ခါန် 11
လွင် ဇဝ် ယေဆူ လိုပ် ခဲင် မိူင် ယေရူဆာလဲမ်
4 ဇဝ် ယေဆူ ဟဲ့ ဟွတ့် စ်ု ဂါယ် ဘူင် ပါယ် တီ၊ ဂါယ် ဝီ ဟာဝ်၊ ဘော ယိုဝ် မာလာ အူ ဒုဝ် ကွယ် ခူပ် န့တေန့်။ အီ ဟဲ့ ပက် ဒုဝ် တီ ဒီ ခူပ် မာလုဝ်း ကာင်။ ဂါယ် ဘော ဂဝ်း ဝန် အန်။ 5 ဒေါ အန် တီ န့ မိုဝ်း ဒူအီ မင် အီ၊ ဂေ တဝ်း၊ “မှဝ် န့ ပါယ် ပီ ဂဝ်း ဘာယ် ဝန် မာလာ တီ။း” 6 ဂါယ် ဝီ ဝျီ့ ဂြုဝ်း ပီ ဒမ် ဇဝ် ယေဆူ တွိုန်။ ဟဲ့ ဟွတ့်၊ ဂေ ဝီ ခ့ဝါင် ဂါယ် ဟာဝ်။ 7 ဂါယ် ဟဲ့ ဟွတ့် ဒိုဝ်း မာလာ တွိုန်၊ ဝီ တိုယ် အန် ဟာဝ် ဇမ် ဒူင် ကွယ် ဇဝ် ယေဆူ၊ ဂါယ် ဝီ ဘုတ့် ခြိုင် ဂါယ်၊ ဘ့လေး ဒီ ကာတု မာလာ၊ ဝီ တဲး ဇဝ် ယေဆူ ပဝ့် နာ ဒဲင်။ 8 ဘော ဂေ ဒူအီ ကိူန် မိူဝ် ဒိုဝ်း ခြိုင် ဂေ၊ ဘ့လေး ဒဲင် န့တေန့်။ ဘော မိုဝ်း မင် အီ၊ ဂေ ဟာဝ် ဘက် ကာပ့လုယ် ခဲင် မာန်၊ ဝီ ဘ့လေး ဒဲင် န့တေန့်၊ တဲး ဇဝ် ယေဆူ ဟာဝ် နာ ဒဲင်။ 9 ဂေ ဒူအီ ယဲတ့် ဒီ အာတ့် ဇဝ် ယေဆူ ဘော ဂေ ဒူအီ ဒူပ် ဒီ ပန်၊ ဂေ ဘောကာဂ့လျီတ် ဒတ် တာင် တဝ်း၊ “အိူပ် အန် ဇဝ်၊ အီ ပီ တိုယ် ဇဝ်ဖြာ။ တဲး ဇဝ်ဖြာ မွင့်ကာရာ တဲး ဒီ အန်။”
10 ဂေ ဘော တဝ်း၊ “တဲး ဇဝ်ဖြာ မွင့်ကာရာ တဲး ဘော မိူင် ပီ ဒီ အိုပ် အန် ဒေါ တီ နီ။ န့ မုး မိူင် ပီ ဒွိုမ် အိုပ် ခုန်ဒီခမ် အာဒါဝိတ်၊ အီ မုး ဂုန့် ဒင် အေ။ အိူပ် အန် ဇဝ်၊ အီ တာင် လွှိုမ် တူတ့်။”
11 ဝါယ် အန် တီ ဇဝ် ယေဆူ ဟာဝ် ဇမ် ခဲင် မိူင် ယေရူဆာလဲမ်။ အန် ဟာဝ် လိုပ် ခဲင် ဝဲင် ဟုဝ် ဇဝ်ဖြာ၊ ဝိန် ဒီ လဲ ယွတ် ဒွန် မျုဝ်။ ဆီငဲ တီ ပြဲ ဟဲ့ ရိန် ဒီ အပ်။ ခုဝ်၊ အန် ပီ ဝီ လေး ခဲင် ဝဲင် ဟုဝ် ဇဝ်ဖြာ၊ ဝိဝ် ရဝ် ဘေထာနီ။ ဘော ဒီဘဲ အန် ဂိုဝ် ဒီ အာ ဝီ ဟာဝ် ရိုမ် ဒူပ် အန်။
လွင် ဇဝ် ယေဆူ ဆုတ့် အီ လေး ခဲင် ဝဲင် ဟုဝ် ဇဝ်ဖြာ
