1 ဂေ ဘော တး ဇမ် ကာတတ် မိူင် ယေရူဆာလဲမ်။ န့ မိုဝ်း ရဝ် ဘေတ်ဖာဂေ၊ အီ ကွယ် ဒီ ခူပ် နွန် ဟေ နာမန်။ ဂေ ဘော တး ဇမ် ဒူင် တီ၊ ဇဝ် ယေဆူ ဝီ စ်ု ဒီဘဲ အန် အာ ဝီ၊ တဲး ဂါယ် ဟာဝ် ခဲင် ရဝ် တွိုန်။ 2 အန် တဝ်း၊ “တဲး ဘာယ် ဟာဝ် ခဲင် ရဝ် အီ ကွယ် ကာတတ် ဒွယ်။ ဘာယ် ဟီ လိုပ် ခဲင် ရဝ်၊ ဘာယ် ဒီ ဝီ ယိုဝ် မာလာ အူ ဒုဝ် အီ မုး ဒုဝ် အာဟျာင် ပဲ့ ဟဲ့ ပက် အုန် ဂေ။ အန် ဘော မိုဝ်း ဂွန် အီ ကွယ် ရိုမ် ဒူပ် အန်။ ဘာယ် ဟီ ယိုဝ် မာလာ တီ၊ တဲး ဘာယ် ဝီ ဂဝ်း ဝန် ပီ ပက် ဂေ၊ ဝီ တိုန့် တး ဘော အာ ဒုဝ် ဒီ နီ။ 3 ဆေ န့ မိုဝ်း အီ တဝ်း ဒီ ဘာယ်၊ ‘မှဝ် န့ ပါယ် ပီ ဘူင် ဘာယ် ပါယ် တီ၊’ ဘာယ် လုဝ် တဝ်း၊ ‘အန် ဇဝ် အီ လုဝ် မာလာ နီ။ ဟီ ဟွတ့်၊ အန် ဒီ ဝီ ဒွါ ဝိဝ် အူ ဇေန့်။’”

4 ပါယ် တီ၊ န့ ဘော ဘဲန် ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ ဒေါ မွိုန်။ အန် ဟဲ့ ဒွိုမ် တဝ်း၊ 5 “တဲး မဲ ကာလာင် ဒီ ဂေ ဒူအီ အီ ကွယ် ခဲင် မိူင် ဇီအူန်^a ‘တဲး ဘေ ယွတ်၊ န့ မုး ခုန်ဒီခမ် ဘေ၊ အီ ဟဲ့ တး။ အန် မိုဝ်း နဝ်း န့စု န့စမ်။ အန် ပဝ့် ဂွန် မာလာ၊ တး ဒူင် ကွယ် ဘေ။’”

6 ဒီဘဲ ဇဝ် ယေဆူ အာ ဝီ တွိုန်၊ ဂါယ် ဝီ ဟာဝ် ဘူင် ခဲ့ ပီ စ်ု ဇဝ် ယေဆူ ဂါယ် ဘူင်။ 7 ဂါယ် ဝီ တိုန့် မာလာ တး ဒူင် ကွယ် ဇဝ် ယေဆူ။ ဂေ အီ ဟဝ် ဝီ ဒိုဝ်း ခြိုင် ပီ တာ ဂေ၊ ဘ့လေး ဒီ ကာတု မာလာ၊ ဝီ ဒွါ ဇဝ် ယေဆူ ပဝ့် နာ ဒဲင်။ 8 ဂေ ဒူအီ ကိူန် ဘော ဒိုဝ်း ခြိုင် ပီ တာ ဂေ၊ ဘ့လေး ဒဲင် န့တေန့်။ ဘော မင် အီ ဟဲ့ ဟာဝ် ခဲင် ပြဲ ဘော ဒဲပ် ရာ စိုက်၊ ဝီ ဘ့လေး ဒဲင် န့တေန့်၊ တဲး ဇဝ် ယေဆူ ဟာဝ် နာ ဒဲင်။ 9 ဂေ ဒူအီ အီ ယဲတ့် ဒီ အာတ့် ဇဝ် ယေဆူ ဘော ဂေ ဒူအီ အီ ဒူပ် ဒီ ပန်၊ ဂေ ဘောကာဂ့လျီတ် ဒတ် တာင် တဝ်း၊

