1 ဇဝ် ယေဆူ ဝီ ခဲ အူဖာမာ ပေါ အူ မျုဝ်။ အန် တဝ်း၊ “မိူင် ပီ အိုပ် ဇဝ်ဖြာ န့ ပီ ဒါ ကာညာ အူ ဝီ၊ အီ ဟြေတ့် ဒူအီ ဇာင် ဒီ အန်။ အူ ဆီငဲ ဆိန့်ဝး စေဝ်၊ အန် လေး ခဲင် ကာင် အန် ဟာဝ် ဒီ ကာလး၊ တဲး အန် ဒဲ့ ဒူအီ ဇာင် ဒီ အန်၊ ရန့် ခဲင် မာန် မာငုန် အန်။ 2 အန် တဝ်း ဒီ ဒွါ ရွိုန် ဇဲတ် အူ ဘူင့် အာဒါ အူ ဆီငဲ။ ဂေ မိူဝ် ဟဲ့ ဖြူမ်၊ ဂေ ဘော ဟာဝ် ဘူင် ဂါန် ခဲင် မာန် တွိုန်။

3 ဘော နုဝ့် ဒိမ် နာရီ၊ အန် ဝီ ဟာဝ် ဟြေတ့် ပေါ အူ ဇေန့်၊ ဝီ ယိုဝ် ဒူအီ မင် အီ အီ ကွယ် ခဲင် ကာလး၊ တူ မိုဝ်း ဒီ ဘူင် မာဆေ။ 4 အန် တဝ်း ဒီ ဂေ၊ ‘တဲး ဘော ဘေ ဟာဝ် ဘူင် ဂါန် ခဲင် မာန် မာငုန် အုဝ်။ အုဝ် ဒီ ဒွါ ဒီ ဘေ ခဲ့ ကာအာပ် ဒွါ။’

5 ပန် တီ ဘော ဂေ ဟာဝ် ဇာင် ဒီ အန်။ ဘော ဇမ် ဆီငဲ ကာတဲ၊ ဒါ ကာညာ တွိုန် ဝီ ဟာဝ် ဝီ ဒဲ့ ဒူအီ မင် အီ၊ တဲး ဂေ ဇာင် ဒီ အန်။ ဘော နုဝ့် အူယ် နာရီ ဝါယ် ဆီငဲ ကာတဲ၊ အန် ဝီ ဟာဝ် ပေါ အူ ဇေန့်၊ ဝီ ဒဲ့ ဒူအီ ပေါ န့ ပွါ တး ဇာင် ဒီ အန်။ 6 ဘာ ဒီ အပ်၊ အန် ပီ ဝီ ဟာဝ် ပေါ အူ ဇေန့်၊ ဝီ ယိုဝ် ဒူအီ အီ တူ ဘူင် မာဆေ။ အန် ဝီ တဝ်း ဒီ ဂေ၊ ‘မှဝ် န့ ပါယ် ပီ တူ ဘူင် ဘေ ဂါန်။း’

7 ဂေ ဝီ တဝ်း၊ ‘အာဝ် မိုဝ်း အီ ဒဲ့ ယေ။’ အန် ဝီ တဝ်း ဒီ ဂေ၊ ‘တဲး ဘော ဘေ ဟာဝ် ဘူင် ဂါန် ခဲင် မာန် အုဝ်။’

8 ဘော ဇမ် ခဲင် မှိုဝ်၊ ဒါ ကာညာ ဝီ တဝ်း ဒီ ဒဲစေန့် အန်၊ ‘မဲ ဒဲ့ ဂေ ဒူအီ အီ ဇာင် ဒီ အုဝ်၊ ဒွါ ရုး ဒီ ဂေ။ တဲး ဂေ အီ တး ဒီ ပန် ပွိုန် ရုး ဒီ အာတ့်၊ တဲး န့ လာယ် ဒါမ်၊ တဲး ဂေ အီ တး ဆိန့်ဝး ပွိုန် ဒီ ပန်။’

