1 ဝါယ် အန် တီ ဒဝ် ဆီငဲ၊ ဇဝ် ယေဆူ ဝီ ဒဲ့ အာပေတာရူ၊ အာယာကူပ် ဘော အာယောဟာန် အီ မုး ဝါ အာယာကူပ်၊ တဲး ဂေ ဟာဝ် ရိုမ် ဒူပ် အန်။ ဂေ ဟုဝ့် ဒဲင် နွန် စာ၊ တူ တဲး အီ ဟဝ် ဒူပ် ဂေ။ 2 ဂေ ဟဲ့ ဟွတ့် ဇမ် ဒဲင် နွန် တွိုန်၊ အာရိုပ် ဇဝ် ယေဆူ ဝီ ဘ့လိူင်၊ တဲး ဂေ ဒီဘဲ အန် အူယ် ဝီ ပွိုန် ဒီ ယိုဝ်။ နာ အန် ဝီ ဘ့လာင် ပီ ဆီငဲ။ ဘော ခြိုင် ပီ စှိုပ် အန် ဝီ လုယ် ရာဝ်။ 3 ဒေါ အန် တီ န့ ဘော မိုဝ်း ဒါ အာမုဝ်ဆဲ ဂါယ် ဒါ အာအေလီယ အီ ကွယ် ဘာန် ဒေါ မွိုန်၊ ဂါယ် ဝီ ကာပ့လုး ဒီ အာတ့် ဂေ၊ ကာလာင် ဂြုဝ်း ဒီ ဇဝ် ယေဆူ။

4 အာပေတာရူ ဝီ တဝ်း ဒီ ဇဝ် ယေဆူ၊ “မဲ ဇဝ်၊ န့ ဟဲ့ ဒါခိုယ် ကွယ် ဒီ နီ။ ဆေ မဲ လုဝ်၊ အုဝ် ဒီ ဘူင် ထိုပ် အူယ် ထိုပ်၊ တဲး ဘော မဲ ဘော အာမုဝ်ဆဲ ဘော အာအေလီယ ကွယ် အူ ဝီ အူ ထိုပ်။”

5 ဒေါ ကာလာင် အန် ဂြုဝ်း တီ၊ န့ မိုဝ်း န့အု အီ ဘ့လာင် တး ပ့လိုက် ဂေ။ ဘော မိုဝ်း ဂြုဝ်း အီ လေး ခဲင် န့အု တီ တဝ်း၊ “ဒူအီ တီ မုး ဂွန် ပီ ရွက့် အုဝ်။ ပီ ဘူင် အန်၊ န့ လဝ့် နဝ်း အုဝ်။ တဲး ဘေ ထူမ် ဂြုဝ်း အန်။”

6 ဂေ ဒီဘဲ အန် အူယ် ဝီ ဟဲ့ ဟွတ့် ထူမ် ဂြုဝ်း တီ၊ ဂေ ဝီ ကေး၊ ဝီ ယုဝ် ကာဆဝ်။ 7 ဇဝ် ယေဆူ ဝီ တး ဘျိတ့် ဂေ တဝ်း၊ “ယိတ့်။ ကွဲ့ ယုဝ်။” 8 ဂေ ဝီ ဆာကိုဝ်း ယွတ်၊ ဝီ ယိုဝ် မီ ဇဝ် ယေဆူ အူ ဝီ။ အာဝ် ဟူ ယိုဝ် ဂါယ် အာ ဝီ တွိုန်။

9 ဒေါ ဝီ လူင် ဂေ ဒဲင် နွန်၊ ဇဝ် ယေဆူ ဝီ တဝ်း ဒီ ဂေ၊ “ကွဲ့ ခဲ ဒီ အာဆေ လွင် ပဲ့ ဟဲ့ ယိုဝ် ဘေ နီ၊ တဲး န့ ကော ဇမ် အာခြာဝ် ဒီ ဝီ ယိတ့် ဝီ အိမ် အုဝ် ဝါယ် ဟဲ့ ဟွတ့် ယမ် အုဝ်။”

10 ပန် တီ ဂေ ဒီဘဲ ဇဝ် ယေဆူ ဝီ ဒီမွှတ် အန်။ ဂေ တဝ်း၊ “ဂေ ဒါ ဆာရာ အီ မာနုဝ် ဒါရာ၊ ဂေ တဝ်း၊ အာအေလီယ တွိုန် အီ ဟဲ့ ဟွတ့် ယမ်၊ အန် လုဝ် ဝီ တး ဒဲင် ကာဒါယ် နီ အာတ့် တး ဒူအီ ပီ ရဝ်း ပီ တိုယ် ဇဝ်ဖြာ တီ။ မှဝ် န့ ပါယ် ပီ တဝ်း ဂေ ပါယ် တီ။း”