“အိူပ် အန် ဇဝ်၊ အီ မုး လှုက်လှာန် အာဒါဝိတ်။ တဲး ဇဝ်ဖြာ မွင့်ကာရာ တဲး ဒီ ဒူအီ ပီ တိုယ် အန်။ အိူပ် အန် ဇဝ် အီ တာင် လွှိုမ် တူတ့်။”

10 ဇဝ် ယေဆူ ဟဲ့ ဇမ် ခဲင် မိူင် ယေရူဆာလဲမ်၊ ဂေ ဒူအီ ခဲင် မိူင် ဘော မိူင် ဘော နပ် လွင် အန် တီ။ ဂေ ဝီ ဒီမွှတ် ဂေ အီ တး။ ဂေ တဝ်း၊ “ဒူအီ တီ၊ အန် မုး အာဆေ။း”

11 ဂေ ဒူအီ ကိူန် ဝီ တဝ်း၊ “အန် စိူဝ် အာယေဆူ။ အန် မုး ဒူအီ အီ ဘျာန် ဂြုဝ်း ဇဝ်ဖြာ တး မိူင် နာဆာရေတ့်၊ အီ ကွယ် ခဲင် အိူင် အီ စိူဝ် ဂါလီလေ။”

12 ဇဝ် ယေဆူ ဘော လိုပ် ခဲင် ဝဲင် ဟုဝ် ဇဝ်ဖြာ။ အန် ဘော ဟုဝ် လေး ဒူအီ အီ လာယ် ကာစိုဝ်း ကာယွင့် ခဲင် ဝဲင် ဟုဝ် ဇဝ်ဖြာ။ အန် စုဝ့် ကာဘ့လျီ့ ကာစှူင့် ဂေ ဒူအီ အီ လာယ် ကာရဝ်း ကာဂူ ရွိုန် ဘော ပျာတ့် ဝဲန် ဒူင် ယွင့် ဂေ မာဘ့လူယ်။ 13 အန် တဝ်း ဒီ ဂေ၊ “ခဲင် ဘပ် ဇဝ်ဖြာ ဟဲ့ ဒဲမ် အုန်၊ ‘ကာင် အုဝ် မုး ဒူင် တး ဆာခိုဝ် ဒူအီ ဒီ ဇဝ်ဖြာ။’ ဘေ ယီ ဟဲ့ ဘူင် တဲး န့ ပီ ဒူင် တး ကာဇု ဒါ ဇူန်။”

14 ဒေါ ကွယ် ဇဝ် ယေဆူ ခဲင် ဝဲင် ဟုဝ် ဇဝ်ဖြာ တွိုန်၊ ဂေ ဒူအီ အီ ငါယ် အပ် ဘော ဂေ ဒူအီ အီ တူ ပွိုန် ဟာဝ်၊ ဂေ ဝီ တး ဒူင် ကွယ် အန်။ အန် မိူဝ် ပီကဲန် ဂေ။ 15 န့ ဘော မိုဝ်း ဂွန် အီ ကွယ် ခဲင် ဝဲင် ဟုဝ် ဇဝ်ဖြာ တွိုန်။ ဂေ ဝီ ဒတ် တာင် တဝ်း၊ “အိူပ် အန် ဇဝ်၊ အီ မုး လှုက်လှာန် အာဒါဝိတ်။” န့ ယီ မိုဝ်း ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဘော ထူမ် ဂြုဝ်း ဂွန် ဂေ တီ ဘော ယိုဝ် နာ မွှိုမ် အာမ် ကာဆဝ် ပီ ဘူင် ဇဝ် ယေဆူ။ န့ ယီ တူ လဝ့် နဝ်း ဂေ။

