1 ဂေ ဒူအီ ခဲင် ဖိုင် ဖာရီဆဲ ဘော ဂေ ဒူအီ ခဲင် ဖိုင် ဆာဒူခဲ မင် အီ၊ ဂေ ဝီ တး ဒူင် ကွယ် ဇဝ် ယေဆူ၊ ဝီ ထေဝ် နဝ်း အန်။ ဂေ ဝီ မှာန့် ဒီ ဇဝ် ယေဆူ တဲး အန် ဂါဝ် ပွုန် ဇဝ်ဖြာ၊ ဘျ ဒီ ဂေ နာ မွှိုမ် အာမ် ကာဆဝ်။

2 ဇဝ် ယေဆူ ဝီ တဝ်း၊ “ဆေ ဟီ ဇမ် ဘာ ဒီ အပ် ဘေ နပ် ဒီ ယွတ် ဘ့လေန့်။ ဆေ ဘ့လေန့် ဟဲ့ ရေန့်၊ ဘေ နပ် ဒီ တဝ်း၊ ‘ခဲညှာ န့ ဒီ ဆောဒါတ်၊ အာဝ် ဂ့လာယ်။’ 3 ဆေ န့ မုး ဆိန့်ဝး၊ ဘေ ဘော နပ် ဒီ ယွတ် ဘ့လေန့်။ ဆေ အန် ရေန့်၊ ဆေ န့ ဘော မိုဝ်း န့အု ခဲင် ဘ့လေန့်၊ ဘေ ဝီ နပ် ဒီ တဝ်း၊ ‘အာတိုဝ် ခုန် ဂေ ဂ့လာယ် ဒီ တး။’ ဆေ ဘေ ယွတ် ဘ့လေန့်၊ ဘေ ဘော နပ် ဒီ ကာလာင် န့ ဒီ ပါယ် မှဝ်။ ပါယ် တီ၊ ဘေ ဘော ယွတ် ပီ ဘူင် အုဝ် ဒေါ ကွယ် အုဝ် ဒီ နီ။ န့ ယီ တူ လိုဝ်း ဆီဖဝ် အန် ခဲင် နဝ်း ဘေ။ 4 ဘေ ဒူအီ ဇာတ် နီ၊ ဘေ ဟဲ့ ဟာယ်။ ဘေ ဘော ဝဲန် ဇဝ်ဖြာ၊ ဝီ ဒူပ် ဒါရာ ဘဲန် မျုဝ် ဘဲန် မျုဝ်။ န့ ပီ ပီ ဘူင် ဂေ ဒူအီ အီ လုတ့် အီဘိုန့်။ ဘေ တူ ညှိုမ် ဂြုဝ်း အုဝ်၊ ယီ မှာန့် အုဝ် ဘူင် နာ မွှိုမ် အာမ် ကာဆဝ် တဲး ဘေ နပ် လွင် ပွုန် အုဝ်။ ဇဝ်ဖြာ ဟဲ့ ဟွတ့် ဘူင် နာ မွှိုမ် အာမ် ကာဆဝ် ဒီ ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာယုဝ်နာ တွိုန်။ အာတီ ဟဲ့ ဘျ လွင် အုဝ်။ ဒဲင် တီ အာဝ် မိုဝ်း ပီ ဒီ ဘျ ဒီ ဘေ။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ဒူင် ကွယ် အန် တွိုန်၊ ဟာဝ် ပေါ အူ ပ့လုဝ့် တဲး ဂေ ဒူအီ ဟဝ် ကွယ် နာ ပန်။

5 ဇဝ် ယေဆူ ဘော ဒီဘဲ အန် ဝီ ပဝ့် ရိုဝ်၊ ကာလုဝ်း အိုမ် ဒိုင်၊ ဝီ ဇမ် ဘ့လာက် နာ တ တွိုန်။ ဒေါ အန် တီ ဂေ ဒီဘဲ အန် ဟဲ့ ပိဝ် ဒီ ဂူင့် ခါမုန် ပီ ဒီ ဟူမ် ဂေ။ 6 ဇဝ် ယေဆူ ဝီ တဝ်း ဒီ ဂေ၊ “ဘေ လုဝ် ဆာဒိက် ဂေ ဒူအီ ဖိုင် ဖာရီဆဲ ဘော ဂေ ဒူအီ ဖိုင် ဆာဒူခဲ။ ပီ ဘူင် ဂေ၊ န့ ပီ ဆီနမ် ဘြး ခါမုန်။”

