ခါန် 5
လွင် ဇဝ် ယေဆူ ဆုတ့် ကာနမ် လေး ခဲင် ဒုဝ် ဘူင့် အီ
6 ဒူအီ တီ၊ အန် ဘော ယိုဝ် ဇဝ် ယေဆူ ဒေါ ဆီ ကွယ် ကာတူင့် အန်။ အန် ဝီ ကာဘ့လဲပ် ဟာဝ် ဇမ် ဒီ အာတ့် ဇဝ် ယေဆူ၊ ဝီ ခြိုပ်ခြဝ်၊ ကြိုပ် ဇဝ် ယေဆူ။ 7 အန် ဝီ ဒတ် တာင် တဝ်း၊ “အိုယ် မဲ အာယေဆူ၊ မဲ မုး ဂွန် ဇဝ်ဖြာ အီ တာင် လွှိုမ် တူတ့်။ မာဆေ ပီ လုဝ် မဲ ဒီ အုဝ်။း တဲး မဲ ဒွါ ကာဒိက် ဆတ်ဇာ၊ တဲး ဘော ဇဝ်ဖြာ ထူမ်၊ ကွဲ့ တဲး မဲ ဒွါ ဒုက် ဒီ အုဝ်။” 8 အန် တဝ်း ပါယ် တီ၊ ကူပ် ဟဲ့ ဟွတ့် တဝ်း ဇဝ် ယေဆူ ဒီ အန်၊ “မဲ ကာနမ် ဟာယ်၊ လေး တ ဒုဝ် ဘူင့် ဒူအီ တီ။”
9 ပန် တီ ဇဝ် ယေဆူ ဝီ ဒီမွှတ် အန် တဝ်း၊ “မာဆေ ပီ စိူဝ် မဲ။း”
အန် တဝ်း၊ “အုဝ် စိူဝ် ဟြဲန့်၊ ကူပ် ဟဲ့ ကိူန် ယေ။” 10 ဟဲ့ ဟွတ့် တဝ်း ပါယ် တီ၊ အန် ဝီ မှာန့် ဘဲန် ဇေန့် ဘဲန် ဇေန့်၊ ကွဲ့ တဲး ဇဝ် ယေဆူ ဆုတ့် ဂေ လေး ခဲင် မိူင် တီ။
11 ဒေါ အန် တီ န့ ယီ မိုဝ်း ဖိုင် မာလေတ့် အီ ကွယ် ကာတတ် ဒူင် တီ။ ဂေ ကိူန် ဝီ ဟြေတ့် ပီ ဒီ ဟူမ် ဂေ ဘာင် နွန်။ 12 ဂေ ကာနမ် ဝီ မှာန့် ဒီ ဇဝ် ယေဆူ တဝ်း၊ “တဲး မဲ ခ့ဝါင် ယေ ဟာဝ် ဒူင် ကွယ် ဖိုင် မာလေတ့်၊ တဲး ယေ လိုပ် ခဲင် ဒုဝ် ဂေ။” 13 ဇဝ် ယေဆူ ဘော ခ့ဝါင် ဂေ။ ဟဲ့ ဟွတ့်၊ ဂေ ကာနမ် ဟာယ် လေး ခဲင် ဒုဝ် ဘူင့် ဒူအီ တွိုန် ဝီ ဟာဝ် လိုပ် ခဲင် ဒုဝ် မာလေတ့်။ ဖိုင် မာလေတ့် တွိုန် မိုဝ်း ကာဘက် အာ ဟြဲန့် ဒုဝ်၊ ဂေ ဘောကာဂ့လျီတ် ဝီ ဖူင့် လူင် ဘာင် နွန် တွိုန် အူ ဇေန့်၊ ဝီ ဒဲန် ဘျွာ ခဲင် အိုမ် ဒိုင်၊ ကော ယမ် တူတ့်။