11 ဇဝ် ယေဆူ ဝီ တဝ်း၊ “ဟဲ့ မုး၊ ဟဲ့ မှာန်၊ ခဲင် ဘပ် ဇဝ်ဖြာ န့ တဝ်း လွင် အာအေလီယ ဒီ ဝီ တး ဒဲင် ကာဒါယ် နီ၊ တဲး အန် မ့ပြာယ် တူတ့် ဒွန် မျုဝ် အာတ့် ဒီ တး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 12 အုဝ် ယီ တဝ်း ဒီ ဘေ၊ ဒူအီ အီ ပီ အာအေလီယ တွိုန်၊ အန် ဟဲ့ ဟွတ့် တး။ ဂေ ယီ တူ နပ် န့ မုး အန်။ ခုဝ်၊ ဂေ ဟဲ့ ဘူင် ဒွန် မျုဝ် ပီ အိုင် ဂေ ဒီ အန်။ ပါယ် တီ ဂေ ဒီ ဘော ဇွင့် ဘော စာဝ် ဘော ဒီ အုဝ် အီ ဟဲ့ ဘဲန် ဂွန် ဒူအီ။” 13 ဇဝ် ယေဆူ ဟဲ့ ဟွတ့် ကာလာင် ပါယ် တီ၊ ဂေ ဒီဘဲ အန် ကော နပ်၊ အန် ကာလာင် လွင် ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တွိုန်။ အန် ပီ ဒါ အာအေလီယ တွိုန်။

14 ဂေ ဟဲ့ ဟွတ့် လူင် ဒဲင် နွန်၊ ဝီ ဇမ် ဒူင် ကွယ် ဂေ ဒူအီ ကိူန်၊ န့ မိုဝ်း ဒူအီ အူ ဝီ၊ အန် တး ခြိုပ်ခြဝ် ဒီ အာတ့် ဇဝ် ယေဆူ။ 15 အန် တဝ်း၊ “မဲ ဇဝ်၊ တဲး မဲ ကာဝေ ဂွန် အီမာယ် အုဝ်။ အန် မိုဝ်း ငါန် အီ တဲး အန် ခမ် ဒုက် ကာဆဝ်။ ဘဲန် ဇေန့် ဘဲန် ဇေန့် အန် ကေး ခဲင် ငဝ် ဘော ကေး ခဲင် အိုမ်။ 16 အုဝ် ဟဲ့ တိုယ် အန် တး ဒီ နီ၊ တဲး ဂေ ဒီဘဲ မဲ ပီကဲန် အန်။ ဂေ ယီ တူ ပဲ။”

17 ဇဝ် ယေဆူ ဝီ တဝ်း၊ “ဘေ ဒူအီ အီ ကွယ် ဇာတ် နီ၊ ဘေ တူ ညှိုမ် မာဆေ။ ပီ ဇေန့်ဇာ ဘေ ဘော ပီ ဘူင် ဘေ အာဝ် မွှိုမ်။ ခဲ့ မှဝ် န့ ဒီ လှေန့်၊ အုဝ် ဒီ ဘော လုဝ် ကွယ် ရိုမ် ဒူပ် ဘေ။း ခဲ့ မှဝ် န့ ဒီ လှေန့်၊ အုဝ် ဒီ ဘော လုဝ် ခမ် ဒူအီ ပီ ဘေ။း” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း ဒီ ဒူအီ တွိုန်၊ “တိုယ် ဂွန် မဲ တး ဒီ အုဝ်။” 18 ပန် တီ ဇဝ် ယေဆူ ဆုတ့် လေး ကာနမ် ခဲင် ဒုဝ် ဂွန် တီ။ ဟဲ့ ဟွတ့် ကာနမ် မိူဝ် လေး။ ဂွန် အီမာယ် တွိုန် ဟဲ့ ကဲန် အူ ဇေန့်။

19 ဝါယ် အန် တီ ဒေါ တူ ကွယ် အီ ဟဝ်၊ ဂေ ဒီဘဲ ဇဝ် ယေဆူ ဝီ တး ဒီမွှတ် အန်။ ဂေ တဝ်း၊ “မှဝ် န့ ပါယ် ပီ တူ ပဲ ယေ ဒီ ဆုတ့် ကာနမ် တီ လေး တဝ်။း”

20 ဇဝ် ယေဆူ ဝီ ဝျီ့ ဂြုဝ်း ဂေ တီ တဝ်း၊ “ဘေ ညှိုမ် အီ စဲက်။ ခုဝ်၊ ဘေ တူ ပဲ ဒီ စ်ု ကာနမ် တီ လေး ခဲင် ဒုဝ် ဒူအီ တီ။ အုဝ် တဝ်း အာခ်ု ဒီ ဘေ၊ ဆေ ဘေ မိုဝ်း နဝ်း ညှိုမ် အီ ဒါန် ကာအာင် ဒဝ် ဆျီမ်၊ ဘေ ဒီ ဘော နပ် ဒီ ဘူင် တူတ့် ဒွန် မျုဝ်။ အာဝ် မိုဝ်း မာဆေ ပီ တူ ပဲ ဘေ။ ဘေ ဒီ ဘော တဝ်း ဒီ နွန် အီ ကွယ် ဆွုန် တ ဒွယ်၊ ‘ကာထုဝ့် ဒူင် ကွယ် မဲ။’ အန် ဒီ ဘော ကာထုဝ့်။ 21 ကာနမ် ဇိုဝ် တီ၊ ဂေ ယီ တူ လေး ဆေ ဘေ တူ ဆာခိုဝ် ဘော ယိူန် ပီ ဒီ ဟူမ်။”