7 ဂေ ဒီဘဲ ဇဝ် ယေဆူ ဝီ လာယ် ဆင်ချာင် လွင် ဒါင် ဂြုဝ်း တီ။ ဂေ တဝ်း၊ “အန် ဟဲ့ ခဲ ဒီ အေ လွင် အန် တီ ကူပ် ဟဲ့ ပိဝ် အေ ဒီ ဂူင့် ခါမုန်။”

8 ဇဝ် ယေဆူ ဝီ နပ် လွင် ဂြုဝ်း ဂေ တီ၊ အန် ဝီ တဝ်း ဒီ ဂေ၊ “ဘေ မုး ဒူအီ အီ ညှိုမ် အီ စဲက်။ မှဝ် န့ ပါယ် ပီ ကာလာင် ဘေ လွင် တူ မိုဝ်း ဘေ ခါမုန်။း 9 န့ ညှမ် လိုဝ်း ဒီ နဝ်း ဘေ လွင် ပီ ဘူင် အုဝ်။ န့ ပီ၊ ဘေ ဟဲ့ ပိဝ် ဒေါ ဒိုဝ်း အုဝ် ခါမုန် ဖန် ဘူင့်၊ တဲး ဒူအီ ဖန် ဟြဲန့် ဟူမ် ဖဲ။ ဘေ မိူဝ် ဟဲ့ ပိဝ်၊ နှာင် ကာတဲပ် ဟဲ့ ဝီ ကာလူယ်။ 10 ဘေ မိူဝ် ဟဲ့ ပိဝ် ဒေါ ဒိုဝ်း အုဝ် ခါမုန် ဘူ ဘူင့်၊ တဲး ဒူအီ ဖွုန် ဟြဲန့် ဟူမ် ဖဲ။ ဘေ မိူဝ် ဟဲ့ ပိဝ် နှာင် ခွန် ဟဲ့ ဝီ ကာလူယ် ဒေါ အန် တီ။ 11 န့ တူ ကာလှုး ဒီ နဝ်း ဘေ လွင် ဂြုဝ်း ပီ ကာလာင် အုဝ်။ အုဝ် တူ ကာလာင် လွင် ခါမုန် ဘေ။ အုဝ် ဟဲ့ တဝ်း၊ တဲး ဘေ ဆာဒိက် ဂေ ဒူအီ ဖိုင် ဖာရီဆဲ ဘော ဒူအီ ခဲင် ဖိုင် ဆာဒူခဲ တွိုန်။ ဂေ ပီ ဆီနမ် ဘြး။” 12 ပန် တီ န့ ကော လိုဝ်း ဒီ နဝ်း ဂေ လွင် ဂြုဝ်း ဇဝ် ယေဆူ တွိုန်။ အန် တူ ကာလာင် လွင် ဆီနမ် ဘြး ပီ ကာဝ်ု ဂေ ခဲင် ခါမုန်။ အန် ယီ ကာလာင် လွင် ပီ မာနုဝ် ဂေ ဒူအီ ခဲင် ဖိုင် ဖာရီဆဲ ဘော ဒူအီ ခဲင် ဖိုင် ဆာဒူခဲ တွိုန်။

13 ဝါယ် အန် တီ ဇဝ် ယေဆူ ဂေ ဒီဘဲ အန် ဝီ ဟာဝ် ဇမ် ကာတတ် မိူင် ကေဆာရေ ဖီလီဖီ။ ဒေါ အန် တီ အန် ဝီ ဒီမွှတ် ဒီဘဲ အန်။ အန် တဝ်း၊ “မာဆေ ပီ တဝ်း ဂေ ဒူအီ ဟဝ်၊ လွင် အုဝ် အီ ဟဲ့ ဘဲန် ဂွန် ဒူအီ။း”

14 ဂေ ဝီ တဝ်း၊ “မင် အီ တဝ်း၊ မဲ မုး ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တွိုန် အီ ဟဲ့ ဝီ ယိတ့် ဝီ အိမ်။ မင် အီ တဝ်း၊ မဲ မုး ဒါ ဆာရာ အာအေလီယ တွိုန် အီ ဟဲ့ ဝီ ယိတ့် ဝီ အိမ်။ မင် အီ ဘော တဝ်း၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ အူ ဝီ။ ဂေ ဘော တဝ်း၊ မဲ မုး ဒါ အာယေရေမီ တွိုန် အီ ဟဲ့ ဝီ ယိတ့် ဝီ အိမ်။”

