟဲ့ ဟွတ့် ဇမ် ဘ့လာက် နာ တ အိုမ်၊ ဂေ ဝီ ချ ရိုဝ် ဒီ ခူပ် မိူင် ကေနေဆာရေတ်။ 54 ဂေ ဟဲ့ ဟွတ့် လေး ခဲင် ရိုဝ်၊ အူ ဇေန့်၊ ဂေ ဒူအီ ကိူန် ဘော နပ်၊ န့ မုး ဇဝ် ယေဆူ ဟဲ့ တး။ 55 ဂေ ဝီ ဟာဝ် ဘဲန် ပ့လုဝ့် ဘဲန် ပ့လုဝ့်၊ ကာလာင် တဲး ဒူအီ ကော နပ် လွင် ဇဝ် ယေဆူ ဟဲ့ တး။ ဇဝ် ယေဆူ ဘော ဟာဝ် နာ မှဝ်၊ ဂေ ဘော ဂွတ် ဒူအီ ဆဝ် ဒဲင် ကာဘဲး၊ ဟာဝ် ဇမ် ဒူင် ပီ တဝ်း ဂေ အန် ဒီ ဝဝ့်။ 56 ဇဝ် ယေဆူ ဘော ဟာဝ် နာ မှဝ်၊ န့ ဘော မုး ခဲင် ရဝ်၊ ခဲင် မာန် ခဲင် မိူင်၊ ဂေ ဒိုဝ်း ဘ့လေး ဒူအီ ဆဝ် ဒီ ဂ့လ။ ဂေ ဝီ မှာန့် ဒီ ဇဝ် ယေဆူ၊ တဲး အန် ခ့ဝါင် ဂေ ပါ ခြိုင် အန်။ ဒွန် အီ အီ ပါ ခြိုင် အန် မိူဝ် ကဲန်။