16 ဂေ ဝီ ဒီမွှတ် ဇဝ် ယေဆူ၊ ဝီ တဝ်း၊ “မဲ နပ် ဂြုဝ်း ပီ ဒတ် ဂွန် ဂေ တီ။း” ဇဝ် ယေဆူ ဝီ တဝ်း၊ “အုဝ် ဟဲ့ နပ် လွင် အန် တီ။ န့ ယီ မုး ဘေ။ မှဝ် န့ ပါယ် ပီ တူ ဒွိုမ် တိး ဘေ ခဲင် ဘပ် ဇဝ်ဖြာ လွင် အန် တီ။း န့ တဝ်း၊ ‘အန် ဇဝ် ဟဲ့ တဲး ဂေ ဂွန် ဒီတဲတ် ဘော ဂေ ဂွန် ဒီရွယ် ဝီ အိူပ် အန်။’”

17 အန် ဟဲ့ ဟွတ့် ကာလာင် ဂြုဝ်း တီ ဒီ ဒါ တာင် တွိုန်၊ အန် ဝီ လေး ဒူင် ကွယ် ဂေ၊ ဝီ ဟာဝ် ဇမ် ခဲင် ရဝ် ဘေထာနီ၊ ဝီ တမ် ခဲင် ရဝ် တီ။

18 ပါ ခဲညှာ ဆိန့်ဝး စေဝ်၊ ဇဝ် ယေဆူ ဘော ဒီဘဲ အန် ဝီ လေး ခဲင် ရဝ် ဘေထာနီ တွိုန်၊ ဝီ ဟာဝ် မိူင် ယေရူဆာလဲမ်။ ဒေါ ဟာဝ် ဂေ ဒူပ် န့တေန့်၊ ဇဝ် ယေဆူ ဝီ ကာပြာန့် ပီ ဒီ ဟူမ်။ 19 အန် ဘော ယိုဝ် ဟေ ဒီပူ အီ ကွယ် ခူပ် န့တေန့်။ အန် ဝီ ဟာဝ် ကာတတ်၊ ဝီ ယွတ်၊ အာဝ် မိုဝ်း ဘ့လေ အန်။ မိုဝ်း မီ လှာ အန်။ ပန် တီ အန် ဝီ တဝ်း ဒီ ဟေ တီ၊ “ကွဲ့ တဲး မဲ ဝီ မိုဝ်း ဘ့လေ ဒေါ မှဝ်။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဟေ တီ ဝီ ဟျီ့ ဒီလှး အူ ဇေန့်။

20 ဂေ ဒီဘဲ အန် ဘော ယိုဝ် အာတီ၊ ဂေ ဝီ အာမ် ကာဆဝ်။ ဂေ ဝီ ဒီမွှတ် ဇဝ် ယေဆူ တဝ်း၊ “မှဝ် န့ ပါယ် ပီ ဟျီ့ ဟေ တီ။း”

21 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ။ ဆေ ဘေ ညှိုမ် ဆီချာ၊ တူ မိုဝ်း နဝ်း ကာလိင် ကာလဲ၊ ဘော ဘေ ပွိုန် ဒီ ဘူင် ခဲ့ ပီ ဘူင် အုဝ် ဒီ ဟေ တီ။ အာဝ် ဝန် ခဲ့ တီ။ ဘေ ဒီ ဘော ပွိုန် ဒီ တဝ်း ဒီ နွန်၊ ‘တဲး မဲ ကာထုဝ့် ဒူင် ကွယ် မဲ နီ၊ ဝီ လူင် ခဲင် အိုမ် ဒိုင်။’ ဟဲ့ ဟွတ့်၊ န့ ဒီ ဘော ဘဲန် ပါယ် တီ။ 22 ဆေ ဘေ ဆာခိုဝ် ဒီ ဇဝ်ဖြာ၊ ဆေ ဘေ ဘော ညှိုမ် အန် ဇဝ်၊ ဘေ ဒီ ဘော ပွိုန် ခဲ့ ပီ မှာန့် ဘေ။”