14 ဂေ ဒူအီ ဟျီင် မာလေတ့် တွိုန်၊ ဂေ ဝီ တဝ် လိုပ် ခဲင် မိူင်၊ ဝီ ကာလာင် တူတ့် လွင် အန် တီ၊ တဲး ဒွန် အီ ခဲင် မာန် ခဲင် မိူင် ကော နပ်။ ဂေ ဒူအီ ကိူန် ဟဲ့ ဟွတ့် ထူမ်၊ ဂေ ဝီ လေး ဒူင် ကွယ် ဂေ၊ ဝီ ဟာဝ် ယွတ် မာဆေ န့ မုး လွင် အန် တီ။ 15 ဂေ ဝီ တး ဇမ် ဒူင် ကွယ် ဇဝ် ယေဆူ၊ ဂေ ဝီ ယိုဝ် ဒူအီ အီ ဒွိုမ် မိုဝ်း ကာနမ် အီ စိူဝ် ဟြဲန့်။ အန် ဟဲ့ ကွယ် ဒါခိုယ်၊ ဟဲ့ စှိုပ် ခြိုင် အန်၊ ဟဲ့ ဝီ လှုဝ်း ဒုဝ် အန်။ ဒေါ ယိုဝ် ဂေ ဇိုဝ် တီ ဒွန် မျုဝ်၊ ဂေ ဝီ ယုဝ်။ 16 ဂေ ဒူအီ အီ ဟဲ့ ယိုဝ် တူတ့် ဒွန် မျုဝ်၊ ဂေ ဝီ ကာလာင် ဒီ အီ ဟဝ် လွင် ပီ ပါယ် ဒူအီ အီ ဒွိုမ် မိုဝ်း ကာနမ်။ ဂေ ဘော ခဲ လွင် မာလေတ့်။ 17 ပန် တီ ဂေ ဒူအီ ကိူန် စုး ဒီ မှာန့် ဒီ ဇဝ် ယေဆူ၊ တဲး အန် လေး ဒူင် ကွယ် ဂေ။
18 ဒေါ တဝ်း ဇဝ် ယေဆူ ဒီ ဝီ လိုပ် ခဲင် ရိုဝ် အန်၊ ဒူအီ အီ ဟဲ့ ဒွိုမ် မိုဝ်း ကာနမ် ကွယ် ခဲင် ဒုဝ် ဘူင့် အန်၊ အန် ဝီ မှာန့် ဒီ ဟာဝ် ဒူပ် ဇဝ် ယေဆူ။ 19 ဇဝ် ယေဆူ ယီ တူ ခ့ဝါင် အန် ဟာဝ်။ အန် တဝ်း၊ “မဲ ဟာဝ် ဝေန့် ဒူင် ကွယ် မဲ၊ ဝီ ကာလာင် ဒီ ဂေ ဒူအီ ခဲင် န့ဟူမ် မဲ လွင် ပဲ့ ဟဲ့ ဘူင် အုဝ် ဒီ မဲ ဘော လွင် ပဲ့ ဟဲ့ ကာဝေ အုဝ် ဒီ မဲ။” 20 ပန် တီ ဒူအီ တွိုန် ဘော ဟာဝ် ကာလာင် တူတ့် လွင် ပဲ့ ဟဲ့ ဘူင် ဇဝ် ယေဆူ၊ တဲး ဂေ ဒူအီ အီ ကွယ် ခဲင် အိူင် အီ စိူဝ် ဂိုဝ် မိူင် ကော နပ်။ ဂေ ဒူအီ အီ ထူမ် လွင် အန် တီ၊ ဂေ ဘောကာဂ့လျီတ် ဝီ အာမ် ကာဆဝ်။
လွင် အီဘိုန့် အာ ဝီ
