ဒူအီ အီ ဆီ ဘူင် ပီ အိုင် အန်၊ အန် တူ ဆီ ကွယ် ရိုမ် ဒူပ် အီ ဟဝ်။ အန် တူ ဖြူမ် ဂေ အီ မိုဝ်း နဝ်း ဆိူဝ်။

2 ဒူအီ ရိုဝ်၊ အန် တူ အိုင် အာငျာန် ဘွတ်။ အန် ဆီ ဘျ မီ ပီ ပါယ် ခဲင် နဝ်း အန်။

3 ဆေ ဂေ ဒူအီ စုး ဒီ ဘူင် နာ တူ မွှိုမ်၊ အီ ဟဝ် ဘော စုး ဒီ လုက်တာယ် ဂေ။ ဆေ ဂေ စုး ဒီ ဘူင် အီ မွှိုမ် ဆာယ်၊ ဂေ ဒီ ဘော စှိုမ် ဆာရေ။

4 ဂြုဝ်း အီ လေး ခဲင် မူတ့် ဒူအီ၊ န့ ဘော ပီ အိုမ် အီ ဟဲ့ လိုက်။ ဂြုဝ်း အီ မိုဝ်း အာငျာန် ပီ အိုမ် ဘ့လဲင် အီ ဇဲဝ်။

5 ဆေ အီ ကာဝေ ဒူအီ ဟာယ်၊ န့ ဒီ ဘဲန် အီ တူ မွှိုမ်။ ဆေ ဒူအီ တူ ဆုင်ဖျာတ် နာ မှာန် ဒီ ဒူအီ တူ မိုဝ်း မှာပ်၊ ဘော ဇိုဝ် တီ အာဝ် မွှိုမ်။

6 ဆေ ဂြုဝ်း ပီ ကာလာင် ဒူအီ ရိုဝ် ဝီ ထဲန့် အီ၊ န့ တဲး အီ လာယ် ကာလုတ့်။ ဂြုဝ်း ပီ ကာလာင် အန်၊ န့ ပီ အန် မှာန့် မ့ဖျီ့၊ တဲး အီ မး အန်။

7 ဆေ ဒူအီ ရိုဝ် ကာလာင် ဂြုဝ်း၊ န့ ဒီ ဝီ တဲး အန် လိုဝ် စှိုမ်။ ဂြုဝ်း အီ လေး ခဲင် မူတ့် အန်၊ န့ ပီ ယွတ့် အီ ဟဲ့ ဟွတ့် ဒိန့် အုန်၊ ဟဲ့ ဘ်ု ဒီ ခြွတ် အန်။

8 ဆေ ဒူအီ အွန် ဒီ ခဲ အာဂျာင် အီ၊ န့ ဘော ပီ ပီ ဒီ ဟူမ် အီ ဆီငဲး ဒီ အန်။ န့ ပီ န့ ဒီ လိုပ် လူင် ခဲင် ဝတ့် အန်၊ တဲး န့ ဒါခိုယ်။

9 ဂေ ဒူအီ ကြာန် အီ ကွယ် ပီယေန့် ဘော ဂေ ဒူအီ အီ တဲး ကြုဝ်ကြာမ် ဂေ စှိုမ်၊ ဂေ ဘဲန် အူ ဘီနွင် ဝေါဝဲ။

10 ဇဝ်ဖြာ ပီ ဒူင် ပွိုန် ချြီင် အီ မန် ဆီချာ။ ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ လိုပ် ကွယ် နာ ခဲင် ဘော လွတ် ခမ် ဒုက်။

11 ဂေ ဒူအီ ခြမ်၊ ဂေ ဘော ထာင် ကြုဝ်ကြာမ် ဂေ ဒီ ပွိုန် ဂွင့် ရဲ ဂေ၊ တဲး န့ ပီ ရဲင် မိူင် အီ ဟဲ့ စာ၊ ဟဲ့ မန် ဆီချာ၊ အီ တူ ပွိုန် ဒဲန် ဟုဝ့် လိုပ် နာ ခဲင်။

12 ဆေ ဒူအီ ပီခိုက် ဂေ၊ ဂေ နပ် ဒီ လိုဝ်၊ နပ် ဒီ စှိုမ်။ အာဆေ ဆီ တဲး အီ ရုဝ်ဆေ အန်၊ အန် လုဝ် မိုဝ်း နဝ်း ဂူမ် နဝ်း တျီမ် ဒီ အာတ့်။

13 အာတ့် ကာလာင် မဲ ဂြုဝ်း၊ မဲ လုဝ် ထူမ် ဆီချာ။ ဆေ မဲ တူ ဘူင် ပါယ် တီ၊ မဲ တူ မိုဝ်း အာငျာန်၊ မဲ ဒီ ဝီ ဆာယ် အီ။