23 ပန် တီ ဇဝ် ယေဆူ ဝီ လိုပ် ခဲင် ဝဲင် ဟုဝ် ဇဝ်ဖြာ၊ ဝီ မာနုဝ် ဒူအီ။ ဒေါ အန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဂေ တး ဒူင် ကွယ် အန်။ ဂေ တဝ်း၊ “မဲ ဟဲ့ ဒိုဝ်း ပွုန် အာဆေ၊ ဘူင် ပီ ဘူင် မဲ ဒွန် မျုဝ်။း အာဆေ ဟဲ့ ခ့ဝါင် မဲ ဘူင် ဇိုဝ် တီ။း”

24 ဇဝ် ယေဆူ ဝီ ဝျီ့ ဂြုဝ်း ဂေ တီ။ အန် တဝ်း၊ “ဘော အုဝ် ဒီ ဝီ ဒီမွှတ် ဘေ။ ဆေ ဘေ နပ် ဒီ ကာလာင် ဒီ အုဝ်၊ ဘော အုဝ် ဒီ ခဲ ဒီ ဘေ လွင် ပွုန် ပီ ဒိုဝ်း အုဝ်၊ ဘူင် ခဲ့ ပီ ဘူင် အုဝ်။ 25 အာဆေ ဟဲ့ စ်ု ဒါ ဆာရာ အာယောဟာန် တွိုန်၊ တဲး အန် စိုပ် ဒူအီ ခဲင် အိုမ်။း န့ မုး ဇဝ်ဖြာ။း န့ မုး ဒူအီ။း” ဂေ ဝီ လာယ် ဆင်ချာင် လွင် အန် တီ ကာတဲ ဂေ။ ဂေ ဝီ တဝ်း၊ “ဆေ အေ ဒီ တဝ်း၊ ‘န့ မုး ဇဝ်ဖြာ၊’ အန် ဒီ ဘော တဝ်း၊ ‘မှဝ် န့ ပါယ် ပီ တူ ညှိုမ် ဘေ ဒီ အန်။း’ 26 ဆေ အေ ယီ တဝ်း၊ ‘န့ မုး ဒူအီ’ အေ လုဝ် ယုဝ် ဒူအီ ကိူန်။ ခုဝ်၊ ဂေ ဘောကာဂ့လျီတ် တဝ်း၊ ဒါ ဆာရာ အာယောဟာန် တွိုန် မုး ဒူအီ အီ ဘျာန် ဂြုဝ်း ဇဝ်ဖြာ။” 27 ဟဲ့ ဟွတ့် လာယ် ဆင်ချာင် ပါယ် တီ၊ ဂေ ဝီ တဝ်း ဒီ ဇဝ် ယေဆူ၊ “ယေ တူ နပ် လွင် အန် တီ။” ဂေ ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ဘော အုဝ် တူ ကာလာင် ဒီ ဘေ ပွုန် အာဆေ အုဝ် ဒိုဝ်း၊ ဘူင် ပီ ဘူင် အုဝ်။”

28 ဇဝ် ယေဆူ ဝီ ခဲ အူဖာမာ။ အန် တဝ်း၊ “မာဆေ ပီ ထာင် ဘေ လွင် ပီ ကာလာင် အုဝ် ဒေါ တီ နီ။း န့ ဟဲ့ ဒွိုမ် မိုဝ်း ဒူအီ အူ ဝီ။ အန် မိုဝ်း ဂွန် အီမာယ် အာ ဝီ။ အန် ဝီ ဟာဝ် ဒူင် ကွယ် ဂွန် အန် အူ ဝီ၊ ဝီ တဝ်း၊ ‘အိုယ် ဂွန်၊ အာတိုဝ် တဲး မဲ ဟာဝ် ဘူင် ဂါန် ခဲင် မာန် မာငုန် အေ။’