9 ပန် တီ ဂေ ဒူအီ အီ တး ဘူင် ဂါန် ဒေါ ဘာ ဒီ အပ်၊ ဂေ တး ဒီ အာတ့်၊ ဝီ ပွိုန် ရွိုန် ဇဲတ် အူ ဝီ အူ ဘူင့်။ 10 ဘော ဇမ် ဂေ အီ ဘူင် ဂါန် ဆိန့် ဆိန့်ဝး၊ ဂေ ထာင်၊ ဂေ ဒီ ပွိုန် လွှိုမ် ဂေ အီ တး ဒီ ပန်။ ဂေ ဒွန် အီ ယီ ပွိုန် ခဲ့ အူ ဘူင့် တီ။ 11 ဂေ ဒွန် အီ ဟဲ့ ဟွတ့် ပွိုန် ရွိုန် ဂေ၊ ဂေ ဒူအီ တး ဒီ အာတ့် တူ အိုင်၊ ဂေ ဝီ တဝ်း၊ ဒါ ကာညာ တွိုန် အာဝ် မွှိုမ်။ 12 ဂေ တဝ်း ဒီ အန်၊ ‘ဒူအီ အီ တး ဒီ ပန်၊ ဂေ ဘူင် ဂါန် ခဲ့ အူ နာရီ။ မဲ ယီ ဒွါ ဒီ ဂေ ခဲ့ ပီ ဒွါ မဲ ဒီ ယေ အီ ဟဲ့ ဘူင် ဂါန် ကိူန်၊ ဟဲ့ ခမ် ဒီ ဘူင် ခဲင် ဆောဒါတ် ဆိန့် ဆိန့်ဝး ကော ဇမ် အပ်။’

13 ဒါ ကာညာ တွိုန် ယီ တဝ်း ဒီ ဒူအီ အူ ဝီ၊ ‘ဒါ ဂိုက် အိုယ်၊ အာဝ် မုး၊ အုဝ် ဘူင် နာ တူ မွှိုမ် ဒီ မဲ။ ဘေ ဟဲ့ ဖြူမ် ဒီ ဇာင် ဒီ အုဝ် အာဒါ ရွိုန် ဇဲတ် အူ ဘူင့်။ ဟဲ့ မုး။း 14 ခုဝ်၊ ဘေ ဒိုဝ်း ရွိုန် ဘေ၊ ဟာဝ်။ ဆေ အုဝ် ဆီ ဒွါ ဒီ ဂေ အီ တး ဒီ ပန် ခဲ့ ပီ ဒွါ အုဝ် ဒီ ဘေ၊ န့ ဟွတ့် ဒီ အုဝ်။ 15 အုဝ် ဆီ ဘူင် ပါယ် မှဝ် မိူဝ် ရွိုန် အုဝ်။ န့ ယီ နှဲန် ဘေ လှယ့် အီ။ ကူပ် ဒီဟာင် နဝ်း အုဝ်၊ န့ တူ လဝ့် နဝ်း ဘေ။’” ဇဝ် ယေဆူ ဟဲ့ ဟွတ့် ကာလာင် ခဲ့ တီ၊ အန် ဝီ တဝ်း၊ “ဘော ဇဝ်ဖြာ မိုဝ်း နဝ်း ဒီဟာင် ပါယ် တီ။ 16 ခုဝ်၊ အုဝ် ဟဲ့ ဒွိုမ် တဝ်း၊ ဂေ ဒူအီ အီ တး ဒီ ပန် ဒီ ဝီ ယဲတ့် ဒီ အာတ့်။ ဂေ ဒူအီ အီ ဟဲ့ ယဲတ့် ဒီ အာတ့်၊ ဂေ ယီ ဝီ ကွယ် နာ ပန်။”^a