12 ပါ ခဲညှာ၊ ဂေ ဝီ လေး ခဲင် ရဝ် ဘေထာနီ။ ဒေါ အန် တီ ဇဝ် ယေဆူ ကာပြာန့် ပီ ဒီ ဟူမ်။ 13 အန် ဝီ ယိုဝ် ဟေ ဒီပူ အူ ကာဒင်၊ အီ ကွယ် နာ ကာတူင့်။ ဟေ တီ ဟဲ့ ဟွတ့် မိုဝ်း လှာ အန်။ ခုဝ်၊ ဇဝ် ယေဆူ ဝီ ဟာဝ် ယွတ်၊ ယုဝ် ဟဲ့ မိုဝ်း ဘ့လေ အန်။ အန် ဟဲ့ ဟွတ့် ဟာဝ် ကာတတ် ယွတ်၊ အာဝ် မိုဝ်း ဘ့လေ။ ကူပ် ညှမ် ဇမ် အာခြာဝ် မိုဝ်း ဘ့လေ၊ န့ မိုဝ်း မီ လှာ ဒီလူယ်။ 14 ဟဲ့ ဟွတ့်၊ အန် ဝီ တဝ်း ဒီ ဟေ တီ၊ “ကွဲ့ တဲး အာဆေ ပွိုန် ဒီ ဟူမ် ဘ့လေ မဲ ဒေါ မှဝ်။” ဘော ဒီဘဲ အန် ဟဲ့ ယိုဝ် ဂြုဝ်း အန် တီ။
18 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဟဲ့ ဟွတ့် ထူမ် ဂြုဝ်း တီ၊ ဂေ ဝီ စုး ဒီ ဇေန့်ဇာ မှဝ် ဂေ ဒီ ပါယ် ဒီ ဘူင်၊ တဲး ဂေ ပွိုန် ဒီ ငဝ်း အာဆာက် ဇဝ် ယေဆူ။ ဂေ ဘော နပ်၊ ဂေ ဒူအီ ကိူန် အာမ် ပီ မာနုဝ် အန်။ ခုဝ်၊ ဂေ ဘော ယုဝ် အန်။
19 ခဲင် မှိုဝ် ဘာ ဒီ အပ်၊ ဇဝ် ယေဆူ ဘော ဒီဘဲ အန်၊ ဂေ ဝီ လေး ခဲင် မိူင် ယေရူဆာလဲမ်။
လွင် ဟေ ဒီပူ ဟဲ့ ယမ်
20 ပါ ခဲညှာ ဆိန့်ဝး၊ ဂေ ဝီ ဒူပ် န့တေန့် ဘြိမ် ဂေ။ ဂေ ဝီ ယွတ် ဟေ ဒီပူ တွိုန်။ အန် ဟဲ့ ဟျီ့ ဒီလှး ယမ်။ ဘော ရျီး အန် ဟဲ့ ယမ် တူတ့်။ 21 အာပေတာရူ ဝီ လှုဝ်း ဂြုဝ်း ဇဝ် ယေဆူ၊ ဝီ တဝ်း၊ “ဆာရာ၊ မဲ ယွတ်၊ ဟေ ပီ ဒိူင် မဲ တွိုန် ဟဲ့ ဟွတ့် ယမ်။”
22 ဇဝ် ယေဆူ ဝီ တဝ်း၊ “မဲ လုဝ် ညှိုမ် ဇဝ်ဖြာ။
23 အုဝ် တဝ်း အာခ်ု ဒီ မဲ။ ဆေ ဒူအီ အူ ဝီ တဝ်း ဒီ နွန် နီ၊ ‘တဲး မဲ ကာထုဝ့် ဒူင် ကွယ် မဲ နီ၊ တဲး မဲ လူင် ခဲင် အိုမ်၊’ ဆေ ဒူအီ တီ တူ မိုဝ်း နဝ်း အာ မျုဝ်၊ ဆေ အန် ညှိုမ် ဆီချာ၊ န့ ဒီ ဘော ဘဲန် ပီ ပီ တဝ်း အန်။ 24 ခုဝ်၊ အုဝ် တဝ်း၊ ဆေ မဲ ဆာခိုဝ် ဇဝ်ဖြာ၊ မဲ ဘော မှာန့် မာဆေ၊ တဲး မဲ ညှိုမ် မဲ ဟဲ့ ဟွတ့် ပွိုန်။ ပန် တီ မဲ ဒီ ဘော