15 ဇဝ် ယေဆူ ဝီ တဝ်း၊ “ဘေ လဲ၊ ဘေ ထာင်၊ အုဝ် မုး အာဆေ။း”

16 အာဆီမူန် အီ စိူဝ် ဘော အာပေတာရူ တွိုန်၊ အန် ဝီ ဝျီ့ ဂြုဝ်း တီ။ အန် တဝ်း၊ “မဲ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး မဲ ချွတ် ဒူအီ။ မဲ မုး ဂွန် ဇဝ်ဖြာ အီ ကွယ် ဆေဆေ၊ အီ တူ နပ် ဒီ ယမ်။”

17 ဇဝ် ယေဆူ ဝီ တဝ်း၊ “မဲ အာဆီမူန်^a အီ မုး ဂွန် အာယုဝ်နာ၊ ဇဝ်ဖြာ ဟဲ့ မွင့်ကာရာ တဲး ဒီ မဲ။ အာဝ် မိုဝ်း ဒူအီ အီ ဟဲ့ မာနုဝ် မဲ။ န့ မုး ဂုန့် အုဝ်၊ အီ ကွယ် ဂါင်ဟြာဝ်၊ အန် ဟဲ့ ဘျ ဒီ မဲ လွင် အုဝ်။ 18 အုဝ် မိူဝ် တဝ်း ဒီ မဲ၊ မဲ မုး အာပေတာရူ။ လွင် ဒါင် စိူဝ် မဲ တီ၊ န့ မုး မာဝ် တာင်။ အုဝ် ဒီ တဲး မဲ ဒဲ့ ဒူအီ ကိူန် ဒူပ် အုဝ်၊ တဲး ဂေ ဘဲန် ဖိုင် အီ ညှိုမ် အုဝ်။ ဖိုင် တီ ဒီ ပီ ကာင် ပီ ဆမ် ဒူအီ ဒဲင် မာဝ် တာင် တီ။ ဂေ ဒီ ညှိုမ် ဆီချာ၊ တူ ယုဝ် ဒီ ယမ်။ အာဆေ တဝ်း ဒီ ကာဂုဝ်း ဒီ ဂေ၊ အန် ဒိူန် တူ ပဲ တူ အွင် ဒေါ မှဝ်။ 19 ဆေ ဇဝ်ဖြာ ဟီ အိုပ် ကာဒါယ်၊ အုဝ် ဒီ တဲး မဲ ပီ ဒူအီ အီ ဂူင့် လခတ်ဆဝ် အီ ပွိုန် ဝိုဝ်း မာလုဝ်း ခဲင် ဟုဝ် ခုန်ဒီခမ်။ အုဝ် တဲး မဲ မိုဝ်း ပွုန် ပီ ဒူအီ ဇိုဝ် တီ။ ခဲ့ ပီ စ်ု မဲ ဒူအီ ဘူင် ဒဲင် ကာဒါယ် နီ၊ ဘော ဇဝ်ဖြာ အီ ကွယ် ဂါင်ဟြာဝ် ဒီ တဝ်း၊ ဟဲ့ မုး၊ ဟဲ့ မှာန်။ ခဲ့ ပီ ခြဲ မဲ ဒဲင် ကာဒါယ် နီ၊ ဘော ဇဝ်ဖြာ တူ တဲး အီ ဘူင်။” 20 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ အာပေတာရူ၊ အန် ဝီ စ်ု ဂေ ဒီဘဲ အန်၊ ကွဲ့ တဲး ဂေ ကာလာင် ဒီ အာဆေ လွင် မုး အန် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။

21 ဝါယ် အန် တီ ဇဝ် ယေဆူ ကာလာင် ဒီ ဂေ ဒီဘဲ အန် ပီ တူ ဒွိုမ် ကာလာင် အန် ဒီ ဂေ။ အန် တဲး ဂေ နပ်၊ အန် လုဝ် ဟာဝ် မိူင် ယေရူဆာလဲမ်။ ဂေ ဒါ တာင် ယူဒါ၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဒီ ဘူင် တဲး အန် ကာဒုး ဒုက် ဘဲန် မျုဝ် ဘဲန် မျုဝ်။ ဟဲ့ ဟွတ့်၊ ဂေ ဒီ ငဝ်း အာဆာက် အန်။ ဟီ ဇမ် ဆီငဲ ဟာအူယ် ဝါယ် ယမ် အန်၊ အန် ဒီ ဝီ ယိတ့် ဝီ အိမ်။