29 ဂွန် တွိုန် ဝီ တဝ်း၊ ‘အုဝ် တူ ဟာဝ်။’ မာလဲ၊ ဝါယ် ဟဲ့ ဟွတ့် အန် ကာလာင် ဂြုဝ်း တီ၊ အန် ဝီ ဘျွင် နဝ်း၊ ဝီ ဟာဝ် ဘူင် ခဲ့ ပီ စ်ု ဂုန့် အန် ဘူင်။

30 ဟဲ့ ဟွတ့် ပန် တီ ဂုန့် တွိုန် ဝီ ဟာဝ် ဒူင် ကွယ် ဂွန် အန် ပေါ အူ ဝီ၊ ဝီ စ်ု ဘော အန် ဘူင် ဂါန် ခဲင် မာန် မာငုန် တွိုန်။ ဂွန် ဝီ တီ ဝီ တဝ်း၊ ‘အိုဝ် ဂုန့်၊ အုဝ် ဒီ ဟာဝ်။’ မာလဲ၊ အန် ယီ တူ ဟာဝ်။

31 တဲး ဘေ ကာလာင် ဒီ အုဝ်၊ ဂွန် အာ ဝီ တီ၊ အာဆေ ဘူင် ပီ အိုင် ဂုန့် အန်။း” ဂေ ဝီ တဝ်း၊ “န့ မုး ဒူအီ ပီ စ်ု ဂုန့် ဒီ အာတ့်။” ပန် တီ ဇဝ် ယေဆူ ဝီ တဝ်း ဒီ ဂေ ဒူအီ အီ ထူမ် ဂြုဝ်း အန် တီ၊ “အုဝ် တဝ်း အာခ်ု ဒီ ဘေ။ န့ ဒီ မိုဝ်း ဂေ ဒူအီ အီ ဂဲပ် ရွိုန် စိုင် ဘော ဂေ ယာ မာလမ်၊ ဂေ ဒီ လိုပ် ခဲင် မိူင် ပီ အိုပ် ဇဝ်ဖြာ အာတ့် လိုပ် ဘေ။ 32 ခုဝ်၊ န့ ဒွိုမ် မိုဝ်း ဒါ ဆာရာ အာယောဟာန် တွိုန်။ အန် ဟဲ့ တး ဒူင် ကွယ် ဘေ၊ ဝီ ဘျ ဒီ ဘေ မှဝ် ဘေ ဒီ ပါယ် ဒီ ဘူင် နာ မှာန် နာ မွှိုမ်။ ဘေ ယီ တူ ညှိုမ် အန်။ န့ ယီ မိုဝ်း ဂေ ဒူအီ ဂဲပ် ရွိုန် စိုင် ဘော ဂေ ယာ မာလမ်၊ ဂေ ညှိုမ် ဂြုဝ်း အန်။ ဘော ဘေ ဟဲ့ ယိုဝ် ပီ ဘူင် အန် ဘဲန် မျုဝ် ဘဲန် မျုဝ်၊ ဘေ ယီ တူ ဝဲန် မှာပ် ဘေ၊ တူ ညှိုမ်။”