17 ဝါယ် အန် တီ ဇဝ် ယေဆူ ဟာဝ် ဟုဝ့် မိူင် ယေရူဆာလဲမ်။ ဒေါ အန် တီ အန် ဝီ ကာလာင် ဒီ ဒီဘဲ အန် ဂိုဝ် ဒီ အာ ဝီ ဒေါ တူ မိုဝ်း အီ ဟဝ် ထူမ်။ အန် တဝ်း၊ 18 “အေ ဒီ ဟုဝ့် မိူင် ယေရူဆာလဲမ် ဒေါ တီ နီ။ ဟီ ဇမ် ခဲင် မိူင်၊ ဂေ ဒီ မှေတ့် အုဝ်၊ အီ ဟဲ့ ဘဲန် ဂွန် ဒူအီ၊ ဝီ အာပ် အုဝ် ဒီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဒီ ဂေ ဒါ ဆာရာ အီ မာနုဝ် ဒါရာ ယူဒါ။ ဂေ ဒူအီ တီ ဒီ ဘော ဆုင်ဖျာတ် ဒီ ငဝ်း ယမ် အုဝ်။ 19 ဂေ ဒီ ဝီ အာပ် အုဝ် ဒီ ဒူအီ အာမျုဝ် ဟဝ်၊ တဲး ဂေ ဝီ ကာညး အုဝ်၊ ဆီဘျြီ့ အုဝ်။ ဟဲ့ ဟွတ့်၊ ဂေ ဒီ ငဝ်း ယမ် အုဝ် ဒဲင် ရွင့် ကာဝဲ့။ ဟီ ဇမ် ဆီငဲ ဟာအူယ်၊ အုဝ် ဒီ ဝီ ယိတ့် ဝီ အိမ်။”

20 အူ ဆီငဲ၊ န့ မိုဝ်း မာ အာယာကူပ် ဂါယ် အာယောဟာန် တွိုန်။ အီမာယ် အန် မုး အာဇေဘေဒေ။ အန် ဝီ ဒူပ် ဂွန် အီမာယ် အန် အာ ဝီ တွိုန်၊ ဝီ ဟာဝ် ဒူင် ကွယ် ဇဝ် ယေဆူ။ အန် ဝီ ခြိုပ်ခြဝ် ဒီ အာတ့် ဇဝ် ယေဆူ၊ တဝ်း ဒီ မှာန့် ဒီ အန်။ 21 ဇဝ် ယေဆူ တဝ်း၊ “မာဆေ ပီ လုဝ် မဲ။း” အန် ဝီ တဝ်း၊ “ဆေ မဲ အိုပ် မိူင် မဲ၊ တဲး မဲ ဒွါ ဂွန် အုဝ် ကွယ် ဒီ ခူပ် မဲ၊ အူ ဝီ ဘ့လာက် အာအး၊ အူ ဝီ ဘ့လာက် အာဂ။”

22 ဇဝ် ယေဆူ ဝီ တဝ်း ဒီ အာယာကူပ် ဂါယ် အာယောဟာန်၊ “ဘာယ် တူ နပ် ပီ မှာန့် ဘာယ်။ အုဝ် ဆီ ဒီမွှတ် ဘာယ်။ ဘာယ် ဒီ ခမ် ဒီ ဒျီင် ဆီလယ့် ပီ လုဝ် ဒျီင် အုဝ်၊ အီ တဲး အုဝ် ယမ်။း”^b ဂါယ် ဝီ တဝ်း၊ “ယာယ် ဟဲ့ ခမ်။” 23 ပန် တီ ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ဘာယ် ဒီ ဘော ယမ်၊ တဲး န့ ပီ ဆီလယ့် ပီ ဒျီင် အုဝ်။ အုဝ် ယီ တူ ပွိုန် တဲး ဘာယ် ကွယ် ဘ့လာက် အာအး ဂါယ် ဘ့လာက် အာဂ အုဝ်။ ဇဝ်ဖြာ ဟဲ့ ဟွတ့် ရဝ်း ဒူအီ အီ ပွိုန် ဒီ ကွယ် ခူပ် အုဝ်။ ဒူင် ဆီ ကွယ် ဘာယ် တီ၊ အန် ဇဝ် ဒီ ဒွါ ဒီ ဒူအီ ပီ ရဝ်း အန်။”