န့ ယီ မိုဝ်း ဒူအီ ကိူန်၊ ဂေ ဘော ဒူပ် ဂါယ်၊ ဝီ လာယ် ကာဆျီ့ ကော ရူပ် ဇဝ် ယေဆူ။ 25 န့ မိုဝ်း ဘော အီဘိုန့် အူ ဝီ အီ တး ကာတတ် ဇဝ် ယေဆူ။ အန် မိုဝ်း ဆဝ် နှာမ် လေး အာဒါ ဂိုဝ် ဒီ အာ ဆီနမ်။ 26 ဟဲ့ မိုဝ်း ဆာရာဝူန် ဘဲန် ဝီ ဘဲန် ဝီ အီ ဟဲ့ ထေဝ် ဒီ ဆီနမ် အန်၊ တဲး အန် ဝဲ ခမ် ဒုက် ဘဲန် မျုဝ် ဘဲန် မျုဝ်။ ခဲ့ မိုဝ်း အန် ကြုဝ်ကြာမ် မိူဝ် ဟဲ့ တူတ့်။ ဆဝ် အန် ယီ တူ ကဲန်၊ ယီ ဝီ ကြဲ ဒီ ကာဆဝ် လွှိုမ် ဘြိမ်။ 27 အီဘိုန့် တီ ဘော နပ် လွင် ဇဝ် ယေဆူ၊ အန် ဝီ တး ချြီ့ ဒီ ပန် ဇဝ် ယေဆူ ဒေါ ကွယ် ကာဆျီ့ ဂေ ဒူအီ ကိူန် တွိုန်။ ဟဲ့ ဟွတ့်၊ အန် ဝီ ပါ ဆီတုဝ် ဇဝ် ယေဆူ။ 28 အန် ထာင် ခဲင် နဝ်း အန်၊ “ဆေ အုဝ် ပွိုန် ဒီ ပါ ခြိုင် ပီ တာ ဇဝ် ယေဆူ၊ အုဝ် ဒီ ဘော ကဲန်။” ခုဝ်၊ အန် ဟဲ့ ဘူင် ပါယ် တီ။ 29 အန် ဟဲ့ ဟွတ့် ပါ ခြိုင် ဇဝ် ယေဆူ၊ နှာမ် အန် ဝီ ဟိတ် အူ ဇေန့်။ အန် ဘော နပ် ဆီချာ၊ ခဲင် ဒုဝ် ဘူင့် အန် အာဝ် ဟူ မိုဝ်း ဆဝ် တွိုန်။
30 ဒေါ အန် တီ ဇဝ် ယေဆူ မိူဝ် နပ် အူ ဇေန့်၊ ပွုန် အန် ဟဲ့ လေး ခဲင် ဒုဝ် ဘူင့် အန်။ အန် ဝီ ယွတ် နာ ပန်၊ ဝီ တဝ်း၊ “အာဆေ ဟဲ့ ပါ ဆီတုဝ် အုဝ်။း”
31 ဂေ ဒီဘဲ အန် ဝီ တဝ်း၊ “မဲ ယိုဝ်၊ န့ မိုဝ်း ဒူအီ ကိူန် လာယ် ကာဆျီ့ ကွယ် ရူပ် မဲ။ မှဝ် န့ ပါယ် ပီ ဒီမွှတ် မဲ၊ ‘အာဆေ ဟဲ့ ပါ အုဝ်။း’”
32 ဇဝ် ယေဆူ ယီ ဝီ ယွတ် ဂေ ဒူအီ အီ ကွယ် ရူပ် အန်၊ ဟြေတ့် အီ ပါ အန်။ 33 ပန် တီ အီဘိုန့် တွိုန် ဝီ တး ခြိုပ်ခြဝ် ဒီ အာတ့် ဇဝ် ယေဆူ။ အန် ဟဲ့ နပ် န့ ပါယ် မှဝ် ခဲင် ဒုဝ် အန်။ အန် ဝီ ဒီယေန့် ဒီယုဝ်၊ ဝီ ခဲ တူတ့် ဒီ ဇဝ် ယေဆူ။ 34 ဇဝ် ယေဆူ ဝီ တဝ်း ဒီ အန်၊ “အိုယ် ဂိုန့်၊ ကူပ် ညှိုမ် မဲ၊ မဲ ဟဲ့ ကဲန်။ တဲး နဝ်း မဲ ဒါခိုယ်။ တဲး မဲ ဝေန့်၊ ကွဲ့ ဟူ တဲး မဲ လုဝ် ခမ် ဒုက်။” 35 ဒေါ ကာလာင် အန် ဂြုဝ်း တီ၊ န့ မိုဝ်း ဒူအီ မင် အီ၊ ဂေ တး ကာင် အာယာအီရုတ် တွိုန်၊ အီ မုး ဒါ ကာညာ အီ အိုပ် ဇူင် ယူဒါ။ ဂေ တး တဝ်း ဒီ အာယာအီရုတ်၊ “ဂွန် မဲ ဟဲ့ ဟွတ့် ယမ်၊ အာဝ် ဟူ လုဝ် ဒဲ့ ဒါ ဆာရာ တး ဒီ ကာင် မဲ။”