33 ဝါယ် အန် တီ ဇဝ် ယေဆူ ဝီ တဝ်း၊ “တဲး ဘေ ဝီ ထူမ် အူဖာမာ ပေါ အူ မျုဝ်။ န့ ဒွိုမ် မိုဝ်း ဒါ ကာညာ အီ ဘူင် မာန် မာငုန်။ အန် ဘူင် လူင့် ဒီ ကာအုန် မာန်၊ ဝီ ဂိုဝ်း ကာဒဝ် ဒီ နျီ့ ဘ့လေ မာငုန်၊ တဲး အိုမ် အန် လေး။ ဟဲ့ ဟွတ့်၊ အန် ဘော ဆမ် ကာစှူင့် စာ ဒီ ဘ်ု မာန်။ အန် ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ အန် ဝီ တဲး ဒူအီ ဟဝ် ခါတ် ဒီ ရန့် မာန် တီ။ အန် ယီ ဝီ ဟာဝ် ကွယ် ပေါ အူ ပ့လုဝ့်။ 34 ဘော ဇမ် အာခြာဝ် ဟဲ့ ဆိန် ဘ့လေ မာငုန်၊ ဒါ ကာညာ မာန် တွိုန် ဝီ တိုယ် မှာယ် အန် အူယ် ဝီ၊ တဲး ဂေ ဟာဝ် ဒူင် ကွယ် ဒူအီ အီ ခါတ် ဒီ ရန့် မာန် မာငုန်၊ တဲး ဂေ ဟာဝ် ဒိုဝ်း ဘ့လေ ခဲ့ ပီ လုဝ် ပွိုန် ဒါ ကာညာ မာန်။

35 ဂေ ဒူအီ အီ ရန့် မာန်၊ ဂေ ဝီ မှေတ့် မှာယ် အူ ဝီ၊ မး အန်။ ဂေ ဘော ငဝ်း အာဆာက် ပေါ အူ ဝီ။ ဟဲ့ ဟွတ့်၊ ပေါ အူ ဝီ၊ ဂေ ဝီ ဒိုဝ်း မာဝ်၊ ဝိုန့် ဒီ အန်။ 36 ပေါ အူ ဇေန့် ဒါ ကာညာ မာန် တွိုန် ဝီ တိုယ် ဟာဝ် မှာယ် အန် ကိူန် လွှိုမ် ခါ အာတ့်။ ဂေ ဒူအီ ခါတ် ဒီ ရန့် မာန် တွိုန်၊ ဂေ ယီ ဘူင် နာ စီစိဝ် ဒီ ဂေ ပီ ခါ အာတ့်။ 37 ဟဲ့ ဟွတ့်၊ ဒါ ကာညာ မာန် တွိုန် ဝီ တိုယ် ဂွန် အီမာယ် အန်။ အန် တဝ်း၊ ‘ဂေ ဒီ ဘော ရုဝ်ဆေ အန်။’

38 ဂေ ဒူအီ အီ ခါတ် ဒီ ရန့် မာန် တွိုန်၊ ဂေ ဘော ယိုဝ် ဂွန် ဒါ ကာညာ တွိုန်၊ ဂေ ဝီ လာယ် ကာမွုန် တဝ်း၊ ‘ဝီ နီ အီ မုး အီ ဒီ ပ့လု ဂုန့် အန်။ တဲး အေ ငဝ်း ဝဲန် အန်၊ တဲး အေ ပွိုန် ခါဂုန် အန်။’ 39 ခုဝ်၊ ဂေ ဝီ မှေတ့် အန်၊ ဒိုဝ်း လေး အန် နာ ရေတ့် မာန် မာငုန်၊ ဝီ ငဝ်း ဝဲန် အန်။

40 မာဆေ ပီ ထာင် ဘေ။း ဆေ ဒါ ကာညာ တွိုန် ဝီ တး ဇမ် ဒူင် ကွယ် ဂေ ဒူအီ အီ ခါတ် ဒီ ရန့် မာန် အန်၊ မာဆေ ပီ ဒီ ဘူင် အန် ဒီ ဂေ။း”