22 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အာပေတာရူ တွိုန် ယီ တဲး ဇဝ် ယေဆူ ဝီ မာငး ယွတ် အန်။ အန် တဝ်း၊ “မဲ ဇဝ်၊ ကွဲ့ တဲး န့ ဘဲန် ပါယ် တီ ဒေါ မှဝ်။”

23 ဇဝ် ယေဆူ ဝီ ယွတ် အန်၊ ဝီ တဝ်း၊ “ကွဲ့ ကာလာင် ဂြုဝ်း ပါယ် တီ။ န့ ပီ ဂြုဝ်း ဘုဝ် ကာနမ် အီ စိူဝ် ဆာတာန် အီ ခြဲ အုဝ် ဘူင် ပီ အိုင် ဇဝ်ဖြာ။ ခုဝ်၊ အာငျာန် မဲ တူ ဒူပ် အာငျာန် ဇဝ်ဖြာ အီ မုး ဂုန့် အုဝ်။ န့ ဒူပ် အာငျာန် ဒူအီ။”

24 ပန် တီ ဇဝ် ယေဆူ ဝီ ကာလာင် ဒီ ဂေ ဒီဘဲ အန် ဒွန် အီ။ အန် တဝ်း၊ “အာဆေ ဆီ ဒူပ် အုဝ် အာဝ် ပွိုန် ဘူင် ပီ အိုင် အန်။ အန် လုဝ် ဘ့လေး နဝ်း အန် တဝ်း၊ ‘ဆေ အုဝ် ပီ ဘော လုဝ် ယမ် မိူဝ်၊ အုဝ် ယီ ဒီ ဒူပ် အန် ဇဝ် ဆေဆေ။’ 25 အာဆေ လှယ့် အာဆာက် အန်၊ အာဆာက် အန် တီ ဒီ စှိုမ်။ အာဆေ ယီ တူ ယုဝ် ဒီ ယမ် ကူပ် ညှိုမ် အန် ဒီ အုဝ်၊ အန် ဒီ ဝီ ပွိုန် အာဆာက် ကာမာယ်။ 26 ဆေ ဒူအီ အူ ဝီ ဟဲ့ ပွိုန် တူတ့် ဒွန် မျုဝ် ခဲ့ ပီ ဆီ ပွိုန် အန် ဒဲင် ကာဒါယ် နီ၊ အာဆာက် အန် ယီ စှိုမ်၊ စုဝ်း ကာလုဝ့် ငါရာယ်၊ ကြုဝ် ပဲ့ ဟဲ့ ပွိုန် အန် တီ၊ အာဝ် ဘဲန် အာဂျိုဝ် မာဆေ ဒီ အန်။ ဒူအီ မိူဝ် တူ ပွိုန် ဒွါ မာဆေ၊ တဲး ဇဝ်ဖြာ ချွတ် အန်၊ ကွဲ့ တဲး အာဆာက် အန် စှိုမ်။ 27 ခုဝ် အန် တီ အုဝ် တဝ်း ဒီ ဘေ၊ ဆေ အုဝ် အီ ဟဲ့ ဘဲန် ဂွန် ဒူအီ ဒီ ဝီ တး ဒဲင် ကာဒါယ် နီ၊ အုဝ် ဒီ ဂူင့် အာဖုင် ဒင်ခုဝ် ပီ ဒွါ ဇဝ်ဖြာ ဒီ အုဝ်။ ဘော ဂေ အာမူ အာမာတ် ဇဝ်ဖြာ ဒီ ဒူပ် အုဝ်။ ပန် အန် တီ၊ အုဝ် ဒီ ဝီ ဒွါ ရုး အန် ဒီ ဒူအီ ဒွန် အီ၊ တဲး န့ ကာဒါန် ပဲ့ ဟဲ့ ဘူင် ဂေ။ 28 အုဝ် တဝ်း အာခ်ု ဒီ ဘေ။ ကာတဲ ဘေ ဒူအီ အီ ထူမ် ဂြုဝ်း အုဝ် အီ ဟဲ့ ဘဲန် ဂွန် ဒူအီ နီ၊ န့ မိုဝ်း မင် အီ၊ ဂေ တူ ယမ် အာတ့် ဇမ် အာခြာဝ် ပန် ဒီ ဝီ တး အိုပ် တူတ့် အုဝ် ဒဲင် ကာဒါယ် နီ။”