ပွိုန် ခဲ့ ပီ မှာန့် မဲ။ 25 ပေါ အူ မျုဝ် အုဝ် တဝ်း။ ဆေ မဲ ယိတ့် စွင့်၊ ဆာခိုဝ် ဒီ ဇဝ်ဖြာ၊ မဲ ယီ အုန် နဝ်း ဒီ အီ ဟဝ်၊ မဲ လုဝ် ဘ့လွာ့ ဝဲန် မှာပ် ဒူအီ တီ။ 26 ဆေ မဲ ယီ အုန် မှာပ် ပီ ဘူင် အီ ဒီ မဲ၊ ဘော ဇဝ်ဖြာ၊ အီ ကွယ် နာ ဒဲင်၊ အန် ဒီ အုန် မှာပ် ပီ ဘူင် မဲ။”a
လွင် ပွုန် ဇဝ် ယေဆူ
27 ဝါယ် အန် တီ ဘော ဇဝ် ယေဆူ ဘော ဒီဘဲ အန် ဝီ ဟာဝ် ဇမ် မိူင် ယေရူဆာလဲမ်၊ ဝီ ဟာဝ် လိုပ် ခဲင် ဝဲင် ဟုဝ် ဇဝ်ဖြာ။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒါ တာင် အီ အိုပ် မိူင်၊ ဂေ ဝီ တး ဒီ အန်။ 28 ဂေ ဝီ ဒီမွှတ် အန်။ ဂေ တဝ်း၊ “မဲ ဒိုဝ်း ပွုန် အာဆေ၊ ဘူင် ပီ ဘူင် မဲ။း အာဆေ ဟဲ့ စ်ု မဲ ဘူင် ဇိုဝ် တီ။း”
29 ဂေ ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း၊ “ဘော အုဝ် ဒီ ဝီ ဒီမွှတ် ဘေ။ ဆေ ဘေ ဟဲ့ နပ် ဒီ ကာလာင် ဒီ အုဝ်၊ အုဝ် မိူဝ် ဒီ ခဲ ဒီ ဘေ လွင် ပွုန် ပီ ဒိုဝ်း အုဝ်၊ ဘူင် ခဲ့ ပီ ဘူင် အုဝ်။ တဲး ဘေ ကာလာင် ဒီ အုဝ်၊ 30 အာဆေ ဟဲ့ စ်ု ဒါ ဆာရာ အာယောဟာန် တွိုန်၊ တဲး အန် စိုပ် ဒူအီ ခဲင် အိုမ်။း န့ မုး ဇဝ်ဖြာ။း န့ မုး ဒူအီ။း”
31 ဂေ ဝီ လာယ် ဆင်ချာင် လွင် အန် တီ။ ဂေ တဝ်း၊ “ဆေ အေ တဝ်း၊ ‘ဇဝ်ဖြာ ဟဲ့ စ်ု အန် ဘူင်၊’ အန် ဒီ တဝ်း၊ ‘မှဝ် န့ ပါယ် ပီ တူ ညှိုမ် ဘေ ဒီ ဇဝ်ဖြာ။း’ 32 ဆေ အေ ယီ တဝ်း၊ ဒူအီ ဟဲ့ စ်ု အန်၊ အေ လုဝ် ယုဝ် ဒူအီ ကိူန်။ ခုဝ်၊ ဂေ ဘောကာဂ့လျီတ် တဝ်း၊ ဒါ ဆာရာ အာယောဟာန် မုး ဒူအီ အီ ဘျာန် ဂြုဝ်း ဇဝ်ဖြာ။”
33 ခုဝ်၊ ဂေ ဝီ တဝ်း ဒီ ဇဝ် ယေဆူ၊ “ယေ တူ နပ် လွင် အန် တီ။” ပန် တီ ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ဘော အုဝ် တူ ကာလာင် ဒီ ဘေ၊ ပွုန် အာဆေ အုဝ် ဒိုဝ်း၊ ဘူင် ပီ ဘူင် အုဝ်။”