22 ဝါယ် အန် တီ အူ ဆီငဲ ဂေ ဒီဘဲ ဇဝ် ယေဆူ ဘောကာဂ့လျီတ် ကွယ် ရိုမ် ဒူပ် အန် ဒေါ ကွယ် ဂေ ခဲင် အိူင် ဂါလီလေ။ ဒေါ အန် တီ ဇဝ် ယေဆူ ဝီ တဝ်း ဒီ ဂေ၊ “န့ မုး အုဝ်၊ အီ ဟဲ့ ဘဲန် ဂွန် ဒူအီ၊ ဂေ ဒီ အာပ် အုဝ် ဒီ ရန်ဆူ အုဝ်။ 23 ဂေ ဒီ ဘော ငဝ်း အာဆာက် အုဝ်။ ဝါယ် ဟဲ့ ဟွတ့် ယမ် အုဝ်၊ ဟီ နုဝ့် အူယ် ဆီငဲ၊ ဇဝ်ဖြာ ဒီ တဲး အုဝ် ဝီ ယိတ့် ဝီ အိမ်။” ကူပ် ကာလာင် အန် ဂြုဝ်း တီ၊ ဂေ ဒီဘဲ အန် ဝီ ဘဲန် နဝ်း က့လိုဝ်။

24 ဇဝ် ယေဆူ ဘော ဒီဘဲ အန် ဟဲ့ ဝီ တး ဇမ် ခဲင် မိူင် ကာပေနာရိုမ်၊ န့ ဝီ မိုဝ်း ဒူအီ အီ ဂဲပ် ရွိုန် စိုင်၊ ဂေ တး ဒူင် ကွယ် အာပေတာရူ။ ရွိုန် စိုင် တီ မုး ရွိုန် အူ ခွါယ် ပီ လုဝ် ဒွါ အီမာယ် ဒွန် အီ၊ တဲး န့ ဘဲန် ရွိုန် ပီ စ်ု ခဲင် ဟုဝ် ဇဝ်ဖြာ။ ဂေ ဒူအီ ဂဲပ် ရွိုန် စိုင် တီ၊ ဂေ တဝ်း ဒီ အာပေတာရူ၊ “မှဝ် န့ ပါယ် ပီ တူ ဒွါ ဒါ ဆာရာ မဲ ရွိုန် စိုင် အာဒါ ဟုဝ် ဇဝ်ဖြာ တီ။း”

25 အာပေတာရူ ဝီ တဝ်း၊ “အန် ဒီ ဒွါ။” အာပေတာရူ ဝီ လိုပ် ခဲင် ကာင် ဒူင် ကွယ် ဇဝ် ယေဆူ။ ဇဝ် ယေဆူ ဝီ တဝ်း အူ ဇေန့်၊ “အာဆီမူန်၊ မာဆေ ပီ ထာင် မဲ။း ဂေ ခုန်ဒီခမ် အီ ကွယ် ဒဲင် ကာဒါယ် နီ၊ ဂေ ဂဲပ် ရွိုန် စိုင် ဒီ အာဆေ။း ဂေ ဒိုဝ်း ဒီ ဂွန် ဂေ။း ဂေ ဒိုဝ်း ဒီ အီ ဟဝ်။း”

26 အာပေတာရူ ဝီ တဝ်း၊ “ဂေ ဒိုဝ်း ဒီ အီ ဟဝ်။” ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ဂွန် ခုန်ဒီခမ် တူ လုဝ် ဟပ် ရွိုန် စိုင်။ 27 ပီ ဘော ဟဲ့ ပါယ် တီ မိူဝ်၊ အေ ယီ တူ ဆီ ဘူင် ပီ တူ အိုင် ဂေ။ ခုဝ်၊ မဲ ဟာဝ် ဒီ ဘာင် အိုမ်၊ ဘျွာ မ့ပဲတ် မဲ။ ဆေ မာဂါ ဟဲ့ ဒိုက်၊ မဲ ဒိုဝ်း မာဂါ ဒုဝ် တီ၊ ကာဝိုဝ်း မူတ့် အန်။ န့ ဒီ မိုဝ်း ရွိုန် အူ ဘူင့် ခဲင် မူတ့် အန်။ ရွိုန် တီ မဲ ဒိုဝ်း ဒွါ ဒီ ဂေ ဒူအီ အီ ဂဲပ် ရွိုန် စိုင် တီ။ န့ ဟဲ့ ဂ့လိုမ် ခဲ့ ပီ လုဝ် ဒွါ အာယ်။”