14 နဝ်း ဖွိုမ် အေ ဒူအီ တဲး အေ ပွိုန် ဒီ ခမ် ဆဝ်။ အီ မုး နဝ်း လိုဝ်၊ နဝ်း ကာပျာတ့်၊ ယီ တူ မိုဝ်း အာဆေ ပွိုန် ခမ်။

15 ဂေ အီ မိုဝ်း အာငျာန် ဘွတ်၊ ဂေ ဘော မိုဝ်း နဝ်း ဆီ ဟေန် ပေါ မ့ပွါ။ ဂေ ဒီ ဘော ထူမ် ဆီချာ၊ တဲး ဂေ နပ်။

16 ဆေ မဲ မိုဝ်း ဒီ ဂူင့် လက်ဆွင်၊ န့ ဒီ တဲး မဲ ပွိုန် ဒီ လိုပ် ဘဲန် ပ့လုဝ့် ဘဲန် ပ့လုဝ့်။ န့ ဘော တဲး မဲ ပွိုန် ဒီ ဟာဝ် ဒူင် ကွယ် ဒူအီ တာင်။

17 ဒူအီ အီ ယိတ့် ကာလာင် ဂြုဝ်း ပီ ပါယ် လွင် အာမူ အန်၊ န့ တဲး အီ ထာင် ဟဲ့ မုး ဟဲ့ မှာန်။ ဆေ အီ ကာဘး ဒီ အန် ယီ ဝီ ဒီမွှတ် ဘဲန် မျုဝ် ဘဲန် မျုဝ်၊ န့ ဒီ လိုဝ်း ပေါ အူ မျုဝ်။

18 ဆေ ဒူအီ လာယ် ကာထဲန့် လာယ် ကာဘး ကာဆဝ် ဒေါ ဆုင်ဖျာတ် အီ အာမူ၊ တဲး ဂေ ကာတာမ်။ န့ ဒီ တဲး ဂေ ဝီ ယေန် ဒါခိုယ်။ န့ ဘော စွယ် အီ လာယ် ရူ ကာဆဝ်၊ ကွဲ့ တဲး ဂေ လာယ် ကာဂုဝ်း လာယ် ကာမး။

19 ဆေ ဘီနွင် မဲ ဟဲ့ အုန် နဝ်း၊ န့ ပီ မိူင် အီ မိုဝ်း ရဲင်။ အန် တူ တဲး မဲ တး ကာတတ် အန်။ ဆေ ဒူအီ ကာအေး ကာထဲန့်၊ ဂေ ပီ ဒါ ဆိုက် အီ ဟဲ့ ဟွတ့် ကာဘိတ် မာလုဝ်း ဒူင် ချြီင် ဂေ။^a

20 ဂြုဝ်း ပီ ကာလာင် ဒူအီ တဲး နဝ်း အန် ကြွိုမ်၊ န့ ပီ ပီ ဒီ ဟူမ် တဲး အန် ဖဲ။ ဂြုဝ်း အီ မှာန် အီ မုး တဲး န့ ဘဲန် နဝ်း ဒါခိုယ် ဒီ အီ။

21 န့ ဘော မုး ခဲ့ ပီ ကာလာင် မဲ တီ၊ အီ တဲး မဲ ကွယ် ဒါခိုယ် ဘော တဲး မဲ လိုဝ်၊ မဲ စှိုမ်။ ခုဝ်၊ ဆေ မဲ အိုင် ဒီ ကာလာင် ဂြုဝ်း ကိူန်၊ မဲ လုဝ် ခမ် အာဂျိုဝ် အန်။

22 အာဆေ ဟဲ့ မိုဝ်း အီဘိုန့်၊ န့ ဘော ပီ အန် ဟဲ့ ပွိုန် နာ ဘွတ် နာ မွှိုမ်။ ဇဝ်ဖြာ ဟဲ့ ဂေဇူ အန်။

23 ဒူအီ ဂိန်၊ ဂေ ဘော နပ် ဒီ ဒွင်ဘာန်။ ဒူအီ ခြမ်၊ ဂေ ယီ နပ် ဒီ ဝျီ့ ဂြုဝ်း ကာဇဲန်။

24 ဂိုက် မင် အီ နပ် ဒီ ညိုင်ရာင် ဒီ ဘဲန် ဂိုက် တဲး မဲ စှိုမ်။ ဂိုက် မင် အီ ယီ ကာဒိုက် ကာဒဝ့် ဒီ မဲ လွှိုမ် ဝေါဝဲ အာရာင် မဲ။