24 ပန် တီ ဂေ ဒီဘဲ ဇဝ် ယေဆူ ပေါ ဂိုဝ် ဝီ၊ ဂေ ဘော နပ် လွင် ပီ မှာန့် မာ ဂါယ်၊ ဂေ တူ အိုင် ဂါယ် အူကတ် အူဝါ အာ ဝီ တီ။ 25 ဇဝ် ယေဆူ ယီ ဒဲ့ ဂေ ဘောကာဂ့လျီတ် တး ကာဇု။ အန် ဝီ တဝ်း ဒီ ဂေ၊ “ဘေ နပ်၊ ဆေ န့ မုး ဂေ ဒါ ကာညာ အီ အိုပ် ဒူအီ အာမျုဝ် ဟဝ်၊ ဂေ နပ် ဒီ ဒိုဝ်း ပွုန် ဂေ၊ စ်ု ကာဆဝ် ဒူအီ ပီ အိုပ် ဂေ၊ တဲး န့ ဒုက် ဒီ ဂေ။ ဘော ဂေ ဒါ တာင် ခဲင် မိူင် ဟဝ် နပ် ဒီ ခါနှာပ် ဂေ။ 26 ဘေ ယီ တူ လုဝ် ဘူင် ပါယ် တီ။ အာဆေ ဆီ ဘဲန် ဒါ တာင် ကာတဲ ဘေ၊ အန် လုဝ် ဘဲန် မှာယ် ဘေ ဒွန် အီ။ 27 အာဆေ ဆီ ယဲတ့် အီ၊ ဝီ လုဝ် ဘဲန် ဝါ ဒွန် အီ၊ စွယ် ဒွန် အီ။ 28 ပါယ် တီ ဘော အုဝ်၊ အီ ဟဲ့ ဘဲန် ဂွန် ဒူအီ၊ အုဝ် တူ တး တဲး အီ ဟဝ် စွယ် အုဝ်။ အုဝ် ဟဲ့ တး ဇမ် ဒဲင် ကာဒါယ် နီ၊ တဲး အုဝ် လိုမ်လာ ဘော စွယ် ဘေ။ အုဝ် မိူဝ် ဟဲ့ တး၊ တဲး အုဝ် ယမ် ကာဒါင် အီ၊ တဲး အုဝ် ချွတ် အာဆာက် ဒူအီ ကိူန်။”

29 ဇဝ် ယေဆူ ဟဲ့ ဟွတ့် ပွုန် မိူင် ယေရီခုဝ် တွိုန်။ ဒေါ ဝီ လေး အန် ခဲင် မိူင်၊ န့ ဝီ မိုဝ်း ဒူအီ ကိူန် ဒူပ် ဒီ ပန် အန်။ 30 န့ ဝီ မိုဝ်း ဒူအီ ငါယ် အပ် အာ ဝီ။ ဂါယ် ကွယ် ဒီ ခူပ် န့တေန့်။ ဒေါ ယိုဝ် ဂါယ် လွင် ဇဝ် ယေဆူ ကာလုဝ်း ဒူင် ကွယ် ဂါယ်၊ ဂါယ် ဝီ ဒတ် တဝ်း၊ “မဲ ဇဝ်၊ အီ မုး လှုက်လှာန် အာဒါဝိတ်၊ မှာန့် မဲ ကာဝေ ယာယ်။”

31 ဂေ ဒူအီ ကိူန် ဝီ အေး ဂါယ်၊ ဝီ တဝ်း ဒီ ဂါယ်၊ “ကွဲ့ ဒတ်။” ဂါယ် ယီ ဝီ ဝဲ ဒတ် တာင် တဝ်း၊ “မဲ ဇဝ်၊ အီ မုး လှုက်လှာန် အာဒါဝိတ်၊ ကာဝေ ယာယ်။”

32 ဇဝ် ယေဆူ ဝီ ဂိူတ်၊ ဝီ ဒဲ့ ဂါယ် တး ဒီ အန်။ အန် တဝ်း၊ “မာဆေ ပီ လုဝ် ဘာယ် ဒီ အုဝ်။း”

33 ဂါယ် ဝီ တဝ်း၊ “မဲ ဇဝ်၊ ယာယ် ဆီ တဲး ငါယ် ယာယ် ဝီ ဘ့လာင်။”

34 ပန် တီ ဇဝ် ယေဆူ မိူဝ် ဝီ ကာဝေ ဂါယ်၊ ဝီ ပါ ငါယ် ဂါယ်။ ငါယ် ဂါယ် ဘော ဘ့လာင် အူ ဇေန့်။ ဂါယ် ဘော ဒူပ် ဇဝ် ယေဆူ။