ဒူအီ ဂိန် အီ မိုဝ်း နဝ်း ဆိူဝ် နဝ်း မှာန်၊ အန် ဘော မွှိုမ် လွှိုမ် ဒူအီ ရိုဝ် အီ ကာလုဝ်၊ ကာလာင် ဂြုဝ်း ဂုဝ့် ဂဲ့။

2 ဒူအီ အီ မိုဝ်း နဝ်း ဆီ ဘူင် ဘဲန် မျုဝ် ဘဲန် မျုဝ်၊ ဆေ အန် ယီ တူ နပ် မာဆေ၊ န့ တူ မွှိုမ် ဒီ အန်။ အာဆေ ဆီ ဘူင် ဟဲ ဟဲ ခြန် ခြန်၊ အန် နပ် ဒီ ကာလိုပ်။

3 ဒူအီ နပ် ဒီ စှိုမ် ကူပ် ရိုဝ် အန်။ ဟဲ့ ဟွတ့်၊ အန် ယီ ဝီ ရူ ဒီ ဇဝ်ဖြာ ခဲင် နဝ်း အန်။

4 ဒူအီ ခြမ် ဒီ ဘော မိုဝ်း ဂိုက် ကိူန်။ အီ မုး ဒူအီ ဂိန်၊ ဂိုက် ဘြိမ် အန် မိူဝ် ဘော နပ် ဒီ ဘ့လေး ဝဲန် အန်။

5 ဆေ မဲ ဘဲန် ဆက်ဆေ၊ ကာလာင် ဂြုဝ်း တူ မှာန် ဒေါ ဆုင်ဖျာတ် အီ အာမူ၊ မဲ လုဝ် ခမ် မှာပ် မဲ။ အာဆေ ဆီမာ ကာလုဝ်၊ အန် တူ လွတ် အီ ဒမ် မှာပ် ဒီ အန်။

6 န့ မိုဝ်း ဒူအီ ကိူန် အီ ဆီ ပွိုန် ဆာရေ ဒီ အာတ့် ဒါ ကာညာ ဂေ။ ဒူအီ ဒွန် အီ ဘော ဆီ ဘဲန် ဂိုက် ဒူအီ နဝ်း ဒီဟာင်။

7 ဆေ န့ မုး ဒူအီ ဂိန်၊ ဂေ ဘီနွင် အန် မိူဝ် ဝီ ဇွင့် အန်။ ဂိုက် အန် ဘော ဝဲ ဝး အန်။ အန် ပီ ဘော ဝီ ဟြေတ့် ဒီ ဒဲ့ ဂေ မိူဝ်၊ ဂေ တူ တဲး အန် ယိုဝ် ဂေ။

8 ဒူအီ အီ မိုဝ်း အာငျာန်၊ အန် ဘော ရွက့် ဒုဝ် ဘြိမ် အန်။ ဂေ အီ ဆီ နပ် ဘဲန် မျုဝ် ဘဲန် မျုဝ်၊ ဂေ ဒီ ဝဲ မိုဝ်း ကိူန်။

9 ဒွန် အီ အီ ကာလာင် ဂြုဝ်း တူ မှာန် ဒေါ ဆုင်ဖျာတ် အီ ဒါရာ၊ အန် ဒိူန် ဒီ လုဝ် ခမ် မှာပ် အန်။ အာဆေ ယီ ဆီမာ ကာလုဝ်၊ အန် ဒီ စှိုမ်။

10 ဒူအီ ရိုဝ် တူ ကာအာပ် မိုဝ်း ကြုဝ်ကြာမ် ကိူန် ကာဆဝ်။ ဒဲင် တီ၊ မှာယ် မိူဝ် တူ ကာအာပ် အိုပ် ဂွန် ဒါ တာင် ဘော ဂွန် ခုန်ဒီခမ်။

11 ဆေ မဲ နပ် ဒီ ကာဖာ ဘော နပ် ဒီ ဆာဒိက်၊ မဲ ဒီ ပဲ ဒီ အူတ် နဝ်း။ ဆေ မဲ ယီ တူ ဒိူန် ပီ ဘူင် လုတ့် အီ ဟဝ် ဒီ မဲ၊ န့ တဲး မဲ မိုဝ်း ဆာရေ။

12 နဝ်း ရူ ခုန်ဒီခမ်၊ န့ ပီ မာခြင်ဆီ ရျီင်။ ဂေဇူ အန် ယီ ပီ အိုမ် ဒီငါန် အီ စုဝ်း ဒဲင် ပေတ့် ဂေ ပြဲ။

13 ဂွန် အီ ရိုဝ်၊ အန် ဒီ တဲး ဂုန့် အန် စှိုမ်။ အီဘိုန့် အီ ဆီမာ ပိုန့်၊ န့ ဘော ပီ အိုမ် ဂ့လာယ် အီ စွတ် ပွက့် ပွက့်။