41 ဂေ ဝီ တဝ်း၊ “အန် ဒီ ဘူင် တဲး ဂေ ဒူအီ ဟာယ် တွိုန် ဝီ ခမ် ဒုက် တာင် ကော ဇမ် ယမ်။ ဟဲ့ ဟွတ့် အန် ဒီ ဒဲ့ ဒူအီ ဟဝ်၊ တဲး ဂေ ရန့် မာန် အန် တီ။ အန် ဒီ ရဝ်း ဝီ အီ ဒီ ဒွါ ဒီ ဒါ ကာညာ ခဲ့ ပီ လုဝ် ဒွါ ဂေ ဒေါ ဆိန် ဘ့လေ မာငုန် တွိုန်။” ခဲ့ တီ ဇဝ် ယေဆူ ကာလာင် အူဖာမာ လွင် ဇဝ်ဖြာ ပီ ဒါ ကာညာ မာန် တွိုန်။

42 ဇဝ် ယေဆူ ဟဲ့ ဟွတ့် ကာလာင် အူဖာမာ တီ၊ အန် ဝီ တဝ်း ဒီ ဂေ ဒူအီ အီ ထူမ်၊ “ဘေ တူ ဒွိုမ် တိး ခဲင် ဘပ် ဇဝ်ဖြာ လွင် အုဝ်။း န့ တဝ်း၊ ‘မာဝ် ပီ ဝဲန် ဂေ ဒူအီ အီ ဆမ် ကာင်၊ အန် ဟဲ့ ဝီ ဘဲန် စေန့် ရွင့်။ အန် ဇဝ် ဟဲ့ ဘူင်၊ တဲး န့ ဘဲန် ပါယ် တီ။ ယေ မိူဝ် ဟဲ့ အာမ် ကာဆဝ် လွင် အန် တီ။’

43 မာဝ် တာင် တီ၊ န့ ပီ အုဝ်။ န့ ယီ မုး ဘေ၊ ဘေ ပီ ဒူအီ အီ ဆမ် ကာင်၊ အီ ဟဲ့ ဝဲန် မာဝ် တီ။ ခုဝ်၊ အုဝ် တဝ်း ဒီ ဘေ၊ ဇဝ်ဖြာ တူ တဲး ဘေ လိုပ် ခဲင် မိူင် ပီ အိုပ် အန်။ အန် ဒီ တဲး ဒူအီ အီ ထူမ် ဂြုဝ်း အုဝ် လိုပ် ခဲင် မိူင် ပီ အိုပ် အန်။ ဒူအီ ဂေ တီ၊ ဂေ ပီ ဟေ အီ မိုဝ်း ဘ့လေ။ 44 အုဝ် ယီ ပီ မာဝ် တွိုန်။ အာဆေ တူ ညှိုမ် အုဝ်၊ အန် ပီ ဒူအီ ဒီ တာ ဒုး ပ့လဝ် အန် ဒီ မာဝ် တွိုန်။ အန် ဒီ ဘော ကေး၊ ကာဘက် လိုဝ် တူတ့်။ ဆေ မာဝ် တွိုန် ဘော စုဝ်း ဒဲင် ဒူအီ၊ ဒူအီ တီ ဒီ ကာမုန် လိုဝ်၊ ဘဲန် ပီ ကာပုး။”

45 ဇဝ် ယေဆူ ဟဲ့ ဟွတ့် ကာလာင် အူဖာမာ တီ၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ၊ ဂေ ဟဲ့ ထူမ် ဆီချာ။ ဂေ ဘော နပ်၊ ဇဝ် ယေဆူ ဟဲ့ ကာလာင် ဂြုဝ်း တူ မွှိုမ် လွင် ဂေ။ 46 ခုဝ်၊ ဂေ ဇေန့်ဇာ၊ မှဝ် ဂေ ဒီ ပါယ် ဒီ မှေတ့် ဇဝ် ယေဆူ။ ဂေ ယီ ယုဝ် ဒူအီ ကိူန်။ ကူပ် ညှိုမ် ဒူအီ ကိူန်၊ ဇဝ် ယေဆူ မုး ဒူအီ အီ ဘျာန် ဂြုဝ်း ဇဝ်ဖြာ၊ ဂေ တူ ယ ဘူင် မာဆေ ဒီ အန်။