36 ဇဝ် ယေဆူ ဟဲ့ ဟွတ့် ထူမ် ဂြုဝ်း ဂေ၊ အန် ဝီ တဝ်း ဒီ ဒါ အီ အိုပ် ဇူင်၊ “ကွဲ့ ယုဝ်၊ တဲး မဲ ညှိုမ် ခဲင် နဝ်း မဲ။”
37 ပန် တီ ဇဝ် ယေဆူ တူ တဲး အီ ဟဝ် ဒူပ် ဂေ။ န့ ယီ မုး အာပေတာရူ၊ အာယာကူပ် ဘော အာယောဟာန်၊ အီ မုး ဝါ အာယာကူပ်။ ဇဝ် ယေဆူ ခ့ဝါင် မီ ဂေ ဒူပ် အန်။ 38 ဂေ ဟဲ့ ဟွတ့် တး ဇမ် ဒီ ကာင် ဒါ တွိုန်၊ ဇဝ် ယေဆူ ဝီ ယိုဝ် ဆီနန် ဆီနိူင်။ ဂေ ဒူအီ ကာဖြူမ် ဒီ ယာမ် တာင်။ 39 အန် ဝီ ဟာဝ် ဒူင် ကွယ် ဂေ၊ ဝီ တဝ်း၊ “မှဝ် န့ ပါယ် ပီ ဆီနန် ဆီနိူင်၊ ပီ ယာမ် တာင် ဘေ။း ဂွန် တီ တူ ယမ်၊ အန် အိတ်။” 40 ဂေ ယီ ကာညး အန်။
ဝါယ် အန် တီ အန် စ်ု ဂေ ဘောကာဂ့လျီတ် လေး ခဲင် ကာင် တွိုန်။ အန် ဝီ ဒဲ့ ဂုန့် မာ ဂွန် တွိုန် ဘော ဂေ ဒီဘဲ အန် အူယ် ဝီ တွိုန်၊ တဲး ဂေ ဝီ ဟာဝ် ဒူပ် အန်၊ လိုပ် ခဲင် ဟူင် ဒူင် ကွယ် ဂွန် တွိုန်။ 41 အန် ဝီ ပါ ဒဲ ဂွန် အီဘိုန့်၊ ဝီ တဝ်း၊ “ထာလီ ထာခူမီ၊” (လွင် ဒါင် အန် မုး၊ “အိုယ် ဂွန်၊ အုဝ် တဝ်း၊ တဲး မဲ ယိတ့်။”) 42 အန် ဟဲ့ ဟွတ့် ကာလာင် ဂြုဝ်း တီ၊ ဂွန် တွိုန် ဝီ ယိတ့် ဝီ ဟာဝ် အူ ဇေန့်။ (ဂွန် အီဘိုန့် တွိုန်၊ အာဆာက် အန် ဟဲ့ နုဝ့် ဂိုဝ် ဒီ အာ ဆီနမ်)။ ဂေ ဝီ အာမ် ကာဆဝ် လွင် အန် တီ။ 43 အန် ယီ ဒမ် ဂေ၊ ကွဲ့ တဲး ဂေ ကာလာင် ဒီ အီ ဟဝ် လွင် ပဲ့ ဟဲ့ ဘူင် အန် ဇိုဝ် တီ။ ဟဲ့ ဟွတ့်၊ အန် စ်ု ဂေ ဒွါ ပီ ဒီ ဟူမ် ဒီ ဂွန် တွိုန်။