14 ကာင် ဘော ကြုဝ်ကြာမ်၊ န့ ဘော မုး ခါဂုန် ပီ ဒွါ ဂုန့် မာ။ အီဘိုန့် အီ မိုဝ်း အာငျာန်၊ အီဘိုန့် အီ မွှိုမ်၊ န့ ဘော မုး ပီ ဒွါ ဇဝ်ဖြာ။

15 ဒူအီ ကြာန် ဘဲန် ဆီ အိတ် ဆေဆေ။ ဒူအီ အီ တူ ဘူင် ဂါန်၊ အန် ဒီ ကာပြာန့်၊ ဒီ အေတ့် ဘူမ်။

16 ဆေ မဲ ဒူပ် ဒါရာ၊ မဲ ဒီ ဘ်ု အာဆာက် မဲ။ ဆေ မဲ တူ ဆာဒိက် ပီ ဘူင် မဲ၊ မဲ ဒီ ယမ်။

17 အာဆေ ကာဝေ ဒူအီ ဂိန်၊ န့ ပီ အန် ဟဲ့ ဒွါ ဇဝ်ဖြာ ကာရဝ်း။ ဇဝ်ဖြာ ဒီ ဝီ ဒွါ ဝျီ့ အာဂျိုဝ် ပဲ့ ဟဲ့ ဘူင် အန်။

18 မဲ လုဝ် မာနုဝ် ဂွန် မဲ၊ တာ မ့ဖျီ့ ဒေါ ဆီ ပွိုန် ဂေ ဟေန်။ ဆေ ဂေ ဘော လိုဝ်၊ ကွဲ့ တဲး န့ ဘဲန် မှာပ် မဲ။

19 ဆေ ဒူအီ ဟဲ့ ရူ ကာဆဝ်၊ အန် ဒီ လုဝ် ဝီ ခမ် မှာပ် အန်။ ဆေ မဲ ဒီ စွယ် တဲး အန် လွတ်၊ မဲ ဒီ လုဝ် စွယ် ဒွန် ဇေန့်။

20 ဆေ မဲ ထူမ် အာကျာမ် အာငျာန် ဘော ဘူင် ဒူပ်၊ အူ ဆီငဲ မဲ ဒီ ဝီ ဘဲန် ဒူအီ အီ မိုဝ်း အာငျာန်။

21 ဒူအီ ဟဲ့ ပွိုန် ခြာမ် ဒီ ဘူင် ဘဲန် မျုဝ် ဘဲန် မျုဝ်။ မာလဲ၊ န့ မုး ပီ အိုင် ဇဝ်ဖြာ အီ ဒီ ဘဲန်။

22 ပီ ဆီ ပွိုန် ဒူအီ၊ န့ မုး နဝ်း ရွက့်။ ဒူအီ ဂိန် ဟဲ့ မွှိုမ် လွှိုမ် ဒူအီ အီ ဆီမာ ကာလုဝ်။

23 ဆေ မဲ ရုဝ်ဆေ ဇဝ်ဖြာ၊ န့ ဒီ တဲး အာဆာက် မဲ တူင့်။ န့ ဒီ တဲး မဲ ပွိုန် ခဲ့ ပီ လုဝ် မဲ၊ တူ တဲး န့ မိုဝ်း အာဖေ အာရေ ဒီ မဲ။

24 ဒူအီ အီ ကြာန် ကာဆဝ်၊ အန် ကြာန် ဘော ဒီ ဘာဝ် ဘူမ် ဘ့လိုပ် ခဲင် မူတ့် အန်။

25 ဒူအီ ပီခိုက် လုဝ် ခမ် အီ မး အန်၊ တဲး ဒူအီ ရိုဝ် ဝီ နပ် ဒီ ဆာဒိက်။ ဒူအီ အီ မိုဝ်း အာငျာန်၊ အန် နပ် ဒီ ဟေန် ဒေါ မာနုဝ် အီ ဒီ အန်။

26 ဒူအီ အီ ဘူင် နာ စာဝ် ဒီ ဂုန့် အန်၊ ဝီ ဟုဝ် တဲး ဘော မာ အန် လေး ရေတ့် ကာင်၊ အန် မုး ဂွန် အီ ဘူင် တဲး န့ မွှိုမ် ဆာယ်။

27 အိုယ် ဂွန် အုဝ်၊ ဆေ မဲ စူ ဟေန်၊ န့ ပီ မဲ ဝး ဂြုဝ်း အီ တဲး မဲ မိုဝ်း အာငျာန်။

28 ဆက်ဆေ အီ ကာလာင် ဂြုဝ်း တူ မှာန်၊ အန် ဘော ဝး ဒါရာ ဘော ကာညး အီ မုး အီ မှာန်။ အန် အိုင် နာ တူ မွှိုမ် ပီ အီ ဘ့လိုပ် ပီ ဒီ ဟူမ် ခဲင် မူတ့် အန်၊ ကော ဟူ ဒန် ဆီဂ့လာန့်။

29 ဂေ ဒူအီ ပီခိုက်၊ ဂေ လုဝ် ခမ် ကာဆဝ် မှာပ် ဂေ။ ဘော ဂေ ဒူအီ ရိုဝ် လုဝ် ခမ် မ့ဖျီ့။